¿Jumajj jupanakjamarakit amuyta? Inas Biblia liyiñ munirista, ukampis jupanakjam amuyasajj inas jan liyjjstati. Jilaparte jaqenakatakejj chʼamakiw Biblia liyiñajja. Jumatï Biblian yatichäwinakapajj kʼuchiki, sumaki jakasiñatak yanaptʼirïtap yatisma ukhajja, ¿liytʼasmati? Biblia liyiñatak walja yanaptʼanak utjatap yatisma ukhajja, ¿janit kunja suma yatichäwinakanis uk yatiñatakejj Biblia liyiñ munkasma?

Biblia liyisajj waljaniw suma yatichäwinak apsupjje, jakäwinakapansa wal yanaptʼaraki. Kamsapjjes jupanakajj uk jichhajj uñjañäni.

Ezekiel 20 jila marani waynajj akham siwa: “Janïr Biblia liytʼkasajja, kunjamtï jaqenakajj mä thakin jan kuna amtani sarapki ukhamarakiyätwa. Biblia liyiñajj wal yanaptʼawayitu. Sapür sum sarnaqañatakejj suma ewjjanakaniwa” sasa.

Frieda 20 jila marani tawaqojj sarakiwa: “Jankʼakiw nayajj kunats colerasirïta. Biblia liyisasti jan jankʼaki colerasiñatakejj kunsa lurirista ukwa yateqawayta. Jichhajj janiw nayrjamäjjtti, walja amigonakaw utj-jjarakitu” sasa.

Eunice 50 jila marani warmejj akham sarakiwa: “Biblia liyiñajj suma jaqëñataki, jan wali costumbrenak jaytañatakiw yanaptʼaskitu” sasa.

Jupanakarusa walja jaqenakarusa sum jakasiñatakiw Biblia liyiñajj yanaptʼaski (Isaías 48:17, 18). Jumarojj akanakanwa yanaptʼiristam: 1) suma amtanakar puriñataki, 2) suma amigonakanïñataki, 3) llakinakamp jan aynachtʼañataki, 4) Diosar jukʼamp uñtʼañataki, cheqas ukaw taqe kunat sipansa jukʼamp wakiskirejja. Biblian ewjjanakapajj Diosatwa juti, ukarjam sarnaqasajj janiw amtaskañäniti. Jupajj janipuniw jan wali ewjjtʼanak churkistaspati.

Ukatakejj Biblia liyiñ qalltañaw wakisi. Akjjar jutki uka yatichäwinakanjja, kunas Biblia liyiñ munañataki, chuymamar purtʼañataki yanaptʼiristam ukanakwa uñjaskañäni.

Chuymamar purtʼañapatakisa suma yatichäwinak apsuñatakisa, ¿kunas yanaptʼiristamjja? Kunanakas Biblia liytʼirinakarojj yanaptʼawayi ukanak phesqa toqet uñjañäni.

Mä suma lugaranwa liytʼañama. Jan pantjasis liytʼañatakejja, qhanawjana, suma cheqana, kawkjantï jan khitisa ni kunas pantjasiykiristam ukawjanwa liytʼañama.

Jukʼampi yateqañ amtampiw liytʼañama. Bibliajja alajjpachankir Awkisan regalopawa. Suma yatichäwinakap apsuñatakejja, kunjamtï mä jiskʼa wawajj awkipat wal yateqañ munki ukhamäñamawa. Kuna kʼari amuyunakatï Bibliat utjktam ukanakjja maysar apanukuñamawa, antisas Diosampi yatichayasiñ amtampiw liytʼañama (Salmo 25:4).

Oracionampiw qalltañama. Bibliajj Diosan amtanakapaniwa, ukatwa Biblia amuytʼañatakejj Jupan yanaptʼap muntanjja. Diosasti qollan ajayup mayipki ukanakarojj churapuniwa (Lucas 11:13). Qollan ajayuw Diosan amtanakap wali sum amuyañatak yanaptʼätam. Tiempompejja ‘Diosan jan amuytʼkay amtanakapsa yatirakïtawa’ (1 Corintios 2:10).

Amuytʼañatakiw chʼamachasiñama. Biblia liykasajja, janiw aleq ukhamak liyiñamäkiti. Kuna toqetsa liytʼaskta uk amuytʼañamawa. Akham sasaw jisktʼasiñama: “Khiti toqettï Biblian liytʼaskta uka jaqejj ¿kunjam jaqënsa? ¿Kunjamsa yateqkta ukarjam sarnaqeristjja?” sasa.

Mä amtampiw liytʼañama. Chuymamar purtʼañapatakejja, jakäwiman kunas yanaptʼiristam uk apsuñatakiw chʼamachasiñama. Aka amtanakampiw liytʼasma: Diosar uñtʼañataki, suma jaqëñataki, suma esposöñataki, suma esposäñataki jan ukajj yaqha ukhamanakataki. Ukatakejja Biblian kawkïr textonakapas yanaptʼiristam ukwa ajlliñama.a

Uka phesqa yanaptʼanakajj Biblia liyiñ qalltañatakiw yanaptʼätam. Ukampis ¿kunas jukʼamp liyiñ munañatakejj yanaptʼiristamjja? Akjjar jutki uka yatichäwinwa uka toqet yatjjataskañäni.

Biblia liytʼas jan qariñasa jukʼampi liytʼañ munañasa, kunjam amuyumpis liytʼaskta ukarjamäniwa. Biblia liytʼañ munañatakisa chuymamar purtʼkirïñapatakisa, kunas yanaptʼiristam ukanak uñjañäni.

Uñtʼat arunakampi suma jaqokiptʼat Biblia ajllisim. Jumatï jan amuytʼkaña, jan uñtʼat arunakampi qellqat Biblia liyïta ukhajja, janiw kunsa amuykätati. Ukatwa chuymar purtʼkiri, suma amuytʼkaña Biblia thaqañama. Uka Bibliajj confiykaña, nayra qellqatanakarjam suma jaqokipatäñapawa.a

Internetampi, jichhürun utjki uka aparatonakampiw yanaptʼayasisma. Bibliajja kunayman aparatonakanwa liytʼasirakispa. Internetanwa liytʼasma, computadoraru, tabletaru, celularar apaqasas liytʼarakismawa. Ukham apaqasajja, yaqhep Biblianakajj kunayman yanaptʼanakaniwa, mä texto liytʼasajja yaqha Bibliankir textonakapampiw igualtʼayasispa, jan ukajj pachpa Bibliankir yaqha textonakapampiw igualtʼayasirakispa. Bibliajj istʼañatakis utjarakiwa. Waljaniw autot sarkasinsa, isi tʼajjskasinsa, utan yaqha lurañanak lurkasinsa Biblia istʼapjje, ukajj wali sumawa. Ukanakat kawkïris walïspa uk ajllisajja, ¿janit Biblia liyiñ qalltkasma?

Jukʼamp yatjjatañamawa. Bibliat yateqañatakejj yanaptʼanakaw utji, ukanakampiw liykasajj walja suma yatichäwinak apsusma. Ukanakanjja Biblian parlki uka lugaranakan mapanakapaw utji, ukaw kunanakatï uka tiempon paskäna uk uñjkasmas ukham amuytʼañatak yanaptʼiristam. Internetan jw.org cheqanwa yaqha yanaptʼanakajj utjaraki, ukanakampiw Bibliat jukʼamp yateqañatak yanaptʼayasisma.

Kunanaksa yateqañ munta ukanakwa liytʼasma. Qalltat tukuykam Biblia liyiñajj chʼamakiwa, ukhamajj Biblian kawkïr cheqsa wal liytʼañ munta ukampiw qalltasma. Biblian parlki uka chachanakata, warminakata yatjjatañ munsta ukhajja, sapa maynin sarnaqäwipatwa yatjjatarakisma. Biblian yatichäwinakapjja mayat mayatwa yatjjatasma, jan ukajj kuna tiemponsa pasäna ukarjamaw yatjjatarakisma. Maynit jukʼampi yatiñatakejja, “Biblia jukʼampi amuytʼañatakejja khitinakatsa parli uk yatjjatam” sat recuadrompiw yanaptʼayasisma. ¿Janit ukanakamp yanaptʼayasisajj Biblia liytʼkasma?

Bibliajja janiw mayni libronakjamäkiti, jan ukasti Diosan ewjjanakapaniwa (2 Timoteo 3:16). Uka ewjjanakajj wali sum yanaptʼiristam. Biblia pachpaw akham qhanañchi: “Diosan arupasti jakaskiwa, jachʼa chʼamanirakiwa” sasa (Hebreos 4:12). Bibliajja sapürutaki suma ewjjanakaniwa, Diosar jukʼamp uñtʼañataki, amtanakapsa jukʼamp yateqañatakiw yanaptʼistaspa (1 Timoteo 4:8; Santiago 4:8).

Sum jakasiñatakiw yanaptʼätam. Bibliajj jakäwisansa yaqha toqenakansa, wali sum yanaptʼistaspa.

• Mayninakamp sum apasiñataki (Efesios 4:31, 32; 5:22, 25, 28, 33).

• Kʼumara jakasiñataki, llakimpi jan aynachtʼañataki (Salmo 37:8; Proverbios 17:22).

• Sum sarnaqañataki (1 Corintios 6:9, 10).

• Qollqe sum apnaqañataki (Proverbios 10:4; 28:19; Efesios 4:28).a

Jichhak casarasipki ukanakarusa, Biblian ewjjanakapajj yanaptʼarakispawa, ukwa Asia toqenkir mä chacha warmejj uñjapjjäna. Jaqechasipki ukanakatakejja, qalltan maynimpi jakañasa parltʼasiñasa wali chʼamakiwa. Uka chacha warmejja Biblian liytʼapkäna ukarjamaw sarnaqañ qalltapjjäna. ¿Kunjamsa ukajj yanaptʼäna? Annalou sat warmin Vicent esposopajj akham siwa: “Biblian liytʼkayäta ukajja, esposajampi jan waltʼäwinak munasiñampi askichañatakiw yanaptʼawayitu. Ukarjam sarnaqasajj kʼuchikiw jupampejj jakasjjapjjta” sasa. Esposapajj sarakiwa: “Biblian utjki uka sarnaqäwinak liytʼañajj wal yanaptʼawayapjjetu. Chachajampejj mä amtanikëjjapjjtwa, uk yatisaw jichhajj kʼuchiki jakasjjta” sasa.

Diosar uñtʼañatakiw yanaptʼätam. Vicent chachajj akham saskakiwa: “Biblia liyisajj Jehová Diosar jukʼampi jakʼachasitajwa amuyasta” sasa. ¿Kunsa uka arunakajj amuytʼayistu? Diosar jukʼamp uñtʼañatakejj Biblia liyiñaw yanaptʼiristam. Ukhamtï lurätajja Diosan amigopäyätawa. Kunja sumas aka oraqen wiñayataki jutïrin jakasjjañäni uksa yateqarakïtawa (1 Timoteo 6:19). Bibliar uñtasita yaqha librojj janipuniw utjkiti.

Biblia jan jaytjas liyïta ukhajja, sumakiw jakasïta Diosarus jukʼampiw uñtʼarakïta. Ukampis Biblia liykasinjja walja jisktʼanakaw utjätam. Ukhamäni ukhajja, Etiopía markankir jaqetwa amtasiñama. Uka jaqejj Bibliat walja jisktʼanakanïnwa. Felipe chachajj ‘¿kuntï liykta ukjja amuytati?’ sasin jisktʼkäna ukhajja, akham sasaw uka chachajj säna: “¿Kunjämarak nayast amuyästi, jan khitis nayar yatichkitan ukkhasti?” sasa.b Etiopía markankir jaqejja, Felipe chachampiw yanaptʼayasïna (Hechos 8:30, 31, 34). Jumatï Biblia wali sum amuyañ munsta ukhajja, Internetan jw.org cheqan mä formulariojj utjki ukaruw qellqtʼasma, jan ukajj aka revistan utjki uka formularioruw direccionam qellqtʼarakisma. Jan ukasti jakaskta uka cheqan jakasir Jehová Diosan Testigonakapampiw yanaptʼayasisma, jan ukajj kawkjantï tantachasipki uka cheqaruw jupanakampi parltʼañatak sararakisma. Jakäwiman Bibliampi yanaptʼayasiñatakejja, Biblianiñatakiw chʼamañchtʼapjjsma.