Jaqenakajj janiw politiconakar confiyjjapjjeti | ¿Bibliajj uka toqet kamsisa?

2024 maranjja, niya oraqpachanwa marka apnaqerinak ajlliñajj utjani, mä pachpa maran ukham ajlliñajj janiw utjirïkiti. Ukampis jaqenakat waljanejj janiw politiconakar confiyjjapjjeti.

• Estados Unidos markan yatjjatasiwayki ukarjamajja, jaqenakar yanaptʼañ thaqañat sipansa “politiconakat waljanejj jupanakan askipakwa thaqapjje” sasaw walja jaqenakajj sapjjäna (centro de investigación Pew Research Center, 19 de septiembre de 2023).a

Wayn tawaqonakat waljanejj janiw politiconakarojj confiyjjapjjarakiti.

• “Qʼajjo wayn tawaqonakat waljanejja, kuna jan walinakatï utjki ukanak askichañ munapjjewa, ukampis ‘politiconakajj ukanak askichañatakejj janiw yanaptʼapkituti’ sasaw jupanakajj encuestanakan sapjje” (The New York Times, 29 de enero de 2024).

• “Mä encuestajj luraskäna ukarjamajja, wayn tawaqonakajj politiconakar confiyañat sipansa youtubers ukanakaruw jukʼamp confiyapjje” (The Korea Times, 22 de enero de 2024).

Ukhamajja, ¿politiconakajj jutïrin sum jakasiñatakejj yanaptʼapjjaspati? ¿Khitirus confiysna?

Khitirus confiysna uk sum amuytʼasiñasawa

Khitirus confiyañäni uk sum amuytʼasiñasawa. Bibliajj akham siwa: “Jan experienciani jaqejja taqe kuntï jupar sapki ukjja creyikiwa, ukampis amuytʼasir jaqejja kunsa lurani uk sum amuytʼasi” sasa (Proverbios 14:15).

• Mä yatiyäwejj cheqati janicha uk yatiñatakejj aka yatichäwi liytʼäta: “Cómo protegerse de la información falsa.”

Honrado, suma amtani politiconakasa janiw taqe kun lurirjamäpkiti. Ukatwa Bibliajj akham ewjjtʼistu:

• “Principenakarojj jan confiyapjjamti, janirak khiti jaqenakarus confiyapjjamti, kuna laykutejj janiw jupanakajj salvapkaspati” sasa (Salmo 146:3).

¿Khitirus confiysna?

Suma wakichtʼata confiykaña mä apnaqeriruw Diosajj uttʼayi sasaw Bibliajj qhanañchi, ukajj Jesucristowa (Lucas 1:32, 33). Jesusaw Diosan Reinopan reyit apnaqani, uka gobiernojj alajjpachankiwa (Mateo 6:10).

• Kunatsa Jesusar confiysna, kuna jan walinakantï uñjasktan ukanak chhaqtayañatakejj kunsa lurani uk yatjjatañamatakiw chʼamañchtʼapjjsma. Ukatakejj aka yatichäwinakwa liytʼasma: “¿Diosan Reinopan khitis Reyit uttʼayatajja?” ukat “¿Kunsa Diosan Reinopajj lurani?”