• “Amtasipjjapunim, nayajj sapürupuniw jumanakampïskta”
    Yatiyañataki 2013 | julio 15

    • 13. Apocalipsis 18:7 qellqatajja, ¿kunsa Jachʼa Babiloniata ukat cristianöpjjtwa siri kʼari religionanakat qhanañchi?

      13 Kimsïri: wararipjjaniwa, laka chʼakhsa tʼurusipjjarakiniwa. Angelanakajj qoranak marq marqa apthapiñ tukuyapjjani ukhajj ¿kunas pasani? Khitinakatï qorar uñtasitäpki ukanakajj kunjamansa jikjjatasipjjani uka toqet parlkasajja, Jesusajj akham sänwa: “Ukanwa wararipjjani, laka chʼakhsa tʼurusipjjarakini” sasa (Mat. 13:42). ¿Ukajj jichhürunakanti pasaskpacha? Janiwa. Jichhürunakanjja, cristianöpjjtwa siri kʼari religionanakajj Jachʼa Babilonia taypinkirinakjamajj qʼañu warmjamarakiw akham sasipki: “Akan nayajj mä reinar uñtata qontʼatäsktwa, janiw ijmäkti, janirakiw tʼaqheskäsa” sasa (Apo. 18:7). Jupanakas munañanïpkaspa ukhamwa amuyasipjje, ukat ‘mä reinar uñtatas’ marka apnaqerinakjjar ‘qontʼatäkaspa’ ukhamwa jachʼañchasipjje. Ukhamajj jichhürunakanjja, qorar uñtasit cristianonakajj janiw wararipkiti, jan ukasti jachʼañchasisipkiwa. Ukampis ukajj niyaw mayjtʼañampïski.

      Cristianöpjjtwa siri kʼari religionanakajj politican pʼeqtʼirinakamp mayachtʼatäpki ukanakajj niyaw tukjatäpjjani (13 tʼaqa uñjjattʼäta)

      14. 1) ¿Kunapachasa ukat kunatsa kʼari cristianonakajj ‘laka chʼakhanakap tʼurusipjjani’? 2) ¿Mateo 13:42 qellqatat machaq amuytʼäwejj kunjamsa Salmo 112:10 qellqatan siski ukampejj pachpakïpjje? (Qhanañchtʼäwip uñjjattʼam.)

      14 Jachʼa tʼaqhesïwi tiempon taqpach kʼari religionanakajj tukjatäpkani uka qhepatjja, khitinakatï ukar arkapkäna ukanakajj ukaruw imantasiñatak tʼijtapjjani, ukampis janiw kawkin imantasiñsa jikjjatapkaniti (Luc. 23:30; Apo. 6:15-17). Ukatjja, tukjäwit jan kunjam qhespiyasiñ amuyasisajja, jan kun kamachirjamäsaw wal wararipjjani ukat coleratas ‘laka chʼakhanakap tʼurusipjjani’. Ukat Jesusajj kunjamtï jachʼa tʼaqhesïwi tiempot arsuwaykänjja, jupanakajj uka tiemponwa “wal jachapjjani” (Mat. 24:30; Apo. 1:7).e

      15. ¿Qorampejj kunas pasani, ukat kunapachas ukajj pasani?

      15 Pusïri: nina aqkis uka hornoruw jaqontatäpjjani. ¿Marq marqa wakichtʼat qorampejj kunas pasani? Angelanakajj “nina aqkis uka hornoruw jaqontapjjani” (Mat. 13:42). Ukhamajj wiñayatak tukjatäpjjaniwa. Ukatjja, khitinakatï kʼari yupaychäwir arkapjjäna ukanakajj jachʼa tʼaqhesïwi tiempo tukusini ukhaw tukjatäpjjani, mä arunjja, Armagedonana (Mal. 4:1).