Kuna horasa ukat kunürus jutani uk janiw yatipktati

“Jumanakajj suyapjjapunim, janiw yatipktati kuna horasatejj, jan ukajj kunürutejj jutkani [...] ukjja.” (MAT. 25:13.)

1-3. 1) ¿Jesusan pä uñachtʼäwipajj kunanaksa amuytʼayistu? 2) ¿Kuna jisktʼanakar qhanañchañas wakisi?

WALI uñtʼata ukat aytat mä jaqes automat wali wakiskiri mä tantachäwir apita siskiristam ukham amuytʼañäni. Ukat aptir niy sarkasajj gasolin tukusiskatap amuyasma, ukat janis tiempojj utjchejja ukhampach jankʼak alir sarasma. Ukäñkamasti, uka jaqejj uks aksa uñchʼukis wal suyiristam. Ukat jan puritam laykojj yaqhampi apayasjjaspa. Ukat juman puriñamatakejj uka jaqejj chhaqhatäjjaspa ukhajja, ¿kunjamakis jikjjatasisma?

² Jichhajj jumas uka aytat jaqëkasma ukat confiykaña kimsa chacharus wali wakiskiri luräwi churkasma ukham amuytʼarakma. Ukat kunsa lurapjjañapa uk qhanañchtʼasma ukat kimspachanirak iyaw sapjjaspa. Ukampis kuttʼaniñamatakejj paninik kunjamtï sawaykta ukarjam phoqhapjjaspa. Ukat kimsïr jaqejj jan kuns luratapat may mayak parljjaspa ukhajja, ¿jumajj kunjamakis jikjjatasisma?

³ Jesusajja, patronat qollq katoqer kimsa chachata ukat tunka virgenanakat parlki uka uñachtʼäwinakapanjja, niya ukar uñtasitwa qhanañchäna. Uka uñachtʼäwinakapampejja, qhep qhepa urunakan jakiri ajllit cristianonakat yaqhepajj wali amuyumpi ukat taqe chuymaw suyapjjani, yaqhepasti janirakiw ukham suyapkaniti sasaw qhanañchäna (Mat. 25:1-30).a Ukat kunapachas jupajj Supayan apnaqat aka ñanqha pacha Diosan amtaparjam tukjani uka toqet parlkasajja akham sasaw qhanañchäna: “Jumanakajj suyapjjapunim, janiw yatipktati kuna horasatejj, jan ukajj kunürutejj jutkani Jaqen Yoqapajja ukjja” sasa (Mat. 25:13). Jichhürunakanjja, uka ewjjtʼaparjamaw sarnaqañasaraki. ¿Jesusan arunakaparjam wakichtʼat suyañajj kunjamsa yanaptʼistaspa? ¿Khitinakas qhespiyasiñatak wakichtʼatäpjjatap uñachtʼayapjjäna? ¿Ukat wakichtʼat suyañatakejj kunsa lurañasa?