Amigonakam sum ajllisim

Suma amigonakanïsajj jukʼamp kusisitaw jakastanjja. Jupanakan yanaptʼapampejja, llakinakajj utjki ukhajj janirakiw sint llakisktanti. Ukampis amuyasiñasawa, Bibliarjamajja janiw taqenipunejj suma amigonakäpkaspati. Ukhamajj ¿kunjamsa amigonakam ajllisisma? Jichhajja aka jisktʼanakatwa yatjjataskañäni.

1. ¿Kunjam jaqerus amigonakasajj tukuyapjjestaspa?

Chikachasktan uka jaqenakasa Internet toqe parlktan uka jaqenakasa, kunjamäpkitï ukham jaqeruw tiempompejj tukuyistaspa. Bibliajj akham siwa: “Khititï yatiñan jaqenakamp sarnaqki ukajja yatiñan jaqeruw tukuni, ukampis khititï jan amuytʼasir jaqenakamp [mä arunjja Diosar jan munasiri jaqenakamp] chikachaski ukajja jan waliruw purtʼasini” sasa (Proverbios 13:20). Jehová Diosar munasipki, jupar servipki uka amigonakajja, Diosat jan jitheqtañataki suma amtanakar puriñatakiw yanaptʼistaspa. Ukampis jiwasatï jan Diosan markapankapki uka jaqenakamp sint chikachasiñäni ukhajja, Jehová Diosatwa jitheqtsna, ukatwa jupajj suma amigonak ajlliñasatakejj ewjjtʼistu. Amigonakasajj jiwasjam Diosar munasipjjaraki ukhajja, purapatwa sum yanaptʼastanjja. Ukapachaw aka arunakar istʼasktanjja, “jumanakajj maynit maynikam chʼamañchtʼasisipkakim, maynit maynikamas yanaptʼasisipkakim” (1 Tesalonicenses 5:11).

2. ¿Kunjam amigonaksa ajllistan ukajj Jehová Diosatakejj importanteti?

Jehová Diosajj sumwa amigonakap ajllisi. Jupajj “cheqap sarnaqer jaqenakan suma amigopawa” (Proverbios 3:32). Khitinakatï jupar jan munasipki ukanakamp sarnaqsna ukhajja, ¿kunjamakis Jehová Diosajj jikjjatasispa? ¡Jupajj wal llakisispa! (Santiago 4:4 liytʼäta). Maysa toqetsti, jiwasatï jan wali jaqenakat jitheqtañäni, Jehová Diosarusa jupar munasipki ukanakarus jakʼachasirakiñäni ukhajja, Jehová Diosajj wal kusisini, jiwasan amigosarakïniwa (Salmo 15:1-4).

JUKʼAMP YATJJATAÑÄNI

3. Jan wali jaqenakat amuyasiñasawa

Diosar jan munasipki janirak leyinakaparus respetapki ukanakaw jan wali amigonakäspa. VIDEO uñtasajja aka toqetwa parltʼapjjäta:

VIDEO: Jan wali jaqenakat jitheqtapjjañäni (6:17)

• ¿Kunjamanakatsa jan wali jaqenakampejj jan amuyasisaki chikachasisksna?

1 Corintios 15:33 liytʼasajja aka toqetwa parltʼapjjäta:

• ¿Khitinakas jumatakejj jan wali jaqenakäspa? ¿Kunatsa ukham amuyta?

Salmo 119:63 liytʼasajja aka toqetwa parltʼapjjäta:

• ¿Mä suma amigojj kunjamäñapasa?

4. Amigonakasajj janiw jiwasjamäpjjañapäkapuniti

Bibliajj Davidampit Jonatanampitwa parli, jupanakajj nayra Israel markanwa jakasipjjäna. Davidampi Jonatanampejj janiw pachpa edadanïpkänti, janirakiw mä igualak jakasipkänti, ukhamäkchïnsa wali suma amigöpjjänwa. 1 Samuel 18:1 liytʼasajja aka toqetwa parltʼapjjäta:

• Amigonakasajj janiw jiwasjam edadani jan ukajj kunjamtï jiwasajj jakasktan ukham jakasipjjapuniñapäkiti, ¿kunatsa ukham sistanjja?

Romanos 1:11, 12 liytʼasajja aka toqetwa parltʼapjjäta:

• ¿Kunjamsa Jehová Diosar munasipki uka amigonakajj purapat chʼamañchtʼasipjje?

¿Kunjamsa mä waynajj jan suykäna ukan amigonak jikjjatäna? VIDEO uñtasajja aka toqetwa parltʼapjjäta:

VIDEO: Awisajj jan suyktan ukanakaw amigonakasäspa (5:06)

• ¿Kunatsa Akil sat waynan amigonakapajj awk taykapatakejj jan walïkäna?

• ¿Kunatsa Akil waynatakejj amigonakapajj qalltan suma amigonakjamäna?

• ¿Kunsa jan sapaki jikjjatasiñatakejj luräna?

5. ¿Kunjamsa suma amigonak jikjjatsna?

VIDEO: ¿Kunjamas mä cheqpach amigojja? (4:14)

Proverbios 18:24; 27:17 liytʼasajja aka toqetwa parltʼapjjäta:

• ¿Kunjamsa cheqpach amigonakajj yanaptʼasipjje?

• ¿Amigonakamajj Proverbios libron parlki ukhamäpjjarakiti? Jan ukhamäkchi ukhajja, ¿kunsa ukham amigonak jikjjatañatakejj lurasma?

Filipenses 2:4 liytʼasajja aka toqetwa parltʼapjjäta:

• Suma amigonakanïñatakejja, jiwasaw suma amigöñasa. ¿Kunjamatsa jumajj mä suma amigösma?

¿KUNSA YATEQAWAYTAN?

Amigonakas sum ajllistan ukhajja, sumaw jakastanjja Jehová Diosarus kusisiyaraktanwa.

Amtañataki

• Kunjam amigonaktï ajllisktan ukajja, ¿kunatsa Jehová Diosatakejj importantewa sasin sistanjja?

• ¿Kunjam amigonaksa jan ajlliñasäki?

• ¿Kunsa suma amigonak jikjjatañatakejj lurasma?

JUKʼAMP YATJJATAÑAMATAKI

Jan wali tiemponakan kunjamsa cheqpach amigonakasajj yanaptʼapjjestaspa uk yatjjatam.

“Akapacha janïr tukuskipan suma amigonakanïñatak chʼamachasiñäni” (Yatiyañataki noviembre 2019)

Suma amigonakanïñatakejj kunanaksa lursna ukanakat yatjjatam.

“¿Cómo son los buenos amigos?” (Lo que los jóvenes preguntan. Respuestas prácticas [volumen 1], capítulo 8)

Redes sociales ukanakan amigonakanïñat kunsa yatiñama uk yatjjatam.

Redes sociales ukanak wali amuyumpiw apnaqañama (4:12)

Kunatsa mä chachajj yaqha amigonak thaqäna uk yatiñatakejja, “Mä awkinïñjja walpun munayätjja” sat cheqanwa liytʼasma.

“Bibliat yatjjatasaw nayra jakäwinakapjja jaytawayapjje” (Yatiyañataki julio-septiembre, 2012)

1. Kunanakampis kusistʼañäni uk ajllkasajj ¿kuna toqenakatsa amuytʼañasa?

¿Samartʼañatakejj kun lurañas jumar gusttamjja? Yaqheparojj utan quedasis mä libro liyiña, music istʼaña, película uñchʼukiña jan ukajj Internetar mantañaw gusti. Yaqheparusti amigonakapampi pasiytʼir saraña, nadir saraña jan ukajj anatañaw gustaraki. Kunanakamp kusistʼañay gustchistu, ukampis ajllktan uka kusistʼañanakajj “Tatitutak walïskiti janicha” ukwa amuytʼañasa (Efesios 5:10). Uk sum amuytʼañajj wali importantewa. ¿Kunatsa? Kunanakampitï jaqenakajj jilapartejj kusistʼapki ukanakanjja: nuwasiñanaka, qʼañu jucha lurañanaka, layqasiñanakaw utji. Taqe ukanakjja Jehová Diosajj uñisiwa (Salmo 11:5 liytʼäta). ¿Kunas suma amtanakar puriñatak yanaptʼistaspa?

Amigonakasatï Jehová Diosar munasipjjani ukhajja, sum sarnaqañatakiw yanaptʼapjjestani, suma kusistʼañanak ajlliñatakis yanaptʼapjjarakistaniwa. Kunjamtï aka libron 48 yatichäwipan yateqawayktanjja, “khititï yatiñan jaqenakamp sarnaqki ukajja yatiñan jaqeruw tukuni”. Maysa toqetjja, Diosan leyinakapar jan respetiri jaqenakampi chikachasirejja, “jan waliruw purtʼasini” (Proverbios 13:20).