Kunjamsa familiapamp sum apasisma

Jaqechasisajja, jumanakajj yaqha familiäjjapjjtawa. Cheqas awk taykamarojj wali respetompi munasiñampiw uñjaskakiñama, ukampis chachamaw jan ukajj warmimaw jumatak nayrankañapa. Uk amuyañaw familiamatakejj chʼamäspa. Ukhamasti, jupanakampi sum apasiskakiñataki ukat chacha warmjam kusisit jakasiñatakejja, Biblian ewjjtʼanakaparjam sarnaqañaw yanaptʼiristam.

1 FAMILIARANAKAMAR UÑJAÑ TOQETJJA SUM AMUYASIÑAMAWA

BIBLIAJJ KAMSISA: “Awkimar taykamar jachʼañcham” (Efesios 6:2). Jilïr jaqëkasasa, jumajj awk taykamarojj respetaskakiñamawa ukat jachʼañchañamarakiwa. Ukampis jan armasimti, chachamasa jan ukajj warmimasa awk taykaparojj ukham uñjañaparakiwa. ‘Khititejj munasirïki ukajj janiw envidiasirïkiti’ sasaw Bibliajj qhanañchi. Ukhamajj familiapamp sum apasitap uñjasajja, janiw mayjtʼasiñamäkiti (1 Corintios 13:4; Gálatas 5:26).

KUNSA LURASMA:

• Akham arsuñamajj janiw walïkaspati: “Familiamajj sapa kutiw jiskʼachitu”, jan ukajj “Taykamatakejj janipuniw kuna luratajas askïkiti” sasa

• Kunjamsa chachamasa jan ukajj warmimas jikjjatasi uk amuyañatakiw chʼamachasiñama

2 WAKISCHI UKHAJJ QHANWA AWK TAYKAMAMP PARLAÑAMA

BIBLIAJJ KAMSISA: “Chachajj awkipsa, taykapsa jaytjjani[wa], warmipampi mayachasjjañataki, panpachanisti mä sapa jaqekïpkaspasa ukhamäpjjaniwa” (Génesis 2:24). Wawanakapajj jaqechasjjapjje uka qhepatsa awk taykajj jupanakar uñjañ munasipkakiwa, ukatwa awisajj wawapan familiapajj kunsa lurasipki uk wal yatiñ munapjjaspa.

Ukampis awk taykamajj kunansa yanaptʼapjjeristam ukjja jumanakaw amtapjjañama ukat jan chuym ustʼayasa qhanwa jupanakar uk yatiyapjjañama (Proverbios 15:1). Altʼat chuymanïña, llampʼu chuymanïña ukat paciencianïñaw familiaranakamp sum apasiñataki ukat ‘munasiñan sarnaqañatakejj’ yanaptʼapjjätam (Efesios 4:2).

KUNSA LURASMA:

• Awk taykan familiamar mitisipjjatap llakisiystam ukhajja, chachamampi jan ukajj warmimampiw uka toqet sumat parlañama

• Kunsa lurapjjäta ukjja, jumanakaw sum amtapjjañama