7. Jaqen leyinakapat sipansa Diosan Reinopan leyinakapaw jukʼamp sumajja

Gobiernonakajja markachirinakar jarkʼaqañataki yanaptʼañatakiw leyinak apsupjje. Diosan Reinopajj leyinakanirakiwa, uka Reinomp apnaqatanakajj ukarjamaw sarnaqapjjañapa. 1 Corintios 6:9-11 liytʼasajja aka toqetwa parltʼapjjäta:

• Jaqenakajj Diosan leyinakaparjama sarnaqjjapjjani ukhajja, ¿aka oraqen jakasiñajj kunjamäpachänisa?

• Jehová Diosajja Reinopamp apnaqatäpki ukanakarojj leyinakap phoqapjjañapwa mayi, ¿ukham mayitapajj jumatak walikïskiti? ¿Kunatsa ukham amuyta?

• Diosan leyinakaparjam jan sarnaqapki ukanakajja, ¿cambiapjjaspawa sasajj kunatsa sissna? (1 Corintios 6:11 uñjjattʼapjjäta).

Walja jaqenakatakejja ikintasiñ toqet parlañajj janiw faciläkiti. Ukampis ikintasiñ toqet Bibliajj parlki ukhajja, qhana arunakampi wali respetompiw parli. Niyakejjay Bibliajj Jehová Diosat jutchejja, kuntï Bibliajj uka toqet parlki ukajj yanaptʼistaspawa. ¿Kunatsa ukham sistanjja? Jehová Diosaw jiwasarojj lurawayistu, ukatwa kunatï jiwasatakejj askïki uk jupakiw yati sasin sissna. Diosarojj kunjamsa sarnaqatasampejj kusisiysna, kunas wiñayatak kusisit jupar serviñatak yanaptʼistaspa ukanakjja jupakiw sistaspa.

1. ¿Kunjamsa ikintasiñarojj Jehová Diosajj uñji?

Ikintasiñajja casarat chacha warminakatak Jehová Diosan mä regalopawa, uka regalo toqew matrimonionakajj wawanakanïpjjaspa. Ukatjja uka regalo toqerakiw chacha warminakajj purapat munasiñ uñachtʼayasipjje. Ukatwa Diosan Arupajj akham sasin qhanañchi: “Waynäkasin casaraskta uka esposamampi kusisim” sasa (Proverbios 5:18, 19). Jehová Diosajja casado cristiano chacha warminakajj sum sarnaqapjjañapwa muni. Mä cristianojj janipuniw qʼañu jucha lurañapäkiti (Hebreos 13:4 liytʼäta).

2. ¿Kunas qʼañu juchajja?

‘Qʼañu juchan sarnaqerinakajja janiw Diosan Reinop katoqapkaniti’ sasaw Bibliajj qhanañchi (1 Corintios 6:9, 10). Biblia qellqerinakajja qʼañu juchat parlañatakejj griego arut jutki uka pornéia aru apnaqapjjäna. Uka pornéia arojja akanak lurañampi sasiwa: 1) jan casaratäkasin ikintasiña,a 2) chachapura jan ukajj warmipura ikintasiña, 3) animalanakampi qʼañunak luraña. Kunapachatï qʼañu jucha lurañar jan purtʼasktan ukhajja, Jehová Diosaruw kusisiytanjja, ukatjja jiwas pachpas sumaw jakasiraktanjja (1 Tesalonicenses 4:3).

JUKʼAMP YATJJATAÑÄNI

3. Qʼañu juchat jitheqtam

Diosat jan jitheqtiri José chachajja, qʼañu juchar jan purtʼasiñatakiw chʼamachasïna. Génesis 39:1-12 liytʼasajja aka toqetwa parltʼapjjäta:

• ¿Kunatsa José chachajj escapäna? (Génesis 39:9 uñjjattʼapjjäta).

• ¿Josean ukham luratapajj walikïnwa sasmati? ¿Kunatsa ukham amuyta?

VIDEO: Wayna tawaqonaka, qʼañu juchat jitheqtapjjam (5:06)

Jehová Diosajj qʼañu juchat jitheqtañaswa muni. 1 Corintios 6:18 liytʼasajja aka toqetwa parltʼapjjäta:

• ¿Kunjamanakatsa maynejj qʼañu jucha lurañar purtʼasispa?

• ¿Kunjamatsa jumajj qʼañu jucha lurañar jan purtʼaskasma?

4. Jumajj jan wali lurañ munañanakar atipjasmawa

VIDEO: Jan walinakar jan purtʼasiñatakejj Biblia liyiñasawa (3:02)

• Videon uñtktan uka jilatan amuyunakapasa luratanakapas jan walïtap amuyasïna ukhajja, ¿kunsa esposapar jan engañjañatakejj luräna?

Diosar taqe chuyma serviri cristianonakasa, amuyunakapan qʼomäñatakejja awisajj chʼamachasipjjañaparakiwa. ¿Qʼañu amuyunak jankʼak apanukuñatakejj kunsa jumajj lurasma? Filipenses 4:8 liytʼasajja aka toqetwa parltʼapjjäta:

• ¿Uka textorjamajj kunanakatsa lupʼiñasa?

• Jiwasatï Biblia liyiñäni Jehová Diosarus jan tiemponi serviñäni ukhajja, ¿janiw facilakejj qʼañu jucha lurañar purtʼaskañäniti sasmati? ¿Kunatsa ukham amuyta?

5. Jehová Diosan leyinakapajj yanaptʼistuwa

VIDEO: Jan amuytʼasirinakajj jan waliruw purtʼasipjje (9:31)

• ¿Kunjamsa texton parlki uka waynajj jan walir purtʼasiñampïskäna? (Proverbios 7:8, 9 uñjjattʼapjjäta).

• Proverbios 7:23, 26 textorjamajja, qʼañu jucha lurañajj sinti jan walinakanwa uñjasiyistaspa. Qʼom sarnaqañatakitï chʼamachasiñäni ukhajja, ¿kuna jan walinakansa jan uñjaskañäni?

• Qʼom sarnaqañajja, ¿kunjamsa wiñay kusisit jakasiñatakejj yanaptʼistaspa?

‘Chachapura warmipura qʼañu jucha lurañat kuntï Bibliajj siski ukajj janiw walïkiti’ sasaw yaqhepanakajj amuyapjje. Ukampis Jehová Diosajj munasiriwa, ukatwa taqe jaqenakan wiñayatak kusisit jakasipjjañap muni. Jiwasatï ukham jakasiñ munstan ukhajja, leyinakaparjamaw sarnaqañasa. 1 Corintios 6:9-11 liytʼasajja aka toqetwa parltʼapjjäta:

• ¿Diosatakejj chachapura jan ukajj warmipura jan walinak lurañ munañakit jan walïki?

Diosar kusisiyañatakejj jan walinak jaytañatakiw chʼamachasiñasa, ukajj janiw inamayäkaniti. Salmo 19:8, 11 liytʼasajja aka toqetwa parltʼapjjäta:

• ¿Qʼom sarnaqañat kuntï Diosan leyinakapajj siski ukajj jumatak walikiti? ¿Kunatsa ukham amuyta?

¿KUNSA YATEQAWAYTAN?

Ikintasiñajja casarat chacha warminakatak Jehová Diosan mä regalopawa.

Amtañataki

• ¿Kunanakas qʼañu jucha lurañ taypinki?

• ¿Kunas qʼañu juchar jan purtʼasiñatakejj yanaptʼistaspa?

• ¿Qʼom sarnaqañat kunanaktï Jehová Diosan leyinakapajj siski ukar istʼañajj kunjamsa yanaptʼistu?

JUKʼAMP YATJJATAÑAMATAKI

Chacha warmejj junto jakapjjañapatakejja, kunatsa Jehová Diosajj jupanakan casarasipjjañap muni uk yatjjatam.

“¿Qué dice la Biblia sobre vivir juntos sin estar casados?” (Artículo de jw.org)

Chachapura warmipura qʼañunak lurañ toqet kuntï Bibliajj siski ukajja, janiw jupanakar uñisiñataki yaqhachañatak chʼamañchkiti sasajj kunatsa sistan uk yatjjatam.

“¿Es malo ser homosexual?” (Artículo de jw.org)

Kuntï ikintasiñ toqet Diosan leyinakapajj siski ukajj kunjamsa jarkʼaqestu uk yatjjatam.

“¿Es el sexo oral realmente sexo?” (Artículo de jw.org)

Chachanakampi jan walinak lurasin sarnaqkäna uka chacharojja, ¿vidap cambiañatakisa Diosar kusisiykir sarnaqañatakis kunas yanaptʼäna? Jupan sarnaqäwipjja “Me trataron con dignidad” sat cheqanwa liytʼäta.

“La Biblia les cambió la vida” (La Atalaya, 1 de abril de 2011)

Jehová Diosar wal munaskasasa chuymap jan ustʼayañatak wal chʼamachaskasasa pantjasiñajj utjapuniwa. Ukampis yaqhep juchanakajj yaqha juchanakat sipans jukʼamp jachʼawa (1 Corintios 6:9, 10). Jumatï mä jachʼa juchar purtʼasïta ukhajja, ‘janiw Jehová Diosajj munasjjetuti’ sasin janiw amuyañamäkiti, jupajj jucham perdonañatakisa jumar yanaptʼañatakis jankʼakiwa.

1. ¿Kunsa Jehová Diosamp perdonayasiñatakejj lurañasa?

Khitinakatï Jehová Diosar munasipki ukanakajja, mä jachʼa juchar purtʼasipjjatap laykojj wali llakitaw jikjjatasipjje. Ukampis Jehová Diosajj markapar siskäna uka pachpa arunakampiw jupanakar chuymachtʼi, jupajj akham sänwa: “Juchanakamajj llijkir wila colorjamäkchisa, khunur uñtasit janqʼor tukuyatäniwa” sasa (Isaías 1:18). Jiwasatï taqe chuyma arrepentisiñäni ukhajja, Jehová Diosajj juchanakas perdonistaniwa. Ukampis ¿kunjamsa arrepentisitas uñachtʼaysna? Pantjasitanakasat chuymatpach llakisisa, kunatï jan walïki uk jan lurjjasa, Jehová Diosarus perdontʼita sasin ruwtʼasisaw arrepentisitas uñachtʼaysna. Ukatjja juchar purtʼasiykistu uka amuyunak apanukuñatakisa, jan ukajj juchar purtʼasiykistu uka luräwinak apanukuñatakis chʼamachasiñasawa. Jehová Diosan leyinakaparjam sarnaqañatakis chʼamachasiñasarakiwa (Isaías 55:6, 7 liytʼäta).

2. Juchar purtʼasktan ukhajja, ¿kunjamsa Jehová Diosajj ancianonak toqe yanaptʼistu?

Jachʼa juchar purtʼaski ukarojja, Jehová Diosajj akham sasaw ewjjtʼi: “Congregacionankir ancianonakar jawspan” sasa (Santiago 5:14, 15 liytʼäta). Ancianonakajja espíritu santompi uttʼayatäpjjewa, Jehová Diosarusa ovejanakaparus wal munasipjje. Jupanakajj Jehová Diosampi mayamp sum apasiñasatak jiwasar yanaptʼañatakejj wakichtʼatäpjjewa (Gálatas 6:1).

Jachʼa juchar purtʼasktan ukhajja, ¿kunjamsa ancianonakajj yanaptʼapjjestu? Kuntï lurktan ukajj kunatsa jan walïki uk amuyañasatakejja, paya jan ukajj kimsa ancianonakaw Bibliamp yanaptʼapjjestani. Juchar jan mayampi purtʼasiñatakejja, suma ewjjtʼanakwa churapjjestani, chʼamañchtʼapjjarakistaniwa. Maynitejj jachʼa juchar purtʼasisin jan arrepentiskani ukhajja, ancianonakajj congregacionat apsupjjaniwa, ukhamat congregacionar jan walinakat jarkʼaqañataki.

JUKʼAMP YATJJATAÑÄNI

3. Juchanakas arsusiñajja Diosamp mayamp sum apasiñatakiw yanaptʼistu

Juchachasktan ukhajja, Jehová Diosan chuymapwa ustʼaytanjja, ukatwa juparojj juchanakas yatiyañasa. Salmo 32:1-5 liytʼasajja aka toqetwa parltʼapjjäta:

• Juchanakas imtʼañat sipansa, ¿kunjamsa Jehová Diosar juchanakas arsusiñajj yanaptʼistani?

VIDEO: “Jehová Diosajj khitinakarutï munaski ukanakarojj cheqañchiwa” (3:01)

• Videon uñtktan uka Canon jilatarojja, ¿kunjamsa ancianonakajj Jehová Diosan markapar kuttʼaniñapatak yanaptʼapjjäna?

Ancianonakarojj jan kun imtʼasa qhanwa arsusiñasa, jupanakajj jiwasar yanaptʼañatak uttʼayatäpjjewa. Santiago 5:16 liytʼasajja aka toqetwa parltʼapjjäta:

• ¿Kunsa ancianonakampi yanaptʼayasiñatakejj lurañasa? ¿Kunatsa ukham amuyta?

4. Jehová Diosajj juchachasirinakat khuyaptʼayasiwa

Maynitï jachʼa juchar purtʼasisin Jehová Diosan leyinakap jan istʼañ munjjchi ukhajja, jupajj congregacionat apsutäjjañapawa, janirakiw jiwasajj jupamp chikachasjjañasäkiti. 1 Corintios 5:6, 11 liytʼasajja aka toqetwa parltʼapjjäta:

• Mä jukʼa levadurajj taqpach masaruw poqtayi. Jan arrepentisir jaqemp chikachassna ukhajja, ¿ukhamarakit congregacionar jan waltʼayaspa?

Jehová Diosajj juchachasirinakar uñjkasajja, ¿kunjamsa amuytʼasirïtapsa, khuyaptʼayasirïtapsa ukat munasirïtaps uñachtʼayi?

5. Arrepentisiñäni ukhajj Jehová Diosajj perdonistaniwa

Kunapachatï maynejj arrepentiski ukhajja, kunjamsa Jehová Diosajj jikjjatasi uk amuyañasatakejj chhaqat mä ovejatwa Jesusajj parläna. Lucas 15:1-7 liytʼasajja aka toqetwa parltʼapjjäta:

• Chhaqat mä ovejat parlki uka uñachtʼäwejja, ¿kunsa Jehová Diosat yatichistu?

Ezequiel 33:11 liytʼasajja aka toqetwa parltʼapjjäta:

• ¿Kunsa cheqpachapun arrepentisitas uñachtʼayañatakejj lurañasa?

¿KUNSA YATEQAWAYTAN?

Mä jachʼa juchar purtʼasisajj taqe chuyma arrepentisiñäni, janirak mayampis uk lurjjañäni ukhajja, Jehová Diosajj perdonistaniwa.

Amtañataki

• ¿Kunatsa Jehová Diosar juchanakas arsusiñajj wakisi?

• ¿Kunsa Diosajj juchanakas perdonañapatakejj lurañasa?

• Mä jachʼa juchar purtʼasisajja, ¿kunatsa ancianonakar yanaptʼa mayiñasa?

JUKʼAMP YATJJATAÑAMATAKI

Isaías 1:18 textorjamajja, ¿kunjamsa mä chachajj Jehová Diosan khuyapayasiñap katoqäna?

Jehová Diosan khuyapayasiñapat janipun pächasiñäniti (5:02)

Jachʼa juchar purtʼasipki ukanakarojja, ¿kunjamsa ancianonakajj yanaptʼapjje?

“Juchar purtʼasirinakarojj munasiñampi khuyapayasiñamp uñjapjjañäni” (Yatiyañataki agosto de 2024)

Juch lurasin jan arrepentisipki ukanakarojja, kunjamsa munasiñampi ukat khuyapayasiñamp uñjasiskaki uk yatjjatam.

“¿Kunjamsa congregacionat apsutäpki ukanakar yanaptʼasispa?” (Yatiyañataki agosto de 2024)

Kunjamsa mä chacharojj Diosan markapar kuttʼañapatak Jehová Diosajj yanaptʼäna uk yatiñatakejja, “Jehová Diosar kutʼjjañ wal munayäta” sat cheqwa liytʼasma.

“Bibliat yatjjatasaw nayra jakäwinakapjja jaytawayapjje” (Yatiyañataki julio-septiembre, 2012)