Mateo 6:34 | “Jan qharürut llakisipjjamti”

“Janipun qharürut llakisipjjamti, qharürojj yaqha llakinakaw utjarakini. Sapüruw jan walinakajj utji” (Mateo 6:34, Machaq Mundon Jakirinakataki).

“Jan qharürut llakisipjjamti, qharürojj llakisiñatak pachajj utjaskaniwa. Sapürurakiw llakinakan phoqhantatäski” (Mateo 6:34, Qullan Arunaka, 2011).

Mateo 6:34 ¿Kamsañs muni?

Uka arunakjja, Jesusajj kuna jan walinakatï qharürojj utjkaspa ukanakat jan sinti llakisiñasataki, antisas kuna jan walinakatï sapürus utjki ukanakar saykatañasatakiw säna.

Jesusajj janiw qharürut janipun piensapjjamti jan ukajj janipun qharürutak kuna lurañsa amtapjjamti sañ munkänti (Proverbios 21:5). Jan ukasti, kunatï qharürojj paskaspa ukat jan sinti llakisiñasatakiw yanaptʼañ munaskistäna. Ukham llakisiñajj kusisiñ apaqestu, kuntï uka horasan lurañasäki uks janirakiw sum amuyasjjtanti. Kunatï qharürojj paskaspa ukat llakisisajj janiw kuns askichktanti. Uka llakinakat jilapartejj janiw paskapuniti, kunas pasi ukhajj janiw kunjamtï pienskayätan ukham sinti jan walïkarakiti.

Mateo 6:34 ¿Kunamps amuysna?

Jesusan uka arunakapajja, Olivos qollun arstʼkäna uka arunak taypinkiwa, Mateo 5-7 capitulonakan qellqatarakiwa. Uka arstʼäwipanjja, Jesusajj kunjamsa llakisisajj jan kusisitäktan, janirak jukʼamp jakaykistu ukanakwa qhanañchäna (Mateo 6:27). Jakäwisan taqe kunat sipans Diosar nayrar uchasajja, kunjamsa qharürut jan llakisksna uksa qhanañcharakïnwa. Niyakejjay Diosajj animalanaksa plantanaksa sum cuidchejja, jupar adorir jaqenakarojj cuidarakistaniwa (Mateo 6:25, 26, 28-33).