Watchtower INTERNETANKIR BIBLIOTECA

Kunjamtï Diosax jakäw uñjki ukham uñjapxarakiñäni

“Diosan munasiñapan jakasipxañäni”
- 5, 6. Moisesax katuqkäna uka Leyinakaxa, ¿kunjamsa wilax qullanätapa ukat wali wakiskirïtap uñachtʼayäna? (“Animalanakan jakäwipxa respetañasarakiwa” siski uka recuadro uñxattʼäta.)
  
  ⁵ Uka pä yatichäwinakaxa Moisesax katuqkäna uka Leyinakanwa wali sum qhanañchasiraki. Levítico 17:10, 11 jiskʼa tʼaqanakanxa Jehová Diosax akham siwa: “Taqi [israelitanakatxa] [...] wila manqʼapxarakini ukanak contraw saytʼäxa, kunjamsa uka wilxa manqʼasipkpan. Nayasti uka wila manqʼirinakaruxa markap taypitxa jiwayarakïwa. Taqi jakirinakasti kuna wilatix jupanxa utjki ukampiwa jakaraki. Nayaw jumanakarux altaraxan wila churapxsma, ukhamat jumanakax uka wila tuqi [juchat] kutsuyatäpxañamataki, uka wilapï phuqxixa jumanakan jakañanïpxañamatakixa”a sasa (“Wilax juchanak pampachi” siski uka recuadro uñxattʼäta).
  
  WILAX JUCHANAK PAMPACHI
  
  Jakäwimpi wilampix mayakïkaspas ukhamwa Bibliax yatichi. Ukat kunapachatï mä israelitax Diosan mä kamachip pʼakintkän ukhaxa jan jiwañatakix mä animalwa luqtañapäna (Levítico 4:27-31). Arrepentisïna ukhaxa, uka luqtäwimpiw juchapxa pampachasïna, ukampis janiw wiñayatakïkänti.
  
  ‘Juchanak pampachañataki’ siski uka aruxa “kutsuyañäkaspas” jan ukax “imxatañäkaspas” ukham sañ muni, kunjamtï kunsa imxatksna ukhama. Chiqpachansa, kunapachatï maynix juchar puri ukhaxa, janiw kuna animalas uka juch sum imxatañatakix jan ukax kutsuyañatakix utjkiti. Ukampis animalanak luqtapkäna ukaxa mä chʼiwïkaspas ukhamänwa, kunjamtï qhipat juchanakas sum kutsuyasiñapän ukwa uñachtʼayäna (Hebreos 10:1, 4).
  
  Jesucristow “mä kuti wiñayatak jupa pachpa cuerpop sacrificiot luqtasisa” pampachäwi phuqawayäna (Hebreos 10:10). Jesusan jan juchani jakäwipax ‘suma wilamp’ sasiwa, ukatxa “mä suma qʼuma jan kamachtʼata ovejar uñtata sacrificion luqtatarakïnwa”, ukhamax kuntï Adanax aptʼawaykäna ukxa wali sum kutsuyäna (1 Pedro 1:19). Ukhamatwa Jehová Diosax munasiñsa yatiñapsa uñachtʼayistu. Kunatï phuqasiñapäkana ukasa chiqaparuw sum phuqasirakïna, ukatxa “wiñay qhispiyasiñwa” churistu (Hebreos 9:11, 12; Juan 3:16; Apocalipsis 7:14).

Kunjamtï Diosax jakäw uñjki ukham uñjapxarakiñäni

“Diosan munasiñapan jakasipxañäni”
- a “Taqi jakirinakasti kuna wilatix jupanxa utjki ukampiwa jakaraki” siski uka arunakatxa Investigación y Ciencia revistax akham siwa: “Janiw mä uñtasïwitak parlkiti, jan ukasti chiqäskapuniwa: wilankir taqi kasta celulanakas wali wakiskiripuniw jakañatakixa” sasa.