• Jumajj Jehová Diosan amigopäsmawa
    ¡Wiñayatakiw kusisit jakasisma! Bibliat yateqañataki

    • Jumajj Jehová Diosan amigopäsmawa

      Jehová Diosajj jupar sum uñtʼañamwa muni. ¿Kunatsa ukham sistanjja? Diosajj kunjam chuymanisa, kunjamsa jaqenakar uñji, kunjam jakasiñassa muni ukanak yateqasin jupan amigopäñ wal munasma ukwa muni. Ukampis ¿cheqapunit Diosan amigopäsma? (Salmo 25:14 liytʼäta). ¿Diosan amigopäñatakejj kun lurañamas wakisispa? Uka jisktʼanakarojj Bibliaw qhanañchi, Diosan amigopäñajj kunatsa wali importantejja uksa qhanañcharakiwa.

      1. ¿Kun lurañamsa Jehová Diosajj muni?

      “Diosar jakʼachasipjjam, jupajj jumanakar jakʼachasirakiniwa” (Santiago 4:8). Uka arunakajj ¿kamsañsa muni? Jehová Diosajj jupan amigopäsma ukwa muni. ‘Niyakejjay Diosar jan uñjkstantejja, janiw Diosan amigopäñ puedksnati’ sasaw yaqhepanakajj amuyapjje. Ukampis jupar jakʼachasiñatakejj Jehová Diosajj Biblia churawayistu, uka toqew jupajj kunjam chuymanisa uk yatiyistu. Jehová Diosarojj janiw uñjañ puedktanti, ukampis kuntï jupajj Biblia toqe yatichkistu uk liytʼktan ukhajja, jupampejj jukʼamp sumwa apastanjja.

      2. ¿Kunatsa Jehová Diosjam yaqha amigojj jan utjkaspa?

      Janiw khitis Jehová Diosjamajj munaskiristamti. Jupajj kusisit jakasiñamwa muni, yanaptʼa munkäta ukhajj jupar yanaptʼa mayisiñamwa munaraki. Jumajj ‘taqe llakinakam jupan amparaparuw katuyasma, jupajj jumat wal llakisi’ (1 Pedro 5:7). Jehová Diosajj amigonakapar yanaptʼañatakisa, chuymachtʼañatakisa, jupanakar istʼañatakis jankʼakiwa (Salmo 94:18, 19 liytʼäta).

      3. ¿Jehová Diosajj amigonakapan kun lurapjjañapsa suyi?

      Jehová Diosajj taqe jaqenakaruw munasi, “ukampis cheqap sarnaqer jaqenakan suma amigopawa” (Proverbios 3:32). Amigonakapajj kunanakatï jupatakejj walïki uk lurapjjañapwa Jehová Diosajj muni, kunanakatï jupatakejj jan walïki uk jan lurapjjañapwa munaraki. Inas yaqhepajj kunanaktï Diosajj maykistu ukanak janiw phoqkiristti sasin amuyapjjchispa. Ukampis Diosajj kuntï lurirjamäktan uk sum amuyi, khitinakatï jupar taqe chuym munasipki, jupar kusisiyañatakis wal chʼamachasipki ukanakarojj amigoparjamaw katoqaraki (Salmo 147:11; Hechos 10:34, 35).

      JUKʼAMP YATJJATAÑÄNI

      Kunjamatsa Jehová Diosan amigopäsna, kunatsa Jehová Diosjam yaqha amigojj janiw utjkaspati sasin sissna ukanakatwa jichhajj yatjjatañäni.

      4. Abrahán chachajj Diosan amigopänwa

      Bibliajja Abrahán chachatwa parli (jupajj Abrán satarakiwa), uka sarnaqäwiw Jehová Diosan amigopäñatakejj kunjam jaqëñasasa uk uñachtʼayistu. Abrahán chachat parliri Génesis 12:1-4 liytʼasajja aka toqetwa parltʼapjjäta:

      • ¿Kunsa Jehová Diosajj Abrahanar mayïna?

      • ¿Kuna promessa Jehová Diosajj Abrahanar arsüna?

      • ¿Kuntï Jehová Diosajj siskäna uk istʼasajj kunsa Abrahanajj luräna?

      5. ¿Amigonakapan kun lurapjjañapsa Jehová Diosajj muni?

      Amigonakasan jiwas layku kun lurapjjañapsa suyapuntanwa.

      • ¿Amigonakaman juma layku kun lurapjjañapsa suyta?

      1 Juan 5:3 liytʼasajja aka toqetwa parltʼapjjäta:

      • ¿Jehová Diosajj amigonakapan kun lurapjjañapsa muni?

      Jehová Diosar istʼañatakejja, inas jan walinak apanukuñasasa jan ukajj kunjam chuymanïtansa ukanak cambiañasas wakischini. Isaías 48:17, 18 liytʼasajja aka toqetwa parltʼapjjäta:

      • ¿Kunatsa Jehová Diosajj amigonakapan cambionak lurapjjañap muni?

      Utanak lurir mä chachaw trabajir masiparojj mä casco churaski.

      Mä suma amigojja jan walinakan jan uñjasiñatakisa, sum jakasiñatakis kunanaksa lurañasa ukanakwa amtayistu. Jehová Diosajj ukhamarakiw amigonakapar amtayi.

      6. ¿Kunsa Jehová Diosajj amigonakap layku luri?

      Jehová Diosajj jan walinakar saykatapjjañapatakiw amigonakapar yanaptʼi. VIDEO uñtasajja aka toqetwa parltʼapjjäta:

      VIDEO: Jehová Diosaw yanaptʼawayitu (3:20)

      • Uñjawayktan uka videorjamajja, ¿kunjamsa Jehová Diosajj wali aynachtʼatäkäna uka warmir yanaptʼäna?

      Isaías 41:10, 13 liytʼasajja aka toqetwa parltʼapjjäta:

      • ¿Jehová Diosajj amigonakap laykojj kun lurañsa arsuwayi?

      • ¿Jehová Diosajj suma amigosäspati? ¿Kunatsa ukham amuyta?

      Kunjamsa amigonakajj yanaptʼasipjje ukaw dibujonakan uñjasi: 1) Mä chachaw yaqha chachar mesa aptañ yanaptʼaski. 2) Mä warmiw amigapar llakinakap cuenttʼaski. 3) Muletani mä chacharuw amigopajj yanaptʼaski.

      Cheqpach amigonakasajj jan walinakan uñjasktan ukhajj yanaptʼapjjapunistuwa. Jehová Diosajj ukhamarakiw jumar yanaptʼätam.

      7. Jehová Diosan amigopäñatakejj jupampejj parltʼasiñasapuniwa, juparus istʼañasarakiwa

      Amigonakasampi parltʼastan ukhajja, jupanakampejj jukʼamp sumaw apastanjja. Salmo 86:6, 11 liytʼasajja aka toqetwa parltʼapjjäta:

      • ¿Kunjamatsa Jehová Diosamp parltʼassna?

      • ¿Kuna toqes Jehová Diosajj jiwasar parlistu?

      Dibujonaka: 1) Mä warmiw orasiski. Pʼeqep alayansti mä flechaw uñsti, uka flechajj alayaruw wikuchaski. 2) Mä warmiw Biblia liyiski. Pʼeqep alayansti mä flechaw uñsti, uka flechajj aynacharuw wikuchaski.

      Jiwasajj oración toqew Jehová Diosamp parltanjja, jupajj Biblia toqew jiwasar parlarakistu.

      YAQHEPANAKAJJ AKHAM SAPJJEWA: “Janiw khitis Diosan amigopäkaspati” sasa.

      • Jehová Diosan amigopäsnawa sañatakejja, ¿Biblian kawkïr textopsa mayninakar uñachtʼayasma?

      ¿KUNSA YATEQAWAYTAN?

      Jehová Diosajj amigomäñwa muni, jupar jakʼachasiñamatakejj yanaptʼarakïtamwa.

      Amtañataki

      • ¿Kunjamsa Jehová Diosajj amigonakapar yanaptʼi?

      • ¿Kunatsa Jehová Diosajj amigonakapan cambionak lurapjjañap muni?

      • ¿Jehová Diosan amigopäñajj wali chʼamäkaspas ukhamti jumajj amuyta? ¿Kunatsa ukham sista?

      Ak lurañ amtam

      JUKʼAMP YATJJATAÑAMATAKI

      ¿Diosan amigopäñajj kunjamsa yanaptʼiristam?

      “Jehová, un Dios que vale la pena conocer” (La Atalaya, 15 de febrero de 2003)

      Diosamp suma amigöñatak chʼamachasim.

      “¿Kunjamatsa Diosan amigopïristjja?” (Kunsa wayn tawaqunakax yatiñ munapxi payïr libro, 35 yatichäwi)

      Kunatsa mä warmejj Jehová Diosan amigopäñaw jiwañat salvitu sasin säna uk yatjjatam.

      “Janiw jiwañ munkayätti” (Yatiyañataki mayïri 2017)

      Kunsa yaqhep qʼajjo wayn tawaqonakajj Jehová Diosat amuyapjje uk videon uñtam.

      ¿Diosan amigopäñajj kamsañsa muni? (1:46)