¿Guerrar jan mitisipki ukanakarojj khitis jarkʼaqani? | ¿Bibliajj kamsisa?

Naciones Unidas ukajj akham siwa:

Aka 2023 maran 7 al 23 de octubre phajjsikamajja, Gaza markampi Israel markamp chʼajjwapjjatap laykojj 6.400 jila jaqenakaw jiwarapjje, 15.200 ukhanirakiw usuchjat uñjasiwayapjje, jilapartejj guerrar jan mitisipki ukanakaw ukhaman uñjasiwayapjje. Janiw ukakïkiti, walja waranqa jaqenakarakiw mun jan muna utanakap jaytasa sarjjapjje.
Rusia markampi Ucrania markamp guerrankapjjatap laykojja, aka 2023 maran 24 de septiembre phajjsikamajj 9.701 ukhaniw guerrar jan mitisipki ukanakajj jiwarawayapjje, 17.748 ukhanirakiw Ucrania markankirinakajj usuchjat uñjasiwayapjje.

¿Guerra utjipan tʼaqesipki ukanakatakejj kuna suma suytʼäwis utji, Bibliajj uka toqet kamsisa?

Mä suma suytʼäwiw utji

‘Diosaw oraqpachan guerranak chhaqtayjjani’ sasaw Bibliajj qhanañchi (Salmo 46:9). Ukatakejja, aka oraqenkir taqe gobiernonak lantejj alajjpachankir mä gobierno uttʼayi, ukajj Diosan Reinopawa (Daniel 2:44). Ukhamajja, uka Reinopaw taqe jaqenakan kusisita jakasipjjañapatakejj yanaptʼani.

Diosan Reinopan apnaqkani uka Reyejj kunsa lurani, mä arunjja kunsa Jesucristo Reyejj lurani uk uñjañäni:

“Jupaw yanaptʼa mayiñatak arnaqasir jaqerojj salvani, humilde jaqerusa jan khiti yanapirin jaqerus jupaw salvarakini. Humilde jaqetsa pobre jaqetsa sinttʼasiniwa, pobrenakan jakañ vidapsa salvaniwa. Jupaw tʼaqesiyirinakatsa nuwasir jaqenakatsa jupanakar salvani” (Salmo 72:12-14).

Guerranak utjipana, kunayman jan walinak utjipanwa jaqenakajj tʼaqesipjje, wali llakita sarnaqapjjaraki. Ukampisa Diosajj Reinop toqew taqe uka jan walinak jan mayampitak chhaqtayjjani.

“Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” (Apocalipsis 21:4).

Diosan Reinopajj niyaw kuna jan walinakatï aka oraqen utjki taqe ukanak chhaqtayjjani. ¿Kunatsa ukham sistanjja? Jichha tiempon ‘guerranak utjatap istʼktan’ uka toqetjja, Bibliajj jayäkipanwa sisjjäna (Mateo 24:6). Guerranakajj utjki, ukat yaqha ukham jan walinakajj paski taqe ukanakajja, aka oraqenkir taqe gobiernonakajj niya tʼunjatäjjapjjani uka qhep ‘qhepa urunakan’ jakaskataswa uñachtʼayistu (2 Timoteo 3:1).