2. ¿Trigompit jan wali qurampit parlki uka uñachtʼäwinxa jathax khitinakamp sasisa?

² Ukat Mateo 13 jaljanxa yaqha uñachtʼäwit Jesusax parlarakïna, trigompit jan wali qurampit parläna. Alaxpachar saririnakarux kunjamsa apthapisiñapäna uka tuqit parli, jupanakaw Jesusamp chikax Diosan Apnaqäwipan apnaqapxani. Yaqha uñachtʼäwinxa, “Diosan suma yatiyäwi[nakapaw]” jathaxa sasaw Jesusax yatichäna, ukampis aka uñachtʼäwinxa, jathax “Diosan ajllit wawa[nakapawa]” sasaw säna (Mat. 13:19, 38). Khitinakatix Diosan Apnaqäwipan apnaqañataki ajllitäpki ukanakat parlaski; janiw aka Uraqin jakapkani ukanakat parlkiti (Rom. 8:14-17; Gálatas 4:6, 7 liytʼasiñapawa).

4. 1) ¿Khitis yapu satirixa? 2) ¿Kunapachas ukat kunjamsa Jesusax suma jatha satantañ qalltawayi?

⁴ Khitis yapur suma jatha satanti uk nayraqat amuytʼañäni. Jesusax akham sasaw arkirinakapar qhipat amuytʼayäna: “Khititix suma jatha satki ukaxa Jaqin Yuqapawa” sasa (Mat. 13:37). Niya kimsa mar chikataniw ‘Jaqin Yuqapaxa’, mä arunxa, Jesusax satañataki yapu wakichawayi (Mat. 8:20; 25:31; 26:64). Ukat 33 maran Pentecostés urutwa Jesusax suma jatha satantañ qalltawayi. Jehová Diosan munañaparjam phuqasaw arkirinakapxar qullan ajayu apayanïna, ukhamata “Diosan ajllit wawanakapar” tukupxañapataki. Yapu satañsa qalltawaykaspa ukhamänwa, ukat trigo yapux wali sum puqurañapänwa (Hech. 2:33).b ¿Kuna amtampis satantañ qalltawayi? Khitinakatix jupamp chika alaxpachan apnaqapxañapäki ukanakar apthapiñatakiw satantawayi.

5. ¿Khitis uñisiñat jan wali jatha satantixa, ukat jan wali qurax khitinakarakisa?

⁵ ¿Khitis jan wali jathampi phawantirixa? “Pachpa supayawa” sasaw Jesusax säna. Ukat ¿kunas jan wali jathaxa? “Supayan wawanakapäkis” ukanakaw sasaw sarakïna (Mat. 13:25, 38, 39). Jan wali jathat parlkasaxa, yapur jan waltʼayir mä chhuxlla qurat parlaskäna. Qalltanxa trigo alïkaspas ukhamawa. Uka uñachtʼäwix wali askiwa, khitinakatix cristianüpxtwa sasin aliqaki parlapxi ukanakax “Diosan wawanakapäpxtwa” sasaw sarnaqapxi, ukampis luratanakapax janiw kuna askïkisa, chhuxlla qurar uñtasitakïpxiwa. Jupanakaw Supayan ‘wawanakapäpxaraki’ (Gén. 3:15).

7. ¿Trigot jan wali qurar tuküna? Uk qhanañchtʼam.

⁷ ¿Trigot jan wali qurar tuküna? Janiwa, jan wali quraw trigo taypir phawantasi sasaw Jesusax säna. Ukhamasti, uka uñachtʼäwinxa, janiw Diosan markapat jithiqtir cristianonakat parlkiti. Jan ukasti, kunjamsa Supayax Diosan markapar jan wali jaqinakampi aynachtʼayañ muni uka tuqit parlaski. Amtañäni, apostolanakat Juan sapaki jakxäna uka tiempotakixa, kʼarinak yatichir jan wali jaqinakax waljaniw utjxäna (2 Ped. 2:1-3; 1 Juan 2:18).