Jeremías 31:15 qellqatajj akham siwa: “[Jehová] Tatitojj siwa: ‘Ramá cheqan mä aruw istʼasi, mayniw jan chuyma uttʼayasisa jachaski. Raquelaw wawanakapat jachaski, janirakiw chuymachatäñ munkiti wawanakapajj jiwaratäjjatap layku’” sasa.

Kuntï Jeremiasajj Raquelat siskäna ukajja, kunapachatï Jesusajj wawäkasin niya jiwayat uñjaskäna ukhaw phoqasirakïna. Uka tiemponjja, Herodes reyiw pä marat minusanïpki uka yoqall wawanakar jiwarayäna. Ukajj Jerusalén markat aynach toqenkir Belén markanwa pasäna. Kunjamtï Jeremiasajj siskänjja, taqe yoqall wawanakaw jiwayatäpjjäna. Uka wawanakan taykanakapajj walpun jachapjjpachäna. Ukaw Ramá markansa jachatanakapajj istʼaskaspa ukhamänjja (Mat. 2:16-18).

Jeremías tiemponsa Jesús tiemponsa, judía warminakan wawanakapar jiwarayaskäna ukhajja, jupanakatak wali jachañaw utjpachäna. Ukatwa Jeremiasajj ‘Raquelaw wawanakapat jachaski’ sasin sispachäna. Waljanis ‘uñisiripan oraqepar’ sarawayapkchejja, mä arunjja, jiwawayapkchejja, jaktanipjjaniwa (Jer. 31:16; 1 Cor. 15:26).