Kunanaksa mayninakajj sum lurapjje uk uñjañasawa
¿Kunatsa?
Jachʼa jachʼa tukuñajj mayninakar yaqhachañaruw apistaspa. Jachʼa jachʼa tukuristi wali suma jaqëkaspasa, mayninakat jilankkaspasa ukhamaw amuyasi, khitinakatï jan jupanakjamäpki ukanakarojj jiskʼachiwa. Taqeniruw ukajj pasistaspa. Encyclopædia Britannica librojj akham siwa: “Niya taqpach culturankirinakaw ‘jakäwisasa, manqʼasasa, isisitasasa, costumbrenakasasa, creencianakasasa, yaqha luräwinakasas mayni culturanakat sipans jukʼamp sumawa’ sasin amuyapjje”. ¿Jan ukham amuyañatakejj kunsa lursna?
¿Kunjamsa Bibliajj yanaptʼistaspa?
“Mayninakarojj humilde chuymamp uñjapjjam, jumanakat sipansa jilïrïpkaspas ukhama” (FILIPENSES 2:3).
¿Kunsa ukajj yatichistu? Jachʼa jachʼa jan tukuñatakejj humilde chuymanïñaw yanaptʼistani. Jiwasatï humildëñäni ukhajja, mayninakajj yaqha luräwinak jukʼamp sum lurapjjatapwa amuyañäni. Janiw mä culturajj taqe kunanpun jilankkiti.
Stefan chachat parltʼañäni, jupan markapan taqenis mä igualakiw jakasipjjerïna, ukanwa jupajj jilsuwayi. ¿Jupjam jan jakasipkäna uka markankir jaqenakar jan yaqhachañatakejj kunas yanaptʼawayi? Jupajj akham siwa: “Jan yaqhachirïñatakejja, mayninakajj jiwasat jilankkaspas ukham amuyañaw wali importantejja. Nayajj janiw taqe kunpun yatkti, mayninakat mä kun yateqañajj utjapuniwa” sasa.
¿Kunsa lursna?
Kunanaksa jan sum lurañ yatktan, kunanakansa pantjastan ukanak qhan amuyasiñasawa. Mayninakajj jiwasat sipan jukʼamp sumwa yaqha luräwinak lurañ yatipjje, uk janiw armañasäkiti. Janiw maynin jan wali jaqëtap laykukejj jupa kasta jaqenakajj taqenis ukhamäpkaspa ukham amuyañasäkiti.
Yaqha kasta jaqenakat jan wal amuyañat sipans akham jisktʼasiñasawa:
Kunanaksa mayninakajj jiwasat sipan jukʼamp sum lurañ yatipjje uk amuyasiñasawa.
¿Kunatï uka jaqet jan gustkitu ukajj cheqapunit jan walïki, jan ukajj kunarutï nayajj yatitäkta ukat mayjätap laykukich ukham amuyta?
¿Uka jaqejj kunansa nayajj pantjasta uk amuyarakispati?
¿Kunanaksa uka jaqejj nayat sipan jukʼamp sum luri?
Uka jisktʼanakar humilde chuymamp jan kʼarisis qhanañchañäni ukhajja, janiw yaqhachañajj chuymasan utj-jjaniti, kunanaksa uka jaqejj sum luri ukanak uñjasas kusisirakiñäniwa.