SARNAQÄWI
Jachʼa Yatichirisat waljanak yateqawayapjjta
ESPOSAJAMP chik precursorjama misionerjam servisajja, kunayman jan walinakanwa uñjasiwayapjjta. Thak bloqueañatak ninajj wal phichhaskäna, thayampi jallump wal utjkäna, chʼajjwañanakajj utjkäna uka cheqanakana, armantat soldadonakani puestonakana ukat yaqha ukhamanakanwa uñjasiwayapjjta, utajats walja kutiw escapapjjarakiyäta. Ukampis ¡kunanaktï lurawayapkta ukanakat janiw arrepentisipkti! Jehová Diosaw jan walinakan yanaptʼapjjetäna, wal bendisipjjarakitäna. Jachʼa Yatichirjamajja, wali sumwa yatichawayapjjarakitu (Job 36:22; Is. 30:20).
PAPIT MAMITAJAJJ YATEQASKAÑÄPJJÄNWA
1957 mara jakʼanakanjja, awk taykajajj Italia markat Saskatchewan (Canadá) cheqankir Kindersley markaruw sarjjapjjäna. Mä jukʼa tiempotjja, Bibliat yateqañwa qalltapjjäna, qhepatjja Diosar serviñajj nanakatak wali importantëjjänwa. Jiskʼäkayäta ukhajja, familiajamp chikaw walja horanak predicapjjerïta, ukatwa awisajj sawkasisajj “8 maranïkayäta ukhatpachaw precursor auxiliaräjjta” sasin sista.
Familiajampi, niya 1966 marana.
Awk taykajajj janiw walja qollqenïpkänti, ukampis Jehová Dios laykojj walja sacrificionakwa lurawayapjje. Sañäni, 1963 maranjja kunanakapatï utjkäna ukanakat waljanakwa aljapjjäna, ukhamat Pasadena (California) markan apaskäna uka asamblea internacionalar sarañataki. 1972 maranjja, 1.000 kilometronak jayaruw sarjjapjjayäta, Columbia Británica (Canadá) markankir Trail sat jiskʼa markaru, ukhamat italiano aru parlirinakar predicañataki. Papitujajj qʼomachasa ukat mantenimiento lurasaw mä jachʼa tiendan trabajïna, Jehová Diosar serviñatakejj walja suma trabajonakwa rechazarakïna.
Awk taykajan nanakar suma ejemplo churatapat wal yuspärta. Ukaw nayarojj Jehová Diosar taqe chuyma serviñatakejj yanaptʼawayitu. Jupanakajj ak yatichapjjetäna: nayatï Diosan Reinop nayraqat thaqäjja, Jehová Diosaw cuidaskitani (Mat. 6:33).
DIOSAR SAPÜRUNJAM SERVIÑ QALLTAYÄTA
1980 maranjja, Diosar serviñatak chʼamachasir Debbie kullakampiw casarasta. Nanakajj Diosar sapürunjam serviñwa munapjjayäta, ukatwa casarasipkta ukhat kimsa phajjsinak qhepat esposajajj precursorjam serviñ qalltäna. Mä mara casaratäjjapjjayäta ukhajja, kawkjantï yanapajj munaskäna uka congregacionaruw sarjjapjjayäta, ukanwa precursorjam serviñ qalltarakiyäta.
Casarasipkta uka uru, 1980 marana.
Tiempompejja desanimasjjapjjayätwa, kuttʼjjañak munjjapjjarakiyäta. Ukampis nayraqatajj circuito jilatampiw parlapjjayäta. Jupajj akham sapjjetänwa: “Jumanakaw cambiapjjañama, kuna jan walintï uñjasipkta ukakwa sint piensasipktajja. Jumanakatï kunatï walïki ukar chuym uchapjjäta ukhajj jikjjatapjjätawa” sasa. Ukpunwa necesitapjjayäta (Sl. 141:5). Uka ewjjtʼarjam lurasajj walja sumanakwa jikjjatapjjayäta. Congregacionankir jilat kullakanakat jilapartejja, jukʼampinakwa Jehová Dios laykojj lurañ munapjjäna, uka taypinjja pusi maranit tunka marankam jilat kullakitanakampi sapak Diosar serviri kullakanakampiw utjäna. Kuntï uñjapkayäta ukajj wali yateqaskañänwa. Kunatï walïki ukar chuym uchaña ukat jan walinak askichañapatak Jehová Diosar suytʼañwa yateqapjjayäta (Miq. 7:7). Mayampiw kusisitäjjapjjayäta, kuna jan walintï uñjasipkayäta ukas askichasjjarakïnwa.
Precursoranakatak escuelar nayrïr kuti sarapkayäta ukhajja, pusi yatichirinipjjayätwa, jupanakat kimsanejj kunjamsa yaqha markanakar sarasajj Diosar servipjjäna, kuna jan walinakansa uñjasipjjäna kuna bendicionanaksa katoqapjjäna ukanakwa cuenttʼapjjetäna, fotonaks uñachtʼayapjjarakitänwa. Taqe ukanak istʼasajj misionerot serviñwa amtapjjayäta.
Columbia Británica markanwa Salonankasipkta, 1983 marana.
Uka amta phoqañatakejja, 1984 maran francés aru parlir Quebec markaruw sarjjapjjayäta, uka markajj Columbia Británica markat 4.000 jila kilometronak jayankänwa. Ukanjja yaqha aru yateqapjjañajäna, uka markar yatinoqtapjjañajarakïnwa, awisajj janirakiw qollqejj utjapkitänti. Mä tiempojja, yapuchir mä jaqew chʼoqe jiltʼanak apasipjjañajatak permiso churapjjetäna, ukatwa manqʼañatakejj chʼoqek utjapjjetäna. Ukampejj wali suma manqʼanakwa esposajajj phaytʼäna. Ukham jan walinakan uñjaskasas kusisitaw aguantasipkakiyäta. Cheqas Jehová Diosaw sum cuidasipkitäna (Sal. 64:10).
Mä urojj mayniw jawsanipjjetäna, Canadá markanakankir Betelan serviñatakiw invitapjjetäna. Galaad escuelaruw sarañ munapjjayäta, ukhamäkchïnsa iyaw sasaw Betelar sarapjjayäta. Ukar purisajja, Comité de Sucursalankir Kenneth Little jilataruw akham jisktʼapjjayäta: “¿Janit Galaad escuelar invitapkpachïtani?” sasa. Jupajj akham sapjjetänwa: “Invitapjjätam ukhaw kuns lurañäni” sasa.
Mä semana qhepatwa Galaad escuelar sarañatak invitación katoqapjjayäta, ukhamajj mä amtaruw puripjjañajäna. Kenneth jilatajj akham sapjjetänwa: “Taqpach asignacionaw sumajja, ukhamajj kun lurañjjay amtapjjchïta, Jehová Diosajj paypach asignacionwa bendisispa, ukampis awisajj maynïr asignación ajllisäna sasin amtasiñajj utjakipuniniwa” sasa. Galaad escuelar sarañwa amtapjjayäta. Kuntï Kenneth jilatajj sapkitäna ukajj phoqasipunïnwa, razonaniw parlapjjetäna. Kawkïr asignacionsa katoqasipjjani uk amtapjjañapäki uka jilat kullakanakarojja, uka pachpa arunakwa sapjjarakirïta.
MISIONEROT SERVISA
(Chʼeqa toqena) Ulysses Glass.
(Kupi toqena) Jack Redford.
Clase 83 Galaad escuelajj abril de 1987 maranwa Brooklyn (Nueva York) markan apasïna, taqpachanejj 22 ukhanïpjjayätwa. Ulysses Glass jilatampi Jack Redford jilatampiw yatichapjjetäna. Phesqa phajjsinakajj ratukiw pasäna, 6 de septiembre de 1987 maranwa graduacipjjta. Haití markaruw John ukat Marie Goode jilat kullakamp chik asignapjjetäna.
Haití markana, 1988 marana.
1962 marat aksarojja, janiw misioneronakajj uka markar asignatäpkänti, kuna laykutejj uka markat alisnukutaw uñjasipjjäna. Graduacipkta ukhat kimsa semanakiw pasaskäna, ukhaw qollunak toqenkir mä congregacionar puripjjta, ukan 35 jilat kullakanakaw utjäna. Wayn tawaqöpjjataj laykojja, yateqañajj waliw utjäna, misioneronakatak mä utanwa jakapjjarakiyäta. Haití markankir jaqenakajj wali pobrëpjjänwa, jilapartejj janiw liytʼasiñ yatipkänti. Ukan jakapkayäta ukhajja, política toqen jan waltʼäwinakaw utjäna, gobiernoruw puestopat apaqañ munapjjäna, kunayman chʼajjwañanakaw utjäna, jachʼa thayanakas utjarakïnwa.
Haití markankir jilat kullakanakajj jan walinakan uñjasisas wali kusisitäpjjänwa, ukajj wali yateqaskañänwa. Jupanakat waljanejj janis sum jakasipkchïnjja, Jehová Diosarojj wal munasipjjäna, predicañas jupanakar wal gustarakïna. Mä jilïr kullakajja, janiw liytʼasirïkänti, ukhamäkchïnsa mä 150 textonakwa yatïna. Kunayman jan walinak uñjasajja, Diosan Reinopakiw taqe uka jan walinak chhaqtayaspa sasajj jukʼampiw jaqenakar parlapjjayäta. Tiempompejja, mä qhawqha estudionakajajj precursor regularanaka, precursor especialanaka ukat ancianonakäjjapjjänwa, ukajj wal kusisiyapjjetäna.
Haití markan Trevor sat mä waynaruw uñttʼayäta, jupajj mormón religionan mä misionerönwa, walja kutiw jupamp Bibliat parltʼayäta. Walja maranak qhepatjja, jupat mä carta katoqayäta, ukan akham sänwa: “¡Jutïr asamblean bautisasjjäwa! Haití markaruw kuttʼañ munta, mormonäkasin misionerökayäta uka markanwa precursor especialat serviñ munarakta” sasa. Qhepat ukapuniw pasäna, walja maranakaw esposapamp ukan quedasïna.
EUROPA UKAT ÁFRICA
Eslovenia markanwa trabajiskta, 1994 marana.
Europa cheqan serviñatakiw khitapjjetäna, ukan jilat kullakanakasajj jukʼat jukʼat janiw jarkʼatäjjapjjänti. 1992 maranjja Liubliana (Eslovenia) markaruw puripta, janïr Italia markar sarjjasajj uka jakʼanwa papit mamitajajj jilsuwayapjjäna. Yugoslavia satäkäna uka cheqanjja, guerrajj utjaskakïnwa. Ukanjja, Viena (Austria), Belgrado (Serbia) sucursalanakaw predicación sarayasipkäna ukat Zagreb (Croacia) oficinanakas ukhamaraki. Ukampis jichhajj sapa markanwa Betelajj utj-jjäna.
Ukhamajj yaqha aru yateqapjjañajäna, uka lugarans yatinoqtapjjañajarakïnwa. Eslovenia markan jakasirinakajj akham sapjjetänwa: “Jezik je težek”, ukajj “aru yateqañajj chʼamawa” sañwa muni. ¡Cheqas chʼamapunïskänwa! Jehová Diosan markapan kuna cambionakatï utjkäna uk suma chuymamp katoqtʼapjjatapasa, Jehová Diosat jan jitheqtapjjatapas kusiskañänwa. Ukham lurapjjatapat kunjamsa Jehová Diosajj jupanakar bendisïna uk uñjapjjayätwa. Kunjamsa Jehová Diosajj jan walinak tiempopar askichi uks uñjapjjarakiyätwa. Eslovenia markan jukʼampinakwa yateqapjjayäta.
Ukjjarojj machaq asignacionanakwa katoqapjjayäta. 2000 maranjja, África Occidental uksa toqenkir Costa de Marfil markaruw khitapjjetäna. Noviembre de 2002 phajjsin mä guerra qalltatapatjja, Sierra Leona markaruw apapjjetäna. Uka markanjja, 11 maranak chʼajjwañanak utjatapat ukhakiw tukusiskäna. Costa de Marfíl markat akatjamat sarjjañajj janiw faciläkänti. Ukampis kunanaktï yateqapkayäta ukaw kusisitäskakiñatak yanaptʼapjjetäna.
Predicapkayäta uka jaqenakajj kunjamsa istʼapjjetäna, jilat kullakanakajj walja maranak guerran aguantasas kunja munasirïpjjänsa ukwa lupʼipjjayäta. Jupanakajj pobrëpkchïnsa, jukʼa utjirinakapampejj mayninakaruw yanaptʼañ munapjjäna. Mä kullakajj esposajarojj mä qhawqha isinakwa regalañ munäna. Esposajajj qalltan suma arunakampis jan katoqasiñ munkchïnjja, kullakajj akham sänwa: “Guerrajj utjkäna ukhajja, walja markanakankir jilat kullakanakaw yanaptʼapjjetäna. Jichhajj nanakarurakiw yanaptʼañajj waktʼapjjetu” sasa. Uka jilat kullakanakat yateqasiñwa amtapjjayäta.
Tiempompejj Costa de Marfil markaruw kuttʼapjjayäta, ukampis política toqet problemanak utjatapatjja, wasitatwa chʼajjwañanakajj qalltäna. Ukatwa noviembre de 2004 phajjsin mä helicópterot uka markat apsjjapjjetäna, sapa maynin qʼepipajj 10 kilokiw pesañapäna. Uka arumajj Francia markankir ejercitopan cuartelapanwa oraq pampan ikipjjayäta, qhepürojj avionatwa Suiza markar apapjjetäna. Niya chika arumaw Sucursalar puripjjayäta. Comité de Sucursalankir jilatanakampi ukat Escuela de Entrenamiento Ministerialankir instructoranakampi, esposanakapampir uñjañajj chuymarupuniw purtʼapjjetäna. Jupanakajj qhomantasaw katoqtʼapjjetäna, juntʼu manqʼampi Suiza markankir walja chocolatenakampiw churapjjarakitäna.
2005 maran Costa de Marfil markanwa yaqha markanakat escapanipki ukanakatak discurso arstʼaski.
Ghana markaruw asignapjjetäna, ukat Costa de Marfil markan chʼajjwañanakajj jan utj-jjäna ukhajj wasitatwa ukar khitjjapjjetäna. Uka tiempon llakinakan uñjasisasa, mä markat yaqha markar sarkasasa, jukʼa tiempon walja asignacionanak katoqasasa, jilat kullakanakan munasiñapaw yanaptʼapjjetäna. Jehová Diosan markapan munasiñajj utjañapapunïkchisa, janipuniw esposajampejj uk armañ munapkayätti. Ukham chʼama tiemponakan jakañajja, jukʼamp suma cristianöñatakiw yanaptʼapjjetäna.
YAQHA ASIGNACIÓN KATOQAPJJAYÄTA
Oriente Medio toqena, 2007 marana.
2006 maranjja, mä cartwa central mundialat katoqapjjayäta, Asia occidental (Oriente Medio) cheqar sarañatakiw asignapjjetäna. Wasitatwa mä machaq lugar uñtʼapjjañajäna, jan waltʼäwinakarus saykatapjjañajäna, mä machaq aru yateqapjjañajarakïna. Waljanakwa uka markan yateqapjjañajäna. Uka lugaranjja, marka apnaqerinakasa religionas wali yäqatänwa. Jilat kullakanakajj Jehová Diosan markapankir instruccionanak katoqasajj mayachtʼatäpjjänwa, walja aru parlir congregacionanakaw utjarakïna, uk uñjañajj kusiskañänwa. Jilat kullakanakajj vecinonakapampi, trabajopankir masinakapampi, escuelankir compañeronakapampi, familiaranakapamp jarkʼat uñjasisajja jan ajjsarasaw jan waltʼäwinak aguantapjjäna, uk uñjañajj musparkañänwa.
2012 maranjja, Tel Aviv (Israel) markan apaskäna uka asamblea especialaruw sarapjjayäta. 33 maran apaskäna uka Pentecostés urutjja, janiw uka cheqan ukham walja jilat kullakanakajj tantachasipkänti, ukajj jan armkañapunïnwa.
Uka maranakanjja, predicañajj jarkʼatäki uka markar visitapjjañajatakiw mayipjjetäna. Uka markar sarasajj mä qhawqha qellqatanakwa apapjjayäta, predikiris sarapjjayätwa, mä qhawqha jiskʼa asambleanakarus sarapjjarakiyätwa. Taqe cheqanwa armantat soldadonakasa controlañatak lugaranakas utjiri. Ukampis uka markankir jilat kullakanakajj jukʼanikïpkchïnsa, jupanakat mä qhawqhanejj compañapjjetänwa, wali amuyump sarnaqañatakis yanaptʼapjjarakitänwa, ukaw jan llakisiñatak yanaptʼapjjetäna.
AFRICARUW KUTTʼAPJJTA
República Democrática del Congo markanwa mä discurso wakichtʼasiskta, 2014 marana.
2013 maranjja yaqha asignacionwa katoqapjjarakiyäta, Kinsasa (República Democrática del Congo) sucursalaruw invitapjjetäna. Uka markajj wali jachʼawa, suma lugaranakanirakiwa. Ukhamäkchisa nayra tiempotpachaw walja chʼajjwañanakana, wali pobren jakasipjje. Qalltan akham sapjjayätwa: “Niyakejjay África markan jakjjchiyätanjja, kunjam jakasiñs yatjjtanwa” sasa. Viajipjjerïta ukhajj thakinakasa puentenakas janiw utjirïkiti, ukhamanakan uñjasisajj kunsa lurapjjañajäna ukwa yateqapjjañajäna. Ukanakat llakisiñat sipansa, jilat kullakanakan pobren jakasisas kusisitäpjjatapa, jan waltʼäwinakan aguantapjjatapata, taqe chuym predicapjjatapata, tantachäwinakaru ukat asambleanakar sarañatak chʼamachasipjjatapatwa piensapjjayäta. Jehová Diosajj kunjamsa predicacionar bendisïna, kunjamsa yanaptʼapjjetäna ukwa uñjapjjayäta. Congo-Kinsasa markan jakasajj waljanakwa yateqapjjayäta, walja amigonakanïpjjarakiyätwa, jupanakajj familiajäpkaspas ukhamänwa.
Sudafriacanwa predicasipkta, 2023 marana.
2017 mara tukuyanakarojja, Sudafricankir Betelaruw asignapjjetäna. Janiw nayrajj ukham jachʼa sucursalankapkayätti, ukan machaq asignacionanakwa katoqapjjayäta. Yateqañajj waljaw faltasipkitäna, kunanaktï yateqapkayäta ukanakajj wal yanaptʼawayapjjetu. Jilat kullakanakat waljaniw walja maranak Jehová Diosar jan jitheqtas serviwayapjje, jupanakar wal munasipjjta. Betelankir jilat kullakanakajj kunayman lugaratäpkchisa, kunayman jakäwinïpjjarakchisa, juntuk jakasipjjatapajj musparkañawa. Niyakejjay Jehová Diosan servirinakapajj jukʼamp suma cristianöñatakisa, Biblian yatichäwinakaparjam sarnaqañatakis chʼamachasipjjchejja, Jehová Diosajj sumankañ churasaw jupanakar bendisi.
Aka maranakanjja, esposajampejj walja asignacionanakwa katoqawayapjjta, kunayman markan jakasiñwa yateqawayapjjta, yaqha arunak parlañs yateqawayapjjaraktwa. Awisajj jan walinakansa uñjasiwayapkstjja, Jehová Diosajj munasiñat janipuniw jaytjawayapkituti, ukwa markap toqesa jilat kullakanak toqes uñjawayapjjta (Sal. 144:2). Jehová Diosar kunayman asignacionanakan serviñajja, jukʼamp suma cristianöñatakiw yanaptʼawayapjjetu.
Esposajan yanaptʼapatsa, oraqpachankir jilat kullakanakan ejemplopatsa, papit mamitajan nayar sum uywapjjatapatsa wal yuspärta. Kuntï jutïrin katoqkañäni uk yatisajja, Jachʼa Yatichiri Diosat yateqaskakiñatakiw esposajamp chʼamachasiñ munapjjta.