¿Kunatsa David chachajj Diosajj nayat llakisiwa ukat janiw armaskituti sasin sispachäna? ¿Diosajj jumat llakispachati? Walja jaqenakajja, ‘Taqe Chʼamani Diosajj janiw jiwasanakat llakiskpachati’ sasaw amuyapjje. ¿Kunatsa?

‘Diosajj jaqenakat sipansa, wali jilïriwa’ sasaw sapjje. Niyakejjay wali jilïrïchejja, “Jupatakejj taqe markanakajj mä uma chʼaqar uñtatakiwa, balansansti mä jiskʼa laqʼar uñtatakirakiwa” (Isaías 40:15). Diosan utjatap jan creyiri mä chachajj akham sarakïnwa: “Jachʼa jachʼa tukurinakakiw diosajj jiwasat llakisiwa sasin sapjjaspa” sasa.

Maysa toqetjja, jan walinak lurapjjatap laykuw waljanejj Diosan yanaptʼapajj janis jupatak wakiskaspa ukham amuyapjje. Jim sat mä chachajj akham siwa: “Diosarojj jan sinti colerirëjjañatakiw yanaptʼa mayirïta, ukampis colerampejj atipjayasiskakirïtwa. Ukatwa jan wali qhoru jaqepunïtwa, janiw Diosas yanaptʼkitaspati sasin amuyjjayäta” sasa.

¿Diosajj wali jayankatap laykuti jiwasar jan amuykpachistu? ¿Pantjasir jaqenakat llakispachati? Diosan yanaptʼapampiw uka jisktʼanakan qhanañchäwip jikjjatsna. Jupajj Arup toqewa, mä arunjja Biblia toqew jiwasanakat llakisitapa ukat jan jayankkatap qhanañchistu. Bibliajj akham siwa: “Diosajj cheqpachana janiw jayankkiti sapaqat jiwasanakatjja” sasa (Hechos 17:27). Akjjaru yatjjatkañäni uka pusi yatichäwinakanwa, Bibliajj uka toqet kamsisa ukat kunjamanakatsa Diosajj jumatsa ukat taqenitsa llakisitap uñachtʼayi uk uñjaskañäni.

¿KUNATSA YAQHEPANAKAJJ PÄCHASIPJJE? Jichhak mistki uka yatiyäwinakarjamajj Vía Láctea sat galaxianjja, mä 100.000 millón planetanakaw utji sasaw sapjje. Niyakejjay alajjpachajj wali jachʼächejja, walja jaqenakaw akham sapjje: “Niyakejjay jaqenakajj Dios nayraqatapan jan kunäkstansa ukat jan yäqañjam planetan jakstanjja, Diosajj janiw jiwasat llakiskpachati” sasa.

¿BIBLIAJJ KAMSISA? Jehováa Diosajj janiw Biblia churkistuti ukhamat jiwasat armasiñataki. Antisas Jupajj akham sistuwa: “Nayranakajjajj jumaruw uñchʼukisktam, nayaw yatichaskäma” sasa (Salmo 32:8).

Agar sat egipcia warmit parltʼañäni, jupajj 1900 nayra pacha maranakanwa jakasïna. Mä kutejj Sarai sat uywiripar jiskʼachasajj wasar pamparuw sarjjäna. Pantjasitap laykojj ¿Diosajj jupat armasïnti? Bibliajj akham siwa: “Tatitun mä angelapaw wasaranjja jupar jikjjatäna” sasa. Ukat akham sasaw chʼamañchäna: ‘Tatitojj tʼaqhesitamjja istʼiwa’ sasa. Agar warmisti akham sänwa: ‘Jumaw nayar uñjiri Diosätajja’ sasa (Génesis 16:4-13).

Diosajj ukhamarakiw uñjasisktamjja. Uk amuytʼañatakejj wawanakapar wali munasiñampi uñjir mä warmit parltʼañäni, jupajj jilïr wawanakapar sum uñjañat sipansa, jiskʼäsipki ukanakaruw jukʼamp sum uñji. Jehová Diosajj ukhamarakiwa, yanapa munktan ukat aynachtʼat jikjjatasktan ukhapuniw yanaptʼistu. Diosajj akham sistuwa: “Nayajj mä alto qollan cheqanwa jakta, ukampisa khititejj altʼat chuymani, llaktʼata sarnaqaraki ukanakarusti chʼamañcharaktwa” sasa (Isaías 57:15).

Ukampis inas akham jisktʼasta: “¿Kunjamsa Diosajj uñjpachïtu? ¿Uñnaqajakti uñjpacha, jan ukajj kunjam chuymanïkti ukcha uñjpacha? ¿Nayat sinttʼaspachati?” sasa.

¿KUNATSA YAQHEPANAKAJJ PÄCHASIPJJE? ‘Diosajj jiwasarojj aleq pantjasir jaqenakjamakwa uñjistu, janiw jiwasat llakiskaspati’ sasaw waljanejj amuyapjje. Kendra sat warmejja, kunjamäkiti Diosan leyinakapajj jan ukarjampun phoqasaw llakimp wal aynachtʼäna. “Ukatwa Diosar jan mayisjjayätti” sasaw jupajj saraki.

¿BIBLIAJJ KAMSISA? Jehová Diosajj janiw pantjasitanakasak uñchʼukkiti, kunjamsa jikjjatastan uk Jupajj sum yati. Bibliajj akham siwa: “Jupajj jiwasanakan laqʼätas yati, ñeqʼet luratäpjjatas yatiraki” sasa. Ukatwa pantjasitanakasat jan juchañchkistuti, antisas jiwasat sinttʼasiwa ukat arrepentistan ukhas perdonarakistuwa (Salmo 103:10, 14).

David reyit amtañäni, jupajj akham sasaw Diosar säna: “Nayranakamajj lurat jañchejj uñjäna; ukanakasti taqpachaw qellqatamar qellqantasïna [...]. Diosay, uñakipitaya, chuymajjar uñantam” sasa (Salmo 139:16, 23). Jupajj walja kutis pantjaskchïna ukat jachʼa juchanaks lurchïnjja, ‘Diosajj taqe chuyma arrepentisitaj-jja uñjitaniwa’ sasaw säna.

Taqenit sipansa, Jehová Diosaw jumar sum uñtʼtamjja. Bibliajj akham siwa: “Jaqejj uñnaqakwa uñjejja, ukampisa [Diosajj] jaqen chuymapwa yati” sasa (1 Samuel 16:7). Kunjamätansa kunatsa ukham lurtan uk Diosajj sum yati. Kunjamsa naciwaytan, jilsuwaytan, kunjamsa jakastan ukat kunjam chuymanïtansa uksa yatirakiwa. Ukat kunjamsa jumajj pantjaskasas suma jaqëñataki chʼamachasta uksa Diosajj wali askitwa uñjaraki.

Ukampis jumat taqe ukanak yatisajj ¿kunjamsa Diosajj chuymachtʼtamjja?

¿KUNATSA YAQHEPANAKAJJ PÄCHASIPJJE? Yaqhepanakajj chuymachtʼatäñ wal munapjje, ukampis ‘jan waltʼäwinakar saykatañataki Diosaru yanaptʼa mayiñajja, jiwasakis taqe kun munksna ukhamäspawa’ sasaw sapjje. Raquel sat mä warmejj akham siwa: “Aka Oraqen waljaniw jukʼamp jan waltʼäwinakan uñjasipjje, ukampis nayan llakijajj janis kunäkaspa ukham amuyasta, ukatwa Diosarojj jan yanaptʼa maykti” sasa.

¿BIBLIAJJ KAMSISA? Jaqenakar yanaptʼañataki ukat chuymachtʼañatakejja, Diosajj mä aski luräw lurawayi. Taqeniw “jan qollkay usuni”, mä arunjja, juchani nastanjja. Ukhamajj janiw Diosan leyinakap jan pantjasis phoqsnati. Ukampis Diosaw ‘jiwasar munasin wawap khitani juchanakasat qhespiyañataki’ (1 Juan 4:10). Diosajj Jesusan loqtasïwip laykuw juchanakasat perdonistaspa, suma conciencianïsna, aka Oraqen wiñayatakis sumankañan jakasiraksna.a Ukampis Jesusan loqtasïwipajj ¿Jehová Diosan taqe jaqenakaru munasitapakti uñachtʼayi, jan ukajj jumar munasitam uñachtʼayarakicha?

Apóstol Pablojj Jesusan loqtasïwip wali askit uñjasajja, akham sasaw qellqäna: ‘Diosan Yoqapajj nayar munasinwa jakañapa naya layku aptʼasiwayi’ sasa (Gálatas 2:20). Jesusajj janïr Pablojj cristianökan ukhaw jiwjjäna. Ukampis jupatakejj Jesusan loqtasïwipajj Diosan mä suma regalopjamänwa.

Diosajj qawqsa munastam uk uñachtʼayañatakiw Jesusan loqtasïwip mä suma regaljam jumar churtamjja. Ukaw ‘wiñay chuymachäwi ukhamarak mä suma suytʼäwi’ churiristam. Ukat ‘chʼamani saytʼañamatakisa, kunatï askïki uk arsuñamatakis lurañamatakis yanaptʼiristam’ (2 Tesalonicenses 2:16, 17).

Jesusan jakäwip loqtasitapatjja, niya 2000 maranakaw pasawayjje. Ukampis Jehová Diosajj jiwasat llakisiskakitapjja ¿kunjamatsa yatsna?

¿KUNATSA YAQHEPANAKAJJ PÄCHASIPJJE? Waljaniw Diosar iyawsapjje, ukampis Jupajj wali jayankkaspas ukham amuyapjje. Irlanda markankir Cristina sat warmejja, sapa semanaw iglesiar sari, jupajj akham siwa: “Taqe kunas Diosan luratätapjja yatisktwa, ukampis janiw uñtʼkti. Janiw kunapachas Jupa jakʼankkiristsa ukham amuyasirikti” sasa.

¿BIBLIAJJ KAMSISA? Diosat wali jayanksnasa ukham inas amuyassna, ukampis Jupajj janiw jaytanukkistuti. Kunjamsa Diosajj sum uñjasistu uk amuytʼayañatakejja, Jesusajj akham sänwa: “Mayni jaqetejj patak ovejanïspa, ukat mayajj chhaqatäspa ukkhajja, ¿janit jupajj uka llätunk tunka llätunkan qollur jaytawayasin chhaqatäkis uka thaqerejj sarki?” sasa. Ukampejj “alajjpachankir Awk[ijajj] janiw khiti jiskʼan chhaqañapsa munkiti” sañwa Jesusajj munaskäna (Mateo 18:12-14).

Diosajj taqe uka ‘jiskʼanakaruw’ wali askit uñji. Ukhamajj ¿kunjamsa ‘chhaqat’ uwijaru thaqhe? Alayan qellqatäki uka arunakarjamajja, Diosaw jaqenakarojj apani.

Diosaw nayraqatjja suma chuyman jaqenakarojj yanaptʼi. Nayrïr pataka maranakanjja, Etiopía markankir mä jaqejj kuna profeciytï liyiskäna uk amuytʼayañapatakejj Felipe sat mä cristianoruw Diosajj khitäna (Hechos 8:26-39). Apóstol Pedrorojja, Roma markankir Cornelio chachar visitañapatakiw khitarakïna, Corneliojj wal mayisiskäna, Diosar serviñatakis chʼamachasiskarakïnwa (Hechos 10:1-48). Apóstol Pablompiru masinakapampirojj Filipos marka anqäjjan jikjjataski uka jawirar sarañapatakiw khitarakïna. Ukanjja, “Diosaru ajjsartiri”, (MT) Lidia sat warmimpiw jikisipjjäna, “Tatitusti juparojj chuymap chʼalljjtayäna, kuntejj Pablojj siskäna ukar jaysañapataki” (Hechos 16:9-15).

Kunjamtï uñjtanjja, Diosar uñtʼañatak chʼamachasirinakarojj Dios pachpaw Jupar uñtʼañapatak yanaptʼäna. Jichhürunakanjja, ¿khitinakas Dios toqet utat uta jan ukajj callenakansa yatiyapjje? Jehová Diosan Qhanañchirinakapa. Ukat akham jisktʼasim: “¿Jupanak toqeti Diosajj jawsaskitu?” sasa. Diosajj Jupar jakʼachasiñasataki invitki ukar jaysañatak Diosar yanaptʼa mayisim.a