¿Qalltan Bibliat yateqkayätan ukanakajj yanaptʼaskakistaspati?

1. ¿Biblian cheqa yatichäwinakap yateqasajj kunjamas jikjjatasiyäta?

KUNTÏ qalltan Bibliat yateqkayätan ukanakajja, wal yanaptʼawayistu. Sañäni, Diosajj Jehová satätap yateqañajja, jupamp sum apasiñatakiw yanaptʼawayistu (Is. 42:8). Jiwatanakajj kunjamäsipkisa uk yateqasajja, janiw jukʼampis ‘jiwatanakajj tʼaqesisipkpachati janicha’ sasin llakisjjtanti (Ecl. 9:10). Diosajj aka oraq mä suma paraisor tukuyañwa arsuwayi, uk yateqasajj kunas jutïrin pasani uka toqet janiw llakisjjtanti, kuna laykutejj janiw 70 jan ukajj 80 maranakak jakjjañäniti, jan ukasti wiñayaw jakasjjañäni (Sal. 37:29; 90:10).

2. Walja maranakas Jehová Diosar sirvjjstanjja, ¿kuntï Bibliat qalltan yateqkayätan ukanakajj yanaptʼaskakistaspati? (2 Pedro 1:12, 13).

² Walja maranakas Diosar sirvjjstanjja, qalltan Bibliat yateqkayätan ukanakajj yanaptʼaskakistaspawa. Apóstol Pedrojj payïr cartapjja, ‘yateqapkäna uka cheqa yatichäwinakjjar suma uttʼayatäpkäna’ uka cristianonakaruw qellqäna (2 Pedro 1:12, 13 liytʼäta). Congregación taypin utjkäna uka falso yatichirinakampita, jan wali jaqenakampit jarkʼaqasipjjañapatakiw Pedrojj uka cristianonakar qellqäna (2 Ped. 2:1-3). Jehová Diosat jan jitheqtapjjañapatakejja, qalltan Bibliat yateqapkäna ukanakat mä qhawqhanak jupanakar amtayarakïna.

3. Kuntï qalltan Bibliat yateqkayätan ukanakat ¿kunatsa taqe cristianonakajj lupʼiskakiñasa? Uk mä uñachtʼäwimp qhanañchtʼam.

³ Walja maranakas Diosar sirvjjstanjja, qalltan Bibliat yateqkayätan ukanakat jukʼampinak yateqaskaksnawa. Sum phaytʼir mä warmimpita phuchapampit amuytʼañäni, jupanakajj pachpa verduranakampejj mä suma manqʼa phaytʼapjjaspa. Ukampis uka tawaqon mamitapajja, uka pachpa verduranakampejj yaqha suma manqʼanakwa phaytʼaspa. Bibliat jichhak yateqasipki ukanakampisa, walja tiempo Diosar sirvjjapjje ukanakampis niya ukhamarakiw pasi. Bibliat jichhak yateqasipki ukanakat sipansa, walja maranak Diosar sirvjjtan ukanakajj jukʼamp yatichäwinakwa mä textot yateqsna, kuna laykutejj bautisastan ukhat aksarojj inas jakäwisajj cambiawaychi, jan ukajj Diosar serviñan yaqha asignacionanakanëjjarakstan. Ukhamïpanjja, qalltan Bibliat yateqkayätan uka textonakat lupʼisajj jukʼamp toqenakanwa yanaptʼayasiskaksna. Aka yatichäwinjja, walja tiempo Diosar sirvjjapjje uka cristianonakajj qalltan Bibliat yateqapkäna ukanakat kunsa yateqasipkakispa ukwa kimsa toqet uñjaskañäni.

JEHOVÁ DIOSAJJ TAQE KUN LURIRIWA

4. Jehová Diosan taqe kun Lurirïtap yatiñajj ¿kunjamsa jakäwisan yanaptʼawayistu?

⁴ Hebreos 3:4 textojj akham siwa: “Taqe kunas Diosan luratawa” sasa. Oraqesa kunanakatï ukan utjki ukanakasa, wali yatiñani wali chʼamani Diosan Lurtʼatawa. Niyakejjay jupajj jiwasar lurtʼawaychistojja, wali sum uñtʼistu. Ukampis janiw ukakïkiti, jupajj munasirakistuwa, jiwasan askiswa munaraki. Jehová Diosajj Luririsätap yatiñajja, jakäwisan wal yanaptʼawayistu, kusisit jakasiñatakiw yanaptʼawayarakistu.

5. ¿Kun yatiñas humilde chuymanïñatak yanaptʼistu? (Isaías 45:9-12).

⁵ Jehová Diosajj taqe kun Lurirïtap yatiñajja, humilde chuymanïñatakiw yanaptʼistu. Job chachat amuytʼañäni. Mä tiempojja, Jehová Diosar arjjatañat sipansa jupa pachpatakwa wal llakisïna, ukatwa Jehová Diosajj wali chʼamani Lurirïtap jupar amtayäna (Job 38:1-4). Ukaw Job chacharojj kuntï Jehová Diosajj lurki ukajj cheqapapunïtap amuyañatak yanaptʼäna. Uka toqet parlkasinjja, mä qhawqha tiempo qhepat Isaías profetajj akham sarakïnwa: “¿Ñeqʼejj Sañu Luririrojj “kuns lurta” sasin saspati?” sasa (Isaías 45:9-12 liytʼäta).

6. ¿Kunatsa Diosan yatiñanïtapatsa wali chʼamanïtapats lupʼiñasapuni? (Fotonak uñjjattʼarakïta).

⁶ Walja tiempo Diosar servir mä cristianojja, Jehová Diosan Arupar confiyañat sipans kuntï amuyki ukarukiw confiyjjaspa (Job 37:23, 24). Uk jan pasañapatakejja, Diosajj qhawqha yatiñanisa, qhawqha chʼamanisa, uka toqenakat lupʼiñatak tiempo apstʼasiñaw yanaptʼaspa (Is. 40:22; 55:8, 9). Diosan taqe kun Lurirïtap yatiñajja, humilde chuymanïskakiñataki, Jehová Diosan amuyupajj jupan amuyupat sipans jukʼamp jilankatap amtañatakiw yanaptʼani.

7. Diosan markapan jichhak mä cambio utjawayki uk katoqasiñatakejja, ¿kunas Rahela kullakarojj yanaptʼawayi?

⁷ Eslovenia markankir Rahela kullakat parltʼañäni, jupatakejj Diosan markapan mä cambio utjkäna uk katoqasiñajj chʼamakïnwa, ukampis Jehová Diosan taqe kun Lurirïtapat lupʼiñaw uk katoqasiñatak yanaptʼäna. Kullakajj akham siwa: “Diosan markap sarayapki ukanakan yaqhep amtanakap katoqasiñajja, nayatakejj chʼamakiwa. 2023 maran Cuerpo Gobernanten 8 yatiyäwip uñtjjchiyätsa, sunkhani mä jilatar discurso arstʼir uñjasajj mayjtʼasipuniyätwa, ukatwa uka cambio katoqasiñatak Jehová Diosar orasiyäta” sasa. Rahela kullakajj akwa yateqäna: alajjpacha oraqe Lurtʼirjamajja, Jehová Diosajj markapar kunjam irpañs yatiwa. Ukhamajj jiwasatakitï mä machaq yatichäwi katoqasiñasa, jan ukajj mä machaq instrucción katoqasiñas chʼamarakïchi ukhajja, Jehová Diosajj qhawqha yatiñanisa, qhawqha chʼamanirakisa uka toqet lupʼiñatakiw tiempo apstʼasiñasa (Rom. 11:33-36).

¿KUNATSA DIOSAJJ TʼAQESIÑANAK UTJAYASKAKPACHA?

8. Tʼaqesiñanak kunatsa Diosajj utjayaskaki uk yatiñajj ¿kunjamsa yanaptʼistu?

⁸ Kunatsa Diosajj tʼaqesiñanak utjayaskaki uk jan yatisajja, yaqhep jaqenakajj Diosatakiw colerapjje, jan ukajj janirakiw jupan utjataparus creyjjapjjeti (Prov. 19:3). Ukampis jiwasajj akwa yateqawaytanjja: Diosajj janiw tʼaqesiñanak utjaykiti jan ukasti jucha utjatap layku, pantjasirïtas laykuw utji. Ukatjja kunjamsa Jehová Diosan paciencianïtap laykojj walja jaqenakajj jupar uñtʼawayapjje, ukat kunjamsa Diosajj jan mayampitak tʼaqesiñanak chhaqtayani ukanakwa yateqawayaraktanjja (2 Ped. 3:9, 15). Ukanak yatiñajja, wal chuymachtʼistu, Jehová Diosar jukʼamp jakʼachasiñatakiw yanaptʼarakistu.

9. ¿Kunjamanakan uñjasisas ‘kunatsa Diosajj tʼaqesiñanak utjayaskaki’ sasin jisktʼassna?

⁹ Niyaw Jehová Diosajj tʼaqesiñanak chhaqtayani, ukañkamajj paciencianïñasawa. Ukampis kunapachatï mä familiarasajj jiwi, jan ukajj jiwasasa, mä munat familiarasas jan waltʼäwinakan uñjasi, jan ukajj ina chʼusat tʼaqesiyat uñjastan ukhajja, ‘¿kunatsa Jehová Diosajj tʼaqesiñanak jan chhaqtaykpacha?’ sasaw jisktʼassna (Hab. 1:2, 3). Ukhamanakan uñjasisajja, kunatsa Jehová Diosajj tʼaqesiñanak utjayaskaki ukwa amtañasa (Sal. 34:19).a Jehová Diosajj tʼaqesiñanak wiñayatakiw chhaqtayani, uka toqets lupʼiñasarakiwa.

10. ¿Kunas Anne kullakarojj sumak jikjjatasiñatak yanaptʼawayi?

¹⁰ Kunatsa Diosajj tʼaqesiñanak utjayaskaki uk yatiñajja, aguantaskakiñatakiw yanaptʼistu. Anne kullakat parltʼañäni, jupajj océano Índico toqenkir Mayotte islanwa jakasi, kullakajj akham siwa: “Mamitajajj jiwkäna ukhajja, walpun llakisiyäta. Ukampis Jehová Diosajj janiw tʼaqesiñanak utjaykiti, uk amtasipuntwa. Jupajj kunanakatï tʼaqesiykistu ukanak chhaqtayañwa muni, jiwatäpki uka munat familiaranakasarus wal jaktayañ munaraki. Ukanakat piensta ukhajja, sumakiw jikjjatasta” sasa.

11. ¿Kunatsa Diosajj tʼaqesiñanak utjayaskaki, ukat kunjamsa ukajj predicaskakiñatak chʼamañchtʼistu?

¹¹ Kunatsa Diosajj tʼaqesiñanak utjayaskaki uk yatiñajja, predicaskakiñatakiw chʼamañchtʼistu. Jehová Diosan paciencianïtapatjja, khitinakatï arrepentisipki ukanakajj salvasipjjaspawa. Pedrojj uk qhanañchtʼkäna uka qhepatjja, akham sänwa: “Jumanakajj kunjam jaqëpjjañamasa uk amuytʼasipjjam, jumanakajj qʼomaw sarnaqapjjañama, luratanakamampis Dios chuymäpjjatamwa uñachtʼayapjjañamaraki” sasa (2 Ped. 3:11). Predicasaw ‘Dios chuymätas uñachtʼaysna’. Jehová Diosjamarakiw jiwasajj jaqenakar munastanjja, jupanakajj paraison jakasipjjaspa ukwa munaraktanjja. Niyakejjay Jehová Diosajj paciencianïchejja, territoriosankki uka jaqenakar yanaptʼañasatakiw tiemp churaski. Ukhamajj Jehová Diosar yanaptʼapjjañäni, janïr akapach tukuskipan jupar uñtʼapjjañapatakis jaqenakar yanaptʼapjjarakiñäni, uk lurañajj mä jachʼa bendicionawa (1 Cor. 3:9).

‘QHEPA URUNAKANWA’ JAKASKTANJJA

12. ‘Qhepa urunakat’ parlir profeciajj kunjamas phoqasiski uk uñjasajja, ¿kunarus jukʼamp confiytanjja?

¹² ‘Qhepa urunakan’ jaqenakajj kunjamäpjjanisa uk Bibliajj sum qhanañchi (2 Tim. 3:1-5). Jakasktan uka lugaran jaqenakajj kunjamäjjapjjesa uk uñjasajja, uka profecía arunakan phoqasiskatapwa amuytanjja. Urut urutjamaw jaqenakajj jukʼamp jan wali jaqenakar tukusipki, uk uñjasajj jukʼampiw Diosan Arupar confiytanjja (2 Tim. 3:13-15).

13. ¿Kamsasas jisktʼasiñasa? (Lucas 12:15-21).

¹³ Qhepa urunakan jakaskatas yatiñajja, tiempo jan ina chʼusar aptʼasiñatakiw yanaptʼistu. Uka toqetjja, Jesusajj mä uñachtʼäwitwa Lucas 12:15-21 (liytʼäta) texton parläna. ¿Kunatsa qamir jaqejj ‘jan amuytʼasiriwa’ sasin uka texton sispacha? Kuna laykutejj janiw kunatï wali importantëki uk nayrar uchkänti, jan ukasti ‘jupatakikiw taqe kuns arkuntasiskäna, janiw Dios nayraqatan qamirïkäntiʼ, jupajj janiw tiempop sum aprovechtʼkänti. ¿Kunatsa ukham sistanjja? Kuna laykutejj jiwañapaw jakʼäjjäna. ¿Kunsa ukat yateqsna? Niyakejjay akapachajj niya tukusiñampïchejja, akhamwa jisktʼasiñasa: “¿Kunanak lurañtï amtaskta ukanakajj Diosar nayrar uchatajti uñachtʼayi? ¿Kun lurapjjañapatakis wawanakajar chʼamañchaskta? Chʼamajampisa, tiempojampisa, qollqejampis ¿Diosar nayar uchatajti uñachtʼaytjja, jan ukajj nayatakik llakisitajcha uñachtʼaytjja?” sasa.

14. Kunjamtï Miki kullakajj lurkäna ukhamjja, ¿kunatsa qhepa urunakan jakaskatasat lupʼiñasajj wakisi?

¹⁴ Qhepa urunakan jakaskatas yatiñajja, suma amtanakar puriñatakiw yanaptʼistu. Ukaw Miki kullakampejj pasäna, jupajj akham siwa: “Colegio tukuyjjayäta ukhajja, animalanakat yatjjatañatakejj universidadaruw wal sarañ munayäta. Ukatjja precursor regularäñsa, jukʼamp predikirinakajj munaski ukan yanaptʼañs munarakiyätwa. ‘Taqe ukanakamp phoqañ puedïtati janicha uk sum amuytʼasim’ sasaw experienciani jilat kullakanakajj sapjjetäna. ‘Akapachajj niyaw tukusjjani, ukhamarus paraisonjja taqe animalanakat yatjjatañatakejj walja tiempow utjätamjja’ sasaw sapjjarakitäna. Ukatwa trabajo jikjjatañatak yanaptʼkitaspa uk mä qhawqha tiempok estudiayäta. Ukhamïpanjja, precursorat serviñatak yanaptʼkitäna uka trabajo jikjjatayäta, ukat mä tiempotjja Ecuador markaruw sarjjayäta, ukan predicañatakejj jukʼamp yanapaw munasïna”. Jichhajj Miki kullakajj esposopampiw Ecuador markan circuitot servisipki.

15. ¿Kunsa Santiagot yateqsna? (Fotonak uñjjattʼarakïta).

¹⁵ Jaqenakajj janisay Diosan arunakapat yatiñ munapkchejja, janiw desanimasiñasäkiti, qhepat jupanakajj yatiñ munjjapjjaspawa. Jesusan Santiago jilapat amuytʼañäni. Jupajj Jesusamp chikaw jilsüna, jutañapäkäna uka Mesiasajj Jesusätaps yatirakïnwa, taqenit sipans wali suma yatichirïtaps uñjarakïnwa. Ukhamäkchïnsa walja maranak qhepatwa, mä arunjja, Jesusajj jiwatat jaktjjäna uka qhepatwa jupan discipulopar tukuskäna, Diosar taqe chuym servir cristianöjjarakïnwa (Juan 7:5; Gál. 2:9).b Ukhamajj Jehová Diosat jan yatiñ munapki uka familiaranakasarojj predicasipkakiñäni, jan istʼañ munapki uka jaqenakarus jan qarjtas predicasipkakiñäni. Qhepa urunakanwa jakasktanjja, ukatwa jankʼak predicañasa. Kunanaktï jupanakar parlktan ukanakatjja, jachʼa tʼaqesiñ tiemponwa jaqenakajj amtasipjjaspa, ukat Diosan arunakapats yatiñ munapjjarakispawa.c

KUNTÏ QALLTAN BIBLIAT YATEQKAYÄTAN UKANAKAT YUSPÄRAPJJAÑÄNI

16. ¿Qalltan Bibliat yateqkayätan ukanakajj yanaptʼaskakistuti? (“¿Kunjamsa mayninakar yanaptʼaspa?” sat recuadro liytʼarakïta).

¹⁶ Seman tukuyajj apaski uka discursosa, jw.org cheqankir yaqhep qellqatanakasa, videonakasa ukat yaqhep qellqatanakasa, Bibliat jukʼak yatipki ukat jan Testigöpki ukanakatakiw lurtʼasiwayi, ukampis ukanakajj taqeniruw yanaptʼarakistu. Ukanakajj Jehová Diosar jukʼamp munasiñataki, Bibliar jukʼamp confiyañataki ukat qalltan Bibliat yateqkayätan ukanak jukʼamp sum yatichañatakiw yanaptʼistu (Sal. 19:7).

17. Qalltan Bibliat yateqkayätan ukanakajj ¿kunjamsa yanaptʼaskakistaspa?

¹⁷ Jehová Diosar walja tiempo sirvjjtan ukanakajja, Biblian mä cheqa yatichäwipajj jukʼamp qhanañchtʼaski ukhajj wal kusistanjja. Ukat qalltan Bibliat yateqkayätan ukanakats yuspäraraktanwa, kuna laykutejj ukanakaw Jehová Diosar jakʼachasiñatak yanaptʼistäna, jichhas uka yatichäwinakat yateqaskaktanwa. Diosan markapat mä machaq instrucción katoqasajja, inas jiwasajj amuyusampik apayasisajj jan uk katoqasiñ munksnati. Ukhamächi ukhajja, humilde chuymanïñasawa, kuna laykutejj taqe kun Luriri, wali yatiñani, wali chʼamani Jehová Diosaw markapar irpaski. Kunapachatï mä jakʼa familiarasasa jan ukajj jiwasas problemanakan uñjastan ukhajja, paciencianïñasawa, kunatsa Jehová Diosajj tʼaqesiñanak utjayaskaki ukwa amtañasaraki. Kunsa tiemposampisa qollqesampis lurañäni uka toqet mä amtar puriñasäki ukhajja, qhepa urunakan jakaskataswa amtañasa, akapachan tukusiñapajj wali jakʼankjjewa. Ukhamajj qalltan Bibliat yateqkayätan uka yatichäwinakamp yanaptʼayasisipkakiñäni, ukhamatwa suma amtanakar puriñäni, janirakiw Jehová Diosat jitheqtkañäniti.