Jumajj ¿kunsa Supayat amuyarakta? Akjjar qhanañchaski ukanakat ¿kawkïris jumatak cheqjamajja?

• Supayajj janiw utjkiti, jan wali utjki ukakiwa.

• Supayajj utjiwa, ukampis janiw jaqenakar kuns kamachkiti.

• Supayajj wali chʼaman mä ajayuwa, jaqenakarojj munañaparjamaw apnaqe.

Waljaniw ukham mayj mayja amuyapjje. Ukampis uka amuyunakat ¿kawkïris cheqäpacha? ¿Uk yatiñajj wakisipuniti? Supayatï jan utjkchi ukhajja, utjatap creyipki ukanakajj pantjatäsipkiwa. Utjchi ukat jaqenakar jan kuns kamachkchi ukhajja, jupar ajjsaririnakajj inamayakiw ajjsarasipki. Ukampis Supayatï utjchi ukat jaqenakar munañaparjam apnaqañ munchi ukhajja, ¿janit jupat jukʼampi amuyasiñajj wakiskaspa?

¿Supayajj jan wali utjki ukakïpachati, jan ukajj cheqapunich utjpacha? Utjchi ukhajja, ¿jan walir puriyiristamti? Ukhamächejja, ¿kunjamatsa jarkʼaqasisma? Uka toqet Bibliajj kamsisa uk yatjjatañäni.

Biblian Supayat parlki ukajja, mä jan walikïkaspas ukham waljanejj amuyapjje. Ukatï cheqäspajja, ¿kunatsa Jesusampis Diosampis parlänwa sasin Bibliajj sispacha? Uka toqet jukʼamp yatjjatañäni.

SUPAYAJJ JESUSAMPIW PARLÄNA

Jesusajj bautisasjjän uka qhepatjja, kimsa kutiw Supayajj yantʼäna. Nayraqatjja, Diosat katoqkäna uka chʼamampejj qalanak tʼantʼar tukuyañapatakiw chʼamañchäna, ukhamat askipak thaqhañapataki. Ukjjarojj jaqenakampi jachʼañchayasiñapatakejja, jakäwip aptʼasirjam lurañapatakiw yantʼarakïna. Ukjjarusti, yupaychayasiñ laykojj taqe markanakwa apnaqañapatak churañ munarakïna. Ukampis Jesusajj uka kimsa yantʼanakarojj saykatänwa, sapa yantʼatakejj Qollan Qellqatat aytäna (Mateo 4:1-11; Lucas 4:1-13).

¿Khitimpis Jesusajj parlaskäna? ¿Chuymapan jan wali utjki ukampit parlaskäna? Janiw ukhamäkänti. Jupajj jiwasjamas yantʼat uñjaskchïnjja, ‘janipuniw juchar purkänti’ sasaw Bibliajj qhanañchi (Hebreos 4:15). “Jupajj janiw kuna juchsa lurkänti, janirakiw khitirus kunapachas ñanqha lurkänti” sasaw Bibliajj jupat saraki (1 Pedro 2:22). Jesusajj jan pantjasirïnwa, Diosarus jan jitheqtasaw servïna, janirakiw chuymapan kuna jan walis utjkänti. Ukhamajja, janiw jupa pachpampi parlkaspänti, maynimpiw parlaskäna.

Cheqas janiw ukakejj Supayan utjatap uñachtʼaykiti. ¿Kunatsa ukham sistanjja?

• Amtañäni, Supayajj yupaychayasiñ laykojj taqe markanak apnaqañapatakiw Jesusar churañ munäna (Mateo 4:8, 9). Supayatï jan utjkaspa ukhajja, uka arunakajj janirakiw cheqäkaspati. Ukat Jesusajj Supayan wali chʼamanïtap yatirakïnwa.

• Jesusampi parlañ tukuyjjäna ukhajja, Supayajj sarawayjjasin “mä wakisiri urkamaw” suytʼäna (Lucas 4:13, MT). Aleq jan walikïspajja janiw uk lurkaspati. Supayajj cheqapuniw utjaski.

• Mateo 4:11 qellqatanjja, ‘angelanakaw jutasin Jesusarojj yanaptʼapjjäna’ sasaw qhanañchi. Uka angelanakajj cheqapuniw utjaskäna. Ukhamajj ¿kunataraki Supayajj janiw utjkiti sisnasti?

SUPAYAJJ DIOSAMPIW PARLÄNA

Jichhajj Job chachan sarnaqäwipat yatjjatarakiñäni, jupajj Diosan serviripänwa, uka sarnaqäwirjamajj Supayajj pä kutiw Diosamp parläna. ‘Job chachajj taqe chuymaw Nayar servitu’ sasaw Diosajj Supayar säna. Supayasti, Job chacharojj Diosat sipan jukʼamp sumsa uñtʼkaspa ukhamwa parlarakïna. ‘Jumajj taqe kun churta, uka laykukiw jan jitheqtas yupaychtamjja’ sasaw Job chachat säna. Uk satajja, ‘kuntï Job chachar lurañ munkta uk luraskakim’ sasaw Jehová Diosajj Supayar säna.a Qhepatjja, Supayan kʼarïtapajj qhanstjjänwa. Ukat Diosajj Job chacharojj ukham aguantatapat wal bendicïna (Job 1:6-12; 2:1-7).

¿Jehová Diosajj chuymapan jan wali utjki ukampit parlaskäna? Janiwa, Bibliasti Jupat akham siwa: “Thakipajj cheqapawa” sasa (2 Samuel 22:31). Ukatjja, “qollana, qollana, qollana, Taqe chʼamani [Jehová] Dios Tata” sasaw qhanañcharaki (Apocalipsis 4:8). Qollana, siski uka arojja, qʼoma, jan juchampi qʼañuchata sañwa muni. Niyakejjay Jehová Diosajj qollanächejja, janipuniw Jupan kuna jan walis utjkaspati.

Job chachajj janiw utjkänti, Supayajj Diosampiw parläna sasin Bibliajj qhanañchi ukajj janiw cheqäkiti sasaw yaqhepanakajj sapjje. ¿Ukajj cheqäpachati? Janiwa, Job chachajj utjapunïnwa sasin Biblia pachpan yaqha cheqanakan qhanañchi. Santiago 5:7-11 qellqatanjja, cristianonakarojj yantʼanak aguantapjjañapatakejj Job chachat yateqasipjjañapatakiw chʼamañchi, ukhamat Jehová Diosat bendición katoqapjjañapataki. Job chachasa, Supayan yantʼatapas jan cheqäkaspa ukhajja, uka qellqatajj inamayakïspawa. Maysa toqetjja, Ezequiel 14:14, 20 qellqatanjja, Diosar loqtir kimsa chachanakatwa parlaraki. Ukanakat paninejj Noé ukat Daniel chachanakänwa, jupanakajj cheqapuniw utjapjjäna. Maynïristi Job chacharakïnwa, ukhamajja jupas utjarakïnwa. Jupatï utjchïnjja, tʼaqhesiykäna uka uñisiripajj utjarakpachänwa.

Ukhamajj Biblian qhanañchäwiparjamajj Supayajj utjapuniwa sasaw sissna. Ukatwa akham jisktʼassna: “¿Familiajarus nayarus aynachtʼayitaspati?” sasa.

¿KUNSA SUPAYAJJ LURASKI?

Jan walinak lurir walja jaqenakas markamar purkaspa ukham amuytʼañäni. ¿Kunas pasaspa? Ajjsarayasiñakiw utj-jjaspa ukat jaqenakas jan walinakwa lurjjapjjaspa. Jichhajj Supayampi ukat sajjranakapampis (jupanakajj Dios contra saytʼapkäna uka angelanakäpjjewa) jiwasanakamp chikäkaspa ukham amuytʼarakiñäni. ¿Kunas pasarakispa? Ukatakejj kunanakatï radionsa, televisionansa istʼktan ukanakat amuytʼañäni:

• Jan walinaka chhaqtayañatak walsa chʼamachasipkchejja, sapürutjamaw jiljjattaski.

• Anatañanakasa, videonakasa, musicanakasa, layqasiñ toqerukiw chʼamañchjje, inamayaw awk taykanakas llakisisipki.

• Oraqe, uma, samana jan qʼañuchañatakis chʼamachasipkchejja, jukʼampikiw jan waltʼayasipki.

• ¿Mä jan uñjkay chʼamas jaqenakar jan wali lurañar nuktʼkaspa ukhamajjaya?

Taqe uka jan walinakjja, mayniw utjayi sasaw Bibliajj qhanañchi ukat khitis jupajja uksa yatiyarakistuwa, akham sasa: “Uka dragonajj jaqonukutäjjänwa alajjpachatjja. Uka dragonapï nayrapacha uka jachʼa katarïnjja, ukasti Supaya, Satanás satarakiwa, juparakiw aka oraqen jaqenakarojj wali sallqjañanak luri. Jupampi angelanakapampisti aka oraqeru jaqtanitäjjapjjänwa. [...] Ukampis, ¡wali llakisiñarakiw oraqen ukhamarak qotan utjirinakatakejja! Supayasti jumanakan ukaruw wali colerat juti, tiempopan jukʼakïtapa yatisina” sasa (Apocalipsis 12:9, 12). Taqe ukanak yatjjatasajja, mä jan wali ajayuwa, mä arunjja, Supayaw akapacha apnaqaski sasaw waljanejj amuyapjje.

Cheqas taqeniw jupat jarkʼaqasiñ muntanjja. ¿Kunjams uk lursna? Akjjar jutki uka yatichäwinwa uka jisktʼarojj qhanañchasiskani.

Supayajj uka jan wali samanar uñtasitarakiwa, jan uñjkayawa ukat jaqenakajj jan amuykayakiw munañaparjam sarnaqjjapjjaspa. Ukampis janiw jupar ajjsarañasäkiti, Jehová Diosajj walja yanaptʼanakwa churistu. Ukanakat mä qawqha jichhajj uñjañäni.

Jiwasaw kuns ajllsna. Santiago 4:7 qellqatajj akham siwa: “Supayatakisti saytʼasipjjarakim, uka Supayasti jumanakatjja jaltawayjjarakiniwa” sasa. Supayajj wali chʼamanïkchisa, kuntï jan munktan ukjja, janiw munkir jan munkir luraykistaspati. Kunsa lurañäni ukajj jiwasatäjjewa. 1 Pedro 5:9 qellqatanjja “wal saytʼasipjjam iyawsañanakamanjja” sasaw ewjjtʼistu, ukham lurañäni ukhajja, jupajj janiw kuns lurjjestaniti. Jesusajj Supayan kimspach yantʼanakaparuw saykatäna, ukat jupajj janiw kuns kamachjjänti (Mateo 4:11). Jiwasajj ukhamarakiw lursna.

Diosan amigopäsnawa. Santiago 4:8 qellqatajj “Diosar jakʼachasipjjam” sasaw chʼamañchistu. Ukjja, Jehová Dios pachpaw amigopäñasatak invittʼistu. ¿Kunjamatsa amigopäsna? Kuntï Bibliajj Jupat yatichki taqe ukanakwa yatjjatañasa (Juan 17:3). Diosat jukʼamp yatjjataskakiñänejja, Juparojj jukʼampiw munasiñäni. Jukʼamp munasiñänejja, jukʼampiw serviñ munarakiñäni (1 Juan 5:3). Ukham chʼamachasiñänejja, ¿kunsa Jupajj lurani? Santiago qellqatajj akham tuktʼayi: “Jupasti jumanakarojj jakʼachasirakiniwa” sasa.

Diosaw imantasiñasajja. Proverbios 18:10 qellqatajj akham siwa: “[Jehová] Tatitun sutipajj imantasiña jachʼa torrer uñtatawa, aski jaqenakajj jupan ukar imantasiñataki jutapki ukanakatakejja” sasa. Ukhamajja Diosan sutipajj janiw jan walinakat jarkʼaqasiñatak mä kunäkaspas ukham aytasiñatakïkiti. Jan ukasti uka suti respetirinakajja, yanaptʼa munapki ukhajj kunapachas Diosar jakʼachasipjjakispawa.

Biblianwa yanaptʼa jikjjataraksna. Hechos 19:19 qellqatanjja mä yateqaskay uñachtʼäwiw utji. Ukanjja, Éfeso markankir mä qawqha jaqenakajj cristianojjapjjäna ukhajj kunsa lurapjjäna ukjja akham qhanañchi: “Layqäpkäna ukanakajja libronakap apanisinwa taqenin nayraqatapan ninar phichantapjje. Uka libronakasti wali jila alanïnwa. [...] ‘Alapajj mä phesqa tunk waranq qollqjamä[nwa]’”.a Uka cristianonakajja layqasiñatak utjkäna taqe ukanakjja wali jila alanïkchïnsa phichantapjjänwa. Ukajj jiwasatak yateqaskayawa. Jichhürunjja akapachajj layqasiñanakampi phoqantatawa. Kuna lurañanakasa, yänakasa, sumäkaspas ukhamäspawa, ukampis ukanakan layqasiñajj utjapuniwa, ukat sajjranakarus jawsarakispawa. Ukhamajja, taqe ukanakat jitheqtañasapuniwa (Deuteronomio 18:10-12).

Qalltan parlaniwayktan uka Rogelio chachajja, 50 maranëjjäna ukhaw Supayan utjatap amuyjjäna. ¿Kunas yanaptʼäna? Jupajj akham siwa: “Janiw Biblianikayätti, jichhajj Biblianëjjtwa, ukan liytʼasaw Supayajj cheqapun utjatap amuyta. Uk yatiñaw jupat jarkʼaqasiñatak yanaptʼawayitu” sasa.

Jutïr pachan Supayajj jan utj-jjani ukhajja, wali sumwa jakasjjañäni. Supayajj walja jaqenakaruw sallqjaski, ukatsti niyaw ‘nina azufre qotaru jaqontatäni’ sasaw Bibliajj qhanañchi (Apocalipsis 20:10). Ukampis ninasa azufresa janiw mä ajayurojj kuns kamachkaspati, ukhamajj uka qotajj janiw cheqpach nina qotäkiti, jan ukasti wiñayatak tʼunjaña sañwa muni. Ukhamajja, Supayajj wiñayatakiw jiwayatäni. ¡Jehová Diosan loqtirinakapatakejj wali kusiskañapunïniwa!

Uka uru puriniñapkamajja, Jehová Diosatsa ukat amtanakapatsa yateqaskakiñasawa.b Ukhamtï lurañänejja, taqe chuymaw mä urojj akham sañäni “¡Supayajj janiw utj-jjeti!” sasa.