‘Suma chuymanïpki’ ukanakarojj jankʼak yanaptʼapjjañäni

1. Prediktan ukhajj ¿kunjamsa jaqenakajj suma yatiyäwinak katoqasipjje? (Hechos 13:47, 48; 16:14, 15).

NAYRÏR patak maranakanjja, suma yatiyäwinak istʼasajj waljaniw wal kusisipjjäna, ukspachaw cristianöjjañ munapjjarakïna (Hechos 13:47, 48; 16:14, 15 liytʼäta). Jichhürunakanjja suma yatiyäwinak nayrïr kuti istʼasajj ukhamarakiw yaqhepanakajj wal kusisipjje. Yaqhepanakasti Diosat janiw qalltan yatiñ munapkiti, ukampis qhepat yatjjatañ munapjjaspawa. Ukhamajj predickasatï ‘suma chuyman’ jaqenak jikjjatstan ukhajja, ¿kunsa lurañasäspa?

2. ¿Kunatsa predicañajj mä yapu yapuchirimpi sasispajja?

² Predicañajja mä yapuchirimpi sasispawa. Kunapachatï mä yapuchirejj mä kuns satantki ukhajja, inas yaqhep satatanakapajj niya poqoratäjjatap amuychi, ukat apthapiñ amtarakchi. Prediktan uka jaqenakampejj niya ukhamarakiwa, yaqhepanakajj Bibliat yatjjatañatakejj dispuestokïpjjewa. Ukatwa jupanakar ukspach yatichañatakejj chʼamachastanjja. Ukampis khitinakatï qalltan Diosan arunakap jan yatiñ munapki ukanakarojja, kunatsa Diosat yatjjatapjjañapajj wakisi uk amuyapjjañapatakiw yanaptʼaskaktanjja (Juan 4:35, 36). Maynejj Bibliat yatjjatañatakejj wakichtʼatati janicha uk amuyañäni ukhajja, kunjamsa jupar yanaptʼsna uk yatiñäniwa. Maynitï nayrïr kuti Bibliat parltʼatajj wali sum istʼchistu ukhajja, kunsa lurañasa ukwa aka yatichäwin yatjjataskañäni. Jehová Diosar jukʼamp jakʼachasiskakiñapatakisa jupar serviñapatakis kunsa luraraksna ukwa yatjjataskarakiñäni.

SUM ISTʼAPKISTU UKANAKAROJJ ¿KUNJAMSA YANAPTʼSNA?

3. Predickasajj maynitï wali sum istʼistani ukhajj ¿kunsa lurañasa? (1 Corintios 9:26).

³ Suma yatiyäwinak predicasajj maynitï wali sum istʼchistu ukhajja, ukspachaw yanaptʼañasa, ukhamat jakañar apki uka thaknam sarañapataki. Janiw suytʼañajj wakiskiti, jupampi nayrïr kut parltʼkañäni ukhajja, Bibliat yatjjatañapataki ukat tantachäwinakar sarañapatakiw invittʼsna (1 Corintios 9:26 liytʼäta).

4. ¿Kuna experiencias nayrïr kut parlktan ukhatpach Bibliat yatjjatañ munirinak utjatap uñachtʼayi?

⁴ Bibliat yatjjatañapatak invittʼam. Suma yatiyäwinak nayrïr kut istʼapki ukhatpachaw yaqhepanakajj Bibliat yatjjatañ munapjjaspa. Ukaw Canadá markan pasäna. Mä jueves urojja, carritomp predicasipkäna ukaruw mä tawaqojj jakʼachasïna, ukat ¡Wiñayatakiw kusisit jakasisma! sat folleto aptasïna. Carritomp predickäna uka kullakajja, uka folletompejj Bibliat gratisakiw yatjjatasma sasaw qhanañchäna. Uka tawaqojj Bibliat yatjjatañ munänwa ukat numeropwa kullakar churarakïna. Ukat uka tawaqojj ukürpachaw kunjamsa Bibliat yatjjataspa uka toqet jukʼamp yatiñatak kullakar mä mensaje apayäna. Kullakajj aka seman tukuyaw yatjjatsna sasin säna ukhajja, uka tawaqojj “qharürojj tiemponïsktwa, ¿janit qharürojj yatjjatksna?” sasaw säna. Ukhamatwa qhepürpach Bibliat yatjjatañ qalltapjjäna, uka seman tukuyasti tantachäwiruw saräna ukat ratukiw Diosar serviñan nayrar sartäna.

5. Maynir Bibliat yatjjatañapatak invittʼkasajja, ¿kunsa amtañasa? (Fotonak uñjjattʼarakïta).

⁵ Cheqansa, janiw taqenis uka tawaqjamajj nayrïr kut Bibliat parlktan ukhatpachajj Bibliat yatjjatañ munapkaspati. Awisajja, kuna toqetti utanejj parlañ munkaspa uka toqet parlañaw wakisispa, ukhamat Bibliat yatjjatañ munañapataki. Ukampis jiwasatï mayninakat cheqpachapun llakisiñäni, janirak qarjtkañäni ukhajja, Bibliat yatjjatañapatakiw maynirojj yanaptʼsna. ¿Bibliat yatjjatañ munañapatakejj kamssnasa? Uka pachpa jisktʼarakiw Bibliat yatichapki uka jilat kullakanakarojj jisktʼasïna. Kamsasas jaysapjjäna uk uñjapjjañäni.

6. ¿Maynimpi Bibliat wasitat parltʼañatakejj kamssnasa?

⁶ Uka jilat kullakanakajj akham sapjjewa: “Bibliat yatjjatañ munañapatakejj janiw awisajj ‘¿mä estudio jan ukajj mä curso katoqañ munasmati?’ sasin jisktʼañajj wakiskiti. Jan ukasti ‘¿Bibliat jukʼamp parltʼaña jan ukajj kuna toqets Bibliajj parli uk yatiñ munasmati?’ sasin jisktʼañaw wakisi. Ukat utanejj jumamp mayamp parltʼañ munañapatakejja, akhamwa sapjjarakisma: ‘Jisktʼanakaman respuestanakap Biblianwa jikjjatasma’, jan ukajj ‘Bibliajj janiw religión toqetak parlkiti, jan ukasti wali suma ewjjtʼanakaniwa, yanaptʼarakiristamwa’ sasa. Ukat akham sapjjasmawa: ‘10 jan ukajj 15 minutonakanakwa jumajj wali wakiskir yatichäwinak yateqasma’ sasa”. Utanejj Bibliat yatjjatañatak obligatjam jan amuyasiñapatakisa jan llakisiñapatakisa, sapa semanaw kuttʼanëjja sañajj janiw wakiskaspati.

7. Kunatï cheqäki uk yateqasipkatap ¿kawkinsa yaqhepanakajj amuyapjjaspa? (1 Corintios 14:23-25).

⁷ Tantachäwir invittʼam. Amuyatajj apóstol Pablojj jakkäna uka tiemponjja, yaqhep jaqenakajj mä tantachäwir sarasaw kunatï cheqaki uk yateqasipkatap amuyapjjäna (1 Corintios 14:23-25 liytʼäta). Jichhürunakanjja ukhamarakiw waljanejj tantachäwinakar sarasajj Jehová Diosar serviñ jankʼak qalltapjje. Ukhamajj ¿kunapachas tantachäwinakarojj invittʼañasäspa? ¡Wiñayatakiw kusisit jakasisma! sat libronjja, 10 yatichäwipanwa yateqerirojj tantachäwinakar sarañapatak chʼamañchtʼi, ukampis janiw ukhar puriñkamajj invittʼañatakejj suyañasäkaspati. Jan ukasti nayrïr kut parlktan ukhatpachaw tantachäwinakar invittʼsna, inas taqenitak arstʼäwin kuna toqetsa parlasini jan ukajj Yatiyañataki revistan kuna toqetsa yatjjatasini uk jupar mä jukʼa parltʼsna.

8. Maynirutï tantachäwinakasar invittʼañäni ukhajj ¿kunanaksa qhanañchañasäspa? (Isaías 54:13).

⁸ Tantachäwinakasar maynir invittʼkasajja, kunansa yaqha religionankir tantachäwinakampejj jan igualäki ukwa qhanañchtʼsna. Yatiyañataki sat revistat yatjjatasiskäna uk nayrïr kut istʼasajja, mä yateqerejj akham sasaw yatichiripar jisktʼäna: “¿Tantachäw sarayki ukajj taqenin sutinakapti yati?” sasa. Kullakajj akham sasaw yateqerirojj säna: “Congregacionajj mä familiar uñtasitawa, ukatwa taqenin sutinakap yatiñatak chʼamachasipjjta” sasa. Yateqeristi “iglesiajan mä qhawqhanikiw yaqhanakan sutinakap yatipjje” sasaw säna. Kuna amtampis tantachastan uk inas waljanejj jan yatipkchiti, ukatwa qhanañchtʼañajj wakisispa (Isaías 54:13 liytʼäta). Jehová Diosar adorañataki, jupat jukʼamp yatjjatañataki ukat maynit maynikam chʼamañchtʼasiñatakiw tantachastanjja (Heb. 2:12; 10:24, 25). Ukatwa tantachäwinakasajj jukʼamp yatjjatañasatak wali suma organistʼat apasi, janiw kuna costumbrenakas amtaskiti (1 Cor. 14:40). Ukhamarus tantachasiñ lugaranakajja, jiwasan yateqañasatakejj wali qhana lugaranakawa. Ukat niyakejjay jan akapachankirïkstanjja, janiw tantachäwinakan politicat parlktanti ni mä partidorus apoyktanti, janirakiw jiskhisiñanakasa ni arnaqasiñanakas utjkiti. Invitktan uka jaqejj tantachäwinakasajj kunjamas apasi uk amuyañapatakejja, ¿Kunjamsa tantachäwinakajj apasi? sat video uñtaysna.

9, 10. Maynirutï tantachäwinakar invittʼañäni ukhajja, ¿kunanaksa jan ajjsarañapatakejj jupar qhanañchañasa? (Foto uñjjattʼarakïta).

⁹ Yaqhepanakajja tantachäwinakar sarirista ukhajj Testigöjjañamawa sapjjetaniwa sasaw ajjsarapjje. Ukatwa Testigöpki jan Testigöpkaraki ukanakas taqeniw tantachäwinakar sarapjjaspa sasin qhanañchañasa. Jupatï munchi ukhajja, tantachäwinakar saraspawa, janiw khitis tantachäwin arstʼañamawa religionams jaytjjañamawa sasin siskaniti, uksa qhanañchañasarakiwa. Awk taykanakajj juntukiw wawanakapamp tantachasipjje, janiw wawanakajj yaqh tantachasipkiti. Ukhamatwa awk taykanakajj wawanakapajj kunsa yateqasipki, kunsa lurasipki uk yatipjjaspa (Deut. 31:12). Jesusan arunakaparjamajj janiw kuna qollqsa tantachäwinakan mayktanti, kuna laykutejj jupajj akham sänwa: “Gratisakiw katoqapjjtajja, gratisakirak churapjjam” sasa (Mat. 10:8). Ukatjja isisiñ toqet qhanañchañasarakiwa, janiw jila alani isinakamp jutañapajj wakiskiti. Kuna laykutejj janiw Diosajj uñnaqasak uñjkiti, jan ukasti kunatï chuymasankki ukwa uñji (1 Sam. 16:7).

¹⁰ Invittʼkañäni ukatï tantachäwir jutani ukhajja, sumak jikjjatasiñapataki, jan mayjtʼasiñapatakiw yanaptʼañasa. Ukatakejj ancianonakaru ukat yaqha jilat kullakanakaruw presenttʼsna. Ukhamtï jupar yanaptʼañänejja, mayampiw tantachäwisar jutañ munaspa. Jan Biblianïkchi ukhajja, Bibliasatwa textonak uñachtʼayañasa ukat kunsa tantachäwin yatjjatasktan uks qhanañchtʼañasarakiwa.

BIBLIAT YATJJATAÑ MUNAPKI UKANAKAROJJ ¿KUNJAMSA YANAPTʼSNA?

11. Estudiosajj yateqañatak tiempo apstʼaski uk respetatasjja, ¿kunjamsa uñachtʼaysna?

¹¹ Maynirutï Bibliat yatichañ qalltstan ukhajja, ¿kunanaksa amtañasa? Yateqañatak tiempo apstʼaski ukjja respetañasawa. Amuytʼañataki, jakasktan uka cheqantï jaqenakajj qheptʼatak sarnaqañ yatipjjchi ukhasa, kuna horar sarañtï arsuwayktan uk phoqañasawa. Nayrïr kut yatjjatkañäni ukhajja, janiw jaya tiempöñapäkiti. Uka toqetjja, experienciani yaqhep jilat kullakanakajj akham sapjjewa: “Yateqerejj yatjjatañ munaskakini ukhasa, qhawqha tiempo yatjjatañtï amtawayktan ukarjamakiw yatjjatañasa” sasa. Ukat jiwasat sinti parlañat sipansa, yateqerisaw parlañapa (Prov. 10:19).

12. ¿Bibliat yateqerisarojj kuna amtampis qalltatpach yatichañasa?

¹² Yateqerisajja Jehová Diosampiru Jesusampiru uñtʼaspa munasirakispa ukwa muntanjja, uka amtampiw yatichañasa. Ukatakejja pachpa amuyunakasak yatichañat sipansa, Bibliampiw yatichañasa (Hech. 10:25, 26). Apóstol Pablotwa yateqassna. Jehová Diosajj jupar uñtʼañasatakisa jupar munasiñasatakisa Jesucristoruw khitanïna, ukatwa apóstol Pablojj jaqenakar yatichirïkäna ukhajj Jesusatpun yatichirïna (1 Cor. 2:1, 2). Ukatjja machaq discipulonakar suma chuymanïpjjañapatak yanaptʼañajj kunja wakiskirisa uka toqetsa parlarakïnwa. Suma chuymanïñajj qoriru, qollqe metalaru, wali valoran qalanakar uñtasitawa sasaw säna (1 Cor. 3:11-15). Ukanakat yaqhepajj akanakawa: Jehová Diosar confiyaña, yatiñanïña, amuytʼasirïña ukat Jehová Diosar ajjsaraña (Sal. 19:9, 10; Prov. 3:13-15; 1 Ped. 1:7). Pablot yateqasisajja, yateqerinakasarojj Jehová Diosar jukʼamp confiyapjjañapataki, jupamp sum apasipjjañapatak yanaptʼapjjañäni (2 Cor. 1:24).

13. ¿Kunas pacienciamp yatichañatakisa wali amuyump yatichañatakis yanaptʼistaspa? (2 Corintios 10:4, 5; foto uñjjattʼarakïta).

¹³ Jesusat yateqasisajja, pacienciampi ukat wali amuyumpiw yatichañasa. Janiw yateqerisarojj jupar mayjtʼasiykaspa uka jisktʼanak jisktʼañasäkiti. Yateqerisatï mä yatichäw jan sum amuykani ukhajja, janiw uk sum amuyañapkam ukan qheparañasäkiti, jan ukasti yatjjataskakiñasawa, yaqha horasanwa uka yatichäwit wasitat yatjjatsna. Biblian mä yatichäwiparjam lurañatï jupatak chʼamäni ukhajja, paciencianïñasawa, Biblian yatichäwinakapajj chuymapar purtʼañapatakiw tiempo churañasa (Juan 16:12; Col. 2:6, 7). Kʼari yatichäwinakajj suma saytʼat mä perqar uñtasitawa sasaw Bibliajj qhanañchi (2 Corintios 10:4, 5 liytʼäta; “derrumbar cosas fuertemente atrincheradas” siski ukwa español arut utjki uka Biblia de estudion notapan liytʼäta). Yateqerisajj kʼari yatichäwinak jaytjjañapatakejja, nayraqatajj Jehová Diosaruw mä imantasiñ lugarapäkaspas ukham uñjañapa, ukatakiw yanaptʼañasa (Sal. 91:9).

TANTACHÄWIR SARAPKI UKANAKAROJJ ¿KUNJAMSA YANAPTʼSNA?

14. Tantachäwinakar jutapki ukanakarojj ¿kunjamsa uñjañasa?

¹⁴ Jehová Diosajja tantachäwinakar jutapki ukanakarojj jan yaqhachasa ukat munasiñap uñjsna ukwa muni, kawkja markatäskpasa pobrëpasa janisa taqenir ukham uñjañaswa muni (Sant. 2:1-4, 9). Kunjamsa uk lursna uk jichhajj uñjapjjañäni.

15, 16. Tantachäwir nayrïr kut jutapki ukanakan sum jikjjatasipjjañapatakejj ¿kunsa lursna?

¹⁵ Yaqhep jaqenakajja, tantachäwinak aleq uñjirikiw jutapjje, jan ukajj maynin invitataw jutapjje. Ukhamajj maynitï nayrïr kut tantachäwir jutani ukhajja, jankʼakiw sum katoqtʼañasa. Munasiñamp katoqtʼapjjañäni, ukampis jan jupar mayjtʼasiyapjjañäniti. Jiwasamp qontʼasiñapatakiw invittʼsna. Bibliampi ukat yatjjatktan uka qellqatampwa jupatak jikjjatarapiñasa, jan ukajj jiwasankirwa chursna. Kun lurañas sumak jikjjatasiñapatak yanaptʼaspa uk amuytʼañäni. Mä jaqejj tantachäwir nayrïr kut saräna ukhajja, wal ajjsarayasïna, kuna laykutejj janiw tantachäwitakjam isthapitäkänti. Jupar katoqtʼkäna uka jilatajja, uka jaqerojj “jan llakisimti Testigonakajj mayni jaqenakjamakïptwa” sasaw säna. Uka jaqejj qhepat bautisasjjänwa, kunjamsa jilatajj jupar katoqtʼäna uk janiw armkänti. Maysa toqetjja, tantachäwinakar jutapki ukanakarojj munasiñampis katoqchiñänejja, janiw jakäwipat taqe kun yatiñ munasajj jiskhiñasäkiti (1 Ped. 4:15).

¹⁶ ¿Tantachäwir jutapki ukanakan sum jikjjatasipjjañapatakejj kunanakampsa lursna? Tantachäwin arstʼkasasa asignacionasamp phoqkasasa jan ukajj parlkasasa, jan Testigöpki ukanakatsa creencianakapatsa respetompipuniw parlañasa. Ukhamajj janipun jupanakan chuymap ustʼayapjjañäniti, kuna laykutejj jutasipkakiñapwa muntanjja (Tito 2:8; 3:2). Amuytʼañataki, jupanakan creencianakap jiskʼachañajj janipuniw walïkaspati (2 Cor. 6:3). Discursonak arstʼapki uka jilatanakajja, uka toqenakat wal amuyasipjjañapa. Visitapkistu ukanakatakitï yaqhep arunakajj jan entiendiñjamächi ukhajja, uka arunakajj kamsañsa muni uk sumwa arstʼirinakajj qhanañchapjjañapa.

17. ‘Suma chuyman’ mä jaqer jikjjatasajj ¿kunsa lurañasa?

¹⁷ Niyakejjay akapachan tukusiñapajj sapürutjam jakʼachasisinkchejja, predicañajj wali importantewa, ‘wiñay jakañatak suma chuymani’ jaqenakajj utjaskakiwa (Hech. 13:48). Ukhamajj jupanakarutï predicañäni ukhajja, Bibliat yatjjatapjjañapataki ukat tantachäwinakar sarapjjañapatak invittʼapjjañäni. Ukhamtï lurañänejja, ‘jakañar apki’ uka thaknam sarapjjañapatakiw yanaptʼaskañäni (Mat. 7:14).