Oración

1 ¿Kunatsa orañasa?

ORACIÓN. Biblian yatichäwinakapatxa, mä qhawqha yatichäwinakatakwa jaqix yatxatañ munapxi. Aka yatichäwinakanxa, oración tuqit paqallqu jisktʼanakwa uñjaskañäni ukat Biblian qhanañchtʼäwinakapampi. Ukax pä amtampi wakichanitawa: khitinakatï jan orapki ukanakarux orapxañapatak chʼamañchtʼani, ukat orapki ukanakarux jukʼamp sum orapxañapataki.

URAQPACHANXA, jaqinakax kunjam sarnaqäwinipkchisa jan ukax kuna yupaychäwirusay sarasipkchi taqiniw orapxi. Iglesiana, sinagogana, mezquitana jan ukax santuariona. Ukat rosario, orañatak libro, alfombra, tablillanaka ukat cilindros de oración ukanakamp aptʼatasipkchisa, sapakis jan ukax yaqhanakamp chikas taqiniw orapxi.

Taqi kunatï aka Uraqin jakki ukanakatxa, orañanwa jaqinakax mayjäpxi. Kunattix uywanakjamarakiw manqʼtansa umtansa ukat samstansa. Ukhamaraki nastansa, jilstansa ukat jiwtanxa (Eclesiastés 3:19). Ukampis jaqikiw oración luri. ¿Kunatsa?

Kunattix orañaw jaqitakix wakisi. Oración tuqiw kunatï jaqitakix qullanäki ukat wiñayäki ukar jakʼachasispa. Ukat uka amtani luratätanwa sasaw Bibliax qhanañchi (Eclesiastés 3:11). Jesusax akham sänwa: “Kusisiñanïpxiw khitinakatix ajay tuqin aynachtʼatäpxatap amuyasipxi ukanakaxa” sasa (Mateo 5:3).

Chiqas ukatwa walja templonaka, orañatak yänakas utjpacha ukat walja horanaks orapxarakpacha. Jïsa, yaqhipax ajay tuqin aynachtʼatäpxatap amuyasisaw chuyma phuqtʼat jikxatasiñatakix kuns lurapxi ukat jaqi masinakaparus yanap mayipxi. Ukampisa, jupa pachpa thaqhasasa janiw uk jikxatkaspati ni jaqi masipas yanaptʼkaspati. Kunattix mä jukʼa tiempokiw jaktanxa ukatwa taqi kun sum jan yatktanti. Khititï wiñayatak jakki, wali yatiñanïki ukat wali chʼamanïki ukakiw kuntï thaqasktan uk churistaspa. Ukhamasti, ¿kunanakas chiqpachapun orañatak wiytistu?

Amuytʼañäni, awisax kun jisktʼasisasa janiw khitis kunjamtï munktan ukarjam qhanañchkistuti ni iwxtʼkarakistusa, ¿janich ukhamäki? Wali wakiskir amtar puriñatak yanaptʼatasa, jachʼa juchar puritasat pampachatasa ukat mä munat familiarana jan ukax amigon jiwatapat chuymachtʼatasa janiw chuymas chuym jikxatasktanti, ¿jumax ukhaman uñjasirïtati?

Taqi ukanakatwa oración lurtanxa. Bibliaw uka tuqinakat wali atiniskayaxa ukat Diosar taqi chuyma luqtir chachanakana ukat warminakan walja mayisïwinakapat parlaraki. Jupanakaxa, chuymachtʼäwi, yanaptʼa, juchanakapat pampachatäña ukat chʼama qhanañchtʼkañ jisktʼanakar qhanañchäwinakwa mayipxatayna (Salmo 23:3; 71:21; Daniel 9:4, 5, 19; Habacuc 1:3).

Khitinakatï orapkäna ukanakax janiw kikpaki orapkänti. Ukampis istʼatäñatakixa, khitirus orapxañapäna ukwa yatipxäna. Jichhürunakanxa yatkasinsa jan yatkasinsa jaqinakax ukx armxapxakiwa.

Oración

2 ¿Khitirus orañäspa?

KHITIRUSAY oraskañäni, taqi mayisïwinakas Diosax istʼiw sasaw jaqinakax jichhürunakan sapxi. Khitinakatï kunayman yupaychäwinakaru mayachtʼañ munapki ukat taqi yupaychäwinakaw sumaxa sasin sapki ukanakas ukhamarakwa sapxi. Ukampis ¿chiqäpachati?

Khitirutï orañäki ukaruw jan orapkiti, sasaw Diosan Arupax qhanañchi. Kunapachatï Bibliax qillqaskäna ukhaxa, idolonakar orañax yatitänwa. Ukampisa, Diosax walja kutiw jan ukham lurapxamti sasin markapar iwxtʼäna. Salmo 115:4-6 qillqatanxa uka idolonakax “jinchunïkasas janiw istʼapkiti” sasaw qhanañchi. Ukhamasti, jan istʼir diosanakar orañax inamayäspawa.

Uka tuqit jukʼamp yatxatañatakixa, Biblian mä qhawqha jiskʼa tʼaqanakapat yatxatañäni. Taqi chuyma Diosar luqtir Elías profetatwa parli. Jupaxa, Baal diosan sacerdotenakaparuw akham säna: jumanakax diosamar mayisipxam ukat nayasti Diosajaruw mayisi, ukat khititï jaysankani ukaw chiqpach Diosätap uñachtʼayani sasa. Ukat Baal diosan profetanakapax iyaw sasaw mayisiñ qalltapxäna. Walja horanakaw jupanakax mayisipxäna, ukampis inamayakïnwa. “¡Janiw khitis istʼankänti, ni jayskarakïnsa!” (1 Reyes 18:29). ¿Eliasarux ukhamti pasarakpachäna?

Janiwa, mayisiñ tukuyxäna ukspachaw Diosax nina alaxpachat apayanïna ukat kawkïr ofrendtï profetax wakichkäna uk nakhantayäna. ¿Kunatsa oracionap Diosax jankʼak istʼpachäna? Eliasan mayisïwipaw uk qhanañchistu. Uka mayisïwix hebreo arunxa, 30 arunakanikiwa ukat kimsa kutiw Diosan sutipax uñsti. Ukhamasti, Eliasax kimsa kutiw Jehová sasin Diosan sutip aytatayna (1 Reyes 18:36, 37).

¿Kunatsa ukax wali wakiskirïpachänxa? Amuytʼañataki, Cananeonakan diosapax Baal satänwa (“dueño” jan ukax “uywiri” sañ muni) ukat sapa chiqanwa yaqha sutimp uñtʼatäna. Ukampisa, Jehová Diosan sutipax mayakiwa, kunattix akapachansa ukat alaxpachans Jupa sapakiw uka sutinixa. Ukat Jupa pachpaw akham säna: “Nayätwa [‘Jehová’, NM] Tatitux, ukarakiw sutixaxa, janirakiw munkäti kunatix nayar churañäki ukxa yaqhar churayañxa” sasa (Isaías 42:8).

Ukhamasti, Eliasan mayisïwipasa ukat Baal diosan profetanakapan mayisïwinakapasa, ¿pachpa diosarus purkaspa ukham amuyañax walikïskaspati? Janiwa. Baal diosar yupaychasax jaqinakwa sacrificiot luqtapxäna ukat qʼañu wachuq juchanakwa lurapxäna, ukax jaqinakarux jan wali ukat qʼañu amtaninakaruw tukuyäna. Ukampisa, Jehová Diosar luqtañax qʼumänwa ukat janiw jaqinakarux qʼañu jan walinaka munkir jan munkir lurayapkänti. Ukhamasti, Jehová Diosar orapkäna ukax janiw Baal diosar purkaspänti. Wali respetat amigor mä carta apaysna ukat yaqha sutini jan wali jaqit uñtʼat jaqirus purkaspa ukhamäspaw ukaxa.

Jehová Diosar orapki ukanakaxa, Luriri Awkisaruw orapxi.a “[Jehová] jumaw nanakan awkixätaxa” sasaw Isaías profetax mayiskäna ukhax mä kutix säna (Isaías 63:16). Jupatwa Jesusax parlaskäna, kunapachatï arkirinakapar akham säna ukhaxa: “Sarasktwa kawkinkkitix Awkixax ukaru, jupasti jumanakan Awkimarakiwa, nayan Diosaxawa jumanakan Diosamarakiwa” sasa (Juan 20:17). Ukhamasti Jehová Diosatï Jesusan Awkipächixa, Jesusax uka Diosaruw mayisïna ukat arkirinakapax uka Diosarurakiw mayisipxañapäna (Mateo 6:9).

¿Jesusaru, Mariaru ukat santonakaru jan ukax angelanakaruw mayisipxañama sasat Bibliax sispacha? Janiwa, Jehová Diosarukiw orañasa. ¿Kunatsa? Kunattix oración tuqiw yupaychtanxa, ukat Qullan Qillqatanakarjamax Jehová Diosarukiw yupaychañasa (Éxodo 20:5). Ukat Jupakiw ‘mayisïwinakar istʼirixa’ (Salmo 65:2). Jupax walja luräwinaksa yaqhanakan lurapxañapatakis uttʼaykchixa, oracionanak istʼañapatakix janipuniw khitirus uttʼaykiti.

Ukhamasti, mayisïwinakasax Diosan istʼatäñapatakixa Biblian aka arunakwa amtañasa: “Taqi khitinakatix [Jehová] Tatitun sutipar artʼaskanixa, qhispiyatäniwa” (Hechos 2:21). Oracionanakax Juparukïñapawa ukat taqi oracionanakxa istʼatäniwa, ¿sañti uka arunakax munpacha? Jan ukaxa, ¿kunampich lurañäspa?

[Qhanañchäwi]

[5 janan fotopa]

Kunjamtï Elías profetax uñachtʼaykänxa, janiw taqi oracionanakxa Diosax istʼkiti

Oración

3 ¿Kunjamsa orañasa?

KUNJAMTÏ yaqhip religionanakan lurañ yatipxi ukhamxa, kuna arunakas arsuñasa, kunsa lurañasa ukat mayiskasax saytʼatäñati jan ukax qunqurtʼatäñacha ukxa janiw Bibliax qhanañchkiti. Jan ukasti, wali wakiskir tuqinakatwa qhanañchi.

Kunjamsa Diosat jan jithiqtir luqtirinakapax mayisipxäna uka tuqitwa Bibliax qhanañchi. Kunjamansa jikxatasipxäna ukarjamaw yaqhipax chuymapan mayisipxäna, yaqhipasti jachʼat arsusaw mayisipxäna. Yaqhipasti alaxpach uñtasaw mayisipxirïna ukat yaqhipax uraqir altʼata. Ukhamsa mayisipxchïnxa, janipuniw lurat pachachanaksa, rosarionaksa ni orañatak libronaksa apnaqapxirïkänti, jan ukasti kunatï chuymanakapan utjkäna ukwa mayisisax taqi chuyma arsupxirïna. ¿Kunatsa Diosax uka oracionanak istʼpachäna?

Kunjamtï yatiqawayktanxa, Jehová Diosaruw oracionanak lurapxirïna. Ukampisa, 1 Juan 5:14 qillqatanxa, kunamp lurañas wakisi ukwa akham sasin qhanañchi: “Utjistuwa Diosar iyawsañasaxa, yatiraktanwa kuntix Diosarux mayiñäni munañaparjama ukxa jupax istʼistuwa”. Jïsa, oracionanakasaxa Diosan munañaparjamäñapawa. ¿Kunsa ukax sañ muni?

Nayraqatxa, kunas Diosan munañapaxa ukwa yatiñasa. Ukatakixa, Bibliat yatxatañaw wali wakiskirixa. Ukampisa, janiw taqi kuntï Bibliax siski uk sum yatsuñasxa Diosax jiwasat suykiti. Jan ukasti, amtanakap amuyañasa ukat ukarjam sarnaqañatak chʼamachasiñaswa suyi (Mateo 7:21-23). Ukhamasti, kuntï Bibliat yatiqtan ukarjamaw orañasa.

Ukhamarusa, Jehová Diosata ukat munañapat jukʼamp yatiqtan ukhaxa, jukʼampwa iyawsäwisax jilxatti. Ukhamasti Diosax mayisitanakas istʼañapatakixa iyawsäwinïñaw wali wakiskirixa. Jesusax akham sänwa: “Taqi kuntix oracionan mayipxasma, ukat iyawsapxarakisma ukaxa katuqapxasmawa” sasa (Mateo 21:22). Ukampis janiw ukhamawa sañakïkiti, jan ukasti iyawsäwixa, kuntix jan uñjtan ukax chiqätapa sañ muni: Jesusax parlkäna uka iyawsäwixa luräwinakamp uñachtʼayatawa (Hebreos 11:1). Chiqas Jehová Diosarux janiw uñjksnati, ukampisa Bibliax qhanwa jupan utjatapa ukat atiniskayätapa qhanañchistu. Ukat khitinakatï Jupar iyawsapki ukanakan oracionanakap istʼiwa. Kunapachatï jukʼamp iyawsäwi mayiñäni ukhaxa, jupax wali munasiñampiw qhawqtï wakiskani uk churistani (Lucas 17:5; Santiago 1:17).

Ukhamäkchisa, Diosax oracionanakas istʼañapatakixa akaw wakisi: “Naya tuqikiw Awkin ukar puriñax utji” sasaw Jesusax säna (Juan 14:6). Mä arunxa, Diosan Yuqap tuqikiw Awkir jakʼachassnaxa. Ukatwa Jesusax sutipxar orañxa arkirinakapar yatichpachäna (Juan 14:13; 15:16). Ukampisa Jesusan sutipxaru orañaxa, janiw jupar oraña sañ munkiti. Jan ukasti, jupïpanwa alaxpachankir qullana ukat chiqapa Awkisaru jakʼachastanxa, uk amuyañwa sañ muni.

Mä kutixa, akham sasaw mä arkiripax Jesusar achiktʼasïna: “Tata, oración lurañay yatichtʼapxita” sasa (Lucas 11:1). ¿Ukampix kun sañs munäna? Jupanakax kunjamsa oraña uk yatxapxänwa, ukampis kuna tuqinakatsa mayisiñasa ukwa jisktʼasipkäna.

[6 janan qhanañchäwipa]

Diosax oracionanakas istʼañapatakixa, munañaparjamaw orañasa, iyawsäwinïñasawa ukat Jesusan sutipxarurakiw mayiñasa.

Oración

4 ¿Kuna tuqitsa orañasa?

CRISTIANONAKAN taqi oracionanakapatxa, nänakan Awkija sat oraciona Jesusax yatichkäna ukwa jaqinakax jilpach kutin kutin orapxi. Ukat uka oracionax kamsañs muni uks janiw sum amuyapkiti. Waranqa waranq jaqinakaw kamsañs muni uk jan sum amuytʼasa sapüru kutin kutin uka oración arsupxi ukat urun walja kutiraki. Ukampis Jesusax janiw ukham lurapxañapa munkänti. ¿Kunatsa?

Kunattixa, janïr yatichkasaxa, Jesús pachpaw akham säna: “Oración lurkasinxa jan inamaya [jan ukax pachpa] arunakxa arsumti” sasa (Mateo 6:7). Ukhamasti, ¿Jesusax pʼiqir amxasiñataki ukat pachpa arunaka kutin kutin arsupxañapatak yatichaspänti? Janiwa. Chiqansa, kuna tuqinakatsa nayraqat mayiñasa ukwa Jesusax yatichañ munäna. Ukhamaxa, Mateo 6:9-13 jiskʼa tʼaqanakan jikxataski uka oracionax kamsañs muni uk yatxatañäni.

“Alaxpachankir nanakan Awkixa, sutimax jachʼañchatäpan.”

Uka arunakampix Jehová Diosarukipuniw mayisiñasa sasaw Jesusax arkirinakapar amtayaskäna. Ukampis ¿kunatsa ukxarux sutimax jachʼañchatäpan sasin sispachäna?

Kunattixa, qalltatpachaw Diosan sutipat kʼarinak parlapxäna. Diosar uñisiri Supayaxa, Jehová Diosax kʼariwa, ukat janiw jaqin askip munkiti ukat luratanakapxarux janiw apnaqkaspati sasaw si (Génesis 3:1-6). Ukat khitinakatï Supay tuq saytʼasipxi ukanakaxa, Diosax janiw sintʼasirïkiti, qhuruwa ukat jan walit jan walimpiw kuttʼayi sasaw yatichapxi, ukat taqi kunatï utjki ukanak janiw Jupax lurkiti sasaw sapxaraki. Yämas yaqhipaxa, Bibliat Diosan sutip kunwa apsupxi ukat janiw arsusiñapäkiti sasaw sapxaraki.

Ukampisa, Diosaw taqi ukanak chhaqtayäni sasaw Qullan Qillqatanakax qhanañchi (Ezequiel 39:7). Ukat uk lurani ukhaxa, kunanakatï jaqir jan waltʼayki ukanaks chhaqtayarakiniwa. ¿Kunjamsa uk lurpachäni? Jesusaw akham sasin qhanañchi.

“Munañamampisti apnaqapxita.”

Kunas Diosan Apnaqäwipaxa, uka tuqitxa yupaychäwi pʼiqtʼirinakax janiw jichhürunakan mä amtar puripkiti. Ukampis Jesusax aka Uraqinkkäna uka urunakanxa janiw Judionakampix ukham paskänti. Jupanakaxa, Diosan ajllit Qhispiyiri, Mesiasat parlir profecianak sumwa yatipxäna, jupaw Diosan Apnaqäwipan apnaqañapäna ukat uka apnaqäwiw uraq sumaptayañapäna (Isaías 9:6, 7; Daniel 2:44). Ukat uka apnaqäwirakiw Jehová Diosan sutip qʼumachas jachʼar aptani, Supayan kʼarinakap qhanstayani, Supayan apnaqäwipsa ukat luräwinakapsa tukjani. Ukat chʼaxwäwinaksa, manqʼat pistʼañanaksa, usunaksa ukat jiwañsa chhaqtayani (Salmo 46:9; 72:12-16; Isaías 25:8; 33:24). Ukhamasti, munañamampisti apnaqapxita jan ukax Apnaqäwimax jutpan sasin mayisktan ukhaxa, uka amtanakap phuqasiñapwa mayisktanxa.

“Munañamasti luratäpan akapachanxa, kunjämatï alaxpachana luratäki ukhama.”

Diosan munañapax aka Uraqin phuqasipuniniwa sasaw uka arunakax uñachtʼayistu, kunjamtï alaxpachan phuqaski ukhama. Kunapachatï Diosan yuqapax Supayar ukat angelanakapar aka uraqir jaquqankäna ukhaw Diosan munañapax alaxpachan phuqasïna (Apocalipsis 12:9-12). Nänakan Awkija sat oracionat jichhakam yatxatktan uka arunakaxa, jiwasan munañas lurañat sipansa, Diosan munañap lurañwa amtayistu. Diosan munañap phuqasini ukhakiw Uraqin askinakax utjani. Jesusax janisay pantjasirïkchïnxa, jupa pachpaw akham säna: “Jan munañaxa luratäpati, jan ukasti juman munañamak luraspan” sasa (Lucas 22:42).

“Sapürutak manqʼañ churanipxita.”

Kuntï jiwasatakix wakiski ukxa mayiraksnawa sasaw Jesusax säna. Kunjamtï uñjtanxa, jakañatak wakiski uk Diosar mayiñax walikïskiwa. Ukham mayisisaxa, Jehová Diosaw “jakañsa, samañsa, taqi kunanaksa” churistu sasaw atinistanxa (Hechos 17:25). Kunjamtï mä munasiri awkix wawanakapar kuntï wakiski uk churkixa ukhamaw Jehová Diosaxa sasaw Bibliax qhanañchi. Ukat suma awkjamaxa, kunatï jupanakar jan waltʼaykaspa uk janipuniw churkaspati.

“Juchanakaxatxa pampachapxita.”

¿Kunatsa pampachatäñ muntanxa? Jichhürunakanxa, janis juchax utjkaspa ukat juchachasipkchisa janis kunäkaspa ukhamwa waljanix amuyapxi. Ukampis kunjamtï Bibliax siskixa, juchaw jan waltʼäwinakar puriyi ukat jiwañarus puriyistu sasaw qhanañchi. Ukat juchararjamaxa, sapa kutiw Dios nayraqatan jan walinak lurasax juchachastanxa. Ukhamasti, wiñay jakañ munstan ukhaxa, uka juchanakasat Diosamp pampachatäñaw wakisi (Romanos 3:23; 5:12; 6:23). Jehová Diosax munasiriwa ukat juch pampachirirakiwa, sasaw Bibliax amtayistu (Salmo 86:5).

“Ñanqhatxa qhispiyapxita.”

Jaqinakax Diosamp jarkʼaqatäñ wal muntanxa. Inas waljanis janiw ‘ñanqhax’ jan ukax Supayax utjkiti sasin sapxchispa. Ukampis Jesusax Supayan utjatap yatïnwa, ukatwa juparux ‘akapach apnaqiri’ sasin sutichäna (Juan 12:31; 16:11). Ukat akapach munañapar apnaqasasa ukat jan walinak utjayasasa janiw ukhamak Supayax qhiparkiti, jan ukasti Jehová Diosamp jan sum apasiñasatakix kunayman jan walinakwa lurayañ munistu (1 Pedro 5:8). Ukampis janiw jupar axsarañasäkiti, kunattix Diosaw jukʼampi chʼamanixa ukat Jupar munasipki ukanakarux jarkʼaqaniwa.

Ukampis janiw ukanakak mayisiñasäkiti, jan ukasti kunjamtï 1 Juan 5:14 qillqatan siskixa: “Kuntix Diosarux mayiñäni munañaparjama ukxa jupax istʼistuwa”. Jïsa, taqi llakinakassa yatiyaraksnawa, kunattix Jupax janiw jan yäqañäkaspas ukham uñjkiti (1 Pedro 5:7).

¿Kawkinsa ukat kuna pachasa orañäspa uka tuqit kamsasirakispasa? ¿Uka tuqit Bibliax parlpachati?

Oración

5 ¿Kunapachasa ukat kawkinsa orañasa?

URAQPACHAN wali uñtʼat yupaychäwinakax utjki ukanakatxa, niya taqpachaniw kawkinsa ukat kunapachas orasiñapa uk uttʼayapxi. Ukampis ¿Bibliax ukhamti yaticharakpacha?

Janiwa. Jan ukasti, kunapachas orañax wakisispa ukwa qhanañchi. Ukhamawa, Jesusax janïr manqʼkasaw Diosar yuspärañatak mayisïna (Lucas 22:17). Arkirinakapaxa, Diosar yupaychañataki tantachasipxäna ukhax orapxapunïnwa. Ukampis ukxa janiw ukhak uñstayapkänti. Jan ukasti, judionakan sinagoganakapansa ukat Jerusalén templonsa nayrax lurxapxänwa. Uka utaxa, “taqi markankirinakataki Diosat mayisiñ utä[ñap]wa” Diosax munäna (Marcos 11:17).

Kunapachatï luqtirinakapax tantachasisin mä amtampiki ukat Qullan Qillqatanakarjam mayisipxi ukhaxa, Diosatakix wali askiwa. Jïsa uka oracionanakaw kuntï jan lurkaspa uk lurañapatak wiytaspa (Hebreos 13:18, 19). Ukatwa Jehová Diosan Qhanañchirinakapax taqi tantachäwinakapan orapxi. Jumatï jupanakan oracionanakap istʼañ munstaxa, kawkhantï jupanakax tantachasipki ukar sararakismawa.

Kunapachas ukat kawkhansa orañasa ukxa Bibliax janiw siskiti. Jan ukasti Diosan luqtirinakapaxa, kunapachas ukat kawkhansa mayisipxakïnwa, ukwa Bibliax qhanañchistu. Jesusax akham sänwa: “Jumax mayiskätas ukkhaxa, utamar mantam; punkum jistʼantasisinsti mayisirakim Awkimata khititix jumampïski ukaru. Awkimasti uñjasktamwa jamasan mayisiskirxa, ukatsti jupax mayisitamarux istʼätamwa” sasa (Mateo 6:6).

Kunapachasa ukat kawkhansa taqi kunjaru Munañani Jehová Diosar mayisiñäni ukhaxa Jupax istʼistaniwa, uk yatiñax wali kusiskañapuniwa. Ukatwa Jesusax Awkipar orañataki sapakïñxa munpachäna. Mä kutixa, janïr mä wakiskir amtar puriñatakixa, “arum paqariw Diosat mayisïna” (Lucas 6:12, 13).

Ukhamarus Diosan yaqha luqtirinakapaxa, mä wakiskir amtaru puriñataki jan ukax jan waltʼäwinakar saykatañatakix Juparuw mayisipxarakïna. Jupanakax chuymap manqhansa jan ukax jachʼat arsusasa, waljanisa jan ukax sapakisa mayisipxchïnxa, Diosaruw mayisipxäna ukaw wali wakiskirïnxa. Ukat Dios pachpaw akham sasin iwxtʼarakistu: “Jan inaktʼas orapxam” sasa (1 Tesalonicenses 5:17). ¿Janit wali munasitapat ukham siskpachïstu? Luqtirinakapax qhawqha kutisay mayisispkpan Jupax istʼapuniniwa.

Ukhamäkchisa, kunatï chiqäki uka tuqit pächasirinakaxa, oracionax jichhürunakan kunatakis yanaptʼistaspati sasaw jisktʼasipxi. Inas jumax ukham jisktʼasiraksta.

[9 janan qhanañchäwipa]

Kunapachas ukat kawkinsa Diosarux mayisiskaksnawa

Oración

6 ¿Kunatakis orañax wakisi?

ORACIONAX janjamakiw yanaptʼkistaspati sasaw waljanix pächasipxi. Ukampisa, Bibliax janiw ukham yatichkiti (Lucas 22:40; Santiago 5:13). Oracionanakaxa, janiw ajay tuqitak yanaptʼkistuti, jan ukasti jañchi tuqitsa ukat llakitätan ukhasa yanaptʼistuwa. ¿Kunjamsa?

Amuytʼañataki, kunapachatï mä wawax regalo katuqki ukhaxa, ¿kun lurañapatakis awk taykax wawapar amtayi? Janiw suma chuymampik katuqañ yatichapkiti, jan ukasti yuspärañwa yatichapxi. Arunakampi yuspärtan ukhaxa, taqi chuyma yuspärataswa uñachtʼaytanxa. ¿Diosar mayistan ukhax ukhamarakïpachati? Jïsa, ukhamarakiwa. Uka tuqit mä qhawqha uñachtʼäwinakat amuytʼañäni.

Yuspärañatak oracionanaka. Taqi kuna askinaktï paskistu ukanakat Diosar yuspärtan ukhaxa, kuna bendicionanaktï katuqktan uka tuqinakat lupʼiñaruw uchistu. Ukaw wali yuspärasirïñataki, kusisitäñataki ukat taqi kuns askirjam uñjañatak yanaptʼistu (Filipenses 4:6).

Amuytʼañataki: Jesusax Awkipan istʼatapat yuspärañatak mayiskäna uka oraciona (Juan 11:41).

Juchanakasat pampachatäñatak oracionanaka. Juchanakasat pampachatäñatak Diosar mayisktan ukhaxa, suma chuyman jikxatasiñatakiw yanaptʼistu. Ukatxa, Diosan amtaparjam sarnaqañataki, kuna jucharus purtʼastan uk amuyasiñataki ukat taqi chuyma arrepentisiñatakiw yanaptʼistu.

Amuytʼañataki: Arrepintisit Davitan oracionapa (Salmo 51).

Yanaptʼa ukat yatiñkankañ mayiñatak oracionanaka. Ukaw altʼat chuymanïñ yanaptʼistu, kunattix jiwas pachpax janiw kuns lurksnati. Ukat jiwas pachpar atinisiñat sipansa Alaxpachankir Awkisar atinisiñwa yanaptʼistu (Proverbios 3:5, 6).

Amuytʼañataki: Salomón chachax Israel marka apnaqañatak yanapa ukat yatiñkankañ mayïna uka oraciona (1 Reyes 3:5-12).

Jan waltʼäwin jikxatasktan uka oracionanaka. Wali llakita jikxatastan ukhaxa, Diosar llakinakas yatiytan ukhakiw sum jikxatastanxa. Ukhamarusa, Diosar katuyatjam sarnaqañwa yatiqaraktanxa (Salmo 62:8).

Amuytʼañataki: Asá apnaqirix wali chʼamani enemigop contra nuwasiñatak mayiskäna uka oraciona (2 Crónicas 14:11).

Khitinakatï yanap munapki ukanakataki oracionanaka. Ukham mayisiñaxa, khuyapayasirïñasataki ukat sintʼasirïñasataki ukat yaqhanakan askip thaqhañatakiw yanaptʼistu.

Amuytʼañataki: Jesusax arkirinakapatak maykäna uka oraciona (Juan 17:9-17).

Diosar jachʼañchañataki oracionanaka. Jehová Diosar luratanakapata ukat suma Diosätapat jachʼañchtan ukhaw Jupar respetatasa ukat munasitassa jukʼamp jilxattï. Uka oracionanakarakiw Alaxpachankir Awkisar jukʼamp jakʼachistu.

Amuytʼañataki: Diosan luratanakapat Davitax jachʼañchkäna uka oraciona (Salmo 8).

Ukampis oración tuqirakiw Diosan samarañap jikxattanxa, “ukasti taqi kuntix jaqix amuytʼkaspas ukat jukʼamp jachʼawa” (Filipenses 4:7). Aka jan wali pachan kusisita ukat suman jakañaxa, mä suma churäwipuniwa. ¡Kʼumara jakasiñatakis yanaptʼarakistuwa! (Proverbios 14:30.) Ukampisa, ¿uka samarañ jiwasan chʼamachasitasatti jikxatpachätan, jan ukax kunamp lurañach wakisispa?

[10 janan qhanañchäwipa]

Oracionaxa, Diosar yupaychañ tuqitsa, jañchi tuqitsa ukat llakitätan ukhasa yanaptʼarakistuwa

Oración

7 ¿Diosax oracionanakas istʼpachïstuti?

AKA jisktʼatwa waljanix yatiñ munapxi. Kunjamtï yatiqawaytanxa, Diosax janiw taqi oracionanak istʼkiti. Ukhamasti, ¿jiwasan oracionanakasxa istʼpachati? Ukax jiwasatäxaniwa.

Kʼari yupaychäwi irpirinakax orapkäna ukxa, jan walitwa Jesusax uñjäna: kunattix jupanakaxa, taqi chuymas Diosar yupaychapkaspa ukhamwa amuyayañ munapxäna. Ukatwa Jesusax akham sispachäna: “uka luräwipatxa katuqxapxiwa” sasa. Ukhamawa, janiw Diosamp istʼatäñ munapkänti, jan ukasti jaqinakan uñjatäñ laykukiw orapxirïna (Mateo 6:5). Niya ukhamarakwa jichhürunakan pasaski. Waljanix janiw Diosan munañaparjam orapkiti, jan ukasti jupanakan munañaparjamakiw mayisipxi. Ukat Biblian iwxanakaparjam jan orapxatapatxa Diosax janiw istʼkiti, kunjamtï akat nayrïr yatichäwinakan yatiqawayktan ukhama.

¿Kamsasirakispas jiwasatxa? Diosax oracionanakas istʼañapatakixa, janiw mä kasta jañchinïñasäkiti ni mä markankirïñasäkisa. “Diosatakix taqi casta jaqis mayak[iwa]” sasaw Bibliax qhanañchi. “Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” (Hechos 10:34, 35). Ukhamaxa, ‘Diosar axsarki’ ukanakax wali askitwa Diosar uñjapxi ukat kunatï Jupar phinqʼachayaspa uk janipuniw lurapkiti, ukat khititï ‘aski lurki’ ukax Diosan munañap lurañatakiw chʼamachasi, janiw pachpa munañapa ni yaqha jaqinakan munañapsa lurkiti. Ukhamasti, Diosan istʼatäñti munstanxa, kuntï Bibliax siski ukarjamaw orañasa.a

Chiqas mä milagrompis oracionanakap Diosax jaysaspa ukwa waljanix suyapxi. Ukampis nayra pachanakanxa mä qhawqha kutikiw oracionanak ukham jaysäna. Ukhamarus Bibliarjamaxa mä milagro luratatxa awisax patak patak maranak pasatatwa yaqha milagro lurasïna. Ukatxa, apostolanakax jiwapxañapäna ukhaw milagronak lurañax tukusiñapäna sasaw Bibliax qhanañchistu (1 Corintios 13:8-10). ¿Diosax janiw oracionanakas istʼxaniti sañti ukax munpacha? Janiwa. Ukatakixa, kunjamsa jichhürunakan Diosax oracionanak istʼatap uñachtʼayi, ukwa mä qhawqha uñjañäni.

Yatiñkankañ churi. Diosatwa chiqpach yatiñkankañax juti, ukatwa khitinakatï Jupan yanapap thaqhapxi ukat ukarjam sarnaqañatak chʼamachasipxi ukanakar yatiñkankañ churi (Santiago 1:5).

Qullan ajay churi. Qullan ajayjamax janipuniw kunas utjkaspati, ukax Diosan chʼamapawa. Uka chʼamapampiw jan waltʼäwinakar saykatañ yanaptʼistu, llakitätan ukhas sumankañ churistu ukat cristianjam sarnaqañsa yanaptʼarakistu (Gálatas 5:22, 23). Ukhamarusa, khitinakatï qullan ajay mayipkani ukanakarux qhawqtï wakisirjamäni ukwa churani, sasaw Jesusax säna (Lucas 11:13).

Kunatï chiqäki uk thaqhirinakarux yatiñwa churi. Kunjamtï Hechos 17:26, 27 qillqatan siskixa, uraqpachanxa waljaniw Diosar thaqhapxi. Jupan sutipa uñtʼañ munapxi ukat kunas amtapaxa Uraqitakisa jaqinakatakisa, ukat kunjamsa Jupar jakʼachasipxaspa uk yatiñsa munapxarakiwa (Santiago 4:8). Jehová Diosan Qhanañchirinakapax sapa kutiw ukham yatxatañ munirinakamp jikisipxi ukat munasiñampiw jisktʼanakapar Bibliamp qhanañchapxi.

¿Jumax ukatarakti aka revista katuqasta? ¿Diosarut jumax thaqaskarakta? Ukhamächi ukhaxa, Diosax inas aka tuqnam oracionanakamar jaysanstam.

[Qhanañchäwi]