Wiñay wiñay Diosan munasitapäpxañäni

Munasitanakanïñatakix chʼamachtʼasiñawa. Diosan munasitapäñataki chʼamachasiñäni, munasitapäskakiñäni ukhaxa walja bendicionanakwa katuqañäni. Jesusax iyawsirinakarux sänwa: “Chiqa kankañasti qhispiyat sarnaqasiñ churapxarakïtam” (Juan 8:32). ¿Kamsañs munpachäna?

Jichhaw qhispiyatäsna. Kʼari yatichäwinakampita, Satanasan kʼarinakapampita qhispiyatäsnawa. Millón millón jaqinakawa Jehová Diosaru jan uñtʼasaxa llakita jan suytʼawin sarnaqapxi, ukhamañatsa qhispitäsnawa (Romanos 8:22). Diosan munasitanakapaxa janiw “jiwañar axsarasin esclavjam” sarnaqapkiti (Hebreos 2:14, 15).

Diosan machaq jutïrpachapanxa qhispiyataw kusisit sarnaqsna. ¡Jutir urunakanxa kunja sum qhispiyataki sarnaqkañäni! Uraqix kusipachaptayatäxani ukhaxa, janiw chʼaxwäwinakasa, usuntañanakasa, ñanqha luräwinakasa utjxaniti. Janirakiw pisinkañasa awtjatäñasa utjxaniti. Chuymaniptañatsa jiwañatsa qhispiyatäxañäniwa, ukhamaraki janiw axsarxañäniti, janirakiw khitis tʼaqhisiyxistaniti ni khitis kʼarimpi aynachtʼayxistanisa. Bibliax Diosat siwa: “Jumaw amparam luqatattaxa, taqi jakirinakarusti askinak jilarkir churtaxa.” (Salmo 145:16.)

Diosan munasitanakapaxa wiñayatakiwa jakapxani. Wiñay jakañax Diosan suma waxtʼäwipawa munasitapäñ munirinakatakixa (Romanos 6:23). Amuyarakim, jumatakixa kunj sumakïkani wiñayan wiñayapataki kusisisa jakañaxa.

Taqi kuna lurañatakisa tiempox utjxaniwa. Inas kuna tukartʼäwi yatiqañ munchiñäni, dibujonak pintañsa, jan ukax kʼullu khituñanaksa. Inas kunaymani animalanakatsa jan ukax chʼuxña alinakatsa yatxatañ munarakchiñäni. Jan ukax kawksay sarañ munchiñäni, anqa markanakaru jaqinakapampiru uñtʼañataki. Niyakixay wiñayataki jakxchiñänixa, taqi akanakwa lurañäni.

Walja munat masinakanïñatakixa tiempox utjxaniwa. Niyakixay wiñayataki jakaschiñänixa, Diosan yaqha munasitanakaparusa uñtʼañäniwa. Kunanak luriripxchiya ukat kunjam jaqinakapxchiya uk uñtʼañäni, jupanakaxa munat masinakasäxaniwa. Jupanakarux munasiñäniwa, jupanakasa munasipxarakistaniwa (1 Corintios 13:8). Niyakixay wiñayataki jakxchiñänixa, Uraqpachan taqi jaqinakaw munasit masinakasäxapxanixa. Ukat sipansa, sapa patak maratjamawa Jehová Diosampi munasiñasaxa jukʼampi jilxattani. ¡Wiñay wiñay Diosan munasitapäpxañäni!