Watchtower INTERNETANKIR BIBLIOTECA

‘Jaysam Jehová Diosan arunakaparu’

Jehová Diosajj Jeremías toqew yatichistu
- 12. ¿Jan walinakat tamar jarkʼaqañatakejja awisajj kuns irpir chuymaninakajj lurapjjañapa?
  
  ¹² Jehová Diosajj Jeremías toqejj walja kutiw judionakar yanaptʼañ munäna, ukampis janiw yäqapkänti. Ukhamarakiw maynejj juchar purtʼasisajj jan arrepentiskaspa, ukat irpir chuymaninakan yanaptʼapsa janirakiw yäqkaspati. Ukhamäspa ukhajja, irpir chuymaninakajj Biblian kamachinakapan siski ukarjamaw lurapjjañapa ukat taman qʼomäñapatakejja, juch luririrojj tamat jaqsupjjañapawa (1 Cor. 5:11-13; “Janiw leyinïpkänti” siski uka recuadro uñjjattʼäta, ukajj 97 janankiwa). Ukhamajja, ¿juchar purtʼasipki ukanakajj janipuniw Diosamp sum apasjjapjjanit sisnati? Janiwa. Israelitanakajja walja tiempow Diosar jan istʼas sarnaqapjjäna, ukhamäkchïnsa Jehová Diosajj jupanakarojj akham sänwa: “Nayatak saytʼasir wawanaka, nayan ukar kuttanjjapjjam. nayarakiw [...] qollartʼjjapjjama” sasa (Jer. 3:22).a Jehová Diosajj juchar purtʼasir jaqenakarojj kuttʼanjjapjjam sasaw saski ukat kuttʼanipjjañapatakisa yanaptʼarakiwa.
  
  JANIW LEYINÏPKÄNTI
  
  ¿Jerusalén markajj tʼunjatäkäna uka qhepat jakañajj kunjamänsa? Uka toqetjja Jeremías profetaw Lamentaciones 2:9 qellqatan amuytʼayistu. Uka markan perqanakapajj allinukutänwa inas punkunakapas ukhamarakïchïna, jan walinakat jarkʼaqerejj janiw utj-jjänti. Ukhamäkchïnsa, “jan leyin” kunaw jikjjatasipjjäna. ¿Jan waltʼayir jaqenakkamakiw uka markan jiltʼapjjäna sañti Jeremías profetajj munpachäna? Janiwa. Amtañäni, sacerdotenakasa ukat profetanakas Diosan Leyinakap yatichapkäna ukanak judionakajj wal katoqapjjäna, ukampis kunjamsa Diosar yupaychañ toqet jan yanaptʼani ukat jan waltʼäwinakat jan jarkʼaqat uñjasipjjäna uka toqetwa amuytʼayistu. Kuntï kʼari profetanakajj yatichapkäna ukajja, janiw Jehová Diosan yanaptʼapjamäkänti; kuna ‘uñjäwinaktï’ jan ukajj visionanak uñjapkäna ukanakajj inamayakïnwa (Lam. 2:14).
  
  Jichhürunakanjja, tamat jaqsutäpki ukanakajj inas ukhaman jikjjatasipjjarakchi. Jupanakajj janiw jilat kullakanakampi chikäjjapjjeti, irpir chuyman jilatanakas janirakiw nayrjam jupanakarojj yanaptʼjjapjjeti. Diosan Arunakapajj kuntï yatichkistu ukatsa jayarstʼatäpjjewa. ‘Janiw Diosan leyiparjamajj’ sarnaqapkiti, ukatwa chuymas kawkstʼata ukham jikjjatasipjjpacha. Ukampisa, Jehová Diosamp wasitatwa sum apasjjapjjaspa ukat Jupan bendicionanakapsa katoqjjapjjarakispawa (2 Cor. 2:6-10). Ukhamajja, taqenis ak amuytanjja, Diosan Arupar istʼas sarnaqañajj wali askiwa ukat leyipat jitheqtañajj janipuniw walïkiti.

‘Jaysam Jehová Diosan arunakaparu’

Jehová Diosajj Jeremías toqew yatichistu
- a Uka arunakjja, Jerusalén markat alay toqen qamapkäna uka tunka triburuw Jehová Diosajj ukham säna, jupanakajj niya patak maranakaw jaya markar apatajjapjjäna, ukhaw Jeremiasajj uka arunak yatiyäna. Ukürkamajj jan arrepentisipjjatapajj qhanaw uka arunakampejj uñachtʼayasi (2 Rey. 17:16-18, 24, 34, 35). Ukampisa, Diosampejj sumwa apasjjapjjaspäna ukat yaqha markar apatäpkäna ukatsa kuttʼanjjapjjarakispänwa.