Jeremías

44 Kawkïr judionakatï Egipto oraqensa,+ Migdol+ lugaransa, Tahpanhés+ markansa, Nof*+ markansa, Patrós+ oraqensa jakapkäna taqe uka judionakatakiw Jeremiasajj Diosan arunakap katoqäna, akham sasa: 2 “Israelan Diosapäki uka ejercitonakan Jehová Diosapajj akham siwa: ‘Jumanakajj kunjamsa nayajj Jerusalén markjjarusa+ Judá oraqen taqe markanakapjjarus jan waltʼäwinak apankta uk uñjapjjtawa. Jichhasti uka markanakajj laqayar tukuyatawa, janirakiw khitis ukan jakkiti.+ 3 Nayar colerayañatak jan walinak lurapjjatap laykuw ukanakajj pasäna. Jumanakajj kawkïr diosanakarutï jumanakasa nayra awkinakamas jan uñtʼapkayäta uka yaqha diosanakaruw sacrificionak jewqʼeyapjjayätajja,+ ukanakaruw servipjjarakiyätajja.+ 4 Nayar serviri taqe profetanakajaruw nayajj jumanakan ukar khitaniyäta, jupanakarojj akham sapjjañapatakiw kutin kutin khitaniyäta:* “Mirä amp suma, nayajj uñiskta uka ajjtaskañanak jan lurapjjamti”+ sasa. 5 Ukampis jupanakajj jan wali luratanakap apanukuñatakejj janiw istʼapkänti, ni amuyumpis istʼapkänti, yaqha diosanakarojj sacrificionak loqtasipkakïnwa.+ 6 Ukatwa colerasitajasa wal colerasiñajas Judá oraqen markanakapjjarusa Jerusalén markan callenakapjjarus jutasin mä ninar uñtat aqäna. Ukatsti uka markanakajj laqayar tukuyatäpjjänwa, chʼusakëjjapjjarakïnwa, jichhüruns ukhamäskarakiwa’+ sasa.

7 ”Israelan Diosapäki uka ejercitonakan Jehová Diosapajj akham siwa: ‘¿Kunatsa jumanak pachpajj jan waltʼäwin uñjasipjjta, ukhamat chachanakasa, warminakasa, wawanakasa, asu wawanakasa Judá markan jiwarañapataki, jan khitis jumanakat jiltʼañapataki? 8 ¿Kunatsa jumanakajj jakir sarapkta uka Egipto oraqen yaqha diosanakar sacrificionak loqtasajj luratanakamamp nayar colerayapjjesta? Jumanakajj jiwarapjjätawa, taqe markanak taypins maldisitäpjjätawa, jiskʼachatäpjjarakïtawa.+ 9 ¿Jumanakajj janit nayra awkinakaman jan wali luratanakapsa, Judá markan reyinakapan jan wali luratanakapsa,+ warminakapan jan wali luratanakapsa,+ jumanakan jan wali luratanakamsa, warminakaman jan wali luratanakapsa,+ Judá oraqempin Jerusalenan callenakapampin jan wali luratanaks amtasipkta? 10 Jichhürkamas jupanakajj janiw humillasipkiti, janiw respetapkituti,+ janirakiw jumanakampir nayra awkinakapampir churkta uka leyirjamas sarnaqapkiti’+ sasa.

11 ”Ukhamasti Israelan Diosapäki uka ejercitonakan Jehová Diosapajj akham siwa: ‘Nayajj mä jan waltʼäwi jumanakjjar apaniñ amtjjta, ukhamat taqpach Judá markar tukjañataki. 12 Khitinakatï Judá markan jiltʼapki, Egipto oraqen jakañatak sarañ amtapkarakïna ukanakarojj katuntäwa, Egipto oraqenwa taqenis jiwarapjjarakini.+ Jupanakajj espadampi manqʼat pistʼañampiw jiwarapjjani, jiskʼat jachʼakamaw espadampi manqʼat pistʼañampi jiwarapjjani. Jupanakajj maldisitäpjjaniwa, wali ajjsarkañar tukuyatäpjjaniwa, insultatäpjjaniwa, jiskʼachatäpjjarakiniwa.+ 13 Egipto oraqen jakasipki ukanakarojja, kunjamtï nayajj Jerusalenar castigkta ukhamwa castigäjja. Jupanakarojj espadampi, manqʼat pistʼañampi, usumpiw* castigäjja.+ 14 Khitinakatï Judá oraqen jiltʼapkäna, Egipto oraqen jakañatak sarapkäna ukanakajja, janiw escapapkaniti, ni Judá oraqer kuttʼañatakis jakapkaniti. Jupanakajj wal kuttʼañ munapjjani, ukampis janiw kuttʼapkaniti, escapapkani uka mä jukʼanikiw kuttʼapjjani’ sasa”.

15 Kawkïr chachanakatï warminakapan yaqha diosanakar sacrificionak loqtatap yatipkäna taqe uka chachanakasa, ukan saytʼatäsipkäna taqe uka warminakasa, mä arunjja taqe uka chachanakas warminakapasa, Egipto oraqenkir+ Patrós+ lugaran jakasipkäna taqe uka jaqenakasa, akham sasaw Jeremiasar sapjjäna: 16 “Nanakajj janiw Jehová Diosan sutipjjar parlapkista uka arunak istʼapkäti. 17 Antisas kuntï nanakajj arsupkta uka arunak taqpach phoqapjjäjja: Alajjpachankir Reinaruw* sacrificionak loqtapjjäjja, jupatakiw vino ofrendanak+ wartapjjäjja, kunjamtï nanakasa, nayra awkinakajasa, reyinakajasa, principenakajasa, Judá oraqen markanakapampin Jerusalenan callenakapampin lurapkäna ukhama. Ukapachansti nanakajj manqʼat sistʼatäpjjayätwa, janirakiw kunas faltapkitänti, ni kuna jan waltʼäwsa uñjapkayätti. 18 Alajjpachankir Reinar* sacrificionak jan loqtjjapjjta, vino ofrendanak jan wartaraqjjapjjta ukhat aksarojj taqe kunaw nanakar faltjjapjjetu, espadampit manqʼat pistʼañampit jiwariris utjarakiwa” sasa.

19 Ukjjarusti warminakajj akham sapjjarakïnwa: “Alajjpachankir Reinar* sacrificionak loqtapkayät ukhasa, jupatak vino ofrendanak wartarapipkayät ukhasa, sacrificiot loqtañatak reinar uñtasit tʼantʼanak lurapkayät ukhasa, jupatak vino ofrendanak wartarapipkayät ukhasa, ¿janit esposonakajan autorizatajj ukanak lurapkayätjja?” sasa.

20 Ukatjja taqe jaqenakarusa, chachanakarusa, warminakaparusa, jupar parlapkäna taqe uka jaqenakarus akham sasaw Jeremiasajj säna: 21 “Kawkïr sacrificionaktï jumanakasa, reyinakamasa, principenakamasa, aka oraqenkir jaqenakas Judá oraqen markanakapampin Jerusalenan callenakapampin lurapkayäta ukanakajja...+ ¡Jehová Diosajj amtasiskänwa, janiw ukanakat armaskänti! 22 Qheparusti Jehová Diosajj jan wali luratanakamsa ajjtaskañ luratanakamsa janiw aguantjjänti, jumanakan oraqemajj chʼusa lugaräjjänwa, wali ajjsarkañar tukuyatäjjänwa, maldisitäjjänwa, jan khiti jakirini, kunjamtï jichhürun uñjaski ukhama.+ 23 Jumanakajj sacrificionak lurapjjayätajja, Jehová Diosan arunakap jan istʼasaw Jehová Dios contrajj jucha lurapjjayätajja, janirakiw leyipsa ni amtayäwinakapsa phoqapkayätati, ukatwa aka jan waltʼäwejj jumanakjjar jutäna, kunjamtï jichhürun uñjaski ukhama”+ sasa.

24 Jeremiasajj akham sasaw taqe jaqenakarusa warminakarus saskakïna: “Egipto oraqen jakapkta taqe uka Judá markankirinaka, Jehová Diosan arunakap istʼapjjam. 25 Israelan Diosapäki uka ejercitonakan Jehová Diosapajj akham siwa: ‘Kuntï jumanakasa warminakamas lakampi arsupkta ukjja, amparanakamampiw phoqapjjtajja, akham sapjjarakiyätawa: “Alajjpachankir Reinar* sacrificionak lurañatak arsupkta uksa vino ofrendanak wartarapiñatak arsupkta uksa phoqapjjapunïwa”+ sasa. Warminaka, jumanakajj arsupkta uk phoqapjjapunïtawa, kuntï mä promesa lurasin arsupkta uksa phoqapjjarakïtawa’ sasa.

26 ”Ukhamasti Egipto oraqen jakapkta taqe uka Judá markankirinaka, Jehová Diosan arunakap istʼapjjam: ‘“Nayajj jachʼa sutij-jjaruw mä juramento lurta”, siw Jehová Diosajja, “Egipto oraqen jakirinakatjja, janiw Judá markankir khiti jaqes+ ‘¡kunjamtï Taqe Kunjjar Munañani Jehová Dios Tatitojj cheqpachapun jakkir Diosäkejja!’ sasin mä juramento lurañatakejj sutij aytaskaniti.+ 27 Nayajj mä jan waltʼäwi jupanakjjar apayaniñ munaskta, ukajj janiw jupanakatak walïkaniti.+ Egipto oraqenkapki uka Judá markankir taqe jaqenakajj espadampi manqʼat pistʼañampiw jiwarapjjani, jupanakan qʼal chhaqtapjjañapkama.+ 28 Mä qhawqhanikiw espadat escapasajj Egipto oraqet Judá markar kuttʼapjjani.+ ¡Egipto oraqer jakir sarapki uka Judá markat jiltʼirinakajja, kawkïr arunakas phoqasi ukwa yatipjjani, jupanakan arunakapati, jan ukajj nayan arunakajacha!” sasa’”.

29 “‘Akaw jumanakatak mä señaläni’, siw Jehová Diosajja, ‘jumanak contra amtkta uka jan waltʼäwinak phoqasiñap yatipjjañamatakejja, aka lugaranwa jumanakarojj castigapjjäma. 30 Naya Jehová Diosajj akham sistwa: “Egipto markan reyipäki uka Hofrá sat faraonarojja, enemigonakapan amparapampiru jupar jiwayañatak munapki ukanakampiruw katuyäjja, kunjamtï Judá markan Sedequías reyiparojj Babilonia markan Nabucodonosor* reyipar katuyktjja ukhama, jupajj enemigopänwa, jiwayañwa munarakïna”+ sasa’”.