Jueces
12 Ukatjja Efraín tribunkir chachanakaw jawsthapitäpjjäna, jupanakasti Zafón markar paskatasajj* akham sasaw Jefté chachar sapjjäna: “Ammonitanakamp nuwasir paskta ukhajj ¿kunatsa jumamp chika sarapjjañajatak jan jawsapkista?+ Jumarojj utam manqharuw utamamp chik phichantapjjäma” sasa. 2 Jefté chachasti jupanakarojj akham sänwa: “Markajampi nayampejj ammonitanakampiw mä jachʼa guerran nuwasisipkayäta. Jumanakarojj yanaptʼa mayipjjayäsma, ukampis jumanakajj janiw jupanakan amparapat salvapkistati. 3 Nayar janis salvañ munapkitasma ukham amuyasajja, vidaj aptʼasirjamaw ammonitanak contra nuwasir sarañ amtta,+ Jehová Diosasti nayaruw ammonitanak katuyarakitu. Ukhamasti ¿kunatsa jichhürojj naya contra nuwasir makatanipjjta?” sasa.
4 Ukatjja Jefté chachajj Galaad+ oraqenkiri taqe chachanakaruw tantachthapïna, jupanakasti Efraín contraw nuwasipjjäna. Galaad oraqenkir chachanakasti Efraín tribunkirinakarojj atipjapjjänwa, efraimitanakajj akhamwa nayrajj sapjjerïna: “Galaaditanaka, jumanakajj Efraín, Manasés tribunakan oraqenakapansa jakapkstajja, Efraín tribut escapanir mä grupokïpjjtawa” sasa. 5 Galaadita chachanakajj Efraín tribut nayrtʼasaw Jordán+ jawira umajj pasañjamäki uka cheqanak katuntapjjäna. Efraimitanakajj escapañ munapjjäna ukhajja, akham sasaw sapjjäna: “Pastʼayita” sasa. Galaadita chachanakasti akham sasaw sapa maynir jisktʼapjjäna: “¿Jumajj efraimitätati?” sasa. “¡Janiwa!” säna ukhajja, 6 jupanakajj sapjjarakïnwa: “Mirä amp suma, shibolet sasin arsum” sasa. Ukampis uka aru jan sum arsuñ pueditap laykojja “sibolet” sasaw arsüna. Ukatwa jupar katuntasajj Jordán jawira umajj pasañjamäki uka jakʼanakan jiwayapjjäna. Ukhamatwa ukapachajj 42.000 efraimita chachanakajj jiwayat uñjasipjjäna.
7 Jefté chachajj sojjta maranakaw Israel markan juezapäna, uka qhepatsti Jefté sat galaadita chachajj jiwjjänwa, Galaad oraqenwa markapan imtʼjjapjjarakïna.
8 Jupa qhepatjja, Belén markankiri Ibzán sat chacharakiw Israel markan juezapänjja.+ 9 Jupasti 30 yoqanakani 30 phuchanakanïnwa. Jupasti yaqha familiankir chachanakampi casarasipjjañapatakiw phuchanakapar khitäna, yoqanakapan casarasipjjañapatakejja 30 warminakwa apanirakïna. Ibzán chachajj paqallqo maranakaw Israel markan juezapäna. 10 Ukatjja Ibzán chachajj jiwjjänwa, Belén markanwa imtʼjjapjjarakïna.
11 Jupa qhepatjja, Elón sat zabulonita chacharakiw Israelan juezapäna, jupajj tunka maranakaw Israelan juezapäna. 12 Ukatjja Elón sat zabulonita chachajj jiwjjänwa, Ayalón markanwa juparojj imtʼjjapjjäna, Zabulón tribun oraqepana.
13 Jupa qhepatjja, Hilel sat piratonita chachan Abdón yoqapaw Israelan juezapäna. 14 Jupasti 70 asnonakat sariri 40 yoqanakani 30 allchhinakanïnwa. Jupajj 8 maranakaw Israelan juezapäna. 15 Ukatjja Hilel sat piratonita chachan Abdón yoqapajj jiwjjänwa, juparojj Efraín tribun oraqepanwa Piratón sat cheqan imtʼjjapjjäna, amalequitanakan+ qollupana.