“Jehová Diosajj janiw nayat armaskitänti”

NAYRA JAKÄWIJA:

Bilbao markanwa nasiwayta, uka markajj janiw sinti qamirïkiti ukat España markat alay toqenkiwa. Pusi kullakäpjjtwa, nayajj payirïkis ukätwa. Familiajan taqe chuymaw Católica Iglesiar sarapjjayäta, sapüruw misar sarapjjayäta. Ukat 23 maranïkayäta ukhajj yatichirëjjayätwa. Uk lurañajj wali askïnwa ukat 40 maranakaw yatichawayta. Kuntï yatichkayäta ukanakatjja, Religión toqetwa yaticharakiyäta, ukajj nayatakejj wali askipunïnwa. Jaypʼunakajja, imill wawanakaruw primera comunión lurañapjjañapatak catequistjam yanaptʼayäta.

Ukatjja, 12 maranak jaqechatäjjapjjayät ukhaw chachajajj jiwjjäna ukat sapäjakiw pusi phuchanakajar uywjjayäta. Ukhajj 33 maranïskayätwa. Religionajans chuymachtʼäwi jikjjatañ munkchiyätjja, janiw aka jisktʼanakajar qhanañchapkitänti: ‘Jesusatï jiwas layku jiwawaychejja, ¿kunatsa jiwañajj utjaskaki? Suma jaqenakatï alajjpachar sarapjjchejja, ¿kunatsa Diosan Reinop jutañap mayiskaktanjja? Ukat jiwktan ukhatï Diosajj taripchistojja, ¿kunatsa juicio urupatakejj alajjpachata, purgatoriota jan ukajj infiernot kuttʼaniñasa?’

Walja tatakuranakaruw ukham jisktʼta. Ukat maynïrejj akham situwa: “Janiw yatkti. Obisporuy jisktʼamjja. Ukampis kunatakis ukanak yatiñ munta. Diosarojj iyawstay ¿janicha?” sasa. Jisktʼanakajan qhanañchäwip thaqhaskakiyätwa, ukatwa jesuitas, pentecostales ukat gnósticos uka iglesianakar sarta, ukampis kuntï sapkitäna ukajj janiw chuymar purtʼkitänti.

KUNJAMSA BIBLIAJJ YANAPTʼAWAYITU:

Ukat 60 jila maranakanïkayäta ukhaw 7 marani mä yateqerijajj Jehová Diosan Qhanañchirinakapan mä tantachäwipar invittʼitu. Ukat kuntï ukan uñjaniwaykta ukat istʼaniwaykta ukajj wali askïkchïnsa, jan tiemponikiw sarnaqayäta ukat janiw mayampis jupanakamp jikisjjayätti. Pä mara qhepatjja, Jehová Diosan Qhanañchirinakapat Juan ukat Maite sat mä chacha warmiw visittʼapjjetu, ukat kimsa phajjsiw jisktʼanakajar qhanañchasipkitäna ukat qhepatwa Bibliat yateqañ qalltapjjta.

¡Jehová Diosan Qhanañchirinakapajj Bibliat yatichir jutapjjañap walpun suyayäta! Kuntï yatichapkitäna ukajj cheqati janicha uk yatiñatakejja, kimsa kasta Bibliampiw sum yatjjatayäta. Ukhamatwa kuntï nayrajj mara maranak yateqkayäta ukajj kʼarïtap amuyjjayäta. Kuntï Bibliajj siski ukat kuntï amuykayäta ukampejj janiw pachpäkänti uk amuyasajj wal muspharayäta. Ukat llakitarakiw jikjjatasiyäta, kuntï nayrajj yateqkayäta ukajj mä jachʼa qoqar uñtatäkaspasa ukat saphitpachsa jikʼskirista ukhamwa amuyasiyäta.

Uka qhepatjja, mayampi casaraskta uka chachajarakiw usuntasin jiwjjäna. Uka tiempotakejja, jubilasjjayätwa ukat Bilbao sat markat yaqha cheqaruw sarjjayäta. Juan ukat Maite chacha warmejj ukhamarakiw yaqha cheqar sarjjapjjäna. Janiw Bibliat yatjjatjjayätti, ukampis kuntï yateqawayta ukjja qorïkaspas ukhamwa uñjayäta ukat janirakiw armaskayätti.

Niya 20 maranak qhepatwa, kunapachatï 82 maranëjjayäta ukhaw Juan ukat Maite chacha warmejj Bilbao markar kuttʼanisin wasitat visittʼapjjetäna. ¡Jupanakar uñjasajj walpun kusisiyäta! Jehová Diosajj janiw nayat armaskitänti ukwa amuyasiyäta, ukatwa Bibliat wasitat yatjjatañ qalltawayta. Jupanakajj wali paciencianïpjjänwa, sapa kutiw pachpa jisktʼanak jisktʼirïta. Kuntï Bibliajj qhanañchi uk kutin kutinwa istʼañ munirïta, ukhamat nayra amuyunakaj chuymat apsuñataki. Ukat kunjamsa familiaranakajaru ukat amigonakajar kunatï cheqäki uk qhanañchirista ukwa yatiñ munarakiyäta.

Ukat 87 maranïkayät ukhaw Jehová Diosan Qhanañchirinakapan mä jachʼa tantachäwipan bautisasjjta. Uka urojj wali kusisitapuniyätwa. Bautisasirinakajj mä wakiskir arstʼäwi istʼapjjta. Ukat kuntï arstʼirejj siskän ukajj walpun chuym chʼalljjtayitu, Jehová Diosas parlkitaspa ukhamänwa. Bautisasjjta ukhajja, janis uñtʼapkchitänjja, waljaniw walik bautisasjjtajja sasin sapjjetäna.

WALJA BENDICIONANAKWA KATOQAWAYTA:

Jesusajj thakïtapjja, yatipuniyätwa (Juan 14:6). Ukampis Bibliat yatjjatañaw Jehová Diosaru sum uñtʼañ yanaptʼawayitu, Juparuw Jesusajj irpistu. Jichhajja, Awkijarjama ukat Amigojarjamaw Jehová Diosarojj oracionan jakʼachasta. Jehová Diosar jakʼachasipjjañänia sat libro liyiñaw jakäwijan yanaptʼawayitu. Nayrïr kuti liytʼkta ukhajja, mä arumanakwa liyiñ tukuyta. Jehová Diosajj kunja khuyapayasiris uk yatiñajj walpun chuym chʼalljjtayitu.

Walja tiempow Biblian cheqa yatichäwinakap thaqkta uka toqet lupʼisajja, Jesusan aka arunakapatwa amtasta: “Mayipjjam, Diosajj churapjjätamwa; thaqapjjam, jikjjatapjjarakïtawa; punksa leqtʼapjjam, jistʼaratäpjjarakïtawa” sasa (Mateo 7:7). Kunanaktï wal yatiñ munkayäta uk yatjjatasajja, yaqhanakaruw yatiyta ukat ukham lurasajj wali kusisitätwa.

Jichhajj 90 maranakanëjjstsa, waljaw Jehová Diosat yatjjatañajäski. Sapa kuti Tantachasiñ Utar sarkta ukhajj wali askinakwa yateqta ukat jilat kullakanakampïsajj kusisitarakïtwa. Aka Oraqejj Paraisor tukuyatäjjani ukhajj wasitatwa yatichirïñ munta (Apocalipsis 21:3, 4). Ukat sipansa, jiwatäjjapjje uka munat familiaranakajaru ukat amigonakajaruw wasitat uñjañ munta. Jupanakarus ukhamarakiw kunatï cheqäki uk yatichañ munta ukat kuna bendicionsa Jehová Diosajj churawayitu uks cuenttʼañ munarakta (Hechos 24:15).