¿Kunjamsa Jehová Diosajj aguantañatak yanaptʼistu?

1. ¿Kunatsa aguantañasajj wakisi, ukat khitis aguantañatak yanaptʼistani? (1 Pedro 5:10).

WALI chʼama tukuñ urunakan jakatasatjja, taqeniw kunayman jan walinakan uñjastanjja. Yaqhepajj wali usutäpjjewa, yaqhepajj mä munat familiarapan jiwatapat wali llakitaw uñjasipjje, yaqhepasti Diosar servitapat gobiernonakampi arknaqata jan ukajj pachpa familiarapamp jarkʼataw uñjasipjje. Ukhamanakan uñjasisajj aguantañaw wakisi (Mat. 10:18, 36, 37). Jehová Diosan yanaptʼapampikiw ukhamanakan uñjasisajj aguantsna (1 Pedro 5:10 liytʼäta).

2. ¿Khitin yanaptʼapampikis aguantsna?

² ¿Aguantaña arojj kamsañsa muni? Jan walinakan uñjasisasa, arknaqat uñjasisasa, problemanakan uñjasisasa, jan walinak lurañatak yantʼat uñjasisas kusisit chuymampi Jehová Diosar serviskakiña sañwa muni. ¿Khitin yanaptʼapampikis aguantsna? Janiw chʼamasamp aguantañ puedksnati, jan ukasti Jehová Diosan chʼamapampikiw aguantsna, jupaw ‘jaqen chʼamapat jilankki uka chʼam churistu’ (2 Cor. 4:7). Aka yatichäwinjja, Jehová Diosan pusi yanaptʼanakapatwa yatjjataskañäni, ukat kunjamsa ukanakamp yanaptʼayassna ukwa yatjjataskarakiñäni.

DIOSAR ORASIÑA

3. ¿Kunatsa Jehová Diosamp oración toqe parltʼasiñajj mä milagrojja?

³ Jehová Diosajj oración toqew aguantañatak yanaptʼistu. Pantjasirïkstansa, jupampejj oración toqew parltʼassna (Heb. 4:16). Kuna horasasa, kawkinkkasasa, kuna arutsa, kuna toqetsa Diosampejj parltʼasiksnawa, carcelankkasas ukhamaraki (Jon. 2:1, 2; Hech. 16:25, 26). Awisajj wali llakitäsajja, janiw Jehová Diosarojj kuns qhan sañ puedksnati, ukampis kamsañs muntan uk jupajj sum amuyistu (Rom. 8:26, 27). ¡Jehová Diosamp oración toqe parltʼasiñajj mä milagrowa!

4. ¿Jan walin uñjasisajj Jehová Diosar yanaptʼa mayiñajj walikïskiti?

⁴ Bibliarjamajja, ‘jiwasatï Jehová Diosan munañaparjam kunsa mayiñäni ukhajj jupajj istʼistaniwa’ (1 Juan 5:14). Ukhamajj ¿Jehová Diosaru aguantañatak yanaptʼa mayiñajj walikïskiti? Jïsa, ukajj Jehová Diosan munañaparjamawa. ¿Kunjamatsa Diosan munañaparjamätap yattanjja? Kuna laykutejj Biblianwa uk qhanañchistu, mä toqetjja jan walinakan aguantktan ukhajja, Jehová Diosajj jupat jan walinak parlki uka Supayan jan cheq parlatapwa uñachtʼayi (Prov. 27:11). Maysa toqetjja, ‘khitinakatï jupar phoqat chuymamp servipki ukanak laykojj chʼamap uñachtʼayañ muni’ sasaw Bibliajj qhanañcharaki (2 Crón. 16:9). Ukhamajj Jehová Diosajj aguantañatak wal yanaptʼañ munistu (Is. 30:18; 41:10; Luc. 11:13).

5. ¿Kunjamsa oracionajj sumankañ jikjjatañatak yanaptʼistu? (Isaías 26:3).

⁵ Bibliajja llakinakas Jehová Diosar cuenttʼañasatakiw chʼamañchistu, ukhamatwa Diosajj sumankañap churistani, “uka sumankañapasti kuntï jaqejj amuyki ukat sipansa jukʼampiwa”. Uka sumankañaw chuymanakassa amuyunakassa jarkʼaqestani (Filip. 4:7). Sumankañ jiwasar churatapat ¡wal Jehová Diosar yuspärtanjja! Jehová Diosar jan servir jaqenakajja, problemanakap mä jukʼ armañatakisa, mä jukʼa sumankañ jikjjatañatakis kunaymaninakwa lurapjje. Ukampis Jehová Diosar oración lurasin sumankañ jikjjatktan ukaw jukʼamp jilankejja. Jiwasajj Jehová Diosaruw wal confiytanjja, jupaw sumankañ churasajj amuyussa chuymassa jarkʼaqestu (Isaías 26:3 liytʼäta). ¿Kunjamsa uk luri? Mä toqetjja, qhawqsa munasistu qhawqsa yanaptʼañ munistu uka toqenakat parlir textonakwa Jehová Diosajj amtayistu (Sal. 62:1, 2).

6. ¿Kuna toqenakatsa Jehová Diosar orassna? (Foto uñjjattʼarakïta).

⁶ ¿Kunsa lursna? Mä jan walin uñjasisajj Jehová Diosar llakinakas katuyapjjañäni, ukat sumankañap mayipjjañäni, suma amtanakar puriñatakejj yatiñ mayipjjarakiñäni (Sal. 55:22; Prov. 2:10, 11). Ukat janiw Jehová Diosarojj ‘aguantañatak yanaptʼita’ sasak ruwtʼasiñasäkiti, jan ukasti juparojj yuspärañasarakiwa (Filip. 4:6). Mä jan walin uñjasisatï Jehová Diosan jiwasar yanaptʼaskatap amuyañäni ukhajja, juparojj yuspärañasawa. Ukhamajj jan walinakan uñjasisajj Jehová Diosan bendicionanakap uñjañatak chʼamachasiñäni (Sal. 16:5, 6).

BIBLIA LIYIÑA

7. ¿Kunjamsa Bibliat yatjjatañajj aguantañatak yanaptʼistu?

⁷ Aguantañatakejj Jehová Diosajj Biblia churawayistu. Ukanwa jiwasar yanaptʼañ munatap uñachtʼayir walja textonak jikjjatsna. Ukanakat mayajj Mateo 6:8 textowa, ukan akham siwa: “Kuntï necesitapkta ukjja janïr mayipktas ukhaw Dios Awkimajj yatjje” sasa. Jesusaw uka arunak arsüna, niyakejjay jupajj Awkipar sum uñtʼchejja, “tʼaqesktan ukhajj kunsa necesittan uk Jehová Diosajj sum yati, yanaptʼarakitaniwa” sasajj janiw payachasiñasäkiti. Bibliajj walja ukham suma textonakaniwa, ukanakaw jan walinakan aguantañatakejj yanaptʼistani (Sal. 94:19).

8. 1) ¿Jan walinakan aguantañatakejj kawknïr textos yanaptʼistaspa? Uk mä ejemplomp qhanañchtʼam. 2) ¿Kunas textonak amtañatakejj yanaptʼistani?

⁸ Jan walinakan aguantañatakejj Biblian suma ewjjtʼanakaw utjaraki. Ukanakaw suma amtanakar puriñatak yanaptʼistu (Prov. 2:6, 7). Sañäni, jutir urunakat añch llakisiñat sipansa, jichhürutak llakisiñatakiw Bibliajj chʼamañchtʼistu (Mat. 6:34). Jiwasatï Biblia liytʼapuniñäni, liytʼawayktan uka toqet lupʼirakiñäni ukhajja, mä jan walir saykatañatakisa, mä amtar puriñatakis facilakwa textonak amtañäni.

9. Diosan servirinakapat lupʼiñajj ¿kunjamsa yanaptʼistaspa?

⁹ Biblianjja Diosar confiyiri jiwasjam jaqenakatwa parlaraki, jupanakajj Diosan yanaptʼapwa katoqapjjäna (Heb. 11:32-34; Sant. 5:17). Uka sarnaqäwinakat lupʼtan ukhajja, ‘Diosaw nayan imantasiñajasa, chʼamajasa, llakisiñ tiemponakan jankʼakiw jupan yanaptʼap jikjjatäjja’ sasaw Jehová Diosar jukʼamp confiytanjja (Sal. 46:1). Jehová Diosan nayra servirinakapajja, jupar wal confiyapjjäna, jan walinakans jupar servisipkakïnwa. Ukanakat lupʼiñäni ukhajja, jupanakat yateqasiñatakiw chʼamachasiñäni (Sant. 5:10, 11).

10. ¿Bibliamp yanaptʼayasiñatakejj kuns lursna?

¹⁰ ¿Kunsa lursna? Sapüruw Biblia liytʼañasa, kawknïr textonakas yanaptʼistaspa uks qellqtʼasiñasarakiwa. Walja jilat kullakanakaw sapürutak utjkistu uka texto sapa alwa liytʼapjje, ukaw jupanakarojj uru jurnäl chʼamañchtʼi. Mariea kullakampejj ukaw pasäna. Uka kullakan tatap mamapajj panpachaniw cáncer usunïpjjäna, ukatwa jupanakar qhepakam cuidañapäna. Uka phajjsinakan ¿kunas kullakar aguantañatak yanaptʼpachäna? Jupajj akham siwa: “Sapa alwaw Diosan Arupat sapür yatjjatañataki sat folletot liytʼirïta, lupʼirakirïta. Ukaw llakinakajatak piensañat sipans Jehová Diosata, suma arunakapat lupʼiñatak yanaptʼitäna” sasa (Sal. 61:2).

JILAT KULLAKANAKAMP YANAPTʼAYASIÑA

11. Jilat kullakanakasan aguantapjjatap yatiñajj ¿kunjamsa chʼamañchtʼistu?

¹¹ Jan walinakan aguantañasatakejja, Jehová Diosajj jilat kullakanak toqew yanaptʼistu. ‘Oraqpachankir jilat kullakanakajj kunjamsa jiwasjam tʼaqesisipki uk yatiñajja’, chuymachtʼistuwa (1 Ped. 5:9). ¿Kunatsa ukham sistanjja? Kuna laykutejj jilat kullakanakajj jiwasjam tʼaqesisajj aguantapjjewa, jiwasajj ukhamarakiw kunayman jan walinakan uñjaskasajj aguantsna (Hech. 14:22).

12. ¿Kunsa maynit maynikam yanaptʼasiñatakejj lursna? (2 Corintios 1:3, 4).

¹² Jilat kullakanakasajj arunakapampi luratanakapampiw chʼamañchtʼapjjestaspa. Ukhamwa apóstol Pablorojj chʼamañchtʼapjjäna. Utapan arrestatäkäna ukhajja, jilat kullakanakajj kunayman toqetwa jupar yanaptʼapjjäna, jupar ukham chuymachtʼapjjatapatsa chʼamañchtʼapjjatapatsa, cartanakapanwa sutinakap aytasajj jupanakar yuspäräna (Filip. 2:25, 29, 30; Col. 4:10, 11). Jichhürunakan jilat kullakanakajj ukhamarakiw jan walinakan uñjasktan ukhajj yanaptʼapjjestu, jan walinakan uñjasipkani ukhajja, jiwasajj yanaptʼañasarakiwa (2 Corintios 1:3, 4 liytʼäta).

13. ¿Kunas Maya kullakarojj jan waltʼäwinakan aguantañatak yanaptʼäna?

¹³ Rusia markankir Maya kullakat parltʼañäni. 2020 maranjja, policianakajj utapar mantasaw qʼal thaqsupjjäna. Ukat predicatapatwa juparojj tribunalar apapjjäna. ¿Kunjamsa jilat kullakanakajj jupar yanaptʼapjjäna? Kullakajj akham siwa: “Qʼala aynachtʼatäkayäta ukhaw jilat kullakanakajj qhawqsa munasipjjetu uk sañatakejj jawsanipjjetäna, mensajenaks qellqtʼanipjjetäna” sasa. Ukat akham sarakiwa: “Wali munasiri mä jachʼa familia taypinkataj yatiyätwa, ukampis 2020 marat aksarojja, ukajj cheqäskapunitapwa qhan uñjawayta” sasa.

14. ¿Kunsa jilat kullakanakasamp yanaptʼayasiñatakejj lursna? (Foto uñjjattʼarakïta).

¹⁴ ¿Kunsa lursna? Jan walinakan uñjasisajja, janiw jilat kullakanakat jitheqtañasäkiti. Ancianonakar yanaptʼa mayiñ jan ajjsarapjjañäniti, jupanakajj “thayat jarkʼaqasiñatak mä imantasiñ lugarjamä[pjjewa], wal purintir jallut jarkʼaqasiñatak mä imantasiñ lugarjamä[pjjarakiwa]” (Is. 32:2). Jilat kullakanakasat janirakiw armasiñasäkiti, jupanakajj jan walinakanwa uñjasipjjaraki. Khititï yanaptʼa munki ukarutï yanaptʼañänejja, kusisitäñäniwa, kuna jan walinakantï uñjasktan ukanakar saykatañas janirakiw chʼamäkaniti (Hech. 20:35).

JUTIR URUNAKAT LUPʼIÑA

15. ¿Kunjamsa Jesusarojj jutïritak mä suytʼäwinïñajj yanaptʼäna, ukat kunjamsa jiwasarojj yanaptʼarakistu? (Hebreos 12:2).

¹⁵ Jan walinakan aguantañasatakejj Jehová Diosajj mä suytʼäw churawayistu (Rom. 15:13). Jesusajj jiwañapäkäna uka urojj jan walinakanwa uñjasïna, ukampis jupajj jutïritak mä suytʼäwinïtapatwa aguantäna (Hebreos 12:2 liytʼäta). Jupajj Awkipan sutip jachʼañchaña, wasitat Awkipamp jikisiña, ajllitanakamp aka oraqjjar apnaqaniñwa suyäna, ukanakaw Diosat jan jitheqtas aguantañatak yanaptʼäna. Jiwasajj ukhamarakiw paraison wiñay jakasiñatak mä suytʼäwinïtanjja, uk suytʼañaw akapachan kunayman jan walinakan aguantañatak yanaptʼistu.

16. ¿Kunjamsa mä kullakarojj paraisot lupʼiñajj yanaptʼäna, kunsa jiwasajj jupat yateqasiraksna?

¹⁶ Rusia markankir Alla sat kullakat parltʼañäni, juparojj paraisot lupʼiñaw jan aynachtʼañatak yanaptʼäna. Esposopajj katuntatäkäna carcelar apatarakïna ukhajja, kullakajj akham sänwa: “Diosar orasiña paraisot lupʼiñaw jan aynachtʼañatak yanaptʼitu. Jan waltʼäwinakajj janiw wiñayatakïkiti, niyaw Jehová Diosajj enemigonakapar atipjani, jiwasarus bendisirakistani” sasa.

17. Jutïritak suytʼäwejj utjkistu ukarojj ¿kunjamsa valoranit uñjatas uñachtʼaysna? (Foto uñjjattʼarakïta).

¹⁷ ¿Kunsa lursna? Jehová Diosajj jutïritak arsuwayki uka promesapat lupʼiñatakiw tiempo apstʼasiñasa. Niyas paraison walja bendicionanak katoqjjsna ukham amuyañasawa. Ukhamtï lurañänejja, ‘jan walinakajj janiw kunäkisa, mä qhawqha tiempotakikiwa’ sasaw amuyañäni (2 Cor. 4:17). Jehová Diosan promesanakapat jaqenakar parlañatakiw chʼamachasiñasaraki. Jupanakatakejj jan walinak aguantañajj chʼamakïpachawa, kuna laykutejj Diosan promesanakapat janiw yatipkiti. Mä jukʼaks Diosat jupanakar parlchiñänejja, jukʼampiw Diosan promesanakapat yateqañ munjjapjjaspa.

18. ¿Kunatsa Jehová Diosan promesanakapar confiysna?

¹⁸ Diosat jan jitheqtasin kunayman jan walinak aguantasajja, Job chachajj akham sasaw Jehová Diosar säna: “Jichhaw yatta, jumajj taqe kun lurasma, kuntï jumajj amtkta uk phoqapuntawa” sasa (Job 42:2). Promesanakap phoqañatakejja, janiw kunas Jehová Diosar jarkʼkaspati, uk Job chachajj sum amuyäna. Ukaw jiwasarojj aguantañatak yanaptʼarakistaspa. Wali usuntat mä warmit amuytʼañäni: uka warmejj kunayman doctoranakarus sarkchejja, janiw khitis jupar yanaptʼañ puedkiti, ukatwa jupajj wali llakit jikjjatasi. Ukat mä urojj wali experienciani mä doctoramp uñjayasir sari ukhajja, kuna usunisa kunjamsa qollasispa ukwa uka doctorajj uka warmir qhanañchi. Jupajj usutakïskchisa janiw sinti llakisjjeti, ukat waliptjjañap yatisjje ukhajja, aguantañajj jupatakejj janiw chʼamäjjeti. Jiwasajj ukhamarakiw jan walinakan aguantaskaksna, kuna laykutejj Diosan promesapajj phoqasipuniniwa sasaw confiytanjja.

19. ¿Kunanakas jan waltʼäwinakan aguantañatakejj yanaptʼistani?

¹⁹ Kunjamtï yatjjataniwayktanjja, jan walinakan aguantañatakejj Jehová Diosaruw orasiñasa, Biblia liyiñasa, jilat kullakanakampiw yanaptʼayasiñasa, suytʼäwisatwa lupʼiñasaraki. Jehová Diosan uka yanaptʼanakapajja, Supayan akapachapajj tukjaskani tʼaqesiñanakas chhaqtayatäkarakini ukhakamaw kunayman jan walinakan aguantañatak yanaptʼistani (Filip. 4:13).