¿Jumax amttati?
¿Aka qhipa phaxsinakan mistkäna Yatiyañataki sat revista liytʼtati? Ukhamächi ukhaxa, aka jisktʼanakar qhanañchtʼma:
• ¿Kunjamatsa “qʼuma aru” sum parlañ yatiqsna, mä arunxa, Jehová Diosatsa ukat amtäwinakapatsa? (Sof. 3:9 NM).
“Qʼuma aru” sum arstʼañaxa, yaqha aru yatiqañamp sasiwa, ukatwa sum arstʼañatakixa 1) sum istʼañamawa 2) khitinakatï sum parlapki ukanakat yatiqasiñamawa, 3) jan armtʼasiñatakiw yatsuñama, ukatakix qalltat tukuykamax Biblian jikxataski uka libronakan sutipax kawkïrinakasa ukat Bibliat apstʼat jiskʼa tʼaqanakap pʼiqiruw yatsuñama, 4) mayamp mayamp yatsuñamawa, 5) kuntï liyktan ukanakat lupʼiñamawa, 6) Bibliankki uka suma yatichäwinakatwa sum yatiqasiñasa, 7) yatxataskañamakiwa, 8) yatxatañatakix tiempo apstʼasiñamawa ukat 9) uka ‘qʼuma aru’ parlañamawa (08/15, 21-25 janakama).
• ¿Kunjamatsa matrimoniox “kimsat kʼanat wiskhar uñtataxa”?
“Kimsat kʼanat wiskha” siski uka amuytʼayäwixa matrimoniot parlaski, warmimpi chachampi ukat Jehová Diosampixa kimsat kʼanat mä wiskhjamäpkaspas ukhamawa, ukanxa Jehová Diosaw nayrankixa (Ecl. 4:12). Jehová Diosar jakʼachasiñaw chacha warmirux yupaychäw tuqit jan aynachtʼapxañapatakix chʼam churi, ukhamatwa jan waltʼäwinakarus saykatapxani ukat kusisit jakasipxarakini (09/15, 16 jana).
• Hebreos 6:2 uka qillqatarjamaxa “amparanak uchañxata” siski uka arunakaxa, ¿kamsañs muni?
Uka arunakax janiw irpir chuymaninakar uttʼayañat parlkiti, jan ukax machaq arkirinakaru amparamp luqxatasa qullan ajayu tuqi milagro lurapxañapatwa parli (Hech. 8:14-17; 19:6) (09/15, 32 jana).
• ¿Kunjamsa irpir chuymaninakax respetomp jilat kullakanakaruxa uñjapxaspa?
Jilat kullakanakaparux janiw jan phuqañjamäki ukanak mayipxañapäkiti, ukatxa kunatsa mä luräwix ukham lurasiñapa ukanakatsa qhanañchapxañaparakiwa (10/15, 22 jana).
• Nayra tiempo israelitanakax thujrumpiw uwijanak anakipxirïna, ¿irpir chuymaninakax kuns jupanakat yatiqasipxaspa?
Nayra tiempo uwij awatir israelitanakaxa, mä thujrumpiw uwij anakipxirïna. Ukat uyut ansuñatakisa anantañatakisa, ‘thujrupampiw’ mayat maya jaktʼapxirïna phuqatäskiti janich uk yatiñataki (Lev. 27:32). Ukhamarakiw irpir chuymaninakax tamankir jilat kullakanakarux sum uñjapxañapa ukat kunjamas jikxatasipxi uks sum yatipxañaparaki, kunattix jupanakar katuyatawa (11/15, 9 jana).