Mayninak layku orañ jan armasipjjañäniti

1. Oracionanakasajj Jehová Diosatak wali importantëtap ¿kunjamatsa yattanjja?

ORACIONAJJ Jehová Diosan mä suma regalopawa. Ak amuytʼañäni: Jehová Diosajj mä qhawqha luräwinak angelanakaruw churawayi, Jesús Yoqaparojj wali wakiskir luräwinakwa churawayaraki (Sal. 91:11; Mat. 28:18). Ukampis Jehová Diosaw ‘oracionanakas istʼi’, janiw khitirus uka luräwi churawaykiti (Sal. 65:2). Jupa pachpaw oracionanakas istʼañ muni.

2. ¿Kunsa apóstol Pablot yateqassna?

² Taqe llakinakaswa Jehová Diosar cuenttʼsna, ukampis mayninak laykojj orañasapuniwa. Ukwa apóstol Pablojj luräna. Jupajj Éfeso markankir taqpach jilat kullakanakarojj akham sänwa: “Oración lurasajj jumanakatakejj mayipuntwa” sasa (Efes. 1:16). Mayni sapatakikis orarakirïnwa. Timoteorojj akham sasaw qellqäna: “Diosarojj walpun nayajj yuspärta, [...] uruy aruma oracionan ruwtʼaskasajja, jumat amtasipuntwa” sasa (2 Tim. 1:3). Apóstol Pablojj walja llakinakan uñjasisajj jupa sapatakikiw orasispäna, ukampis janiw ukhamäkänti, mayninak layku orañatakejj tiempo apstʼasipunirïnwa (2 Cor. 11:23; 12:7, 8).

3. ¿Kunatsa awisajj mayninak layku orañ armassna?

³ ¿Kunatsa mayninak layku orañ awisajj armtʼassna? Sabrinaa kullakajj akham siwa: “Sapürojj jan tiemponikiw sarnaqtanjja. Ukatwa problemanakasat piensasajj kuntï jiwasajj munktan uk mayisak orasjjsna” sasa. Jiwasatï uka kullakjam uñjasirakstan ukhajja, aka yatichäwejj wal yanaptʼistani. Aka yatichäwinjja, mayninak layku orañajj kunatsa wali wakiskirejja ukwa yatjjatañäni. Ukjjarusti, mayninak layku orañatakejj kunas yanaptʼistaspa ukwa yatjjataskarakiñäni.

¿KUNATSA MAYNINAK LAYKU ORAÑAJJ WALI WAKISKIREJJA?

4, 5. Mayninak layku oración lurktan ukajj ¿kunatsa ‘wali chʼamanejja’? (Santiago 5:16).

⁴ Mayninak layku oración lurktan ukajj “wali chʼamaniwa” (Santiago 5:16 liytʼäta). ¿Mayninak layku oración lurktan ukajj cheqpachapunit jupanakar yanaptʼaspa? Jïsa, yanaptʼaspawa. Pedrojj kims kutiw Jesusar jan uñtʼir tukuñapäna, uk yatisajj Jesusajj jupar akham sänwa: “Nayajj walpun Diosar jumatak ruwtʼarapsma, ukhamat Diosar confiyañan jan aynachtʼañamataki” sasa (Luc. 22:32). Oracionajj kunja chʼamanisa uk Pablojj yatirakïnwa. Ukatwa akham sasin Filemón chachar qellqäna: “Oración wal lurapjjatamatjja inas antutapjjchitani, ukhamat jumanakan ukar mayamp jutañataki” sasa. Pablojj uka arunak qellqkäna ukhajja, ina chʼusat juchañchatäsaw Roma markan mä utan llawintatäskäna (Filem. 22). Mä jukʼa tiempotjja, cheqapuniw Pablorojj antutjjapjjäna, ukhamatwa mayamp predikjjäna.

⁵ Ukampis ukajj oracionasarjam lurañapatakis Jehová Diosar obligksna ukham janiw sañ munkiti. Llakinakasat jupar cuentʼtan ukhajja, jupajj wali atencionampiw istʼistu, awisajj oracionasarojj jaysarakiwa. Uk yatiñajja, kunatï wal llakisiykistu ukat wal orasiñataki, ukat kunatï nayatakejj walïki ukwa Diosajj lurani sasin confiyañatakiw chʼamañchtʼistu (Sal. 37:5; 2 Corintios 1:11 liytʼasajj español arut utjki uka Biblia de estudion notanakap liytʼäta).

6. Mayninak layk orañajj ¿kunjam chuymanïñatakis yanaptʼistu? (1 Pedro 3:8).

⁶ Mayninak layku orañajj ‘wali sinttʼasirïñatakiw’ yanaptʼistu (1 Pedro 3:8 liytʼäta). Mä sinttʼasir jaqejja, kunanakas mayninakar tʼaqesiyi uk amuyapuniwa, ukat jupanakar yanaptʼañwa munaraki (Mar. 1:40, 41). Michael sat mä ancianojj akham siwa: “Mayninak layk orañajja, kuna problemanakans uñjasisipki uk amuyañatakiw yanaptʼitu, janisay jupanakajj yatipkchejja, jupanakan jakʼapankkiristsa ukhamwa amuyasta” sasa. Mayninak layku orañajj kunjamas yanaptʼasi uka toqetjja, Richard sat mä anciano jilatajj akham sarakiwa: “Mayni layku ortan ukhajja, jukʼampiw jupar yanaptʼañ muntajja” sasa. Ukat akham sarakiwa: “Diosat mayirapkayätan uka jaqer yanaptʼtan ukhajja, pachpa oracionasarus jaysksna ukhamäspawa” sasa.

7. Mayninak layk orañajj ¿kunatsa problemanakasat jan añch llakisiñatak yanaptʼistu? (Filipenses 2:3, 4; fotonak uñjjattʼarakïta).

⁷ Mayninak layk orañajj problemanakasat jan añch llakisiñatakiw yanaptʼistu (Filipenses 2:3, 4 liytʼäta). Supayan apnaqat akapachanjja, taqeniw jan waltʼäwinakan uñjastanjja (1 Juan 5:19; Apoc. 12:12). Kunapachatï mayninak layku oración lurapuntan ukhajja, ‘oraqpachan jilat kullakanakajj jiwasjam tʼaqesisipkatap amtañatakiw’ yanaptʼistu (1 Ped. 5:9). Katherine sat mä precursora kullakajj akham siwa: “Janiw naya sapakejj jan walinakan uñjaskti, uk amtañatakiw mayninak layku oración lurañajj yanaptʼitu. Ukhamatwa jan naya pachpatak llakisjjti” sasa.

¿KHITINAKATAKIS ORACIÓN LURSNA?

8. ¿Khitinak laykus oración lursna?

⁸ Waljanitakiw oración lursna. Sañäni, usutäpki ukanakataki, jan ukajj jilïrkipstasin tʼaqesisipki ukanakatakiw orarapsna, wayn tawaqonakatakis oración luraraksnawa, kuna laykutejj jupanakajj escuelan mayninakan burlasita, jan walinak lurañatak chʼamañchata ukhamaw uñjasipjje. Walja jilat kullakanakarakiw awisajj pachpa familiapamp jan waltʼayat uñjasipjje, yaqhep jilat kullakanakasti gobiernonakamp arknaqataw uñjasipjjaraki (Mat. 10:18, 36; Hech. 12:5). Yaqhepasti política toqet jan waltʼañanak utjatap laykuw utanakap jaytasin sarjjapjjaraki, yaqhepasti desastres naturales ukanak utjatap laykuw tʼaqesipjjaraki. Uka jan walinakan uñjasir jilat kullakanakarojj inas jan uñtʼkstanti. Ukampis jupanak layku oración lurtan ukhajja, maynit maynikam munasipjjam sasin Jesusajj siskäna uka mandator istʼataswa uñachtʼaytanjja (Juan 13:34).

9. Diosan markapan lurañanakanïpki uka jilatanakatakisa esposanakapatakis ¿kunatsa oración lurañasa?

⁹ Jehová Diosan markapan walja lurañanakanïpki uka jilatanakatakis oración luraraksnawa. Sañäni, Cuerpo Gobernantetaki, yanapirinakapataki, Comité de Sucursal ukankirinakataki, Betelan departamentonakat encargatäpki uka jilatanakataki, superintendente de circuito jilatanakataki, congregacionankir ancianonakataki ukat siervo ministerialanakatakiw oración lursna. Jupanakajj jiwasar yanaptʼañatakejj wal chʼamachasipjje, ukampis jupanakajj llakinakanïpjjarakiwa (2 Cor. 12:15). Mark sat superintendente de circuito jilatat parltʼañäni. Jupajj akham siwa: “Awk taykajat jayankañajj nayatak wali chʼamawa. Jupanakajj jilïrëjjapjjatap laykojja, usutäpjjewa. Kullakajampi cuñadojampejj wali munasiñampis jupanakar cuidapkchejja, awk taykajar jan jukʼamp yanaptʼañ pueditajat wal chuym usuyasta” sasa. Diosan markapan lurañanakanïpki uka jilatanakajj kunjamas jikjjatasipjje uk janisay yatkstanjja, jupanak laykojj orañasawa (1 Tes. 5:12, 13). Esposanakap laykus oración luraraksnawa, kuna laykutejj jupanakaw esposonakapar yanaptʼapjje, ukhamat jilat kullakanak layku wal trabajtʼasipkakiñapataki.

10, 11. ¿Taqe jilat kullakanakatak oración lurktan ukajj Jehová Diosar gustpachati?

¹⁰ Kunjamtï yatjjataniwayktanjja, walja jilat kullakanakatakiw awisajj oración lurtanjja. Inas carcelankapki uka jilat kullakanakar yanaptʼañapataki, jan ukajj maynin jiwatapat wali llakitäki uka jilataru jan ukajj kullakar chuymachtʼañapatak Jehová Diosar oración lurstan. Donald sat mä anciano jilatajj akham siwa: “Walja jilat kullakanakaw kunayman jan walinakan uñjasisipki, ukatwa awisajj taqenitak oración lurtanjja” sasa.

¹¹ ¿Uka kasta oracionanakajj Jehová Diosarojj gustpachati? ¡Jïsa, gustiwa! Taqe jilat kullakanakajj kunsa necesitapjje uk janiw yatktanti, ukhamajj taqe jilat kullakanakatak orañajj walikïskiwa (Juan 17:20; Efes. 6:18). Ukham lurasaw ‘taqpach creyente masinakasar munasitas’ uñachtʼaytanjja (1 Ped. 2:17).

¿MÄ JILATA JAN UKAJJ MÄ KULLAK LAYKU ORAÑATAKEJJ KUNSA LURAÑASA?

12. Mayninakajj kunjamäsipkis uk amuyañajj ¿kunjamsa jupanakatak oración lurañatak yanaptʼistu?

¹² Mayninakajj kunjamäsipkis uk sum amuyañasawa. Niyakejjay taqenitak oración lurañajj walikïchejja, mä jilata jan ukajj mä kullak layku oración lurañajj walirakiwa. Inas congregacionasankir mä jilatasa jan ukajj mä kullakas mä jan wali usump tʼaqesiskchi, colegiopankir compañeronakapan jan walinak lurañatak chʼamañchat uñjasisajja, inas mä wayna jilatasa jan ukajj mä tawaq kullakas desanimat jikjjataschi, inas mä jilatasa jan ukajj mä kullakas ‘Jehová Diosajj munki ukarjam cheqañchasa ewjjtʼasa’ wawapar sapak uywaskchi. ¿Janit jupanakatak oración lurksna? (Efes. 6:4). Jiwasatï jilat kullakanakajj kunjamäsipkisa uk amuyañäni ukhajja, sinttʼasiñat jupanak laykuw orañäni (Rom. 12:15).b

13. ¿Jan uñtʼktan uka jilat kullakanak laykojj oración lursnati?

¹³ Sutinakap aytañasawa. Jan uñtʼktan uka jilat kullakanakan sutinakapsa oracionasan aytaraksnawa. Ak amuytʼañäni, Crimea, Eritrea, Rusia, Singapur markanakanjja, walja jilat kullakanakaw carcelanakan llawintat uñjasipjje. Jw.org sat cheqanwa jupanakan sutinakap jikjjatsna.c Brian sat mä superintendente de circuito jilatajj akham siwa: “Carcelan llawintatäki uka mä jilatana jan ukajj mä kullakan sutip qellqtʼasta ukat jachʼat sutip arsurakta ukhajja, sutipat amtasisajj oracionanakajan aytapuntwa” sasa.

14, 15. ¿Oracionasan kamsañänisa uk amuytʼañatakejj kunas yanaptʼistani?

¹⁴ Kuna yanaptʼsa munapjje uk amuytʼañasawa. Párrafo 6 ukan parlaniwayktan uka Michael jilatajj akham siwa: “Carcelan llawintatäpki uka jilat kullakanakan experiencianakap jw.org sat cheqan liytʼta ukhajja, jupanakjam carcelan llawintatïrista ukhajj kunjamakis jikjjatasirista ukwa amuytʼta. Esposajat wal llakisirista, suma cuidatäñapwa munarakirista. Ukanak amuytʼañaw casado jilatanakajj kunjamakis jikjjatasipjjpacha uk amuytʼañataki ukat ukarjam orañatak yanaptʼitu” sasa (Heb. 13:3, nota).

¹⁵ Jilat kullakanakajj kunjamakis carcelan llawintatäsajj sapür jikjjatasipjjpacha uk amuytʼasajja, kuna toqenakatsa Jehová Diosar oracionasan parltʼsna uk sum amuytʼtanjja. Carcelankir guardianakajj munasiñamp jupanakar uñjapjjañapataki, jan ukajj jila autoridadanïpki ukanakajj Diosar libre adorapjjañapatak dejapjjañapatakiw maysna (1 Tim. 2:1, 2). Ukatjja Diosat jan jitheqtir uka jilat kullakanakan yateqaskayäpjjatapajj uka markankir jilat kullakanakar chʼamañchtʼañapataki, jan Testigöpki uka jaqenakajj predicacionan istʼapjjañapatak chʼamañchtʼañapatakiw oraraksna (1 Ped. 2:12). Ukhamajj mayninakajj kunjamäsipkisa uk amuytʼañasa, jupanakan sutinakap aytañasa, kuna yanaptʼsa munapjje uk amuyañasa, wali wakiskiriwa, janiw carcelankapki ukanakatakik ukham mayiñasäkiti jan ukasti yaqha jan walinakan uñjasir jilat kullakanakatakis ukham mayiñasarakiwa. Ukhamatwa jilat kullakanakasar ‘jukʼampi munasitas’ uñachtʼayañäni (1 Tes. 3:12).

ORACIONASAR KUNJAMSA DIOSAJJ JAYSANI UKAR CONFIYAPJJAÑÄNI

16. ¿Orasiñatakejj kunsa amtañasapuni? (Mateo 6:8).

¹⁶ Kunjamtï yatjjataniwayktanjja, oracionanakasajj wali chʼamaniwa, mayninakarojj yanaptʼaspawa. Ukampis kunjamsa Diosajj oracionasar jaysani ukar confiyañasawa. Oración lurktan ukhajja, kuntï jupar sisktan uk jupajj yatjjewa. Akwa lurañama sasajj janiw juparojj sañasäkiti, kunsa servirinakapajj necesitapjje uk jupanakat sipansa jan ukajj jiwasat sipans jukʼamp nayraw yatjje (Mateo 6:8 liytʼäta). Ukhamajj ¿kunatarak mayninak layku orañasäspasti? Aka yatichäwinjja, kunatsa mayninak layk orañasa ukwa yatjjatawaytanjja. Ukat ¿kunatsa mayninak layku orañasaraki? Mayninak layku llakisipki ukanakajj ukwa lurapjje, jiwasajj jaqenakar munasitas laykuw jupanak layk oración luraraktanjja. Jupjam munasirïñatak chʼamachasitas uñjasajja, Jehová Diosajj walpun kusisi.

17, 18. Mayninak layku oración lurktan uk Jehová Diosajj istʼaskiwa sasajj ¿kunatsa jan payachasktan? Uk qhanañchtʼam.

¹⁷ Mayninak layku oración lurktan ukajj janisay amuyusarjamajj jupanakar yanaptʼkchejja, jilat kullakanakasar munasitaswa uka oracionanakajj uñachtʼayi, ukhamarus Jehová Diosajj uka oracionanak istʼaskiwa. Pä wawani mä chachat amuytʼañäni, maynïrejj yoqallituwa, maynïrejj imillitarakiwa. Yoqallitojj wali usutaw ikiñankaski, ukat imillitajj “mirä amp suma, jilajar yanaptʼakimaya. Jupajj wali usutawa” sasaw kutin kutin papitupar mayi. Yoqall wawapajj kunjamas jikjjatasi uk tatapajj sum yatjje, wal munasiraki, wali sumaw cuidaskaraki. Ukampis imillitapan jilapar wal munasitap uñjasajja, uka chachajj wal kusisi.

¹⁸ Jehová Diosajj ukhamarakiw mayninak layku llakissna, jupanak layku oración lursna uk muni. Ukham lurasajj janiw jiwasatakik llakisitas uñachtʼaykañäniti, jan ukasti jilat kullakanakasat llakisitaswa uñachtʼayarakiñäni, Jehová Diosajj uka oracionanak sum katoqasini (2 Tes. 1:3; Heb. 6:10). Ukat kunjamtï yatjjataniwayktanjja, oracionanakasajj mayninakarojj wal yanaptʼaspa. ¡Ukhamajj jilat kullakanakasatak oracionasan mayipjjapuniñäni!