Israel marka apnaqeri Acab qhoru reyin tiempopanjja, manqʼat pistʼañaw walja maranak utjani sasaw Jehová Diosajj arsüna. Manqʼat pistʼañat Eliasajj yatiykäna uka qhepatjja, Diosajj Acab reyitwa imantäna, ukat mä milagro toqew tʼantʼa ukat aycha manqʼayäna, uk cuervonak toqew churäna. Ukat Jehová Diosajj Elías profetarojj akham sänwa: “Sartasim, ukatsti Sarepta markaru saram, ukasti Sidón cheqankiwa, ukatjja ukanraki jakañataki qhepararakim. Nayajj sistwa ukan jakiri mä ijma warmiru, manqʼa jumar churañapataki” (1 Rey. 17:1-9).

Eliasajj Diosar ajjsartʼir israelitätapwa viuda warmejj amuyäna. Uk aka arunakapanwa amuysna: “Nayajj juramentompiw arsta Tatit Diosam layku” sasa. Inas Israel markan Diosapat mä jukʼa yatchïna, ukampis ‘Diosaja’ sasajj janiw Jehová Diosar sirïkänti. Kunattejj Sarepta markanwa jakäna, uka markajj Fenicia markampi apnaqatänwa, Fenicia markasti Sidón cheqan jikjjatasi. Ukampis Sarepta markankirinakajj inas Baal diosar yupaychapjjchïna. Ukhamäkchïna ukasa Jehová Diosajj uka viudan chuymapan kunas utjäna ukwa uñjäna.

Uka warmejj idolonakar yupaychir taypinsa jakchïnjja, Diosar iyawsäwinïnwa. Jehová Diosajj Eliasaruw uka warmir yanaptʼañataki, ukat jupan askipatak khitäna. Uka sarnaqäwit mä wakiskir yatichäw yateqsna.

Sarepta markan Baal diosar yupaychirinakat janiw taqenejj jan wali jaqenakäpkänti. Viuda warmin utaparu Eliasar khitasajja, Diosajj Jupar janïra servipki, ukampis suma chuymanïpjje ukanakar askit uñjatap uñachtʼayäna. Cheqas Jupajj “kuna cast jaqerus katoqakiwa, khitinakatejj jupar ajjsarki, ukhamarak aski lurapki taqe ukanakarusa” (Hech. 10:35).