1 YATICHÄWI

¿Jupamp mistsuñatakix wakichatätti?

“¿Janit uñtʼatanïkta? sasax taqiniw sapxitu. Ukat walja suma waynanakaw utjaraki.” (Witney)

“Yaqhip imillanakax nayampiskañäni sasaw sapxitu. Walispapï, ukampis tatajaru mamajaru jisktʼä ukhaxa, kamsapxitanis ukx yatxtwa.” (Felipe)

WAYNITUKÏSKSTASA jan ukax tawaqitakïskstasa, inas maynin munatäña, ukhamaraki yäqatäñ munsta. Ukat inas masinakamax uks tuqir wiytapxarakstma. Jeniferax siwa: “11 marar mantaskayäta ukhaw uñtʼatanïxañajatakix wiytapxitäna” sasa. Brittanax sarakiwa: “Khitimpikïpansa, yatiqañ utan jan uñtʼatanïksta ukhax jiskʼachataw uñjasta” sasa.

¿Jumasti? ¿Uñtʼatanïñatakix wakichatäxtati? Janïr kuns siskamti... Nayraqatxa kuna tuqitsa parlasktan uk sum amuytʼañäni.

“¿Amigokïpxpachätti?”

Kimsa amuytʼat parltʼañäni, ukampis sapa mayatakix pachpa jisktʼaw utjani. Kamstas uk chimptʼäta:

Jupampipuniw sapa kuti mistupxta. ¿Amigokïpxpachätti?

□ Jïsa

□ Janiwa

Amiganakajatxa mayniw wali suma uñnaqtʼani, ukatx munarakituwa. Sapüruw celularat qillqasipxta ukhamarak telefonotsa parlapxta. ¿Amigokïpxpachätti?

□ Jïsa

□ Janiwa

Amigonakajamp waljani mistsupxta ukhaxa, jupamp chikapuniw qhiparxta. ¿Amigokïpxpachätti?

□ Jïsa

□ Janiwa

Inas nayrïr jisktʼan jankʼak “janiw” sasin sissta. Mayninakan “jïsa” sañatakis “janiw” sañatakisa, ¿payachastati? Chiqpachansa, kimspach jisktʼäwiruw “janiw” sasin sañamänxa. ¿Kunatsa? Kunattix mä waynamp mä tawaqumpi sapa kuti parlapxi ukat chacha warmïpkaspa ukham sarnaqapxi, ukarux janiw aliq amigokïpxiw sasax sisksnati, jan ukasti jaqichasiñatakis uñtʼasisipkaspa ukhamäspawa. Kunattix taqinin uñjkat sarnaqasa jan ukax jamasat sarnaqasa telefonot jaysasisa jan ukax jikisisin parlasawa uñtʼasipxi. Jichhax wasitamp jisktʼasiñamawa: “Casarasiñ amtasa jupamp mistuñatakixa, ¿wakichatäxtti?” sasa. Uk sum amuytʼañamatakix kimsa jisktʼat parltʼañäni.

“¿Kuna amtampis luraskta?”

Yaqhip markanakanxa, mä waynamp mä tawaqumpi sum uñtʼasiñataki mistuñax walikïskiwa. ¿Kuna amtampis ukham mistupxi? Jupampipunit casarasini janich uk yatxatañatakiw ukham lurapxi.

Yaqhip wayn tawaqunakax janiw ukham amtampi lurapkiti. Jan ukasti, mä tawaqumpi jan ukax mä waynamp aliq irpnaqasiñakwa munapxi, janiw mä jukʼsa jaqichasiñxa amtapkiti. Yaqhipanakax yamas uñtʼataparux mä trofeokaspas jan ukax qurïkaspas ukham uñachtʼayapxi, mä arunxa, jachʼa jachʼa tukuñatakikiw jupampïpxi. Ukat ukham sarnaqirinakax jankʼakiw jaljtawayxapxi. Carla sat mä tawaqux siwa: “Mä qhawqha semanatakwa walja uñtʼasirinakax jaljtapxi. Janiw taqi chuymax amtapkiti. Ukham sarnaqasax janiw chacha warmi suma jakäwirux puripkiti, jan ukasti, divorcioruw puripxi” sasa.

Ukhamaraki, kunapachatï maynimp uñtʼasiñatak mistta ukhaxa, maynin munasiñapax jukʼamp jilxatti. Ukatwa sum amuytʼasiñamaxa, ¿kuna amtampis luraskta? Ak sum amuytʼañäni: ¿inamayak chuymam lunthatapxiristam ukax walispati? Anatañäkasmas ukham apnaqtʼawayasin jaqtxapxiristam ukhaxa, ¿kunjamas jikxatasisma? Chelsea sat mä tawaqux kamsataynas uk amuytʼañäni: “Maynimp kusistʼañ laykuki mistsuñax walikïkaspas ukham amuyañx muniristwa. Ukampis kunapachatï maynix taqi chuym mistu ukat parejamax janiraki ukhaxa, janiw akchʼas kusisiñax utjkiti” sasa.

“¿Tiempüxpachati?”

¿Qhawqha maranis maynix uñtʼatanïspa? ․․․․․

Jichhax awk taykamar jisktʼam ukat kamsapxchinï uk aka chiqar qillqtʼasïta. ․․․․․

¿Awk taykamax qhawqha maraniw maynix maynimp uñtʼasispa sistamsa? Juma qillqkta ukat sipansa jila marwa aytapxpachaxa... ukat awisax janiw ukhamäkarakispati. Yaqhip wayn tawaqunakax jupa pachp sum uñtʼasiñkamaw suyapxi, inas jumax ukham amuyaraksta. Ukhamwa, Daniela sat 17 marani mä tawaqux luratayna. Jupax akham sasaw qhanañchtʼi: “Kunjam yuqalls muntax sas pä mar nayra jisktʼapxitasapäna ukhaxa, janiw jichjam amuykiriskayätti. Jichhas mä jukʼa payachasisktwa. Mä qhawqha marata, ukham amuyaskakï ukhaw niyas uñtʼatanïñ tuqit amtäxa” sasa.

¿Ukat kunatsa suytʼañamaraki? Kunapachatix tawaqur munañasa waynar munañasa ukat chacha warmjam sarnaqañ munañas walpun jilxatti uka tiemp pasañapkamaw suytʼañama. Uka tiempontï mä tawaqump jan ukax mä waynamp sinti chikachasïta ukhaxa, chuymamax jan waliruw aptʼiristamxa ukat wachuq jucharuw purirakisma. Chiqasa, yaqhip wayn tawaqunakax janiw uka tuqit akchʼas llakisipkiti, antisas kunjamas chacha warmi ikthapiñax ukxa wal yantʼañ munapxi. Ukampis jumax janiw jupanakjam amuyañamäkiti (Romanos 12:2). Bibliax qhan sistu: “Jithiqtam wachuqa jucha lurañatxa” sasa (1 Corintios 6:18). Ukhamasti, tawaqur munañasa waynar munañasa ukat chacha warmjam sarnaqañ munañas walpun jilxatti uka tiemp pasañapkam suytʼäta ukhaxa, kunayman jan waltʼäwinakatwa qhispïta (Eclesiastés 11:10).

“¿Jaqichasiñatak wakichatäxtti?”

Janïr kamskasasa akan jikxataski uka tuqinakat juma pachpa amuykiptʼañamawa:

Kunjamsa mayninakamp apasiskta. ¿Kunjamsa awk taykamarus jilanakamarus sullkanakamarus uñjta? ¿Colertʼasisax jan wali arunakampit parlirïta ukat awk taykamarus kutkatasirïtati? Uñtʼatanïñ tuqitxa, ¿jupanakax kamsapxaspasa? Kunjamtï familiamar uñjktaxa, ukhamarakiw parejamarux uñjäsma uk amuytʼasiñamawa (Efesios 4:31 liytʼäta).

Kunjam chuymanïtasa. Jan walinakan uñjasisaxa, ¿nayrarut mistuñ munta jan ukax aynachtʼxaktacha? ¿Amuytʼirïtati, jan ukax arumarjamapunich phuqayañ munirïta? Jan kun kamachañjamäxi ukhaxa, ¿llakimpit aynachtʼayasta? ¿Paciencianïtati? Qullan ajayupan luräwiparjam sarnaqañaxa, casarasxäta ukhas suma chachäñamataki jan ukax suma warmïñamatakiw yanaptʼätamxa (Gálatas 5:22, 23 liytʼäta).

Kunjamsa qullqir uñjta. ¿Sumti apnaqañ yatta? ¿Jan ukax manunikich sarnaqaskta? ¿Irnaqäwiman aguanttati? Jan ukhamäkchi ukaxa, ¿kunatsa? ¿Jan wali irnaqäwïnti? ¿Patronaman juchapatti? ¿Jan ukax juman juchamatch jaqsuyasta? Qullqim jan sum apnaqañ yatkasaxa, ¿familiaman qullqip sumti apnaqasma? (1 Timoteo 5:8 liytʼäta.)

Diosar sumti yupaychaskta. Jehová Diosan Qhanañchiripästa ukaxa, ¿kunjam jaqïtasa? ¿Diosan Arup liyipuntati, yatiyiris misttati ukat tantachäwinakansa arstʼtati? Jumamp panichaskani uka kullakatakisa jan ukax uka jilatatakisa, yupaychäw tuqit suma saytʼatäñamawa (Eclesiastés 4:9, 10 liytʼäta).

Antisasa, ¿kuns lurasmaxa?

Jan wakichatäksta ukhaxa, janiw khitisa maynimp mistsuñamatakix sint waytʼkiristamti. Amuytʼañataki, mä yatichirix janïr sum yatichkasin examen final lurañamataki waykatiristma, ¿ukax walïspati? Janiwa. Antisas wakichasiñamataki tiemp churiristam ukaw askïspaxa, ukhamatwa examenanxa kuns qillqxatarakismaxa.

Jaqichasiñatak sarnaqañax niya ukhamarakiwa. Amuyxpachätawa, ukax janiw aliq anatasiñakïkiti. Ukhamasti, janïr khit uñchʼukkasasa, nayraqatxa tiempompiw sum wakichasiñama: amigonakamp sum apasiñwa yatiqañama. Ukhamatwa, jumatakjam tawaqu jan ukax jumatakjam suma wayna jikxatxäta ukhaxa, sum jupampix apasipxarakïta. Chiqpachansa, pä suma amigonakaw jaqichasipxi.

Suytʼasaxa janiw jarkʼxasitjam amuyasiñamäkiti. Jan ukasti jukʼampwa waynakankañaman tawaqkankañaman kusisiñ jikxatasmaxa (Eclesiastés 11:9). Ukhamarusa, wakichasiñamatak tiempox utjaniwa: chʼamachtʼasïta ukhaxa, sapürutjamwa suma jaqiptäta ukat Diosar yupaychañ tuqitsa sum saytʼarakïta (Lamentaciones 3:27).

Ukañkamasti, wayn tawaqunakamp chikax mistsuskasmawa. Ukampis ukham waljani mistsusax suma uñjatäpxañamawa. Tamara sat mä tawaqux akham siwa: “Ukax wali khusawa, walja amigonakani amiganakanïñawa wali askixa” sasa. Monicax sarakiwa: “Ukham waljan mistsuñax wali askiwa, ukhamatwa taqinir sum uñtʼtaxa” sasa.

Ukampis mayniruk uñchʼukiskäta ukhaxa, chiqpachansa, tʼaqhisïtawa. Ukhamasti suytʼakma. Waynäkasasa jan ukax tawaqükasasa amigonak jikxatam ukat jupanakamp sum apasirakma. Ukat tiempompi jaqichasiñ amtxäta ukhaxa, jumapachas sum uñtʼasxäta ukat kunjam warmimpis jan ukax kunjam chachampis jakañ munta uksa yatxarakïtawa.

JUKʼAMPI YATXATAÑATAKIX MAYÏR LIBRON 29 UKAT 30 YATICHÄWINAKAP UÑXATÄTA

BIBLIAX KAMSISA

“Chʼikhi jaqixa amuytʼasiwa kawkinjamas saraski uka.” (Proverbios 14:15)

AKHAM LURASMAXA

2 Pedro 1:5-7 liytʼasaxa, kawkïr phuqañas wakisispa ukwa ajlliñama. Phaxspachaw uka tuqit yatxatañama, ukat ukarjamaw lurañama, yanaptʼtamti uksa amuytʼasiñamarakiwa. Jaqichasiñ amtxäta ukhaw ukax jumatak wali askïni.

¿YATIYÄTATI?

Janïr 20 maranïkasin casarasipki uka wayn tawaqunakaxa, janïr phisqa mar paskipanwa divorciasipxaspa sasaw walja yatxatirinakax sapxi.

¡AKANAK LURÄ!

Janïr jaqichasiñ amtkasaxa, suma jaqïñajatakix akanakaw nayan wakisi: ․․․․․

¿Kunjamatsa phuqäxa?: ․․․․․

Awkijarus jan ukax taykajarusa, ¿kuns aka tuqit jisktʼañ muntxa? ․․․․․

JUMASTI, ¿KAMSASMASA?

● ¿Kunapachanakas wayn tawaqunakamp chika mistuñax walïspaxa?

● Sañäni, sullkamax mä imillamp mistsuñ munaspa. Ukampis waynitukïskaspa, ¿jupar kamsasmasa?

● Janïr jaqichasiñ munkasa maynimp mistsusma ukhaxa, ¿uk yatisin jupax kunjams jikxatasispa?

[18 janan qhanañchäwipa]

“Janiw jan amuytʼasa khitimpis mistsuñakïkiti. Nayatakixa, mä waynar munassta ukat jupamp sum sarnaqañ amuyassta ukhakiw jupamp mistsuñamaxa.” (Ambera)

[16, 17 jananakan fotopa]

Jaqichasiñ jan munasa maynimp miststaxa, mä wawax machaq anatañamp qarisa jaqtjxixa ukamp sasïtawa