• Jesusax Diosan amtapanxa, ¿kuna jan kikpan luräwinisa?
    Yatiyañataki 2008 | diciembre 15

    • Jilïr Sacerdote

      15. ¿Kunatsa Jesusax yaqha jilïr sacerdotenakatxa, mayjaxa?

      15 Nayrax walja jilïr sacerdotenakasay utjchïnxa, Jesusaw jan kikpani Jilïr Sacerdotexa. ¿Kunatsa ukham sistanxa? Apóstol Pablox akham sasaw qhanañchtʼi: “Janiw mayni jilïri sacerdotenakjamäkiti, ukanakasti animalanak jiwayasin sacrificionak sapüru luqtapxi, nayraqatax jupanakan pachpa juchanakapata, ukxarux jaqin juchanakapatraki. Ukampis Jesusax mä kutikiw wiñayataki jupa pachpa taqitak luqtasiwayi. Moisesan leyipax uttʼayiwa jan qʼumäpkis ukanakaru jilïri sacerdotëñapataki, ukampis Diosax juramentompix leyi qhipatxa jupan Yuqaparuw jilïri sacerdotëñapatak uttʼayi, khititix wiñayatak qʼum tukuyatäki ukaru” sasa (Heb. 7:27, 28).b

      16. ¿Kunatsa Jesusan luqtasïwipax jan kikpani?

      16 Jesusax jan juchan jaqïnwa, kunjamatï Adanax janïr juchachaskasax jan juchanïnxa ukhama (1 Cor. 15:45). Ukatpï jupakipuniw mä qʼuma, phuqat sacrificio luqtasapäna, janipuniw mayampsa ukham luqtäwix lurasxañapäkänti. Moisesax katuqkäna uka Leyirjamaxa, sapüruw sacrificiox luqtasïna. Ukampisa, uka sacrificionaka ukat kuntï sacerdotenakax lurapxäna ukaxa, kuntï Jesusax lurañapäkäna ukan chʼiwipäkaspas ukhamänwa (Heb. 8:5; 10:1). Jesusan jakäwip luqtasïwipatxa wali askinakwa jikxattanxa, ukatwa jan kikpani Jilïr Sacerdotexa.