¿Kunjamsa Biblia liyiñajj yanaptʼiristam?

Mä jachʼa trabajo qalltkasajja, inas jumajj ajjsarayasirïsta. Ukampis uka trabajojj jan sinti chʼamäñapatakejja, inas jumajj jukʼat jukʼat uka trabajo lurirïsta. Biblia liyiñampejj ukaw pasaraki. Inas jumajj akham sasin jisktʼassta: “¿Kunjamsa Biblia liyiñ qalltirista?” sasa. Aka yatichäwinjja, kunas Biblia liyiñatakisa yatjjatañatakis yanaptʼiristam ukanakat mä qhawqhanakwa yatjjataskañäni.

1. ¿Kunatsa Biblia sapür liyiñajj wakisi?

Khititï Biblia sapür liykani, jan ukajj ‘Jehová Diosan leyip’ sapür liykani ukajj kusisitäniwa, taqe kuntï jupajj lurkani ukajj sumaruw sararakini (Salmo 1:1-3 liytʼäta). Biblia liyiñ qalltañatakejja, mä qhawqha minutonakakwa sapürojj liytʼasma. Jumatï Diosan Arup jukʼamp uñtʼäta ukhajja, jukʼampwa Biblia liyiñajj gustätam.

2. ¿Kunas Biblia sum amuytʼañatakejj yanaptʼiristam?

Biblian kuntï liyktan uk sum amuytʼañatakejja, janiw liytʼañ mayakejj wakiskiti, jan ukasti liyktan uka toqenakat piensañasawa. Biblia liykasajj ‘lupʼiñasarakiwa’ (Josué 1:8). Liykasajj akhamwa jisktʼasisma: “¿Kunsa aka versiculonakajj Jehová Diosat yatichitu? ¿Kunjamsa ukarjam sarnaqerista? ¿Kunjamsa uka versiculonakampejj yaqhanakar yanaptʼirista?” sasa.

3. ¿Kunjamsa Biblia liytʼañatak tiempo apstʼasisma?

¿Biblia liyiñatak tiempo apstʼasiñajj jumatakejj chʼamakiti? Waljanitakiw ukhamajja. Ukampis ‘tiempo ina chʼusar jan aptʼasiñatak’ chʼamachasim (Efesios 5:16). ¿Kunjamsa uk lurasma? Biblia sapür liyiñatakejj tiemp apstʼasiñamawa. Yaqhepanakajj alwaw Biblia liytʼapjje, yaqhepanakasti manqtʼasiñatak samartʼapki ukhaw liytʼapjjaraki, yaqhepanakajja janïr ikintkasaw Biblia liytʼapjjaraki. ¿Jumajj kuna horasas Biblia liytʼasma?

JUKʼAMP YATJJATAÑÄNI

4. Biblia liytʼañajj gustiristamwa

Biblia liyiñ qalltañajj inas chʼamakïchispa. Ukampis kunjamtï jan manqʼerïktan uka manqʼajj jukʼat jukʼat gustkistojja, ukhamarakiw Biblia liyiñ ‘wal munjjsna’. 1 Pedro 2:2 liytʼasajja aka toqetwa parltʼapjjäta:

• Biblia sapüru liytʼasma ukhajja, ¿janit jukʼamp liyiñajj gustkiristamjja? ¿Janit jukʼamp yatjjatañsa munkarakisma?

Yaqhep wayn tawaqonakarojj kunjamatsa Biblia liyiñajj wal gustawayi uk yatiñatakejja, VIDEO uñtapjjäta. Ukatjja aka toqetwa parltʼapjjäta:

VIDEO: Wayn tawaqonakajj Diosan arupar munasiñwa yateqawayapjje (5:33)

• Videon uñtktan uka wayn tawaqonakajja, ¿Biblia liyiskakiñatakejj kunanakarus atipjawayapjje?

• ¿Biblia sapüru liyiskakiñatakejj kunas jupanakar yanaptʼawayi?

• ¿Jupanakar Biblia liyiñ gustañapatakejj kunanaksa lurapjjäna?

Biblia liyiñ qalltañatakejj akanakwa lurasma:

• Suma amuykaña, suma traducita Biblia ajlltʼasim. Parlaskta uka aruntï utjchejja, Machaq Mundon Jakirinakataki Biblia liyiñwa yantʼasma.

• Biblian qellqatäki uka sarnaqäwinakat kawkïritsa yatjjatañ munasma uk liytʼañ qalltam. Ukatakejja “Biblia liyiñ qalltañatak yanaptʼanaka” sat tablan utjki uka cheqatwa sarnaqäwinak ajlltʼasisma.

• Kawkjakamas liytʼta uk marctʼasim. Ukatakejja “Biblia liyiñatak yanaptʼa” sat tablampiw yanaptʼayasisma, ukajja aka libronwa utji.

• JW Library^® sat aplicacionamp yanaptʼayasim. Uka aplicación celularamaru, yaqha ukhamanakar apaqasisajja, kawkjankkasas Biblia liytʼakismawa jan ukajj istʼakismawa.

• Machaq Mundon Jakirinakataki Biblian utjki uka apéndice cheqanakamp yanaptʼayasim. Ukanjja mapanakampi, tablanakampi, mä glosariompiw utji. Ukanakaw Biblia liyiñ yanaptʼätam.

5. Bibliat yateqañatakejj wakichtʼasipunim

Salmo 119:34 liytʼasajja aka toqetwa parltʼapjjäta:

• Biblia janïr liytʼkasasa jan ukajj Bibliat yateqañatak janïr wakichtʼaskasasa, ¿kunatsa Diosarojj orasiñamapuni?

¿Aka librot sum yateqañatakejj kunanaksa lurasma? Aka libron yatichäwinakapat yateqkasajja, akanakwa lurasma:

1. Sapa yatichäwin utjki uka nayrïr parrafonakap liytʼam.

2. Textonak Bibliat thaqtasin liytʼam, ukatjja liytʼkta ukampi yateqkta ukampejj kunansa igualakïpjje uk amuytʼam.

3. Jisktʼanakan qhanañchäwipajj kawkïris ukanak marctʼasim. Ukaw yatichirimampi yateqañatakejj yanaptʼätam.

¿Yatiyätati?

Jehová Diosan Testigonakapajj kunayman Biblianakwa apnaqawayapjje, ukampis Machaq Mundon Jakirinakataki Biblia jukʼamp apnaqapjje. Uka Bibliajj wali suma amuykañ lurtʼatawa, Diosan sutipas walja kutiw ukan uñstaraki (“¿Tienen los testigos de Jehová su propia Biblia?” sat qellqatwa Internetan jw.org cheqan liytʼam).

¿KUNSA YATEQAWAYTAN?

Bibliat sum yatjjatañatakejj mä horarionïñamawa, liykta uk sum amuytʼañatakejja Diosaruw yanaptʼa mayisiñama, Bibliat yateqañatakis wakichtʼasiñamarakiwa.

Amtañataki

• Biblia wali sum yatjjatañatakejj ¿kunas yanaptʼiristam?

• ¿Kuna horasas Biblia liytʼasma ukhamarak Bibliats yatjjatasma?

• ¿Kunatsa Bibliat yateqañatak wakichtʼasiñajj wakisi?

JUKʼAMP YATJJATAÑAMATAKI

Kunanakas Biblia wali sum liytʼañatak yanaptʼistaspa uk yatjjatam.

“¿Kunas Biblia liyiñatak yanaptʼistaspa?” (Yatiyañataki mayïri 2017)

Kunjamsa Biblia liytʼasma uk kimsa toqet yatjjatam.

“¿Cómo puede ayudarme la Biblia? Primera parte: Busca tesoros en la Biblia” (Artículo de jw.org)

Kunjamatsa Biblia liyiñajj gustiristam uk yatjjatam.

“¿Cómo puede ayudarme la Biblia? Segunda parte: Aprende a disfrutar la lectura de la Biblia” (Artículo de jw.org)

Walja maranak Biblia liyipki ukanakat yaqhepanakajj Biblia liyiñat kamsapjjesa uk videon uñtam.

Kunjamsa Bibliat wali sum yatjjatsna (2:06)

4. Jehová Dios amigomampejj parltʼasiskakim

Orasiñasa Bibliat yateqañasa Jehová Diosan amigopäñatakiw yanaptʼawaytamjja. Ukanak lurañajj ¿kunjamsa jupar jukʼamp jakʼachasiñatak yanaptʼiristamjja?

Salmo 62:8 liytʼasajja aka toqetwa parltʼapjjäta:

• Jehová Diosamp sum apasiskakiñatakejja, jukʼamp sumwa orasiñama. ¿Kunjamsa uk lurasma?

Salmo 1:2 liytʼasajja aka toqetwa parltʼapjjäta:

• Jehová Diosampi jukʼamp sum apasiñatakejja, ¿Biblia liytʼasajj kunsa lurañama?

Bibliat sapaki yatjjatkasin suma yatichäwinak jikjjatañatakejja, kunsa lurasma uk yatiñatakejja VIDEO uñtapjjäta. Ukatjja aka toqetwa parltʼapjjäta:

VIDEO: Bibliat sapak yatjjatkasajj jukʼamp sum yateqañatak chʼamachasim (5:22)

• Videon uñtktan uka jilat kullakanakatjja, ¿kunanaksa jumajj yateqasisma?

• ¿Kuna toqenakatsa yatjjatañ munasma?