Aka revista liytʼirinakan jisktʼäwinakapa

¿Templon utjkäna uka policianakajj khitinakäpjjänsa, kunsa lurapjjerïna?

Jan sacerdotëpkäna uka levitanakajja, templon walja lurañanakanïpjjänwa, ukanakat mayajja policiat serviñänwa. Jupanakarojja templonkir capitanaw pʼeqtʼäna. Filón sat judío qellqerejja, kunanaksa templon lurapjjerïna uka toqet akham sasaw qhanañchi: “[Levitanakat] yaqhepajj guardianakjamaw templon punkunak uñjapjjäna. Yaqhepasti, templo manqhankapjjerïnwa, santuario nayraqatana, ukhamatwa santuarior jan mantapjjañapäkana ukanakar jarkʼapjjerïna. Yaqhepanakajj turnorjamaw uruy aruma taqpach templo cuidañatak muyupjjerïna” sasa.

Uka policianakajj Sanedrinankirinakaruw servipjjäna. Jupanakarukiw romanonakajj armanak apnaqapjjañapatak permiso churäna.

Bibliat yatjjattʼat Joachim Jeremias chachajj akham sasaw qhanañchäna: ‘Guardianakajj Jesusar katuntapkäna ukhajja, “sapüruw nayajj templon qontʼata yatichaskayätjja, ¿kunatsa ukhajj jan katuntapkista?” sasaw Jesusajj jupanakar säna. Janitï templon servir policianakäpkaspänjja, Jesusajj janiw ukham siskaspänti’ sasa (Mat. 26:55). Uka pachpa chachajj akham sarakïnwa: ‘Khitinakatï uka nayrajj Jesusar katuntañ munapkäna ukanakajj templonkir policianakarakïnwa’ sasa (Juan 7:32, 45, 46). Mä qhawqha tiempotjja, Jesusan discipulonakapar katuntapjjañapatakiw Sanedrinajj capitanampiru guardianakampirojj mayïna, ukhamat jupanak nayraqatar apapjjañapataki. Templonkir policianakarakiw apóstol Pablorojj templo anqäjjar qatatsupjjpachäna (Hech. 4:1-3; 5:17-27; 21:27-30).