Paciencianïñajj mayninakamp sum apasiñatakiw yanaptʼistu. Jiwasatï paciencianïñäni ukhajja, mayninakajj parlapkistu ukhajj sumwa istʼañäni (Sant. 1:19). Paciencianïtasat mayninakampis sumankarakiñäniwa. Estresatäktan ukhajja, janiw jan amuytʼasisajj jankʼak kuns lurkañäniti, janirakiw mayninakar chuym ustʼayir arunaks arskañäniti. Maynejj chuym ustʼayistani ukhasa, janiw jankʼakejj coleraskañäniti, ni ukhamat ukhamsa kuttʼaykañäniti. Antisas maynit maynikamaw aguantasiñäni, taqe chuymaw perdonasirakiñäni (Col. 3:12, 13). Paciencianïñajj suma amtanakar puriñatakiw yanaptʼarakistu. Jankʼaki jan amuytʼasis kun lurañat sipansa, kun lurañas wakisispa uk amuytʼañatakejj tiempo apstʼasiñasawa. Jiwasatï mä trabajo thaqaskstan ukhajja, inas nayraqat uñstkistu uka trabajo katoqasiñ munsna. Ukampis paciencianïñäni ukhajja, kunjamsa familiasarusa Jehová Diosamp sum apasitasarus jan waltʼayani ukwa amuytʼañäni. Paciencianïñajj jan wali amtanakar jan puriñatakiw yanaptʼistani. w23.08 pág. 22 párrs. 8, 9

Jan wali munañanak contra nuwaskasajj wali aynachtʼat jikjjatasïta ukhajja, kuntï Jehová Diosar jakäwim katuyasisajj arsuwaykta uka toqet lupʼiñaw tentacionanakar saykatañatak chʼam churätam. ¿Kunatsa ukham sistanjja? Kunapachatï maynejj Jehová Diosar jakäwip katuyasjje ukhajja, jupa pachpat armtʼasjjewa. ¿Uka arunakajj kamsañs muni? Jehová Diosajj uñiski uka jan wali munañanaka, maynitakik taqe kun munañanak apanukuña sañ muni (Mat. 16:24). Ukhamajj mä yantʼan uñjaskañäni ukhajj janiw kuns lurañäni uk piensañasajj wakiskaniti. Jehová Diosat jan jitheqtañakwa amtañäni. Jupar kusisiyañwa amtarakiñäni. Diosar jakäwis katuyasisajj taqpach yaqha amtanakas jaytanukuñwa arsuwaytanjja. Job chachjamäñasawa, jupajj sinti jan walinakan uñjaskasas jan payachasisaw akham säna: “Janipuniw Diosar taqpach chuymamp serviñ apanukkäti” sasa (Job 27:5). w24.03 pág. 9 párrs. 6, 7

Jehová Diosajj ‘wali munasirïtapwa’ uñachtʼayistu (2 Cor. 13:11). Jupajj sapa mayni jiwasanakatwa llakisi, ‘jupan munasirïtapatsa jan jaytjasirïtapats’ janiw payachasktanti (Sal. 32:10). Diosajj kunjamsa munasiñap uñachtʼayistu uka toqet sapa kuti lupʼiñäni ukhajja, qhawqsa jiwasat llakisi uk jukʼamp sumwa uñjañäni, jukʼampirakiw jupar jakʼachasiñäni. Ukhamajj taqe kunwa Diosar oracionan yatiysna, qhawqsa jupan munasiñap necesittan uksa yatiyaraksnawa. Juparojj taqe llakinakaswa yatiysna, kunjamas jikjjatastan uk amuyatapatsa jiwasar yanaptʼañ munatapats janiw payachasiñasäkiti (Sal. 145:19). Kunjamtï mä thaya urun ninajj juntʼuchkistojja, ukhamarakiw Jehová Diosan munasiñapajj yantʼanakansa jan walinakans chuymachtʼistaspa. Ukhamajj chuymachtʼkiristam, sumankañ churkiristam uka munasir Jehová Diosar jakʼachasim. ¡Jehová Diosan jiwasar munasitapat walpun kusistanjja! Taqeniw akham sañ munaraktanjja: “Jehová Diosar wal munasta” sasa (Sal. 116:1). w24.01 pág. 31 párrs. 19, 20