Ukat Jehová Diosajj arcan punkup jistʼkatkäna ukhajja, ¿kunjamakis Noejj familiapampi jikjjatasipjjpachäna uk amuyasmati? Pusi tunka urunak jalluntañ qalltkäna ukhajja, jupanak pura sum uñjasiñatakisa, animalanakar sum uñjañatakisa wal chʼamachasipjjpachäna. Ukampis mä qawqha urunakatjja, arcajj akatjamat onjjtpachäna, ukat niyakejjay umajj jukʼat jukʼat wal jiljjataskchïnjja arcajj “uma patanwa tuyuskäna” (Génesis 7:17). ¡Taqe ukanakajj Jehová Diosan chʼamap uñachtʼayi!

“KIMSAQALLQONIKIRAKIW UMA TOQE QHESPIYASIPJJÄNA”

Niyakejjay arcajj uma patnam tuyuskchïnjja, animalanakan ojjopjjatapas ukat arcan onoqetapas istʼaspachänwa. Ukampis ¿jachʼa uma mathapinakatsa jan ukajj arcatsa Noé chachajj llakispachänti? Janiwa, jichhürunakan yaqhep jaqenakajj ‘arcajj aynachtʼpachänwa’ sasaw sapjje. Ukampis Noé chachajja janiw ukham amuykänti. Bibliajj akham siwa: “Iyawsäwi laykuw Noé chachajj [...] arcsa luräna” sasa (Hebreos 11:7). Cheqas kuntï Jehová Diosajj Noerojj jumarusa ukat familiamarusa nayaw uñjasipkäma sasin siskäna, uka arunakaruw wal atinisïna (Génesis 6:18, 19). Niyakejjay Diosajj taqe kunanakatï alajjpachan utjki ukat aka Oraqen utjki ukanak lurchejja, ¿janit arca jarkʼaqañatak chʼamanïkarakpachäna?, jïsa chʼamaniwa. Noé chachajj ukar wal atinisïna, ukatwa Jehová Diosajj juparusa ukat familiaparus ‘uma toqe qhespiyäna’ (1 Pedro 3:20).

Pusi tunka urunak pasjjepansti janiw jallojj purintjjänti. Calendariosarjamajja, 2370 nayrïr pacha (n.p.) maranwa diciembre phajjsin jallojj apjjtjjpachäna. Niyakejjay umajj jachʼa qollunak chhaqtaychïnjja, uka patanjamwa arcajj tuyuskäna (Génesis 7:19, 20). ¿Kunjamsa Noé chachajj Sem, Cam ukat Jafet, wawanakapamp animalanakar manqʼayañataki, qʼomäpjjañapataki ukat jan usunïpjjañapatak chʼamachasipjjän uk amuysnati? Cheqansa, animalanakar arcar mantapjjañapatakisa ukat jan uripjjañapatakisa Diosarakiw ukham tukuypachäna.a