Warminakan sum jakasipjjañapa | ¿Bibliajj uka toqet kamsisa?

“Wawäkayäta ukhajja, jilajajj sapüruw arupamp chuym ustʼayirïtu, wal tʼaqesiyarakirïtu. Casarasjjta uka qhepatsa suegrajajj wal tʼaqesiyarakitäna. Jupasa suegrojasa esclavaparjamaw uñjapjjetäna. Nayajj jiwayasiñ amtayäta” (Madhu,a India).

Organización Mundial de la Salud ukankirinakajj akham sapjjewa: “Aka oraqpachanwa warminakajj wali tʼaqesiyat uñjasipjje” sasa. Sapa kimsa warmit mayniw wali tʼaqesiyata jan ukajj abusat uñjasi.

Jumatï ukham uñjasta ukhajja, “kawkir sarkä ukhasa inas mayninakajj arunakapamp chuym ustʼayapjjchitani, nuwjapjjchitani, jan ukajj abusapjjchitani” sasinwa amuypachäta. Ukham jan walinak uñjasasa, kunjamsa warminakar tʼaqesiyapjje uk uñjasasa, warminakajj janis jaqenakan suma uñjatäpkaspa ukham inas amuysta. Ukampis ¿kunjamsa Diosajj warminakar uñjpacha?

¿Kunjamsa Diosajj warminakar uñji?

Texto: “Chacha warmi [Diosajj] luräna” (Génesis 1:27).

¿Ukajj kamsañsa muni? Diosaw chacharusa warmirus luräna. Jupanakajj respetomp uñjatäpjjaspa ukwa muni. Ukhamarus casarat chachanakajj ‘kunjamtï sapa maynejj jupa pachpar munaskejja, ukhamarak sapa maynejj warmipar munasispa’ ukwa Diosajj muni, mä arunjja arunakamp chuym jan ustʼayapjjañapa jan ukajj jan nuwapjjañapwa muni (Efesios 5:33; Colosenses 3:19). Cheqansa warminakan suma uñjatäpjjañapajj Diosatakejj wali importantewa.

“Wawäkayäta ukhajja, familiaranakajat yaqhepajj nayar abusapjjetänwa. 17 maranëjjayäta ukhajja, jefejajj ‘janitï nayamp ikintaskäta ukhajj trabajot jaqsümawa’ sasaw sarakitäna. Jilïrëjjayäta ukhajja, esposojasa, awk taykajasa, vecinonakasa janis kunäkirista ukhamwa uñjapjjetäna. Ukampis tiempompejj jiwasar Lurir Jehováb Diosatwa yateqjjayäta. Jupajj warminakar respetompiw uñji. Uk yatiñaw jupajj nayar munasitapa, valoranit uñjatap amuyañatak yanaptʼitäna” (María, Argentina).

¿Kunas jan nayrjam jikjjatasiñatak yanaptʼiristam?

Texto: “Mä jilat sipansa jan jaytjasir mä amigow utji” (Proverbios 18:24).

¿Ukajj kamsañsa muni? Mä cheqpach amigosa jan ukajj amigasa yanaptʼätamwa. Kunatï pasasktam uk maynir cuentañatï yanaptʼiristam ukhajja, confiykta ukaruw cuenttʼasma.

“20 maranakaw maynejj jupamp ikintasiñatak obliguitäna, uk janiw khitirus yatiykayätti. Ukhamïpanjja, llakita aynachtʼata ukhamaw sarnaqayäta. Ukampis nayar istʼañatak jankʼakïkäna ukar yatiyayäta ukhajja, sumakiw jikjjatasjjayäta” (Elif, Turquía).

Texto: “Taqe llakinakam jupan amparapar katuyapjjam, [Diosajj] jumanakat wal llakisi” (1 Pedro 5:7).

¿Ukajj kamsañsa muni? Diosar orastan ukhajja, jupajj cheqpachapuniw istʼistu (Salmo 55:22; 65:2). Jupajj jumar wal munastamjja. Ukatwa qhawqha importantëtasa uk amuyañatak yanaptʼätam.

“Jehová Diosar uñtʼañaw nayrajj tʼaqesiyapkitäna ukanakat jan sinti llakisiñatak yanaptʼawayitu. Jichhajj Jehová Diosaruw orasta, taqe kunwa yatiyarakta. Juparojj mä amigojarjamaw uñjta, jupakiw kunjamsa jikjjatasta uk amuyitu” (Ana, Belice).

¿Warminakar tʼaqesiyañajj utjki uk Diosajj chhaqtaypachäniti?

Texto: “Jehová Dios Tata, [...] jan awkin wajchanakarusa tʼaqesiyatanakarusa cheqaparuw jumajj uñjäta, ukhamat oraqenkir jiwir jaqejj jan jukʼamp jupanakar ajjsarayañapataki” (Salmo 10:17, 18).

¿Ukajj kamsañsa muni? Diosajj niyaw ina chʼusat tʼaqesiñanak chhaqtayani, warminakaru jan sinttʼasis tʼaqesiñanaks chhaqtayarakiniwa.

“Warminakaru, imill wawanakaru tʼaqesiyirinakarojj niyaw Jehová Diosajj tukjani, uk yatiñajj nayatakejj mä qolljamänwa, ukaw jan sinti llakisiñatak yanaptʼawayitu” (Roberta, México).

Bibliajj kuna suytʼäwsa churistu, kunatsa uka promesanakar confiysna, kunjamsa Jehová Diosan Testigonakapajj Bibliampi yanaptʼapjje uk yatiñatakejja, maynimp visittʼayasiñatakiw mayisma.