Cuerpo Gobernantenkir pä machaq jilatanaka

5 DE OCTUBRE DE 2024 maranjja, reunión anual sat tantachäwin Jody Jedele ukat Jacob Rumph jilatanakajj Cuerpo Gobernante taypinkjjapjjewa sasaw yatiyasïna. Jupanakajj jan jitheqtasaw Jehová Diosar walja maranak servisipki.

Jody Jedele jilatajj Misuri (Estados Unidos) markanwa nasïna. Awk taykapaw juparojj Bibliat yatichapjjäna, jakapkäna uka lugaranjja jukʼa Testigonakakiw utjäna. Walja jilat kullakanakaw predicacionamp yanaptʼañatakejj uka cheqar sarapjjerïna, ukhamatwa Jody jilatajj walja jilat kullakanakar uñtʼawayi. Jehová Diosan markapan kunja mayachtʼatäpjjänsa munasirïpjjarakïnsa uk uñjañajj wal jupar yanaptʼäna. 15 de octubre de 1983 maranwa bautisasïna. Predicañajj wal jupar gustäna, ukatwa colegio tukuyasajj septiembre de 1989 maran precursor regularat serviñ qalltäna.

Jupampi kullakapampejj jiskʼäsipkäna ukhajja, awk taykapajj Betelar irpapjjapunirïnwa. Ukaw jupanakarojj Betelar sarañ munapjjañapatak chʼamañchtʼawayi. Qhepat paniniw Betelan serviñ qalltapjjäna. Jody jilatajj septiembre de 1990 maranwa Wallkill Betelan serviñ qalltäna. Departamento de Limpieza ukanwa trabajïna, qhepat Servicios Médicos uka departamentonwa trabajirakïna.

Betel jakʼanjja, español aru parlir congregacionanakajj wal jiljjattaskäna, jilatanakan yanaptʼapajj wal munasirakïna. Ukatwa Jody jilatajj uka aru parlir mä congregacionar saräna, español aru parlañ yateqarakïna. Mä jukʼa tiempotjja, circuitopankir Dámaris sat mä precursora kullakaruw uñtʼäna. Qhepat jupampiw casarasïna, ukat panpachaniw Betelan sirvjjapjjäna.

2005 maranwa Betelat sarjjapjjäna, ukhamat mamapampiru esposapan papit mamitapampir cuidañataki. Uka tiemponjja, precursor regularatwa servipjjäna, Jody jilatajj Precursoranakatak Escuelan walja kutiw instructoräna. Comité de Enlace con los Hospitales ukat Comité Regional de Construcción ukanwa yanaptʼarakïna.

2013 maranwa wasitat Betelar invittʼapjjäna, Warwick markan luraskäna uka construccionan yanaptʼañataki. Uka qhepatjja, Patterson ukat Wallkill Betelanakanwa serviwayapjjaraki. Jody jilatajj Departamento Local de Diseño y Construcción ukat Servicios de Información sobre Hospitales uka departamentonakanwa serviwayi. Marzo de 2023 maranjja, Comité de Servicio ukan yanaptʼañapatakiw uttʼayapjjäna. Taqe uka asignacionanakan servisajj jilatajj akham siwa: “Mä machaq asignación katoqasajj awisajj llakisiñjamäspawa. Ukhaw Jehová Diosar confiyañajj wali wakiskirejja, kunattejj jupaw taqe kuns utjayi” sasa.

Jacob Rumph jilatajj California (Estados Unidos) markanwa nasiwayi. Jupajj jiskʼäkäna ukhajja, mamitapajj Jehová Diosan markapat jitheqtatänwa. Ukhamäkchïnsa jupajj Jacob wawaparojj Bibliat yatichañatakiw chʼamachasïna. Jacob jilatajj sapa maraw abuelitapar visitirïna, abuelitapajj jan jitheqtasaw Jehová Diosar servïna, jupaw Jacob allchhiparojj Bibliat jukʼamp yateqañ munañapatak yanaptʼäna. Ukatwa Jacobojj 13 maranïsajj maynimp Bibliat estudiañ mayïna. 27 de septiembre de 1992 maranwa waynitükasin bautisasïna. Mamitapajj Diosan markapar kuttʼanjjarakïnwa, papitupasa sullkanakapas Bibliat yateqasajj bautisasipjjarakïnwa.

Jacob jilatajj waynitükäna ukhajja, precursoranakajj wali kusisitäpjjatapwa uñjäna. Ukatwa colegio tukuyasajj septiembre de 1995 maran precursorat serviñ qalltäna. Ukat 2000 maran Ecuador markaruw sarjjäna, ukan predicañatakejj yanapaw munasïna. Ukanwa Canadá markankir Inga sat mä precursorar uñtʼäna. Casarasisajj panpachaniw Ecuador markankir mä jiskʼa markar servir sarjjapjjäna, ukanjja jukʼa publicadoranakani mä jiskʼa grupow utjäna. Jichhajj uka jiskʼa grupojj mä jachʼa congregacionäjjewa.

Mä qhawqha tiempotjja, precursor especialäjjapjjänwa, ukat circuitot servipjjarakïna. 2011 maranjja Galaad Escuelaruw clase 132 ukar invitapjjäna. Uka escuelat graduacisajj walja markanakanwa betelitata, misionerota ukat circuitot serviwayapjje. Escuela para Evangelizadores del Reino ukan walja kutiw instructorat servirakïna.

COVID-19 usu utjatapatjja, Estados Unidos markaruw kuttʼjjapjjäna. Ukat Wallkill Betelan servipjjañapatakiw invitapjjäna, Jacob jilatarojj Departamento de Servicio ukan trabajiñapatakiw capacitapjjäna. Ukat Ecuador markankir sucursalaruw khitapjjäna, ukanjja Comité de Sucursal taypinwa servïna. 2023 maran Warwick Betelaruw asignapjjäna, enero de 2024 maransti Comité de Servicio ukan yanaptʼañapatakiw uttʼayapjjäna. Taqe uka asignacionanakan servisajj jupajj akham siwa: “Kuna asignacionantï Jehová Diosar sirvtan ukajj janiw importantëkiti, jan ukasti khitinakampis Diosar sirvtan ukaw jukʼamp importantejja” sasa.

Uka jilatanakarojj wali valoranitwa uñjtanjja, jupanakarojj wal munasiraktanjja (Filip. 2:29).