• “Jehová Diosamarukiw adorañama”
    Jehová Diosarukiw oraqpachan adorasjjani

    • ‘Jumatï qonqortʼasisin mä kutik adoritäta ukhajja...’

      8. Kimsïr yantʼanjja, ¿kunjamsa Supayan cheqpach amtapajj qhanstäna?

      8 Mateo 4:8-11 liytʼañataki. Kimsïr yantʼanjja Supayajj janiw engañompik Jesusar yantʼkänti, jan ukasti cheqpach amtapajj kunänsa ukaw qhanstäna. Supayajj inas mä visión toqejj ‘aka oraqenkir taqe markanaka, ukhamaraki kunja qamirïpkitejj taqe ukanak’ Jesusar uñachtʼaychïna. Ukampis jan walïki ukjja janiw uñachtʼaykänti. Antisas akham sänwa: ‘Jumatï qonqortʼasisin mä kutik adoritäta ukhajja, taqe akanakwa churäma’ sasa.b Supayajj adorayasiñwa munäna, ¡ukaw jupatakejj jukʼamp wakiskirïna! Jesusajj Awkip contra saytʼasin jupar adorjjaspa ukwa munäna. ‘Jumajj facilakiw akapachan wali chʼamanïsma, wali utjirinïsma, janiw tʼaqesiñamasa, chʼapinakat lurat coronampi uchatäñamasa, jawqʼjatäñamasa, ni mä lawar chʼakkatatäñamas wakiskaniti’ sasinsa Jesusar siskaspa ukhamänwa. Kuntï Supayajj siskäna ukajj phoqasispänwa, Jesusajj Supayan oraqpach apnaqerïtap sum yatïna (Juan 12:31; 1 Juan 5:19). Jesusan Jehová Diosar jan adorjjañapatakejja, Supayajj kuns churirjamänwa.

      9. 1) ¿Cheqpach cristianonakan kun lurapjjañapsa Supayajj muni? ¿Kunjamsa jiwasar yantʼistu? 2) ¿Kunjamsa Jehová Diosar adorañasa? (“¿Adoraña arojj kamsañsa muni?” sat recuadro uñjjattʼäta).

      9 Jichhürunakanjja Supayajj jupar adorañaswa wal muni, jan ukajj Jehová Diosan munañap conträjjsna ukwa muni. Niyakejjay Supayajj akapachan diosapächejja, Jachʼa Babiloniankir taqpach religionanakajj juparuw adorasipki (2 Cor. 4:4). Waranq waranqa jaqenakas Supayar adorasipkchejja, cheqpach cristianonakajj jupar adorjjapjjaspa, ‘cheqaparjam sarnaqatas layku tʼaqesiñat’ sipansa, wali qollqenïña, wali uñtʼatäña thaqapjjaspa ukwa munaraki (1 Ped. 3:14). Jiwasatï Jehová Diosar adorañat sipansa Supayan apnaqat akapachar mitisjjsna ukhajja, Supayarus qonqortʼasisin adorksna ukhamäspawa. ¡Ukhamatwa Supayajj diosasar tukuspa! ¿Kunas ukar jan purtʼasiñatak yanaptʼistaspa?

      10. ¿Supayan kimsïr yantʼaparojj Jesusajj kamsänsa, kunatsa ukham säna?

      10 Supayan kimsïr yantʼaparojj Jesusajj kamsänsa uk uñjañäni. Jupajj taqe chuymaw Dios toqet saytʼasïna, jan pächasisaw Supayar jankʼak akham sarakïna: ‘¡Saram akat Supaya!’ sasa. Nayrïr pä yantʼanakanjja, Jesusajj Diosan sutipwa aytasïna, jichhajj ukhamarakiw Deuteronomio libronkir arunak aytasisajj akham säna: “Qellqatarakiwa: ‘Jehová Diosamarukiw adorañama, jupa saparukiw serviñama’” sasa (Mat. 4:10; Deut. 6:13). Jan tʼaqesisakiw sum jakasisma sasinsa Supayajj siskchïnjja, Jesusajj janiw ukar yäqkänti, taqe ukanakajj jukʼa tiempotakikïtap sum yatïna. Awkijakiw adoratäñapa, ‘qonqortʼasisin mä kutik’ adoririsma ukhasa janipuniw walïkaspati siskaspas ukhamänwa. Jesusajj janipuniw Supayar adorañ munkänti, ukatwa ‘Diablojj jaytjjäna’.c

      Jesusajj taqe chuymaw ‘¡saram akat Supaya!’ saski.

      “¡SARAM AKAT SUPAYA!” (Párrafo 10 uñjjattʼäta).

      11. ¿Kunjamsa Supayarusa yantʼanakaparus saykatsna?

      11 Supayarusa akapachan yantʼanakaparus istʼañäniti janicha ukjja, sapa mayniw Jesusjam amtaraksna. Diosajj kunsa lurañäni uk sapa mayni amtirwa lurawayistu, ukajj mä suma regalowa. Ukhamasti janipuniw khitisa ni wali chʼamani jan sinttʼasir Supayas Diosar adorañat apaqkistaspati. Jiwasatï Diosat janipun jitheqtkañäni, ‘Diosar confiyañanjja suma saytʼatäñäni, Diablo contra saytʼasipjjarakiñäni’ ukhajja, “¡saram akat Supaya!” sisksnas ukhamäniwa (1 Ped. 5:9). Ak amtañäni Jesusajj janiw Supayar istʼkänti, ukatwa Supayajj jaytjjäna. Biblian akham sarakistuwa: ‘Diablo contra saytʼasipjjam, jupajj jumanakat jaltjjaniwa’ sasa (Sant. 4:7).

      Testigonakajj kunjamsa yantʼanakar atipjapjje ukaw aka fotonakan uñjasi: 1) Mä kullakajj trabajki uka hotelanwa mä cuarto qʼomachaski, jupajj wali valorani cosasanak jan lunthatasiñatakiw chʼamachasiski. 2) Mä jilatarojj tawaqonakaw qʼañu juchanak lurañatak uñchʼukisipki, jilatajj jupanakatwa jitheqtaski. 3) Mä jilatarojj nayra amigonakapaw cigarro fumañataki, alcohol umañataki, qollqet anatañatak jawsasipki.

      Supayan apnaqat akapachan yantʼanakaparojj istʼañäniti janicha ukajj jiwasatäjjewa. (Párrafos 11, 19 uñjjattʼäta).

      Jehová Diosar jan adorasiñap munir enemigo

      12. Edén jardinanjja, ¿kunjamsa Supayajj Diosar adorasiñap conträtap uñachtʼayäna?

      12 Supayajj qhep qhepa kutin Jesusar yantʼkäna ukhajja, Jehová Diosar adorasiñap janipun munatapwa uñachtʼayäna. Walja waranqa maranak nayrajja, ukhamarakiw Edén jardinan Diosar adorasiñap contra saytʼäna. Nayraqatjja Evaruw engañjäna, Evasti esposoparuw juchar purtʼasiyarakïna, ukhamatwa Supayajj jupanakar munañaparjam apnaqjjäna, jupanakan pʼeqtʼiripäjjarakïnwa (Génesis 3:1-5 liytʼañataki; 2 Cor. 11:3; Apoc. 12:9). Adanampi Evampejja inas khitis jupanakar engañjaskäna uk jan yatipkchïnti, ukampis Supayaruw adorasipkäna. Ukhamatwa Supayajj jupanakan diosapäjjäna. Edén jardinan jaqenakar Dios contra saytʼayasajja, Diosajj gobernañatak janis derechonïkaspa ukhamwa amuyayäna, ukatsti Diosar adorasiñap contraw saytʼarakïna. ¿Kunjamsa uk luräna?

  • “Jehová Diosamarukiw adorañama”
    Jehová Diosarukiw oraqpachan adorasjjani

    • b Biblia toqet parlir mä librojja, Supayan arunakapat akham siwa: “Kunjamtï Supayajj nayrïr yantʼapampi Adanampir Evampir pantjasiykänjja [...], jichha kutin ukhamarakïnwa, Supayan munañapat lurasini, jan ukajj Diosan munañapach lurasini uk ajlliñaw wakisïna, mä arun khitirus adorasiñapa ukaw amtasiñapäna. Supayajj cheqpach Dios lanti adorayasiñwa munäna” sasa.