¿Kunatsa mayninakar ewjjtʼa mayiñasa?

1. ¿Kunas suma amtanakar puriñatakejj yanaptʼistaspa? (Proverbios 13:10; 15:22).

TAQENIW suma amtanakar puriñ muntanjja, uka amtanakasajj sumar sarañapwa munaraktanjja. Ukatakejja, mayninakar ewjjtʼa mayiñatakiw Bibliajj chʼamañchtʼistu (Proverbios 13:10; 15:22 liytʼäta).

2. ¿Kunsa Jehová Diosajj arsuwayi?

² Jehová Dios Awkisat sipansa, janiw khitis sum ewjjtʼkistaspati, ukatwa juparojj oracionan yatiña maytanjja. Jupajj akham sistuwa: “Nayaw amuytʼayäma, nayranakajasti jumaruw uñchʼukïtam” sasa (Sal. 32:8). Uka arunakajja, Jehová Diosajj jiwasat llakisitapwa uñachtʼayi, ukatwa necesitktan uka ewjjtʼanak churistu, ukarjam lurañatakis yanaptʼistu.

3. ¿Kuna jisktʼanakarus aka yatichäwin qhanañchaskañäni?

³ Aka yatichäwinjja, Bibliampiw aka pusi jisktʼanakar qhanañchtʼaskañäni: 1) ewjjtʼanak katoqasiñatakejj ¿kunjam chuyman jaqëñajasa?, 2) ¿khitis mä suma ewjjtʼa churitaspa?, 3) ¿kunjamsa mä ewjjtʼa munataj uñachtʼayirista?, 4) ¿kunatsa naya lanti mä amtar puriñatakejj maynir jan mayiñajäki?

¿KUNJAM CHUYMAN JAQËÑASASA?

4. Mä ewjjtʼa katoqasiñatakejj ¿kunjam chuymanïñas wakisi?

⁴ Jiwasat sipans jukʼamp experiencianïpki, mä kuns jukʼamp yatipkaraki ukanakarutï ewjjtʼa mayiñäni ukhajja, jukʼamp suma amtanakaruw puriñäni. Cheqas mä ewjjtʼa katoqasiñatakejja, humilde chuymanïñaw wakisi. Janitï ukham chuymanïksnajja, Jehová Diosajj janiw yanaptʼkistaspati, Biblian liytʼktan uka ewjjtʼanakajj inamayakïkaspas ukhamwa amuyjjaraksna (Miq. 6:8; 1 Ped. 5:5). Ukampis humilde chuymanïñäni ukhajja, Biblian jikjjataski uka ewjjtʼanak taqe chuymaw katoqasiñäni.

5. ¿Kuna razonanakatsa Davidajj jachʼa jachʼa tukuspäna?

⁵ David reyit kunsa yateqsna uk jichhajj uñjañäni. Jupajj walja sumanaksa lurkchïnjja, janiw jachʼa jachʼa tukkänti. Janïr reyïkäna ukhajja, wali uñtʼat musicöjjänwa, Saúl reyitakis tuktʼarakïnwa (1 Sam. 16:18, 19). Jehová Diosajj reyïñapatak Davidar ajllkäna ukhajja, espíritu santo churasaw jupar wali chʼamanir tukuyäna (1 Sam. 16:11-13). Walja enemigonakapar jiwarayatapatsa, Goliat sat jachʼa filisteo jaqer jiwayatapats jaqenakajj wal Davidar jachʼañchapjjarakïna (1 Sam. 17:37, 50; 18:7). Jupatï jachʼa jachʼa tukur jaqëspäna ukhajja, akham sasaw amuyaspäna: “Taqe kun nayajj yatta, janiw ewjjtʼatäñajajj wakiskiti” sasa. Ukampis Davidajj humilde chuymanïnwa.

6. ¿Kunjamatsa Davidan ewjjtʼanak katoqasirïtap yattanjja? (Dibujo uñjjattʼarakïta).

⁶ Davidajj reyëjjäna ukhajja, suma ewjjtʼanak churir amigonakwa ajllisïna (1 Crón. 27:32-34). Jupajj ewjjtʼanak katoqasirïnwa, mä chachasa jan ukajj mä warmis jupar ewjjtʼirïchïnjja, istʼasirïnwa. Mä kutejja, Abigaíl warmiw jupar ewjjtʼäna, jupajj jachʼa jachʼa tukuri, jupatakik kuns muniri, jan yuspärasir Nabal chachan esposapänwa. Davidajj humilde chuymampiw jupar istʼäna, jupar istʼatapatjja mä jachʼa jucha lurañatwa salvasïna (1 Sam. 25:2, 3, 21-25, 32-34).

7. ¿Kunanaksa Davidat yateqassna? (Eclesiastés 4:13; fotonak uñjjattʼarakïta).

⁷ ¿Kunsa Davidat yateqassna? Mä toqetjja, jiwasatï mä kuns sum lurtʼañ yatstan, jan ukajj experiencianïstan ukhajja, taqe kuns yatksna, janis ewjjtʼanak mayiñasajj wakisjjaspa ukham janiw amuyañasäkiti. Maysa toqetjja, khitisay ewjjtʼchistanejja istʼañatakejj jankʼakïñasawa ukwa yateqsna (Eclesiastés 4:13 liytʼäta). Ukhamtï lurañänejja, janiw jachʼa juchanakar purtʼasisajj jan walin uñjaskañäniti, mayninakarus janirakiw jan waltʼaykañäniti.

¿KHITIS MÄ SUMA EWJJTʼA CHURISTASPA?

8. ¿Kunatsa Davidajj Jonatanar jisktʼasiñ amtpachäna?

⁸ Kunsa Davidat yateqassna uk uñjaskakiñäni. Jehová Diosamp sum apasipkäna, kunjamas jupajj jikjjatasïna uk amuyapkarakïna ukanakan ewjjtʼapwa Davidajj katoqasirïna. Saúl reyimp sumankthapiñajj walikïspati janicha uk yatiñatakejja, Saulan Jonatán yoqaparuw jisktʼasïna. ¿Kunatsa Jonatanar jisktʼasiñ amtpachäna? Kuna laykutejj Jehová Diosampejj wali sum apasïna, Saúl tataparojj wali sum uñtʼarakïna (1 Sam. 20:9-13). ¿Kunsa Davidat yateqassna?

9. Maynimp ewjjtʼayasiñ munstan ukhajj ¿khitirus jisktʼasiñasa? Uk qhanañchtʼam (Proverbios 13:20).

⁹ Mä toqet ewjjtʼa katoqañ munstan ukhajja, khititï Jehová Diosamp sum apaski, kuna toqettï ewjjtʼatäñ munktan uka toqet experiencianïkaraki ukaruw jisktʼasiñasa (Proverbios 13:20 liytʼäta).a Amuytʼañataki, casarasiñ munir mä waynajj ¿khitirus ewjjtʼayasiñatak jisktʼasispa? Mä soltero jilatar jisktʼasispa ukhajja, jupajj Biblian wiñay yatichäwinakaparjamajj suma ewjjtʼanak churaspawa. Ukampis Jehová Diosamp sum apasipki, jupar sum uñtʼapkaraki uka casado chacha warmiw jukʼamp sum ewjjtʼapjjaspa, kuna laykutejj jupanakajj casadöñ yatjjapjjewa.

10. ¿Kunsa jichhajj yatjjataskañäni?

¹⁰ Jichhakamajja, kunjam chuymanïñasas wakisi, khitis suma ewjjtʼanak churistaspa ukanakwa yatjjataniwaytanjja. Jichhajja, kunjamsa mä ewjjtʼa munatas uñachtʼaysna, ukat mayninakajj jiwas lanti mä amtar puripjjañapatak yanaptʼa mayiñajj kunatsa jan walïkaspa ukanakwa yatjjataskañäni.

¿KUNJAMSA MÄ EWJJTʼA MUNATAS UÑACHTʼAYSNA?

11, 12. 1) ¿Kunsa jan lurañasäki? 2) Wakiskir mä amtar puriñapäkäna ukhajj ¿kunsa Rehoboam reyejj luräna?

¹¹ Inas maynejj mä amtar purjjchispa ukat razonanïtap uñachtʼayañapatakikiw maynir ewjjtʼa mayjjaspa. Khititejj uk lurki ukajja, janiw mä ewjjtʼa munatap uñachtʼaykiti. Rehoboam reyit yatjjatañaw uka toqet amuytʼasiñatak yanaptʼistaspa.

¹² Salomón reyejj jiwjjäna uka qhepatjja, Rehoboam yoqapaw Israel markan reyipäjjäna. Uka tiemponjja, Israel markajj wali qamirïnwa. Ukampis Salomón reyejj wals jupanakar trabajiykaspäna ukhamwa israelitanakajj quejasipjjäna, ukatwa jan añch jupanakar trabajiyañapatak Rehoboam reyir mayipjjäna. Reyisti kunsa lurani uka toqet amuytʼasiñatakiw tiempo mayïna. Ukjjarusti jilïr jaqenakaruw jisktʼasïna, jupanakajj Salomón tataparuw servipjjäna. Ukham luratapajj walikïskänwa (1 Rey. 12:2-7). Ukampis uka jilïr jaqenakan ewjjtʼanakapar janiw istʼkänti. ¿Kunatsa jan istʼkpachäna? Inas janïräkipan mä amtar purjjchïna, ukatwa razonanïtap uñachtʼayapjjañapatakik mayninakar jisktʼaspachäna, ukhamätapatwa wayna amigonakapar jisktʼaspachäna. Jupanakajj kuna amtarutï Rehoboam reyejj purjjäna ukarjamaw ewjjtʼapjjarakïna (1 Rey. 12:8-14). Rehoboam reyejj wayna amigonakapar istʼatapatjja, israelitanakat mä partejj jupa contraw saytʼasipjjäna, ukat uksarojj reyjam apnaqkäna uka tiempon kunayman jan walinakan uñjasïna (1 Rey. 12:16-19).

13. Ewjjtʼa katoqasiñ amtampit jisktʼastan janicha uk yatiñatakejj ¿kunas yanaptʼistaspa?

¹³ Kunatï Rehoboam reyir paskäna ukat ¿kunsa yateqsna? Mä ewjjtʼa mayisajja, katoqasiñ amtampiw jisktʼasiñasa, janiw janïräkipan mä amtar puriñasäkiti. Akhamwa jisktʼasiñasa: “Nayatï mä ewjjtʼa maysta ukat uka ewjjtʼajj jan gustkchitu ukhajj ¿jankʼakit rechaztjja?” sasa.

14. ¿Kunsa amtañasapuni? Mä ejemplomp uk qhanañchtʼam (dibujo uñjjattʼarakïta).

¹⁴ Mä jilatarojj suma pagtʼat mä trabajsa churañ munapkaspa ukham amuytʼañäni. Jilatajj familiapar jaytawayasaw jayar trabajir sarañapa. Ukampis janïr uka trabajo katoqaskasajja, jilatajj mä ancianoruw jisktʼasi, ancianojja “familiamar Diosar serviñan yanaptʼañaw jukʼamp wakiskirejja” sasaw Bibliamp ewjjtʼi (Efes. 6:4; 1 Tim. 5:8). Uka ewjjtʼajj jan jupar gustatapatjja, “uka trabajojj walikïskiwa” sañapkamaw jilatanakar jisktʼasiskaki. ¿Uka jilatajj mä ewjjtʼti thaqaski, jan ukajj kuntï amtjje ukarjam ewjjtʼatäñcha thaqaski? Amtapuniñäni, chuymajj engañjasiriwa (Jer. 17:9). Awisajj necesitktan uka ewjjtʼajja, janiw munktan ukarjamäkaspati.

¿MAYNINAKAROJJ JIWAS LANTI MÄ AMTAR PURIPJJAÑAPATAKEJJ MAYIÑASÄSPATI?

15. ¿Kunsa jan lurañasäki, ukat kunatsa?

¹⁵ Jehová Diosajja, sapa mayni cristianojj pachpa amtanakapar purispa ukwa muni, janiw mayninakarojj jiwas lanti mä amtar puripjjañapatakejj mayiñasäkiti (Gál. 6:4, 5). Ukhamajj khitirutï wal confiyktan ukarojj “¿nayjam uñjasisajj kunsa lurasma?” sasin janiw jisktʼañasäkiti, janirakiw kuntï mayninakajj amtapki uka pachpa amtar puriñasäkiti, antisas jiwas pachp amuytʼasisaw mä amtar puriñasa. Ukatakejj Bibliampi ukat experienciani jilat kullakanakampiw yanaptʼayassna.

16. Corinto markankir cristianonakajj ¿kuna amtarus puripjjañapäna? (1 Corintios 8:7; 10:25, 26).

¹⁶ Kunas nayrïr patak maranakan Corinto congregacionan pasäna uk uñjañäni. Uka cristianonakajj aycha manqʼañ toqetwa mä amtar puripjjañapäna, uka aychajj inas idolonakar loqtatächïna. Pablojj uka cristianonakarojj akham sänwa: “Aka mundonjja idolonakajj janiw kunäkisa, janirakiw yaqha diosajj utjkiti jan ukasti mä cheqpach Diosakiw utji” sasa (1 Cor. 8:4). Ukatwa mä qhawqhanejj idolonakar loqtatäkchïna ukas carniceriat alapkäna uka aycha manqʼañ amtapjjäna. Yaqhepajj concienciapamp jan juchañchayasiñatakejj uka aych jan manqʼañwa amtapjjarakïna (1 Corintios 8:7; 10:25, 26 liytʼäta). Sapa mayniw mä amtar puriñapäna. Pablojj janiw corintonkirinakarojj mayninak lanti mä amtar puripjjañapatakisa, ni mayninakat yateqasis mä amtar puripjjañapatakis chʼamañchkänti. Jan ukasti Romanos 14:10-12 texton akham sänwa: “Sapa mayniw Diosarojj cuenta churañäni” sasa.

17. Jan jiwas pachp mä amtar purksna ukhajj ¿kunas pasaspa? Uk mä ejemplomp qhanañchtʼam (fotonak uñjjattʼarakïta).

¹⁷ Kunatï Corinto congregacionan paskäna niya ukhamajj aka tiempon pasarakispawa. Sañäni, wilajj wali jiskʼa partenakaruw jaljasispa (fracciones sanguíneas), ukat uka wali jiskʼa partenakjja qolljama jan ukajj qollañatakiw apnaqasispa, ukamp qollasiñäniti janicha uk sapa mayniw sum amtjjañasa.b Uka toqet amuytʼañajj inas jiwasatakejj chʼamakïchispa, ukampis ukham toqet mä amtar puriñajj sapa mayni cristianoruw waktʼistu (Rom. 14:4). Jiwasatï kuna amtanakarutï mayninakajj puripki uka pachp lurañ amtarakiñäni ukhajja, janiw kunapachas jiwas pachp amuytʼasiñ yateqkañäniti, Bibliarjam amtanakar puriñäni ukhakiw yatiñanïñäni (Heb. 5:14). Ukhamajj mä amtar puriñasächi ukhajja, jiwasaw nayraqatajj uka toqet yatjjattʼañasa, ukat Biblian kawkïr textonakapas yanaptʼistaspa ukwa amuytʼañasaraki. Amuytʼañatak yanaptʼa jukʼamp munaskakiñäni ukhajja, experienciani mä jilataru jan ukajj kullakaruw jisktʼassna.

EWJJTʼANAK MAYISIPKAKIÑÄNI

18. ¿Kunsa Jehová Diosajj jiwas layk lurawayi?

¹⁸ Jehová Diosajj jiwas pachp amtanakar puriñaswa muni, ukham lurasaw jiwasar wal confiyatap uñachtʼayi. Ukat jiwasar yanaptʼañatakejja, Biblia ukhamarak experienciani jilat kullakanakwa churistu, jupanakaw Bibliankir textonak sum amuytʼañatak yanaptʼapjjestaspa. Ukham lurasaw Jehová Diosajj mä Awkjamätap uñachtʼayistu (Prov. 3:21-23). Uka yanaptʼanakat ¿kunjamsa Jehová Diosar yuspärsna?

19. ¿Kunjamsa Jehová Diosar kusisiysna?

¹⁹ Awk taykanakajja wawanakapar jilsur uñjasasa, yatiñanïpjjatap uñjasasa, mayninakar yanaptʼir uñjasas wal kusisipjje. Alajjpachankir Awkisampejj ukhamarakiwa, kunapachatï jupar serviñan suma saytʼatäktan, ewjjtʼanak maytan, jupar jachʼañchkir amtanakar puriraktan ukhajja, jupajj wal kusisi.