⁸ Ukham amuychïna ukhajja, pantjasïnwa. Ukat uka amuyumpitï Cainar uywsupchïna ukhajja, jukʼamp jachʼa jachʼa tukuñapatakiw Cainar yanaptʼasipkäna. Tiempompejja, Evajj mayampwa mä yoqall wawa ususïna ukampis jupatjja janiw kuns kamskänti. Uka wawajj Abel satänwa, uka sutejj inas “jan valorani” sañ munchispa (Gén. 4:2). Ukhamajj ¿Abelat sipansa Cainaruw Evajj jukʼamp munasïna sissnati? Inas ukhamächïna, janiw yatktanti.

10, 11. Abelasa ukat Cainasa, ¿kunansa irnaqapjjäna, ukat kunatakis Abelajj jukʼamp chʼamachasïna?

¹⁰ Familiar yanaptʼañatakejj kunjamsa irnaqapjjaspa ukwa Adanajj pä yoqanakapar yatichpachäna. Cainajj yapu lurañwa yateqäna ukat Abelajj uwija awatiñwa yateqarakïna.

¹³ Abelajj Jehová Diosat lupʼiñatakejj tiempo apsuspachänwa. Cheqans uwij awatirinakajj wal sarnaqapjjañapäna. Ukhamajj qollu patanaka, vallenaka, jawiranak pasasaw kawkhantï suma pastosa, umasa ukat samartʼañatakis mä cheqajj utjkäna, ukawjanakaruw Abel waynajj uwijanakapar anakpachäna. Jïsa, yaqha animalanakat sipansa, uwijanakaw jaqen suma uñjatäñataki, irpatäñataki ukat jarkʼaqatäñatak luratäpkaspas ukhamänjja. Ukampis wali yatiñani ukat chʼamani Diosamp yanaptʼatäña, irpatäña ukat jarkʼaqatäñjja, ¿Abelajj amuyaspachänti? Jïsa, ukwa Diosar mayisirakpachäna. Taqe ukanakaw jukʼamp iyawsäwinïñatak yanaptʼäna.