Ancianonakamp yanaptʼayasipjjañäni

1. Taqe jilat kullakanakar munasitap ¿kunjamsa Jehová Diosajj uñachtʼayawayi?

JEHOVÁ DIOSAJJA, sapa mayni jilat kullakanakarojj walpun munasi. Jupanakarojj Jesusan wilapampiw alawayi ukat ancianonakaruw jupanakar sum cuidapjjañapatak encargawayaraki (Hech. 20:28). Diosajj Jesusaruw congregacionar pʼeqtʼañapatak uttʼayawayi. Ancianonakajj jilat kullakanakar munasiñamp uñjapjjaspa ukwa Diosasa Jesusas munapjje, ukatwa ancianonakajj Jesusan instruccionanakapar istʼasajj Diosat jan jitheqtapjjañapatak jilat kullakanakar yanaptʼapjje (Is. 32:1, 2).

2. ¿Khitinakatsa Jehová Diosajj jukʼamp llakisi? (Ezequiel 34:15, 16).

² Jehová Diosajj taqe servirinakapatwa llakisi, jukʼampis khitinakatï tʼaqesisipki ukanakatwa llakisi. Inas jupanakat yaqhepajj juchanak lurapjjatapat wal tʼaqesisipkchi, ukatwa Jehová Diosajj ancianonak toqe jupanakar yanaptʼi (Ezequiel 34:15, 16 liytʼäta). ¿Ukham jikjjatasstan ukhajj kunsa lursna? Diosajj jupar orasiñaswa muni, ukat ‘awatirinakäpki, yatichirinakäpki’ uka ancianonakamp yanaptʼayasiñaswa munaraki (Efes. 4:11, 12).

3. ¿Kunatsa aka yatichäwejj taqenir yanaptʼistani?

³ Aka yatichäwinjja, jupar serviñan aynachtʼatäpki ukanakarojj kunjamsa Jehová Diosajj ancianonak toqe yanaptʼi ukwa yatjjataskañäni, ukat aka jisktʼanakaruw qhanañchaskañäni: ¿kunapachas ancianonakar yanaptʼa maysna? ¿Kunatsa uk lurañasa? ¿Kunjamsa jupanakajj yanaptʼapjjestu? Ukanakat yatjjatañajja, Diosar serviñan suma saytʼatäpki ukanakarus yanaptʼarakiniwa. Ukhamajj kunjamsa Diosajj ancianonak toqe taqenir yanaptʼistu uk jukʼamp valoranit uñjañatakiw yanaptʼistani. Jutïrin ancianonakar yanaptʼa mayiñajj wakisini ukhajja, kunsa lursna ukatakis yanaptʼarakistaniwa.

¿KUNAPACHAS ANCIANONAKAR YANAPTʼA MAYSNA?

4. Santiago 5:14-16, 19, 20 textojj Diosar serviñan usuntat mä jaqet parlaskatap ¿kunjamatsa yattanjja? (Fotonak uñjjattʼarakïta).

⁴ Kunjamsa Jehová Diosajj ancianonak toqe yanaptʼistu ukwa Santiagojj qhanañchäna. Jupajj akham sänwa: “Maynitejj jumanak taypin usutächi ukhajja, congregacionankir ancianonakar jawspan” sasa (Santiago 5:14-16, 19, 20 liytʼäta). Uka textonjja Santiagojj khititï Diosar serviñan usutäki ukatwa parlaskäna. ¿Kunjamatsa uk yattanjja? Maya, usutäki ukarojj janiw mä doctorar jawspan sasin Santiagojj siskänti jan ukasti ancianonakar jawspan sänwa. Paya, juchanakapat perdonatäsajj usutajj waliptjjewa sasaw sarakïna. Jañchi toqet usutäki ukampi Diosar serviñan usutäki ukampejj niya igualakïpjjewa. Usunttan ukhajja, mä doctoran yanaptʼapwa thaqtanjja, juparuw kunas usustu uk awistanjja. Ukat kuna instruccionanaktï churkistu ukarjamaw luraraktanjja. Diosar serviñan usuntktan ukhajj niya ukhamarakiwa. Mä ancianon yanaptʼapwa thaqtañasa, kunjamas jikjjatastan ukwa jupar awisañasa, ukat Bibliarjam ewjjtʼanak churkistu ukarjamaw lurañasaraki.

5. ¿Kunjamatsa Diosar serviñan suma saytʼatäsktanti janicha uk yatsna?

⁵ Diosar serviñan aynachtʼaskatas amuyasstan ukhajja, Santiago 5 capitulojj ancianonakar yanaptʼa mayiñatakiw chʼamañchtʼistu. Ukampis Jehová Diosamp sum apasitas janïr aptʼaskasaw ancianonakar yanaptʼa mayiñasa. Wal amuyasiñasawa, Bibliajja kʼari amuyunakasamp jan engañjayasiñatakiw ewjjtʼistu, kuna laykutejj amuyusarjamajja Jehová Diosampejj sums apasksna ukhamwa amuysna (Sant. 1:22). Ukaw Sardis markankir yaqhep cristianonakampejj pasäna, jupanakajj walikïsipkaspas ukham amuyasipjjäna, ukampis Jesusan arunakaparjamajj janiw Diosar serviñan suma saytʼatäpkänti (Apoc. 3:1, 2). ¿Jiwasat kamsasirakispasa? ¿Diosar serviñan suma saytʼatäsktanti janicha uk kunjamatsa yatsna? Bautisaskayätan ukhat jichhakamajj Jehová Diosar munasitasajj pachpakïskiti janicha ukwa igualtʼayañasa (Apoc. 2:4, 5). Akham sasaw jisktʼasiraksna: “¿Biblia liytʼañasa uka toqet lupʼiñas nayrjamat gustaskakitu? ¿Tantachäwinakarojj jan faltasisat sarasktjja, ukat tantachäwinakatakejj sumt waktʼayasiraktjja? ¿Predicañajj nayatak importantekïskiti? ¿Kusistʼañanakampi qollqe thaqañampikich jakäwijan nayrankjje?” sasa. Uka jisktʼanakarjamatï Diosar jan nayrjam servitas amuyasstan ukhajja, jankʼakiw mejorañatak chʼamachasiñasa. Ukham chʼamachasisatï jiwas pachp jan mejorañ puedkstan ukat kunatï Jehová Dios nayraqatan jan walïki uk lurjjarakstan ukhajja, ancianonakaruw yanaptʼa mayiñasa.

6. Maynitï jachʼa juchar purtʼaschi ukhajj ¿kunsa lurañapa?

⁶ Maynitï mä jachʼa juchar purtʼaschi, ukham juchachasitapat congregacionat apsutäñap amuyasirakchi ukhajja, mä ancianompiw parlañapa (1 Cor. 5:11-13). Kuna laykutejj janiw jupa sapakejj Jehová Diosamp sum apasitap askichkaspati. Taqe chuym arrepentisitas ‘luratanakasamp’ uñachtʼayañäni ukhakiw Jehová Diosajj perdonistani (Hech. 26:20). Ukhamajj ancianonakar jachʼa juchar purtʼasitas arsusisaw arrepentisitas uñachtʼaysna.

7. ¿Khitinakas ancianonakan yanaptʼap necesitapjjaraki?

⁷ Ancianonakajj janiw jachʼa juchar purtʼasipki ukanakaruk yanaptʼapkiti, jan ukasti Diosar serviñan aynachtʼatäpki ukanakaruw yanaptʼapjjaraki (Hech. 20:35). Chuymamajj mä jan wali lurañsa wals munkaspa ukat ukar atipjañatakejj janis chʼamanïkasma ukham amuytʼañäni. Janïr Jehová Diosar uñtʼkasajja, inas drogaschiyäta, pornografía uñchʼukchiyäta jan ukajj qʼañu juchanak lurasin sarnaqchiyäta. Ukhamächi ukhajj jan walinak lurañ munañar atipjañajj jukʼamp chʼamäspawa. Ukampis janiw sapäktati, mä ancianompiw parltʼasma, jupajj wali atencionampiw istʼätam, wali sum ewjjtʼätam. Janitï jan wali lurañamp apayaskätajja, Jehová Diosajj sumatwa uñjaskakïtam sasaw amtayarakïtam (Ecl. 4:12). Ukampis jan walinak lurañ munañajj chuymaman utjaskakitap amuyasin desanimat jikjjatassta ukat mä ancianor yanaptʼa mayiraksta ukhajja, jupajj walik yanaptʼa maytajja sasaw sätamjja, ukat akham sasaw amtayarakïtam: “Yanaptʼa mayisajj jan juma pachpar confiyasitama, Jehová Diosar kusisiyañ munatamwa uñachtʼayasktajja” sasa (1 Cor. 10:12).

8. ¿Taqe pantjasitanakasti ancianonakar yatiyañasa?

⁸ Janiw taqe pantjasitanakas ancianonakar yatiyañajj wakiskapuniti. Sañäni, inas mä jilatarusa jan ukajj mä kullakarus chuym ustʼayawaysta ukat wal colertʼasiwayaraksta. Uka toqet mä ancianor parlañat sipansa Jesusan aruparjam lurañwa amtasma, jupajj mayninakamp sumankthapipjjam sasaw ewjjtʼäna (Mat. 5:23, 24). Llampʼu chuymanïñ toqeta, paciencianïñ toqeta, ukat munañasamp jan apayasiñ toqetwa qellqatanakasan yatjjatarakisma. Janipun jan waltʼäwi askichirjamäksta ukhajja, inas mä ancianor yanaptʼa maychisma. Filipo markankir congregacionanjja, Evodiampi Sintiquempiw jan waltʼayasipjjäna. Ukatwa Pablojj uka jan waltʼäwi panpachani askichapjjañapatakejj mä jilatar yanaptʼa mayïna, ukhamat uka jilatajj uka kullakanakar yanaptʼañapataki. Uka congregacionar mä carta qellqkasaw Pablojj uk mayïna. Congregacionamankir mä ancianojj jumar yanaptʼañatakejj ukwa lurarakispa (Filip. 4:2, 3).

¿KUNATSA ANCIANONAKAMP YANAPTʼAYASIÑASA?

9. Juchar purtʼasitasat ancianonakar yatiyañ phenqʼaskstansa, ¿kunatsa yatiyañasa? (Proverbios 28:13).

⁹ Jan wali lurañ munañanakar jan atipirjamätas amuyasstan jan ukajj mä jachʼa juchar purtʼasstan ukhajja, uk ancianonakar yatiyañatakejj jan ajjsarirïñaw wakisi, yanaptʼapjjetaniwa sasin confiyañaw wakisiraki. Janiw phenqʼasitas laykojj jupanakamp parlañ ajjsarañasäkiti. Jehová Diosaw ancianonak churawayistu, ukhamat jupar serviñan suma saytʼatäñatak jiwasar yanaptʼapjjañapataki. Ukhamajj jupanakar yanaptʼa mayisajja, Diosaru ukat instruccionanakapar confiyataswa uñachtʼaytanjja. Kunatï walïki uk lurañatakejj Jehová Diosakiw yanaptʼistaspa (Sal. 94:18). Jucha luratasat ancianonakar yatiyañäni, uka juch apanukurakiñäni ukhajja, Diosajj jiwasat khuyaptʼayasiniwa perdonarakistaniwa (Proverbios 28:13 liytʼäta).

10. Juchanakas imtʼsna ukhajj ¿kunas pasaspa?

¹⁰ Kunjamtï yatjjataniwayktanjja, ancianonakar yanaptʼa mayiñajj kunayman toqetwa yanaptʼistu. Ukampis juchanakas imtʼsna ukhajja, jukʼampiw tʼaqessna. David reyit parltʼañäni. Juchanakap imtʼäna ukhajja, Jehová Diosamp jan sum apasjjatap yatisajj llakimpiw aynachtʼäna usutaw jikjjatasirakïna (Sal. 32:3-5). Usuntasin jan jankʼak qollayasktan ukhajja, jukʼampikiw usuntjjtanjja. Niya ukhamarakiw juchanakas ancianonakar jan yatiyktan ukhajj jukʼamp tʼaqestanjja. Jehová Diosajj uk yatiwa, ukatwa ancianonakar juchas yatiyañas mayistu, ukhamat jupanakajj jupamp suma amigöñasatak jiwasar yanaptʼapjjañapataki (Is. 1:5, 6, 18).

11. Jachʼa juchanak imtʼsna ukhajj ¿kunas pasarakispa?

¹¹ Juchanakas imtʼsna ukhajja, mayninakaw jiwas kawsa tʼaqesipjjarakispa. Janiw Diosan espíritu santopajj congregación taypinkjjaspati, ni sumankañas utj-jjaspati (Efes. 4:30). Maysa toqetjja, congregacionankir mä jilata jan ukajj mä kullakan jachʼa jucha luratap yatstan ukhajja, ancianonakamp parltʼañapatakiw jupar mayiñasa. Jupatï ancianonakar jan yatiykanejja, jiwasaw yatiyañasa, janitï uk lurksnajja jiwasamppachaw Jehová Dios contra juchachasisksna (Lev. 5:1). Jehová Diosar munasitas laykuw cheq parlañasa. Ukhamatwa congregacionankir jilat kullakanakar jarkʼaqañäni, juchachasirirus Jehová Diosamp wasitat sum apasjjañapatak yanaptʼañäni.

¿KUNJAMSA ANCIANONAKAJJ YANAPTʼAPJJESTU?

12. Diosar serviñan aynachtʼatäpki ukanakarojj ¿kunjamsa ancianonakajj yanaptʼapjje?

¹² Bibliajja Diosar serviñan aynachtʼatäpki ukanakar yanaptʼapjjam sasaw ancianonakar ewjjtʼi (1 Tes. 5:14). Ukhamajj kun lurasatï Jehová Diosamp jan sum apasjjsta ukhajja, inas jupanakajj wali suma pienstʼat jisktʼanak jisktʼapjjchïtam, ukhamat kunsa piensta, kunjamas jikjjatasta uk yatiñataki (Prov. 20:5). Ukham jisktʼatäsin ancianonakar parlañajj inas jumatak chʼamakïchispa. Kuntï lurawaykta uk arsuñs wal phenqʼasirakisma, ukampis parlasaw jupanakar wal yanaptʼasma. Kuna jan walch arskä sasajj jan llakisimti (Job 6:3). Ancianonakajj janiw jankʼak juzgapkätamti jan ukasti janïr ewjjtʼkasajj wali atencionamp jumar istʼañataki, jumar sum amuyañatakiw chʼamachasipjjani (Prov. 18:13). Maynir yanaptʼañatakejj tiempow munasi, janiw mä kutik parltʼasakejj taqe kuns askichaskaspati, uk jupanakajj sum yatipjje.

13. Jiwasar yanaptʼañatakejj ¿kunanakampsa ancianonakajj lurapjje? (Fotonak uñjjattʼarakïta).

¹³ Ancianonakajja janiw wali juchararäkasmas ukham amuyasiñam munapkiti, jan ukasti jumatakiw orarapipjjätam. Jehová Diosajj uka oracionanakar istʼaniwa, uka ‘wali chʼamani’ oracionanakajj jumar wal yanaptʼätam chʼamañchtʼarakïtamwa. Ancianonakajj “Jehová Diosan sutipjjaru aceitempi” uchasaw yanaptʼapjjarakïtam (Sant. 5:14-16). Uka ‘aceitejj’ Diosan cheqa Arupamp sasiwa. Ukhamajj Bibliampiw chuymachtʼapjjätam, Jehová Diosamp wasitat sum apasjjañamatakiw yanaptʼapjjarakïtam (Is. 57:18). Biblian ewjjtʼanakapajj kunatï walïki uk luraskakiñatakiw chʼam churätam. Ancianonak toqejj Jehová Diosajj akham siskiristamsa ukhamawa: “Aka cheqaw thakejja. Uka thaknam saraskakim” sasa (Is. 30:21).

14. Gálatas 6:1 textorjamajj ¿kunjamsa ancianonakajj “jan wali thakir” saranukupki ukanakar yanaptʼapjje? (Fotonak uñjjattʼarakïta).

¹⁴ (Gálatas 6:1 liytʼäta). ‘Jan wali thakir saranukuña’ siski uka arunakajja, Diosan cheqap mayitanakaparjam jan luraña jan ukajj jan sarnaqaña sañwa muni. ¿Kunjamsa maynejj jan wali thakir saranukuspa? Jan sum amuytʼasisaw jan wali amtar purispa, jan ukajj Diosan leyinakap pʼakintaskatap yatkasaw juch luraspa. Ancianonakajj munasirïpjjatapatwa ‘llampʼu chuymamp uka jaqer cheqañchapjje’. Griego arut traducitäki uka ‘cheqañchaña’ arojja, kunjamsa nayrajj mä doctorajj chʼakha qhaqsusit mä jaqer qolläna, ukhamat sum jakjjañapataki uka toqet parlañatakiw apnaqasirïna. Chʼakha qhaqsusit mä jaqerojja, jan usuchtʼasaw doctorajj chʼak lugarapar uchjje, ancianonakajj ukhamarakiw juch lurir jilatarusa jan ukajj kullakarus wali munasiñamp cheqañchapjje, ukhamat jan jukʼamp aynachtʼañapataki. Ukhamarus Bibliajja, mayninakar ewjjtʼkasajj ‘jumanak pachpat wal amuyasipjjam’ sasaw sapa mayni ancianonakar ewjjtʼi. Kuna laykutejj jupanakajj pantjasirïpjjarakiwa, jan wali thakirus saranukupjjarakispawa. Ukhamajj juchachasirit sipans jilankapkaspas ukham janiw ancianonakajj amuyasipjjañapäkiti, jan ukasti humilde chuymanïpjjañapawa, suma chuymampiw juchachasirir uñjapjjañaparaki (1 Ped. 3:8).

15. ¿Kunsa mä probleman uñjasisajj lursna?

¹⁵ Ancianonakarojj confiysnawa. Jupanakajj kuntï jan yatiyañapatak confiyapki uk janiw mayninakar yatiyapkiti, ukhamarus amuyunakapat sipans Bibliarjam ewjjtʼapjjañapataki, problemanakasar saykatañatak jiwasar yanaptʼapjjañapatakiw capacitación katoqawayapjje (Prov. 11:13; Gál. 6:2). Cheqas ancianonakajj janiw igualäpkiti, yaqhepajj wali experiencianïpjjewa, yaqhepajj janiraki. Ukhamajj mä probleman uñjasisajj kawkïr ancianompis parltʼasiksnawa. Ukampis kuntï istʼañ munktan uk istʼañ laykukejj janiw sapa mayni ancianon ukar sarañasäkiti. Janiw Diosan ‘cheqa yatichäwinakap’ yateqañat sipansa ‘kuntï istʼañ munapki’ ukak istʼañ munir jaqenakjamäñ munktanti (2 Tim. 4:3). Kunapachatï mä problemat mä ancianor awistʼañäni ukhajja, inas jupajj “¿yaqha ancianonakamp uka toqet parljjtati, kamsasas ewjjtʼapjjtam?” sasin jisktʼchistani. Ukat inas uka ancianojj mayni anciano masiparojj uka toqet yanaptʼa maychispa (Prov. 13:10).

¿KUNA LURAÑANAKAMPIS SAPA MAYNEJJ PHOQAÑASA?

16. ¿Kun lurañatakis chʼamachasiñasa?

¹⁶ Ancianonakajj sum cuidapjjestu, wali sum ewjjtʼapjjarakistu, ukampis janiw kunsa lurañasa uk sapkistuti. Jehová Diosarojj qhawqsa munastanjja, qhawqsa jupar kusisiyañ muntanjja uk sapüruw arsutasampi luratasampi uñachtʼayañatak chʼamachasiñasa (Rom. 14:12). Jupaw suma amtanakar puriñasatakisa jupat jan jitheqtañatakis yanaptʼistani. Ukatwa kunsa lurañasa uk ancianonakajj jan sapkistaniti, antisas kunsa Jehová Diosajj mä toqet amuyi uk Bibliampiw amuytʼayapjjestani. Ukat jiwas pachp mä amtar puriñasatakiw jaytapjjestani. Ukaw ‘suma amuytʼasirïñ’ yateqañatakejj yanaptʼistani (Heb. 5:14).

17. ¿Kun lurañsa amtañasa?

¹⁷ Jehová Diosajja, kunjamtï mä suma awatirejj ovejitanakapar wali sum cuidkejja, ukhamwa wali sum cuidistu. ¡Walpun ukat jupar yuspärtanjja! Jupaw Jesusarojja, mä arunjja ‘suma awatirir’ khitaniwayi, ukhamat juchampit jiwañampit jiwasar kutsuyañataki, ukat wiñay jakañ suytʼäwinïñasataki (Juan 10:11). Ukhamarus Jehová Diosajj ancianonak toqew aka promesa phoqawayi: “Jumanakarojj munañaj lurir awatirinak churapjjäma, jupanakajj uñtʼañampi yatiñampiw manqʼayapjjarakïtam” (Jer. 3:15). Ukhamajj Diosar serviñ toqen aynachtʼatästan usutästan ukhajja, ancianonakar yanaptʼa mayipjjapuniñäni. Jehová Diosan uka regalop sum aprovechtʼañ amtapjjañäni.