4. Kuntï Ezequielajj pä lawanakampejj lurkäna ukajj ¿kunsa uñachtʼayi? (Aka yatichäwi qalltan utjki uka dibujo uñjjattʼäta).

⁴ Jehová Diosajja ‘uka pä lawanak mayachthapim, ukhamat mä sapa lawakïñapataki’ sasaw Ezequielar säna. Yaqha markar apat judionakajja, kuntï Ezequielajj lurkäna uk uñjasajj akham sasaw jisktʼapjjäna: ‘¿Ukanakajj kamsañs muni uk janit sapkitäta?’ sasa. Ezequielajja kuntï Diosajj lurañ amtki ukwa ukajj uñachtʼayi sasaw jupanakar säna. Uka pä lawanakat parlkasajja, Diosajj akham sänwa: ‘Jupanakarojj mä sapa lawarukiw tukuyäjja, amparajanjja mä sapa lawakïniwa’ sasa (Ezeq. 37:17-19).

5. Ezequielajj pä lawanak mayachthapkäna ukajj ¿kamsañsa munäna? (“Pä lawanakaw mayachthapisi” sat recuadro uñjjattʼarakïta).

⁵ Ukjjarusti, pä lawanakan mayachthapisitapajj kamsañsa munäna ukwa Jehová Diosajj Ezequielar qhanañchäna (Ezequiel 37:21, 22 liytʼañataki). Yaqha markar apatanakajj Israel oraqer kuttʼjjapjjañapäkäna ukanakajja, ‘mä sapa markarukiw’ tukupjjañapäna. Mä arunjja, pä tribuni Judá markankirinakampi tunka tribuni Israel (Efraín) markankirinakampejj mayakëjjapjjañapänwa (Jer. 30:1-3; 31:2-9; 33:7).

‘Amparaman mä sapa lawakïñapataki’

NAYRA TIEMPONA

537 a.C. maranjja Diosar taqe chuyma serviri israelitanakaw yaqha markanakat Jerusalenar kuttʼapjje, ukhamat marka askichañataki Jehová Diosarus mayachtʼata adorjjañataki

JICHHA TIEMPONA

1919 marat aksarojja Diosan markapajj mayampiw organiztʼasi, jukʼat jukʼatwa Diosarojj ‘mä sapa tamar’ uñtat adorjjapjjaraki