• “Kunatï paski uk nayajj qhanañchapjjäma”
    Diosan Reinopat phoqatpachaw yatiyasiñapa

    • 11. ¿Kamsasas ancianonakajj Pablor ewjjtʼapjjäna, ukat uka ewjjtʼarjam lurañatakejj kunsa Pablojj lurañapäna? (Nota liytʼarakïta).

      11 Kunanaktï jilatanakajj apóstol Pabljjat istʼapkäna ukajj janis cheqäkchïnjja, judío cristianonakajj payachasisipkakïnwa. Ukatwa ancianonakajj akham sasin Pablor ewjjtʼapjjäna: “Nanak taypin pusi chachanakaw utji, jupanakajj kuntï Diosar mä promesan arsupki uk phoqasipki. Uka chachanakar irpam, Leyirjam jupanakamp chik qʼomachasinim, jupanakan gastopatakis qollqemat irtarakïta, ukhamat jupanakajj ñikʼutap qʼal mururayasipjjañapataki. Ukhamatwa kunanaktï juma contrajj parlapki ukanakajj jan cheqätap yatipjjani, jan ukasti sum sarnaqaskatamsa Leyirjam phoqaskatamsa taqeniw yatipjjani” sasa (Hech. 21:23, 24).c

      12. ¿Kunjamsa Pablojj ancianonakar istʼatap uñachtʼayäna?

      12 Pablo contra parlapkäna uka judío cristianonakajja, Moisesan Leyiparjamaw sarnaqasiñapa sasaw kutin kutin sasipkakïna. Ukhamätap Pablojj qhanwa jupanakar saspäna, ukampis jupajj ancianonakan mayitaparjam lurañatakiw chʼamachasïna, janirakiw Dios contras saytʼañ munkänti. Ukatwa jupajj akham säna: “Janis nayajj Leyirjam sarnaqkstjja, Leyirjam sarnaqapki ukanakatakejj Leyirjamas sarnaqkirista ukhamaw tukta, ukhamat Leyirjam sarnaqapki ukanakaru Criston thakipar irpaniñataki” sasa (1 Cor. 9:20). Uka textorjamajja, Pablojj Jerusalenankir ancianonakaruw istʼäna, ‘Leyirjamas sarnaqkaspa’ ukhamaw tukurakïna. Ukham luratapajj jiwasatakejj wali yateqaskayawa, jiwasajj ancianonakarojj taqe chuymaw istʼañasa, janipuniw kuns munañasarjam lurasiñapatakejj mayiñasäkiti (Heb. 13:17).

      Dibujompi fotompi: 1) Jerusalenankir ancianonakarojj wali atencionampiw Pablojj istʼaski. 2) Mä jilatajja, anciano masinakapajj ampar aytapki ukwa wali atencionamp uñchʼukiski.

      Kuntï ancianonakajj mayipkäna uk Pablojj phoqänwa, kuna laykutejj janiw Biblian yatichäwip pʼakintkänti. ¿Jupjam uñjasisajj kunsa jumajj lurarakisma?

  • “Kunatï paski uk nayajj qhanañchapjjäma”
    Diosan Reinopat phoqatpachaw yatiyasiñapa

    • c Yatjjattʼatanakajja, uka chachanakajj nazareöñatakiw mä promesa lurapjjäna sasaw sapjje (Núm. 6:1-21). Ukampis kunapachatï uka promesa lurapkäna ukhajja, janiw Moisesan Leyiparjamajj sarnaqasjjänti. Ukhamäkchïnsa Diosar arsut mä promesa lurañajj janiw kuna jan walïkisa sasaw Pablojj amuypachäna, ukatwa uka chachanakan gastopatak qollqepat iraqtʼañsa, jupanakar compañtʼañsa amtpachäna. Cheqansa kuna kasta promessa uka chachanakajj lurapjjäna ukajj janiw yatiskiti. Ukampis khitinakatï nazareöñatak mä promesa lurapjjerïkäna ukanakajja, sapa kutiw juchanakapat qʼomachasiñatakejj mä animal sacrificiot loqtapjjerïna. Amuyatajja janiw Pablojj uka chachanakar uk lurapjjañapatak apoykänti, kuna laykutejj Jesusajj perfecto jakañ vidap sacrificiot loqtkäna uka qhepatjja, janiw juchanak layku animalanak sacrificiot loqtañajj wakisjjänti. Ukhamasti concienciaparjamajj kunatï jan walïkäna uk janipuniw Pablojj lurkpachänti.