Autoridadanïpki ukanakar respetañajj wali askiwa

JEHOVÁ DIOSAW aka oraqsa alajjpachsa (universo) apnaqe. Jiwasatï organizacionap taypinkañ munstan ukhajja, juparuw istʼañasa, Yoqaparojj congregación Pʼeqtʼirirjamaw uñjañasaraki. Ukatjja taqe kun lurkasas autoridadanïpki ukanakarojj respetompiw uñjañasa. Ukham lurañajj taqenin askipatakiwa.

² Khititï autoridadanïki ukarojj kunatsa respetasiñapa ukjja, Jehová Diosajj Edén jardinanwa instruccionanak jaqer churäna. Adanampi Evampejj Diosaruw sujetasipjjañapäna, taqe kunanwa istʼapjjañaparakïna, ukatjja animalanakajj jaqemp apnaqatäpjjañaparakïnwa (Gén. 1:28; 2:16, 17). Jupanakatï Diosar istʼapjjaspäna ukhajja, aka oraqen suman jakasiñaw utjaspäna. Apóstol Pablojj uka toqet akham sänwa: “Ak yatipjjañamwa nayajj munta, taqe chachan pʼeqepajj Cristowa, warmin pʼeqepasti chachawa, Criston pʼeqepasti Diosawa” sasa (1 Cor. 11:3). Uka textorjamajja, Jehová Diosakiw jan khitimpis apnaqatäkiti.

³ Jilaparte jaqenakajja, janiw uka texton qellqatäki uka arunakar respetapkiti. ¿Kunatsa? Kuna laykutejj nayrïr awk taykasaw Diosar jan istʼañ amtapjjäna, jupa contraw saytʼapjjarakïna (Gén. 3:4, 5). Ukham lurapjjatapat janiw jukʼamp librejj jakasipkänti, antisas Supayan esclavoparuw tukupjjäna, Diosatsa jitheqtapjjarakïnwa (Col. 1:21). Ukatwa jilaparte jaqenakajj jichhakamas Supayan apnaqatäsipkaki (1 Juan 5:19).

⁴ Jiwasatï Biblian mayitanakapar istʼas ukarjam sarnaqañäni ukhajja, Supayamp jan apnaqayasitaswa uñachtʼayañäni. Ukat Jehová Diosar vidas katuyasis bautisasktan ukhajja, jupamp apnaqayasiñ munataswa uñachtʼaytanjja. David reyjamaw jikjjatastanjja, jupajj Jehová Diosat akham sänwa: “Jumaw taqe kunjjar mä pʼeqtʼirjamajj jachʼañchatätajja” sasa (1 Crón. 29:11). Ukatwa humilde chuymampi akham sasin yatiytanjja: “Jehová Diosajj Diosätap yatipjjam. Jupaw jiwasarojj luristu, ukatwa jiwasajj jupanktanjja. Jiwasajj jupan markapätanwa, pastopankir ovejanakarakïtanwa” sasa (Sal. 100:3). Jehová Diosajj qhawqha chʼamanisa uk sumwa amuytanjja, juparukiw jiwasajj istʼañasa, kuna laykutejj jupakiw taqe kun Lurir Diosajja (Apoc. 4:11). Jehová Diosan cheqpach servirinakapajj Jesusatwa yateqastanjja, jupajj taqe kunanwa Diosar istʼäna.

⁵ Kunjamtï Hebreos 5:8 textojj siskejja, Jesusajj “tʼaqesiñanakan uñjasitap laykuw istʼasirïñ yateqäna”. Jan walinakan uñjaskasas janipuniw Awkipat jitheqtkänti. Janiw jupan amtapatak kuns lurirïkänti, ni kuntï amuykäna ukaksa parlirïkänti, janirakiw mayninakamp jachʼañchayasiñsa thaqkänti (Juan 5:19, 30; 6:38; 7:16-18). Juparojj Awkipan munañap lurañaw wal kusisiyäna, ukham luratapatjja enemigonakapamp arknaqataw uñjasïna (Juan 15:20). Ukhamansa uñjaskchïnjja, Jesusajj humillasïnwa, ‘tʼaqesiñ lawan jiwkäna’ ukhakamaw Awkipar istʼarakïna. Ukham luratapatwa jiwasajj jutïrin wiñayatak jakasiñäni. Jesusan istʼasirïtapajj Jehová Diosaruw jachʼañchäna, ukatwa jupajj nayrat sipansa mä jachʼa puesto katoqäna (Filip. 2:5-11; Heb. 5:9).

AUTORIDADANÏPKI UKANAKAR ISTʼAPJJAPUNIÑÄNI

⁶ Diosar sujetastan ukhajj taqe chuymaw munañap lurtanjja, ukhamatwa Diosar jan servipki ukanakjamajj llakinakampisa jan walinakampis jan aynachtʼktanti. Jiwasar uñisir Diablojj janipuniw qarjtkiti, Diosat apaqañwa munarakistu. ¿Kunjamsa ukat jarkʼaqassna? Jupa contraw saytʼañasa, Jehová Diosarukiw apnaqerisarjam uñjañasaraki (Mat. 6:10, 13; 1 Ped. 5:6-9).

⁷ Jesucristow congregacionan Pʼeqtʼiripajja, jupajj ‘suma phoqeri amuyasir esclavoruw’ autoridad churawayi. Uka esclavon autoridadanïtap amuyañajja, sum sarnaqañataki, mayninakamp sum apasiñataki ukat Diosar sum serviñatakiw yanaptʼistu. Khitinakatï congregacionan autoridadanïpki ukanakar respetapki ukanakajja, taqe kunanwa Diosar serviñatakejj chʼamachasipjje. Sañäni, predikiriw sarapjje, janiw tantachäwinakat faltasipkiti, tantachäwinakansa arstʼapjjewa, ancianonakarus istʼapjjarakiwa, Diosan markaparus taqe chuymaw yanaptʼapjjaraki (Mat. 24:45-47; 28:19, 20; Heb. 10:24, 25; 13:7, 17).

⁸ Jehová Diosajj kunjam Diosas ukajj congregacionanwa qhan amuyasi. Jiwasatï Diosarojj autoridadasarjam uñjañäni ukhajja, congregacionan sumankañaw utjani, suma ordentʼatarakïniwa, janiw kunar ajjsarañas utjkaniti (1 Cor. 14:33, 40). Diosar servirinakampi Diosar jan servirinakampejj kunansa jan kikpäpki uka toqet David reyejj akham sänwa: “¡Kawkïr markatejj Jehová Diosat Diosanïki uka markajj kusisitawa!” sasa (Sal. 144:15). Uka pachparakwa jiwasajj sistanjja.

⁹ Jichhajj familiat parltʼarakiñäni. Apóstol Pablojj akham sänwa: “Warmin pʼeqepasti chachawa” sasa. Ukjjarusti chachan pʼeqepajj Cristowa, Criston pʼeqepasti Diosawa sarakïnwa (1 Cor. 11:3). Ukhamasti mä casada warmejj esposoparuw istʼañapa (Efes. 5:22-24). Wawanakasti awk taykaparuw istʼapjjañaparaki (Efes. 6:1). Kunapachatï familiankirinakajj autoridadanïpki ukanakar respetomp uñjapjje ukhajja, sumankañaw utji.

¹⁰ Esposonakajj Cristotwa yateqasipjjañapa, jupajj munasiñampiw Diosan markapar uñji. Wali jachʼa autoridadanïpkaspas ukham janiw esposonakajj tukupkiti, janirakiw autoridadanïsajj lurañanakap jan sum phoqapkiti (Efes. 5:25-29). Kunapachatï mä esposojj Jesusat yateqasisin kuns luri ukhajja, familiapankirinakajj taqe kunanwa jupar sujetasipjje. Warmejja esposopan yanapiripawa, chachapan compañeraparakiwa (Gén. 2:18). Esposatï paciencianïni, esposopar apoyani, respetarakini ukhajja, esposopan wali munatäniwa, Jehová Diosarus jachʼañcharakiniwa (1 Ped. 3:1-4). Autoridadanïpki ukanakar respetiri, Jehová Diosan munañap taqe chuym lurir awk taykanakajja, wawanakapatakejj wali yateqaskayäpjjewa.

¹¹ ‘Jilïr autoridadanakarojj’ respetompiw uñjañasaraki, kuna laykutejj “Diosan permisopampiw lugaranakapar uchatäpjje” (Rom. 13:1-7). Cristianonakjamajj wali respetompiw markan leyinakap uñjtanjja, impuestonaksa pagaraktanwa, ‘Cesarankkis ukjja, Cesararuw churtanjja, Diosankkis ukjja, Diosaruw churaraktanjja’ (Mat. 22:21). Ukhamarus markan leyinakaparjamaw taqe cheqan predicasi. Gobiernonakarojj taqe chuymaw sujetastanjja, kunanaktï mayipkistu ukarus istʼaraktanwa, ukampis Diosan leyinakap contra kuns lurayañ munapjjestu ukhakiw jan istʼktanti. Ukhamatwa Diosan arunakap taqe chuyma predicaskaksna (Mar. 13:10; Hech. 5:29).

¹² Autoridadanïpki ukanakar respetomp uñjapjjam sasin Bibliajj siski uka mandatorojja, istʼapuntanwa. Diosar wal confiyatasatjja, niyas taqe jaqenakajj Diosar apnaqeriparjam uñj-jjapjjaspa munañaps lurjjapjjarakispa ukhamwa amuytanjja, cheqas niyaw uka urojj purinini. ¡Wali kusiskañapunïniwa! (1 Cor. 15:27, 28).