5-7. 1) Israelitanakajj Egipto markat mistunjjapjjäna uka qhepatjja, ¿kunas pasäna? 2) ¿Kunsa Moisesajj luräna?

⁵ Israelitanakajj Egipto markat mistunjjapjjäna ukhat pä phajjsi pasatatjja, mä jan waltʼäwiw Sinaí Qollur janïr puripkäna ukhajj utjäna. Israelitanakajj uma jan utjipanwa Moisés contra parljjapjjäna. Ukhamïpansti, Moisesajj Jehová Diosaruw akham sasin artʼasïna: “¿Kunsa luräjja aka markampejja? Akat mä jukʼampirojja qalampi kʼupjasawa jiwayapjjetani” sasa (Éx. 17:4). Jehová Diosajj kunsa Moisesajj lurañapäna ukjja, qhanwa ewjjtʼäna. Thujrupampiw Horeb qollunkir mä qarqaru (jan ukajja, jachʼa qalaru) jisktañapäna, ukhamat umajj walja mistuñapataki. Uka toqet Bibliajj akham siwa: “Moisesajj ukhamwa luräna, Israelankir jilïri jaqenak nayraqatanjja” sasa. Israelitanakajj sistʼasiñkamaw um umapjjäna, ukatsti jan waltʼäwejj askichasjjänwa (Éx. 17:5, 6).

11. Moisesajj qarqar jisktas um apsüna ukhajja, ¿kunatsa israelitanakajj janiw Diosan milagropäkiti sasin amuyapjjaspäna?

¹¹ ¿Kunatsa Jehová Diosajj colerasirakpachäna? Nayrïr Meriba cheqankir qarqanakajj wali chʼollqhënwa. Inamayaw maynejj wali chʼamampis jisktaskaspäna, janiw umajj mistkaspänti. Ukampis payïr Meriba cheqankir qarqanakajj janiw sinti chʼollqhëpkänti, caliza qala sasin uñtʼatäpjjänwa. Ukhamätapatjja, umajj uka manqhar tantasïnwa, jaqenakajj uka qarqar pʼiytʼasajj facilakiw um apsupjjaspäna. Ukhamajja, Moisesajj qarqar jan parlasaki thujrupampi pay kuti jisktas um apsüna ukhajja, inas israelitanakajj janiw Diosan milagropäkiti sasin amuyapjjchïna.b Ukampis kunjamächïnjjay uk janiw sum yatktanti.