Janiw jupanakakejj ukham amuyapkiti, jan ukasti oraqpachanjja waljaniw ukham amuyapjjaraki. Jumasti, ¿Diosajj amigojaw sarakismati? ¿Amigopäñ munarakismati, jan ukajj Jupar jukʼamp jakʼachasiskakiñ munasmati? Inas akham jisktʼassta: “¿Kunjamaraki nayjam aleq jaqekisti Taqe Chʼamani Diosan amigopäspasti?” sasa.

DIOSAN AMIGOPÄSNAWA

Bibliajja, Diosan amigopäsnawa siwa. Sañäni, Isaías 41:8 qellqatarjamajja, Diosajj ‘nayan munat amigoja’ sasaw Abraham chacharojj säna. Ukat Santiago 4:8 qellqatanjja, mä suma invitacionaw utjaraki. Ukanjja akham siwa: “Diosar jakʼachasipjjam, jupasti jumanakarojj jakʼachasirakiniwa” sasa. Ukhamasti Diosan amigopäsnawa. Ukampis janiw Juparojj uñjktanti, ukhamajj ¿kunjamaraki jakʼachassnasti?

Uka jisktʼar qhanañchañatakejja, kunjamatsa pä jan uñtʼatanakajj suma amigor tukupjje uka toqet amuytʼañäni. Jupanakajj nayraqatjja, sutipwa yatiyasipjje. Jikisisipkakini ukhajja, amuyunakapatsa, kunjamsa jikjjatasipjje ukanakat parltʼasipjjani, ukham lurasajj jukʼamp sumwa uñtʼasipjjani. Ukat purapat yanaptʼasipjjani ukhajja, suma amigojjapjjaniwa. Diosampi amigoñatakejja niya ukhamarakiwa. Uka toqet jukʼamp uñjaskakiñäni.

Mä munat amigoman sutip jan yatkasma ukhajj ¿walïspati? Janiwa. Uka toqet parlkasajja, Bulgaria markan jakasir Irina warmejj akham sänwa: “Diosan sutip jan yatksna ukhajja, janiw amigopäksnati” sasa. Kunjamtï qalltan yatjjataniwayktanjja, Diosajj Jupar jakʼachasiñaswa muni. Ukatwa Biblian akham sistu: “Nayätwa [Jehová] Tatitojj, ukarakiw sutejjajja” sasa (Isaías 42:8).a

¿Cheqapunit Diosajj sutip yatiñasa ukat aytañas munpacha? Aka toqet amuytʼañäni. Hebreo arut pusi letranakani (Tetragrámaton) Diosan sutipajja, niya 7.000 kutiw nayra Hebreo Arut Qollan Qellqatanakan uñsti, uka qellqatanakajj Antiguo Testamento sasin uñtʼatarakiwa. Diosan sutipajja, taqe sutit sipansa walja kutiw Biblian uñsti. Ukhamajja, Diosajj Jupan sutip yatiñasa ukat aytasiñaswa muni.b

Niyakejjay Diosajj qollana ukat taqe chʼamanïchejja, ‘janiw sutip aytañasäkiti, aytasajj janis uka sutir respetksna ukhamäspawa’ sasaw waljanejj sapjje. Ukajj ukhamäspawa, mä munat amigosan sutip jan walitak aytsna ukhajja, janiw walïkaspati, Diosan sutipampejj ukhamarakiwa. Ukampis Diosajj sutip jachʼañchsna, jaqe masisarus uñtʼaysna ukwa muni (Salmo 69:30, 31; 96:2, 8). Amtañäni, Jesusajj akham mayisipjjäta sasaw arkirinakapar yatichäna: “Alajjpachankir nanakan Awkejja, sutimajj jachʼañchatäpan” sasa. ¿Kunjamsa uka sut jachʼañchsna? Jaqenakar uñtʼayasa. Ukham lurasajja, Juparojj jukʼampiw jakʼachasiñäni (Mateo 6:9).

‘Diosat jan armasipki ukanakan’ oracionanakapjja, Jupajj istʼiwa sasaw Bibliajj yatichi (Malaquías 3:16). Uka suti munasirinakarojj Jehová Diosajj akham siwa: “Nayar munasitap laykusti, juparojj qhespiyäwa, nayar uñtʼatap laykusti, juparojj imarakïwa. Nayar artʼasitan ukapachajja, mayisitaparojj jaysäwa. Jupamp chikaw tʼaqhesiñankä, llakisiñat irpsü” sasa (Salmo 91:14, 15). Ukhamajja, Diosan amigopäñatakejj sutip yatiñasa ukat aytasiñasa wakiskiripuniwa.

Suma amigonakajja, carta, correo, jan ukajj teléfono toqesa parltʼasipjjapuniwa. Diosamp amigoñasatakejj ukhamarakiwa, Jupampejj parlasiñasapuniwa. Ukampis ¿kunjamsa Diosamp parlassna?

Oración toqew Jupamp parlsna. Diosampi parlañajj janiw jaqe masisamp parlktan ukhamäkiti. Oración mayisisajja, Taqe Chʼamani ukat taqe kun Luriri Diosampiw parlasktanjja, ukhamajj wali respetompiw jakʼachasiñasa, uk janipuniw armasiñasäkiti. Ukampis istʼayasiñatakejj mayitanakapar phoqañasawa. Ukanakat kimsa uñjañäni.

Nayraqatjja, Jehová Dios saparukiw mayisiñasa, janiw Jesusarusa ni “santonakarus” mayisiñasäkiti (Éxodo 20:4, 5). Bibliajj uka toqet akham sasaw qhanañchi: “Jan jumanakajj kunats llakisipjjamti, taqe kunsa Diosar sapjjam oracionana, mayipjjam yuspagarapjjarakim” sasa (Filipenses 4:6). Ukatsti, Diosan Yoqapan sutipjjaruw mayisiñasa, mä arunjja, Jesucriston sutipjjaru. Jupa pachpaw akham sarakïna: “Naya toqekiw Awkin ukar puriñajj utji” sasa (Juan 14:6). Ukjjarusti, kuntï maykañäni ukajj munañaparjamäñapawa. Bibliajj akham siwa: “Yatiraktanwa kuntejj Diosarojj mayiñäni munañaparjama ukjja jupajj istʼistuwa” sasa (1 Juan 5:14).a

Ukhamajja, pä amigonakat maynik parlaskani ukhajja, janiw sum apasjjapjjaniti ukat tiempompejj janiw amigöjjapjjaniti. Kunjamtï pä amigojj wali sum parltʼasipkejja, ukhamarakiw Diosampejj parltʼasiñasa. Ukatakejj kuntï Jupajj siskistu ukanakwa istʼañasa. ¿Kunjamsa Diosajj parlistu?

Jichhürunakanjja, Biblia toqew parlistu (2 Timoteo 3:16, 17). Amigomat mä cartsa katoqkasma ukham amuytʼañäni, uka carta liytʼkasajj arunakapsa istʼkasma ¿ukhamajjaya? Biblia liyktan ukhajj ukhamarakiwa, Diosas parlkistaspa ukhamawa. Qallta yatichäwin parlaniwayktan uka Gina warmejj akham siwa: “Nayatï Diosan amigapäñ munstjja, ‘cartap’ liyiñajawa, mä arunjja, Biblia liyiñajawa” sasa. Ukat saskakiwa: “Biblia sapüru liyiñaw Diosar jukʼamp jakʼachasiñatak yanaptʼawayitu” sasa. ¿Jumajj sapürurakit Biblia liyta? Ukham lurätajja, Diosas parlkiristam ukhamäniwa ukat jukʼampirakiw Jupar jakʼachasïta.

“Kuns munätajja mayiskakitasmawa, nayajj churaskämawa.” Uka arunakjja, janiw mä jan uñtʼatarusa ni jichhak uñtʼaskta ukarus siskasmati, amigomarukiw ukham sasma. Cheqas taqeniw amigonakasar yanaptʼañsa ukat jupanakatak kun lurañs muntanjja.

Servirinakap kusisit jakasipjjañapatakejja, Jehová Diosajj yanaptʼapuniw sasaw Bibliajj qhanañchi. David reyit amtañäni, jupajj Diosan mä suma amigopänwa, ukat akham sasaw säna: “Tatay, muspharkañ luratanakamajj waljawa, nanakat khuyapayasitamas waljarakiwa [...], nayatakisti janiw jaktʼañjamäkiti” sasa (Salmo 40:5). Janiw ukakïkiti, Diosajj Jupar jan uñtʼirinakarus yanaptʼarakiwa, ‘Jupaw jallsa, suma cosechanaksa churejja, ukhamarak walja manqʼañanaksa kusisipjjañapataki’ (Hechos 14:17).

Niyakejjay Jehová Diosajj kunanakatï kusisiykistu ukanak churchistojja, jiwasajj ukhamarakiw Jupar kusisiyañatak chʼamachasiñasa (Proverbios 27:11). Ukhamajj ¿kunsa Jupar kusisiyañatak lurañasa? Uka toqet Bibliajj akham siwa: “Janiraki armtʼasipjjamti aski lurañatjja, ukhamarak maynit maynikama kunanakamatejj utjapktam uk jaljasiñsa; uka casta sacrificiow Diosarojj kusisiyi” sasa (Hebreos 13:16). Ukhamajj ¿jaqenakar khuyaptʼayasa ukat askinak lurasakit Jehová Diosar kusisiysna? ¿Ukti uka arunakajj sañ munpacha?

Janiwa. Bibliajj akham siwa: “Janiw Diosarojj jan iyawsañampejj kunapachas kusisiyksnati” sasa (Hebreos 11:6). Abraham chachajj Jupar iyawsatap laykuw “Diosan amigopa” sasin uñtʼatäjjäna, sasaw qhanañcharaki (Santiago 2:23). Ukampisa, Diosan bendicionap katoqañatakejj ‘Diosar iyawsañasawaʼ sasaw Jesucristojj sarakïna (Juan 14:1). Ukhamajj ¿kunjamatsa Diosajj munki ukham iyawsäwinïsna? Nayraqatajja, Biblia liyiñaruw yatinoqtañasa. Ukhamatakwa Diosan mayitanakapar phoqañäni, ukat taqe kun lurasas kusisiyarakiñäni. Jupar sum uñtʼañatakisa, istʼañatakisa chʼamachasiñänejja, iyawsäwisajj jiltaniwa ukat Diosajj jukʼampiw jakʼachasirakistani (Colosenses 1:9, 10).

Diosan suma amigopäñatakejj ¿kuns lurañama? Ukatakejj aka mä qawqha yanaptʼanakwa yateqawaytanjja:

1. Diosan Jehová sat sutip yatiña ukat aytañasapuni.

2. Oracionan sapa kuti mayisiña ukat Biblia sapür liyiña.

3. Kuntï Diosajj maykistu uk phoqaña.

Diosar jakʼachasiñatakejj ¿ukanak lurasktati? Jan ukajj ukanakat ¿kawkïrcha janïr phoqkta? Ukanak lurañatak chʼamachasïta ukhajja, Diosarojj jakʼachasïtawa.

“Diosar jakʼachasiñatak chʼamachasiñänejja, kusisitakiw jikjjatasiñäni. Diosan amigopäsajj walja bendicionanakwa katoqañäni, jukʼampiw Jupar confiyañäni, uñtʼañäni ukat munasirakiñäni. Janipuniw kunas ukhamajj utjkaspati” sasaw Estados Unidos markankir Jennifer warmejj säna.

¿Diosan ukham amigopäñ munasmati? Jehová Diosan Qhanañchirinakapajj taqe chuymaw yanaptʼapjjätam. Jan kun mayisakiw Bibliat yatichapjjätam. Tantachasiñ Uta sasin uñtʼapki ukan jupanakamp chikas tantachasirakismawa. Jupanakajj Jehová Diosaruw munasipjje ukat respetapjjarakiwa.a Jukʼat jukʼatwa salmonak qellqerjamas jikjjatasirakïta, jupajj akham sasaw qellqäna: “Nayasti Diosaruw jakʼachasï, ukaw nayarojj kusisiyitu” sasa (Salmo 73:28).