¿Armagedonajj Israel markanti qalltpachäni? | ¿Bibliajj uka toqet kamsisa?

Bibliarjamajja, Armagedón guerrajj janiw mä markanaki jan ukajj mä lugaranak apaskaniti. Jan ukasti, Armagedonajj Diosan guerrapawa, uka guerranwa Diosajj aka oraqpachankiri taqe gobiernonak contra sartani.

• ‘Uka yatiyäwinakajj demonionakan amuytʼayatawa, oraqpachankir reyinakaw uka yatiyäwinak istʼapjje. Ukhamat Taqe Chʼamani Diosan jachʼa urupan guerrajj apaskani ukar tantachthapiñataki. Hebreo arun Armagedón sat lugararuw reyinakar tantachthapipjjäna’ (Apocalipsis 16:14, 16).

Armagedón arojja, Har Meghiddóhn siski uka hebreo arutwa juti, ukajj “Meguidó qollu” sañ munaraki. Meguidó markajja, nayra tiempon utjkäna uka Israel oraqenkänwa. Ukatwa waljanejja, “Armagedonajj Israel markanwa apasini” sasin amuyapjje. Ukampis janiw Meguidó cheqansa, ni Asia cheqan inti jalanta (Oriente Próximo) toqenkir kawkïr markansa ‘oraqpachankiri reyinakapampi’ ejercitonakapampejj tantachasipkaspati.

Apocalipsis librojj uñachtʼäwinakampi amuytʼayañatakiw qellqasiwayi (Apocalipsis 1:1). Ukhamajj Armagedonajj janiw mä lugaräkiti ni mä markäkisa, jan ukasti kunjamsa aka oraqpachankiri markanakajj Diosan gobiernop contra saytʼasipjjani ukat parlañatakiw Biblian Armagedón arojj apnaqasi (Apocalipsis 19:11-16, 19-21).