Bibliajja Diosan Reinopatwa jukʼamp parli. Jehová Diosajja uka Reino toqew kuntï qalltan aka oraqetak amtkäna uk phoqani. ¿Kunas Diosan Reinopajja? ¿Kunjamatsa uka Reinojj apnaqjjatap yattanjja? ¿Kunsa uka Reinojj jichhakam lurawayi? ¿Kunsa jutïrin lurarakini? Uka jisktʼanakarojja aka yatichäwina ukhamarak 32, 33 yatichäwinakanwa qhanañchasiskani.

1. ¿Kunas Diosan Reinopajja? ¿Khitis uka Reinon Reyipajja?

Diosan Reinopajja Jehová Diosan uttʼayata mä gobiernowa. Uka Reinon Reyipasti Jesucristowa, jupajj alajjpachatwa apnaqanini (Mateo 4:17; Juan 18:36). Jesusat parlkasajja, Bibliajj akham siwa: ‘Jupajj wiñayatakiw mä reyjam apnaqani’ sasa (Lucas 1:32, 33). Diosan Reinopan Reyipjamajja, jupajj aka oraqpacharuw apnaqanini.

2. ¿Khitinakas Jesusamp chikajj apnaqapjje?

Jesusajj janiw sapak apnaqkiti. Jupamp chikajja ‘taqe tribunkir jaqenakampi, kunayman aru parlirinakampi, kunayman markanakata taqe kasta jaqenakampiw reyinakjam apnaqanipjjani’ (Apocalipsis 5:9, 10). ¿Qhawqhanis Cristomp chikajj apnaqanipjjani? Jesusajj aka oraqenkkäna ukhat jichhakamajja, walja waranqa jaqenakaw Criston arkirinakapar tukuwayapjje. Ukampis 144.000 jaqenakakiw alajjpacharojj Jesusamp apnaqañatakejj sarapjjani (Apocalipsis 14:1-4 liytʼäta). Mayni cristianonakajja aka oraqenwa jakapjjani, Diosan Reinopampi apnaqatäpjjarakiniwa (Salmo 37:29).

3. ¿Kunatsa aka oraqenkir gobiernonakat sipansa Diosan Reinopajj jukʼamp sumajja?

Yaqhep gobernantenakajj kunatï sumäki uk lurañsa munapkchejja, janiw kuntï amtapki taqe ukanak lurañ puedipkiti. Jupanak qhepatjja yaqha gobernantenakaw mantjjapjjaraki, inas jupanakajj markat jan sinttʼasiri jupanakatakik taqe kuns muniri ukhamäpjjchi. Ukampis Jesusaw Diosan Reinopan Reyit uttʼayatajja, janiw jupa lantejj yaqha gobernantejj utjkaniti. Diosajj uttʼayki “uka reinojj janipuniw tukjatäkaniti” (Daniel 2:44). Jesusajj aka oraqpacharuw apnaqanini, taqeniruw mä igualak uñjarakini. Jupajj wali munasiri cheqapar uñjiri ukhamawa, jaqenakarojj jupjam wali munasirïpjjañapataki mayninakarus cheqapar uñjapjjañapatakiw Reinopan yaticharakini (Isaías 11:9 liytʼäta).

4. Diosan Reinopaw aka oraqjjar apnaqani

Wali uñtʼata marka apnaqerinakat sipansa Jesucristojj wali chʼamani wali yatiñani apnaqeriwa, janipuniw jupjam yaqha gobernantejj utjkiti. Mateo 28:18 liytʼasajja aka toqetwa parltʼapjjäta:

• Marka apnaqeri jaqenakat sipansa, ¿kunatsa Jesusaw jukʼamp chʼamanejja sasin sistanjja?

Marka apnaqerinakajj mä markakwa apnaqapjje, jukʼa tiempokiw apnaqapjjaraki, ukampis Diosan Reinopampejj janiw ukhamäkaniti. Daniel 7:14 liytʼasajja aka toqetwa parltʼapjjäta:

• Diosan Reinopajj ‘janiw tukjatäkaniti’, ¿kunjamsa uk yatiñajj yanaptʼistu?

• Diosan Reinopajj aka oraqpacharuw apnaqanini, ¿kunjamsa uk yatiñajj yanaptʼistu?

5. Oraqenkir gobiernonak lantejj yaqha gobiernow uttʼayasiñapa

¿Kunatsa Diosan Reinopajj aka oraqenkir gobiernonak lanti uttʼayatäñapa? VIDEO uñtasajja aka toqetwa parltʼapjjäta:

VIDEO: ¿Kunas Diosan Reinopajja? (fragmento) (1:41)

• ¿Marka apnaqerinakajj kuna jan walinaksa utjayawayapjje?

Eclesiastés 8:9 liytʼasajja aka toqetwa parltʼapjjäta:

• ¿Diosan Reinopaw jaqenakan gobiernonakap lantejj apnaqañapa sasat jumajj amuyarakta? ¿Kunatsa ukham amuyta?

6. Diosan Reinopan apnaqerinakajj sum uñtʼapjjestu

Jesusajj aka oraqer jutkäna ukhajja aka oraqenkir jaqenakjamaw jakarakïna, ukatwa jupajj “pantjasitanakasat khuyaptʼayasiri” reyiwa sasin sistanjja (Hebreos 4:15). Jesusamp chika apnaqanipjjañapatakejja, Jehová Diosajj jupat jan jitheqtiri 144.000 chachanakampiru warminakampiruw ajlliwayi. Jupanakajja ‘taqe tribunkir jaqenakata, kunayman aru parlirinakata, taqe kasta jaqenakata, kunayman markanakatäpjjewa’ (Apocalipsis 5:9).

• Jesusasa jupamp chik apnaqapkani ukanakas aka oraqen jakañajj kunjamasa uk sum yatipjje, ¿uk yatiñajj chʼamañchtʼtamti? ¿Kunatsa ukham amuyta?

7. Jaqen leyinakapat sipansa Diosan Reinopan leyinakapaw jukʼamp sumajja

Gobiernonakajja markachirinakar jarkʼaqañataki yanaptʼañatakiw leyinak apsupjje. Diosan Reinopajj leyinakanirakiwa, uka Reinomp apnaqatanakajj ukarjamaw sarnaqapjjañapa. 1 Corintios 6:9-11 liytʼasajja aka toqetwa parltʼapjjäta:

• Jaqenakajj Diosan leyinakaparjama sarnaqjjapjjani ukhajja, ¿aka oraqen jakasiñajj kunjamäpachänisa?

• Jehová Diosajja Reinopamp apnaqatäpki ukanakarojj leyinakap phoqapjjañapwa mayi, ¿ukham mayitapajj jumatak walikïskiti? ¿Kunatsa ukham amuyta?

• Diosan leyinakaparjam jan sarnaqapki ukanakajja, ¿cambiapjjaspawa sasajj kunatsa sissna? (1 Corintios 6:11 uñjjattʼapjjäta).

¿KUNSA YATEQAWAYTAN?

Diosan Reinopajj alajjpachankir mä gobiernowa, aka oraqjjaruw apnaqanirakini.

Amtañataki

• ¿Diosan Reinopan apnaqerinakajj khitinakäpjjesa?

• ¿Kunatsa Diosan Reinopajj jaqenakan gobiernonakapat sipansa jukʼamp sumajja?

• Diosan Reinopamp apnaqatäpki ukanakajja, ¿kunsa Jehová Diosan mayitanakaparjamajj lurapjjañapa?

JUKʼAMP YATJJATAÑAMATAKI

Diosan Reinopajj kawkinkiwa sasas Jesusajj yatichäna uk yatjjatam.

“¿Es el Reino de Dios algo que se lleva en el corazón?” (Artículo de jw.org)

Jehová Diosan Testigonakapajj aka oraqenkir gobiernonakar apoyañat sipansa Diosan Reinoparupuniw apoyapjje, kunatsa jupanakajj uk lurapjje uk yatjjatam.

Diosan Reinoparupuniw apoyapjje (1:43)

Jesusamp chika apnaqanipjjañapatakejja, Jehová Diosajj 144.000 jaqenakaruw ajlli. Kunsa Bibliajj uka toqet yatichi uk yatjjatam.

“¿Quiénes van al cielo?” (Artículo de jw.org)

Carcelan llawintatäkäna uka warmirojja, Diosakiw justicia aka oraqen utjayaspa sañatakejj kunas yanaptʼäna uk yatjjatam.

“Aprendí cómo se solucionarán las injusticias” (¡Despertad!, noviembre de 2011)

Jesusajja discipulonakaparojj “janiw aka mundonkirïpktati” sasaw säna (Juan 15:19). Uka arunakajja jan akapachankirïpjjatapa, mä arunjja politicarusa guerranakarus jan mitisipjjatapa sañwa muni. Ukampis akapachar jan mitisiñajja janiw facilapunïkiti. Jaqenakajja politicar jan mitisitasat burlasipjjestaspawa. ¿Kunjamsa akapachar jan mitisksna? ¿Kunjamsa Jehová Diosat jan jitheqtatas uñachtʼayaraksna?

1. Jaqen apnaqata gobiernonakarojja, ¿kunjamsa cheqpach cristianonakajj uñjtanjja?

Cristianonakajja gobiernonakarojj respettanwa. Jesusajja “Cesarankkis ukjja Cesarar churapjjam” sasaw säna, ukatwa jiwasajj markasan leyinakaparjam sarnaqtanjja, impuestonaksa pagaraktanjja (Marcos 12:17). Bibliarjamajja gobiernonakajj Jehová Diosan permisopampiw apnaqapjje (Romanos 13:1). Ukatwa Jehová Diosakiw gobiernonakat sipansa jukʼamp autoridadanejja sasin sistanjja. Aka oraqenjja kuna jan walinakatï utjki ukanakjja, Diosampi alajjpachankir Reinopampiw askichapjjani sasaw confiytanjja.

2. ¿Kunjamanakatsa akapachar jan mitisitas uñachtʼaytanjja?

Jesusjamarakiw jiwasajj politicar jan mitisktanti. Kunapachatï jaqenakajj Jesusan mä milagrop uñjapjjäna ukhajja, juparojj aka oraqen reyit uttʼayañwa munapjjäna, ukampis Jesusajj janiw uka jaqenakan munañanakaparjam lurkänti (Juan 6:15). ¿Kunatsa ukham luräna? Jupajj akham sänwa: “Reinojajj janiw aka mundonkirïkiti” sasa (Juan 18:36). Jesusan discipulonakapajja, kunaymaninakatwa akapachar jan mitisitas uñachtʼaytanjja. Sañäni, janiw guerranakar sarktanti (Miqueas 4:3 liytʼäta). Banderarusa jan ukajj yaqha ukhamanakarus respetompis uñjkstanjja, janiw ukanakarojj jachʼañchktanti. Ukham lursna ukhajja, ukanakarus adorksna ukhamäspawa (1 Juan 5:21). Janiw partidos políticos ukanakarusa ni candidatonakarusa apoyktanti, janirakiw jupanak conträkaraktansa. Taqe ukanak lurasaw Diosan uttʼayata Reinoparuk apoyatas uñachtʼaytanjja.

JUKʼAMP YATJJATAÑÄNI

3. Cheqpach cristianonakajj janiw akapachar mitisktanti

Jesusampi discipulonakapampejj akapachar jan mitisis sarnaqañwa yatichawayistu. Romanos 13:1, 5-7 ukat 1 Pedro 2:13, 14 liytʼapjjäta. Ukatjja VIDEO uñtasajj aka toqetwa parltʼapjjäta.

VIDEO: Cheqpach cristianonakajj janiw akapachar mitisipkiti (nayrïri) (4:28)

• ¿Kunatsa autoridadanakarojj respetañasa?

• Jupanakar istʼatasjja, ¿kunanak lurasas uñachtʼaysna?

Guerrajj utjki ukhajja, yaqhep markanakajj janiw khitirus apoyapkti sapjjewa, ukampis nuwasipki uka markanakarojj kunjamatsa apoyapjjapuniwa. ¿Ukham lurasajj cheqapunit jan khitirus apoyapki? Juan 17:16 liytʼapjjäta. Ukatjja VIDEO uñtasajj aka toqetwa parltʼapjjäta:

VIDEO: Cheqpach cristianonakajj janiw akapachar mitisipkiti (payïri) (3:11)

• ¿Kunanak lurasas akapachar jan mitisitas uñachtʼaysna?

Awisajja autoridadanakajj kunatï Diosan leyip conträki uk lurañaswa mayipjjestaspa, ¿ukhaman uñjasisajj kunsa lursna? Hechos 5:28, 29 liytʼapjjäta. Ukatjja VIDEO uñtasajj aka toqetwa parltʼapjjäta:

VIDEO: Cheqpach cristianonakajj janiw akapachar mitisipkiti (kimsïri) (1:18)

• Gobiernonakan yaqhep leyinakapajj Diosan leyinakap conträki ukhajja, ¿kawkïrirus istʼañasäspa?

• ¿Cristianonakajj kunapachas autoridadanakarojj jan istʼapkaspa?

4. Amuyusansa luratasansa janiw akapacharojj mitisiñasäkiti

1 Juan 5:21 liytʼapjjäta. Ukatjja VIDEO uñtasajj aka toqetwa parltʼapjjäta:

VIDEO: ¿Kunatsa cheqpach cristianonakajj jan ajjsarirïñasa? Politicaru guerraru jan mitisiñataki (2:49)

• Uñtktan uka videonjja, ¿kunatsa mä partido politicor jan mayachasiñsa banderar jan jachʼañchañsa Ayenge jilatajj amtäna?

• ¿Jilatajj suma amtaruw purïna sasmati?

¿Kunjamanakan uñjasisas akapachar jan mitisiñajj chʼamäspa? VIDEO uñtasajja aka toqetwa parltʼapjjäta:

VIDEO: “Yatiyañataki” revistan yatichäwinakapa: Jan akapachar mitisiñäniti (5:16)

• Markasan equipopajj yaqha markampi pelot anatki ukhajja, ¿kunjamatsa akapachar jan mitisitas uñachtʼaysna?

• Kuntï politiconakajj amtapki ukajj yanaptʼistaniti, jan ukajj jan waltʼayistanicha uk amuyasajja, ¿kunjamsa akapachar jan mitisitas uñachtʼaysna?

• Noticianakasa jan ukajj chikachasktan uka jaqenakas kuntï sapki ukajja, ¿akapachat jitheqtañatakit yanaptʼistani, jan ukajj akapachar mitisiñaruch purtʼasiyistani?

¿KUNSA YATEQAWAYTAN?

Cristianonakajja politicar jan mitisiñatakiw wal chʼamachasipjje, ukhamätapajj amuyupansa, parlatapansa, luratapans qhanaw uñjasi.

Amtañataki

• ¿Jaqenakan apnaqat gobiernonakarojj istʼañasati?

• ¿Kunatsa cristianonakajj politicar jan mitisipjjañapäki?

• ¿Kunjamanakan uñjaskasas akapachar jan mitisiñajj chʼamakïspa?

JUKʼAMP YATJJATAÑAMATAKI

¿Akapachar jan mitisiñatakejj kunanak lurañas wakisispa?

Jehová Diosajj janipuniw apanukupkituti (3:14)

Akapachar jan mitisipjjatap uñachtʼayañatakejja, ¿kunjamsa familianakajj janïräkipan wakichtʼasipjjaspa?

Kun lurkasas janipun akapachar mitisipjjañäniti (4:25)

Waljanitakejja markapar arjjatañajj wali importantewa, ¿jiwasajj ukhamti amuyañasarakïspa?

‘Diosatakejj janiw kunas chʼamäkiti’ (5:19)

Kunansa trabajiñäni uk janïr amtkasajja, ¿kunjamsa akapachar jan mitisitas uñachtʼaysna?

“Cada uno llevará su propia carga de responsabilidad” (La Atalaya, 15 de marzo de 2006)