Walja jaqenakatakejja ikintasiñ toqet parlañajj janiw faciläkiti. Ukampis ikintasiñ toqet Bibliajj parlki ukhajja, qhana arunakampi wali respetompiw parli. Niyakejjay Bibliajj Jehová Diosat jutchejja, kuntï Bibliajj uka toqet parlki ukajj yanaptʼistaspawa. ¿Kunatsa ukham sistanjja? Jehová Diosaw jiwasarojj lurawayistu, ukatwa kunatï jiwasatakejj askïki uk jupakiw yati sasin sissna. Diosarojj kunjamsa sarnaqatasampejj kusisiysna, kunas wiñayatak kusisit jupar serviñatak yanaptʼistaspa ukanakjja jupakiw sistaspa.

1. ¿Kunjamsa ikintasiñarojj Jehová Diosajj uñji?

Ikintasiñajja casarat chacha warminakatak Jehová Diosan mä regalopawa, uka regalo toqew matrimonionakajj wawanakanïpjjaspa. Ukatjja uka regalo toqerakiw chacha warminakajj purapat munasiñ uñachtʼayasipjje. Ukatwa Diosan Arupajj akham sasin qhanañchi: “Waynäkasin casaraskta uka esposamampi kusisim” sasa (Proverbios 5:18, 19). Jehová Diosajja casado cristiano chacha warminakajj sum sarnaqapjjañapwa muni. Mä cristianojj janipuniw qʼañu jucha lurañapäkiti (Hebreos 13:4 liytʼäta).

2. ¿Kunas qʼañu juchajja?

‘Qʼañu juchan sarnaqerinakajja janiw Diosan Reinop katoqapkaniti’ sasaw Bibliajj qhanañchi (1 Corintios 6:9, 10). Biblia qellqerinakajja qʼañu juchat parlañatakejj griego arut jutki uka pornéia aru apnaqapjjäna. Uka pornéia arojja akanak lurañampi sasiwa: 1) jan casaratäkasin ikintasiña,a 2) chachapura jan ukajj warmipura ikintasiña, 3) animalanakampi qʼañunak luraña. Kunapachatï qʼañu jucha lurañar jan purtʼasktan ukhajja, Jehová Diosaruw kusisiytanjja, ukatjja jiwas pachpas sumaw jakasiraktanjja (1 Tesalonicenses 4:3).

JUKʼAMP YATJJATAÑÄNI

3. Qʼañu juchat jitheqtam

Diosat jan jitheqtiri José chachajja, qʼañu juchar jan purtʼasiñatakiw chʼamachasïna. Génesis 39:1-12 liytʼasajja aka toqetwa parltʼapjjäta:

• ¿Kunatsa José chachajj escapäna? (Génesis 39:9 uñjjattʼapjjäta).

• ¿Josean ukham luratapajj walikïnwa sasmati? ¿Kunatsa ukham amuyta?

VIDEO: Wayna tawaqonaka, qʼañu juchat jitheqtapjjam (5:06)

Jehová Diosajj qʼañu juchat jitheqtañaswa muni. 1 Corintios 6:18 liytʼasajja aka toqetwa parltʼapjjäta:

• ¿Kunjamanakatsa maynejj qʼañu jucha lurañar purtʼasispa?

• ¿Kunjamatsa jumajj qʼañu jucha lurañar jan purtʼaskasma?

4. Jumajj jan wali lurañ munañanakar atipjasmawa

VIDEO: Jan walinakar jan purtʼasiñatakejj Biblia liyiñasawa (3:02)

• Videon uñtktan uka jilatan amuyunakapasa luratanakapas jan walïtap amuyasïna ukhajja, ¿kunsa esposapar jan engañjañatakejj luräna?

Diosar taqe chuyma serviri cristianonakasa, amuyunakapan qʼomäñatakejja awisajj chʼamachasipjjañaparakiwa. ¿Qʼañu amuyunak jankʼak apanukuñatakejj kunsa jumajj lurasma? Filipenses 4:8 liytʼasajja aka toqetwa parltʼapjjäta:

• ¿Uka textorjamajj kunanakatsa lupʼiñasa?

• Jiwasatï Biblia liyiñäni Jehová Diosarus jan tiemponi serviñäni ukhajja, ¿janiw facilakejj qʼañu jucha lurañar purtʼaskañäniti sasmati? ¿Kunatsa ukham amuyta?

5. Jehová Diosan leyinakapajj yanaptʼistuwa

VIDEO: Jan amuytʼasirinakajj jan waliruw purtʼasipjje (9:31)

• ¿Kunjamsa texton parlki uka waynajj jan walir purtʼasiñampïskäna? (Proverbios 7:8, 9 uñjjattʼapjjäta).

• Proverbios 7:23, 26 textorjamajja, qʼañu jucha lurañajj sinti jan walinakanwa uñjasiyistaspa. Qʼom sarnaqañatakitï chʼamachasiñäni ukhajja, ¿kuna jan walinakansa jan uñjaskañäni?

• Qʼom sarnaqañajja, ¿kunjamsa wiñay kusisit jakasiñatakejj yanaptʼistaspa?

‘Chachapura warmipura qʼañu jucha lurañat kuntï Bibliajj siski ukajj janiw walïkiti’ sasaw yaqhepanakajj amuyapjje. Ukampis Jehová Diosajj munasiriwa, ukatwa taqe jaqenakan wiñayatak kusisit jakasipjjañap muni. Jiwasatï ukham jakasiñ munstan ukhajja, leyinakaparjamaw sarnaqañasa. 1 Corintios 6:9-11 liytʼasajja aka toqetwa parltʼapjjäta:

• ¿Diosatakejj chachapura jan ukajj warmipura jan walinak lurañ munañakit jan walïki?

Diosar kusisiyañatakejj jan walinak jaytañatakiw chʼamachasiñasa, ukajj janiw inamayäkaniti. Salmo 19:8, 11 liytʼasajja aka toqetwa parltʼapjjäta:

• ¿Qʼom sarnaqañat kuntï Diosan leyinakapajj siski ukajj jumatak walikiti? ¿Kunatsa ukham amuyta?

¿KUNSA YATEQAWAYTAN?

Ikintasiñajja casarat chacha warminakatak Jehová Diosan mä regalopawa.

Amtañataki

• ¿Kunanakas qʼañu jucha lurañ taypinki?

• ¿Kunas qʼañu juchar jan purtʼasiñatakejj yanaptʼistaspa?

• ¿Qʼom sarnaqañat kunanaktï Jehová Diosan leyinakapajj siski ukar istʼañajj kunjamsa yanaptʼistu?

JUKʼAMP YATJJATAÑAMATAKI

Chacha warmejj junto jakapjjañapatakejja, kunatsa Jehová Diosajj jupanakan casarasipjjañap muni uk yatjjatam.

“¿Qué dice la Biblia sobre vivir juntos sin estar casados?” (Artículo de jw.org)

Chachapura warmipura qʼañunak lurañ toqet kuntï Bibliajj siski ukajja, janiw jupanakar uñisiñataki yaqhachañatak chʼamañchkiti sasajj kunatsa sistan uk yatjjatam.

“¿Es malo ser homosexual?” (Artículo de jw.org)

Kuntï ikintasiñ toqet Diosan leyinakapajj siski ukajj kunjamsa jarkʼaqestu uk yatjjatam.

“¿Es el sexo oral realmente sexo?” (Artículo de jw.org)

Chachanakampi jan walinak lurasin sarnaqkäna uka chacharojja, ¿vidap cambiañatakisa Diosar kusisiykir sarnaqañatakis kunas yanaptʼäna? Jupan sarnaqäwipjja “Me trataron con dignidad” sat cheqanwa liytʼäta.

“La Biblia les cambió la vida” (La Atalaya, 1 de abril de 2011)

Yaqhep markanakanjja kusisit jakasiñatakejj maynejj casarasiñapawa sasaw sapjje. Ukampis janiw taqe casadonakajj kusisitäpkapuniti, ni taqe solteronakas llakit sarnaqapkiti. Bibliajja solteröñasa casadöñasa Jehová Diosan mä regalopawa sasaw qhanañchi.

1. ¿Kunanaksa maynejj solterökasin luraspa?

Bibliajj akham siwa: “Maynitejj casaraschi ukhajja, walïniw ukham luratapajja, ukampis maynitejj jan casaraschi ukhajja, jukʼamp walïniw ukham luratapajja” sasa (1 Corintios 7:32, 33, 38 liytʼäta). Maynitejj jan casaraschi ukhajj “jukʼamp walïniw ukham luratapajja”, ¿sasin siski uka arunakajj kamsañsa muni? Solterösipki uka cristianonakajja, janiw casadonakjamajj esposopatsa ni esposapatsa llakisipkiti. Jupanakajj jukʼamp librew jakasipjje. Yaqhep solteronakatakejja kunaymaninak lurasin Jehová Diosar serviñajj jukʼamp facilakiwa. Sañäni, suma yatiyäwinak yatiyañatakejj yaqha lugaranakaruw sarapjjaspa. Jehová Diosar jukʼamp jakʼachasiñatakis jukʼamp tiemponïpjjewa.

2. ¿Kunanaksa leyirjam casaratanakajj lurapjjaspa?

Casadonakajj solteronakjamarakiw kunaymaninak lurapjjaspa. Bibliajja “mayni sapat sipansa paniniw jukʼamp sumajja” sasaw qhanañchi (Eclesiastés 4:9). Ukjja Biblian yatichäwinakaparjam sarnaqapki uka casado chacha warminakaw qhan amuyapjje. Leyirjam casarat chacha warminakajja, munasiñataki respetasiñataki sum uñjasiñatakiw mä promesa lurapjje. Ukatwa concubinot jakasipki ukanakat sipansa casadonakajj jukʼamp sum jakasipjje, wawanakapas jukʼamp segurow jakasipjjaraki.

3. ¿Kunsa Jehová Diosajj matrimoniot amuyi?

Jehová Diosajj nayrïr chacha warmir casarkäna ukhajja, akham sänwa: ‘Chachajj awkiparus taykaparus jaytjjaniwa, ukatsti warmipampiw mayachasjjani’ sasa (Génesis 2:24). Casarat chacha warminakajja, purapat munasipjjaspa janipun jaljtapjjaspati ukwa Jehová Diosajj muni. Bibliarjamajja jupanakat maynejj adulterio jucha lurki ukhakiw divorciasipjjaspa. Adulterio juchajj utjki ukhajja, Diosajj jan juchanïki uka chacharu jan ukajj uka warmiruw divorciasiñsa jan divorciasiñsa amtjjañapatak jayti (Mateo 19:9).a Jehová Diosajja cristianonakarojj mä sapa warmimpik casaratäpjjañapwa mayi (1 Timoteo 3:2).

JUKʼAMP YATJJATAÑÄNI

4. Solterökasajj sumwa Jehová Diosar servisma

Jesusatakejja solteröñajj mä regalönwa (Mateo 19:11, 12). Mateo 4:23 liytʼasajja aka toqetwa parltʼapjjäta:

• Awkipar serviñatakisa mayninakar yanaptʼañatakisa, ¿kunsa Jesusajj solterökasin luräna?

Soltero cristianonakajja, Jesusat yateqasisin Jehová Diosar servisajj wali kusisitäpjjaspawa. VIDEO uñtasajja aka toqetwa parltʼapjjäta:

VIDEO: Cristot yateqasiri soltero jilat kullakanaka (3:14)

• ¿Kunjamsa cristianonakajj solterökasin Diosar servipjjaspa?

¿Yatiyätati?

Maynejj kuna edadarus casarasispa uk Bibliajj janiw siskiti. Ukampis casarasiñatakejja ‘qʼajjo wayna tiempo qʼajjo tawaq tiempo’ pasañapwa ewjjtʼistu, uka tiemponwa wayn tawaqonakajj maynimpi ikintasiñ wal munapjjaspa, janirakiw sum amuytʼasipkaspati (1 Corintios 7:36).

5. Khitimpis casarasïta uk sumwa ajlliñama

Maynejj khitimpis casarasini uk amtañapajj wali importantewa. Mateo 19:4-6, 9 liytʼasajja aka toqetwa parltʼapjjäta:

• Janïr casaraskasajja, ¿kunatsa mä cristianojj wali sum amuytʼasiñapa?

Mä suma espososa jan ukajj mä suma esposasa kunjam chuymanïñapasa uk yatiñatakejj Bibliaw yanaptʼistaspa. Taqe kunat sipansa, Jehová Diosar wal munaski ukampiw casarasiñasa.b 1 Corintios 7:39; 2 Corintios 6:14 liytʼasajja aka toqetwa parltʼapjjäta:

• ¿Kunatsa cheqpach cristianonakampikejj casarasiñasa?

• Jiwasatï Jehová Diosar jan munaski uka jaqemp casarasiñäni ukhajja, ¿kunjamas Diosajj jikjjatasispa?

6. Kunjamtï Diosajj matrimonior uñjki ukham uñjarakim

Nayra Israel markanjja, jupan askip thaqasakiw chachanakajj esposanakapat divorciasipjjäna. Malaquías 2:13, 14, 16 liytʼasajja aka toqetwa parltʼapjjäta:

• Adulterio jucha jan utjipan maynejj divorciaski ukhajja, ¿kunatsa Jehová Diosatakejj jan walïki?

VIDEO uñtasajja aka toqetwa parltʼapjjäta:

VIDEO: Casarasiñajj jan jaljtas sarnaqañasatakiwa (4:30)

• Esposomatï jan ukajj esposamatï Jehová Diosar jan servirïchi ukhajja, ¿kunsa chacha warmjam kusisit jakasiñatakejj lurasma?

7. Casaratäsajj Diosan leyinakaparjam sarnaqam

VIDEO: Jehová Diosajj leyiparjam sarnaqapjjañapatakiw casadonakar yanaptʼi (4:14)

Hebreos 13:4 liytʼasajja aka toqetwa parltʼapjjäta:

• ¿Matrimonio toqet kuna leyinakatï Jehová Diosan utjki ukajj jumatak walikiti? ¿Kunatsa ukham amuyta?

Jehová Diosajja casarasirinakasa, divorciasirinakasa autoridadanakan leyinakaparjam registrasipjjañapwa muni, cheqas niya aka oraqpachanwa uka toqet leyinakajj utji. Tito 3:1 liytʼasajja aka toqetwa parltʼapjjäta:

• Jumatï casaratästa ukhajja, ¿matrimoniomajj autoridadanakan leyinakaparjamati?

¿KUNSA YATEQAWAYTAN?

Solteröñasa casadöñasa Jehová Diosan mä regalopawa. Solteronakasa casadonakas Jehová Diosan munañaparjam sarnaqapjjani ukhajja, wali sumaw jakasipjjani kusisitäpjjarakiniwa.

Amtañataki

• ¿Kunjamsa maynejj solterökasin Jehová Diosar wali sum servispa?

• ¿Bibliarjamajj kunatsa cheqpach cristianompikejj casarasiñasa?

• ¿Bibliarjamajj kuna razonakis divorciasiñatak utji?

JUKʼAMP YATJJATAÑAMATAKI

¿‘Tatitun arkiripampik’ casarasiñajj kamsañsa muni?

“Preguntas de los lectores” (La Atalaya, 1 de julio de 2004)

Maynimp uñtʼasiñ toqeta casarasiñ toqet suma amtanakar puriñatakejja, aka pä sarnaqäwinakaw yanaptʼiristam.

Casarasiñatak wakichtʼasiña (11:53)

‘Kunanaktï jaytawaykta ukat sipansa jukʼamp suma regalo Jehová Diosajj churawayitu’ sasajj kunatsa mä jilatajj amuyi uka toqet yatjjatam.

Diosat yateqañapwa suyayäta (1:56)

Divorciasiña jan ukajj jaljtañ janïr amtkasajja, ¿kuna toqetsa mä cristianojj amuytʼasiñapa?

“‘Kuntï Diosajj mayachki’ uk respetompi uñjapjjañäni” (Yatiyañataki diciembre 2018)