¿Kunjamsa Jesusan jiwatapajj yanaptʼiristam?
Jesusan arunakapar istʼasajja, sapa maraw Jehová Diosan Testigonakapajj walja millón invitadonakapamp Jesusan jiwatap amtañataki aka oraqpachan tantachasipjje (Lucas 22:19). Uka tantachäwejja, Jesusan jiwas layku jiwatapajj kunja wakiskirisa uk amuyañatakiw yanaptʼistu. Jichhasa jutïrinsa kunjamsa jiwatapajj yanaptʼistaspa ukaw uka tantachäwin qhanañchasiraki (Juan 3:16).
Aka marajj Jesusan jiwatap amtañataki tantachäwir sarstasa janisa, ¿kunjamsa jupan jiwatapajj yanaptʼiristam? ¿Kunanaksa lurasma? Jesús pachpaw kunanaksa lurasma uk pä toqet qhanañchäna:
1. Diosampita Jesusampitwa jukʼamp yateqañama. Jesusajja, alajjpachankiri Awkiparojj akham sasaw mä oracionan säna: “Wiñay jakañ katoqañatakejja, jupanakajj juma sapa cheqpach Diosar uñtʼapjjañapawa, jumajj khitankta uka Jesucristorus uñtʼapjjañaparakiwa” sasa (Juan 17:3).
2. Bibliat yateqkta ukarjamaw sarnaqañama. Yatichäwinakaparjam sarnaqañajj kunja wakiskirisa ukwa Jesusajj wali sum qhanañchäna. Mä kutejja, Qollun Yatichkäna ukhajj ‘arunakap istʼasin ukarjam phoqapkäna’ ukanakaruw felicittʼäna (Lucas 6:46-48). Yaqha horasansti akhamwa sarakïna: “Niyakejjay ukanak yatjjapjjstajja, ukanak lurasajj kusisitäpjjätawa” sasa (Juan 13:17).
¿Diosampita Jesusampita jukʼamp yateqañ munasmati? ¿Kunjamsa Biblian yatichäwinakaparjam sarnaqasma uk yatiñ munarakismati? Akanakaw yanaptʼiristamjja:
Bibliat yateqaña
Jehová Diosan Testigonakapajj walja jaqenakaruw Bibliat yateqapjjañapataki, kuntï yateqapki ukarjam sarnaqapjjañapatak yanaptʼasipki.
Uka toqet jukʼamp yatiñatakejja, “Bibliat maynimp yatichayasiñataki” siski uka cheqaruw mantasma.
Jehová Diosan Testigonakapajj kunjamsa Bibliat yatichapjje uk yatiñatakejja, Walikpun Bibliat yateqañ amtawaytajja sat video uñtasma.
Jehová Diosan Testigonakapan tantachäwinakapar saraña
Jehová Diosan Testigonakapajja, semanan pä kutiw Salones del Reino sat cheqanakan tantachasipjje. Uka tantachäwinakar saririnakajja, Bibliatwa yateqapjje, ukarjam sarnaqañwa yateqapjjaraki.
Taqeniw uka tantachäwinakar sarapjjaspa, janiw Jehová Diosan Testigopäñapunejj wakiskiti, janitï sarañ puedkstajja, videoconferencia toqew conectasirakisma.
Tantachäwinakajj kunjamas apasi uk yatiñatakejja, ¿Kunjamsa tantachäwinakajj apasi? sat video uñtasma.
Jumajj jakta uka jakʼan kawkjansa tantachäwinakajj utji uk yatiñatakejja, “Jehová Diosan Testigonakapan tantachäwinakapa” sat cheqaruw mantasma.
Internetan videonak uñtaña jan ukajj qellqatanak liyiña
Jesusajj kunanaksa yatichäna, jupan jiwatapajj kunja wakiskirisa uka toqet parlir walja videonaka ukhamarak qellqatanakaw aka cheqan utji.
Amuytʼañataki, kunjamsa mä jaqen jiwatapajj walja millón jaqenakar yanaptʼaspa uk yatiñatakejja, “¿De qué manera nos salva Jesús?” ukatjja “¿Kunatsa Jesusajj tʼaqhesiwayi ukat jiwawayi?” sat yatichäwinakwa liytʼasma, jan ukajj ¿Kunatsa Jesusajj jiwäna? sat video uñtarakisma.